ពលរដ្ឋនៅស្រុកប្រាសាទបាគង ខេត្តសៀមរាបជាច្រើនរយនាក់ បាននាំគ្នារារាំងនិងបណ្ដេញអាជ្ញាធរអប្សរាមិនឲ្យរុះរើផ្ទះសម្បែងរបស់ពួកគាត់។ ការរារាំងនេះ បន្ទាប់ពីអាជ្ញាធរអប្សរាចុះទៅរុះរើផ្ទះ ដោយមិនបានជូនដំណឹង និងមិនបានទុកពេលសមរម្យឲ្យពលរដ្ឋ។
ពលរដ្ឋជាច្រើនរយនាក់នៅស្រុកបាគង កាលពីថ្ងៃទី៨ សីហា បាននាំគ្នារារាំងអាជ្ញាធរអប្សរា មិនឲ្យរុះរើតង់ និងផ្ទះពួកគេ។
ប្រតិកម្មរបស់ពលរដ្ឋនេះធ្វើឡើងក្រោយពីអាជ្ញាធរប្រមាណ១០នាក់បានចុះមករុះរើតង់ និងសំណង់ថ្មីៗនៅភូមិសាស្ត្រឃុំរលួសស្រុកប្រាសាទបាគង ខេត្តសៀមរាប។ ប្រជាពលរដ្ឋអះអាងថា អាជ្ញាធរចុះមករុះរើផ្ទះ ពួកគាត់ដោយមិនបានជូនដំណឹង និងមិនទុកពេលឲ្យពួកគាត់រុះរើដោយខ្លួនឯងនោះទេ។ ពលរដ្ឋបន្ថែមថា ការរារាំងអាជ្ញាមិនឲ្យរុះរើផ្ទះពួកគាត់នោះពួកគាត់មិនបានប្រើប្រាស់ហិង្សាទៅលើអាជ្ញាធរនោះទេ ហើយអាជ្ញាធរ កាលពីថ្ងៃទី៨ ខែសីហា បាននិយាយថា នឹងទុករយៈពេលត្រឹមតែ ៣ថ្ងៃប៉ុណ្ណោះ ដើម្បីឲ្យពលរដ្ឋរុះរើផ្ទះ។ ប្រជាពលរដ្ឋលើកឡើងដូចៗគ្នាថាពួកគាត់នឹងមិនចាកចេញពីលំនៅឋានដែលពួកគាត់រស់នៅជាច្រើនឆ្នាំនោះទេ ដោយសុខចិត្តលះបង់ជីវិតការពារដីនិងផ្ទះរបស់ពួកគាត់។
ពលរដ្ឋម្នាក់នៅស្រុកប្រាសាទបាគងប្រាប់វិទ្យុអាស៊ីសេរី ក្នុងលក្ខខណ្ឌសុំមិនបញ្ចេញឈ្មោះថាលោកមិនបានទទួលដំណឹងពីការចុះមករុះរើផ្ទះនៅទេ។ លោកបន្តថា លុះអាជ្ញាធរអប្សរាចុះមករុះរើផ្ទះនោះប្រជាពលរដ្ឋនៅក្នុងភូមិក៏នាំគ្នារារាំងអាជ្ញាធរតែម្ដង។
«បើសិនជាយើងមានរឿងដល់ប្រវាយប្រតប់គ្នា អត់ទេ ប៉ុន្តែយើងបានន័យថាយើងគ្រាន់តែរុញៗ ការតវ៉ាគាត់ បានន័យថា គ្រាន់ជាខាងអាជ្ញាធរជាតិអប្សរារឹតបន្តឹងកាន់តែខ្លាំង ត្រូវតែមានទំនាស់ ប៉ុន្តែដល់របៀបថា ចរចាទៅប្រជាពលរដ្ឋគាត់ចេះដឹងដែរ។ ខាងនោះ គឺអត់រុះរើបានទៅស្នើសុំអញ្ចេះមួយ អញ្ចុះមួយ ទៅគេលើកលែងសិនបង គេអត់មានរឿងអីទេ វៃតប់គ្នាអីទេបង»។
ស្រដៀងគ្នានេះដែរ ពលរដ្ឋនៅស្រុកប្រាសាទបាគងម្នាក់ទៀតគឺលោក ឡឺន ឡៃ ប្រាប់អាស៊ីសេរីថាពលរដ្ឋបាននាំគ្នារារាំងមិនឲ្យអាជ្ញាធររុះរើផ្ទះរបស់ពួកគាត់។ លោកបន្ថែមថា ក្នុងរយៈពេល៣ថ្ងៃខាងមុខទៀតបើទោះបីជាពលរដ្ឋមិនរុះរើ ក៏អាជ្ញាធរ ជាអ្នករុះរើផ្ទះនោះដែរ។
លោក ឡឺន ឡៃ៖ «សម្រាប់ខ្ញុំជាប្រជាពលរដ្ឋសាមញ្ញធម្មតាមួយរូបដែល គឺខ្ញុំនឹកឃើញថា បើសិនប្រជាពលរដ្ឋគាត់ថា អាជ្ញាធរទុកពេលឲ្យបីថ្ងៃឲ្យបងប្អូនប្រជាពលរដ្ឋ នឹងគិតមើលថា ត្រូវរុះ ឬមិនក៏រុះ។ បើតាមខ្ញុំប្រជាពលរដ្ឋ ខ្ញុំថា ទោះបីថាយើងមិនរុះក៏ត្រូវតែរុះ ព្រោះគាត់ដាក់គំនាបបែបហ្នឹងទៅហើយ យើងមិនអាចនឹងប្រឆាំងជាមួយច្បាប់បានទេបង»។
លោក ឡឺន ឡៃ បញ្ជាក់លោកនឹងមិនចាកចេញពីលំនៅឋានដែលរស់នៅច្រើនជំនាន់នេះទេហើយនឹងតស៊ូដល់ទីបំផុតដើម្បីការពារដី និងផ្ទះ។
វិទ្យុអាស៊ីសេរីពុំអាចទាក់ទងអ្នកនាំពាក្យអាជ្ញាធរជាតិអប្សរាលោក ឡុង កុសល ដើម្បីបកស្រាយជុំវិញបញ្ហានេះបានទេ នៅថ្ងៃទី៩ ខែសីហា។
ទោះជាយ៉ាងណាប្រធានប្រតិបត្តិគណបក្សភ្លើងទៀនស្រុកប្រាសាទបាគងលោក ឃ្លោក ម៉ៅ ប្រាប់វិទ្យុអាស៊ីសេរីថា មូលហេតុដែលពលរដ្ឋរារាំងរហូតដល់ដេញអាជ្ញាធរគឺបណ្ដាលមកពីអាជ្ញាធរចុះទៅរុះរើផ្ទះពួកគាត់។ លោកបន្ថែមថា រដូវនេះជារដូវភ្លៀងអាជ្ញាធរគួរតែមានចិត្តមេត្តា ឲ្យពលរដ្ឋអាចប្រើតង់ដើម្បីបាំងបិទកន្លែងដែលមានទឹកលិច។
លោក ឃ្លោក ម៉ៅ៖ «គឺត្រឹមត្រូវបងអាជ្ញាធរ ក្នុងនាមអាជ្ញាធរគួរតែផ្ដល់ព័ត៌មានទៅគាត់ដើម្បីឲ្យគាត់ត្រៀមបាទត្រៀមក្នុងការរុះរើ ឬក៏យើងអាចជួយផ្ដល់ជាយោបល់រកដំណោះស្រាយឲ្យគាត់បើថា រើ ផ្ទះគាត់ទៅគួរឲ្យគាត់ទៅរស់នៅកន្លែងណាបើសិនបើផ្ទះយើងគួរតែគិតបើសិនជាយើងរើផ្ទះទៅ គាត់បានកន្លែងណារស់នៅ។ ជាការព្រួយបារម្ភរបស់ខាងខ្ញុំ គឺបារម្ភខ្លាំងមែនទែនតែមិនដឹងថា ជួយគាត់ដូចម្ដេចបានហា»។
លោក ឃ្លោក ម៉ៅ ព្រួយបារម្ភថា នឹងមានការចោទប្រកាន់តាមផ្លូវច្បាប់ណាមួយដល់ពលរដ្ឋនៅពេលពួកគាត់រារាំងដល់អាជ្ញាធរមិនឲ្យរុះរើផ្ទះសម្បែងពួកគាត់ទាំងនេះ។
លោក ឃ្លោក ម៉ៅ៖ «ចំណុចនេះខ្ញុំមានការព្រួយបារម្ភដែរ ការព្រួយបារម្ភខ្លាចមានការឃាត់ខ្លួនចោទប្រកាន់ ខ្ញុំក៏ព្រួយបារម្ភហើយខ្ញុំ ក៏បានរំលឹកដល់បងប្អូនប្រជាពលរដ្ឋដែរថា ធ្វើអ្វីក៏ដោយឲ្យយើងត្រូវមានការប្រុងប្រយ័ត្ន។ យើងមិនត្រូវប្រើហិង្សាអ្វីនោះទេ យើងធ្វើការតវ៉ាទាមទារដោយសន្តិវិធី។ ដូច្នេះបើមានសំណងសមរម្យប្រជាពលរដ្ឋគាត់មិនទៅតវ៉ាទេ ព្រោះរាល់ការអភិវឌ្ឍយើងមិនទៅប្រឆាំងជាមួយរដ្ឋាភិបាលទេ ប៉ុន្តែសុំឲ្យមានសំណងសមរម្យបានអីក៏បានសមរម្យអាចរស់នៅបានគឺគាត់ទទួលយកហើយគាត់មិនប្រឆាំងអ្វីនោះទេ»។
ពលរដ្ឋជាច្រើនពាន់គ្រួសាររស់នៅតំបន់អប្សរាក្នុងក្រុងសៀមរាបស្រុកអង្គរធំ ស្រុកបន្ទាយស្រី និងពលរដ្ឋមួយចំនួនរស់នៅស្រុកប្រាសាទបាគងបានបង្ខំចិត្តរុះរើផ្ទះសម្បែង ចេញពីតំបន់ឧទ្យានអង្គរជាបន្តបន្ទាប់ហើយចាប់តាំងពីចុងឆ្នាំ២០២២រហូតមក។ ការផ្លាស់ប្ដូរទីលំនៅនេះដោយសារពួកគាត់គ្មានជម្រើស និងភ័យខ្លាចរដ្ឋាភិបាលបណ្តេញចេញដោយបង្ខំដោយគ្មានសំណងអ្វីទាំងអស់។
កាលពីចុងខែមីនា ឆ្នាំ២០២៣ កន្លងទៅ អង្គការលើកលែងទោសអន្តរជាតិ (Amnesty International) បានចេញសេចក្តីថ្លែងការណ៍មួយបង្ហាញថា មនុស្សជាច្រើនដែលរស់នៅជុំវិញតំបន់អង្គរត្រូវបានបង្ខិតបង្ខំឱ្យផ្លាស់ទីលំនៅទៅរស់នៅតំបន់រុនតាឯកដែលខ្វះខាតហេដ្ឋារចនាសម្ព័ន្ធ និងទឹកស្អាត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។