អាជ្ញាធរ​ក្រុង​ភ្នំពេញ​ប្រើ​ហិង្សា​ទៅ​លើ​ពលរដ្ឋ​មាន​ជម្លោះ​ដី​ធ្លី​នៅ​ខេត្ត​កោះកុង​ ខណៈ​ពួក​គាត់​បន្ត​រក​ដំណោះ​ស្រាយ​ពី​ក្រសួង​ដែន​ដី

ដោយ អាស៊ីសេរី
2019-07-04
អ៊ីម៉ែល
មតិ
Share
បោះពុម្ព
ក្រុម​សន្តិសុខ​ខណ្ឌ​ចម្ការ​មន​ជា​ច្រើន​នាក់ និង​ពលរដ្ឋ​មាន​ជម្លោះ​ដីធ្លី​មក​ពី​ខេត្ត​កោះកុង ប្រមាណ​ ១៥០នាក់ ប្រឈម​មុខ​គ្នា​ពេល​បន្ត​ការ​តវ៉ា​រក​ដំណោះ​ស្រាយ​រឿង​ដីធ្លី នៅ​មុខ​ក្រសួង​រៀប​ចំ​ដែន​ដី នៅ​ថ្ងៃ​ទី៤ ខែកក្កដា ឆ្នាំ២០១៩។
ក្រុម​សន្តិសុខ​ខណ្ឌ​ចម្ការ​មន​ជា​ច្រើន​នាក់ និង​ពលរដ្ឋ​មាន​ជម្លោះ​ដីធ្លី​មក​ពី​ខេត្ត​កោះកុង ប្រមាណ​ ១៥០នាក់ ប្រឈម​មុខ​គ្នា​ពេល​បន្ត​ការ​តវ៉ា​រក​ដំណោះ​ស្រាយ​រឿង​ដីធ្លី នៅ​មុខ​ក្រសួង​រៀប​ចំ​ដែន​ដី នៅ​ថ្ងៃ​ទី៤ ខែកក្កដា ឆ្នាំ២០១៩។
រូប៖ ហ្វេសប៊ុក CCFC-seaoan

សមត្ថកិច្ច​និង​ក្រុម​សន្តិសុខ​ខណ្ឌ​ចម្ការ​មន​ជា​ច្រើន​នាក់ ប្រើ​ហិង្សា​ទៅ​លើ​ពលរដ្ឋ​មាន​ជម្លោះ​ដីធ្លី​មក​ពី​ខេត្ត​កោះកុង ប្រមាណ​ ១៥០នាក់ ដែល​បន្ត​ការ​តវ៉ា​រក​ដំណោះ​ស្រាយ​រឿង​ដីធ្លី នៅ​មុខ​ក្រសួង​រៀប​ចំ​ដែន​ដី។ ការ​ប៉ះទង្គិច​គ្នា​នេះ នៅ​ថ្ងៃ​ទី៤ កក្កដា កើត​ឡើង​នៅ​ពេល​ដែល​ពលរដ្ឋ​ព្យាយាម​ដើរ​ចេញ​ពី​ក្រសួង​ទៅ​ខុទ្ទកាល័យ​លោក ហ៊ុន សែន ដើម្បី​ដាក់​ញត្តិ ប៉ុន្តែ​ត្រូវ​ក្រុម​សន្តិសុខ​​ហាម​ឃាត់​ ដោយ​តម្រូវ​ឲ្យ​ឈរ​នៅ​ក្បែរ​ក្រសួង​វិញ។ សង្គម​ស៊ីវិល​យល់ថា ​ក្រសួង​និង​អាជ្ញាធរ​ខេត្ត​កោះកុង គួរ​រួម​គ្នា​រក​មធ្យោបាយ​ផ្ដល់​ដំណោះ​ស្រាយ​ណា​មួយ ​ដែល​ពលរដ្ឋ​អាច​ទទួល​យក​បាន ដើម្បី​បញ្ចប់​វិវាទ​ដីធ្លី​ដ៏​រ៉ាំរ៉ៃ​មួយ​នេះ។

តំណាង​ពលរដ្ឋ ​លោកស្រី អិន ធូ ​លើកឡើង​ថា​ អាជ្ញាធរ​មិន​គួរ​ណា​ប្រើ​ហិង្សា​រុញ​ច្រាល​ពួកគាត់​បណ្ដាល​ឲ្យ​បុរស​ម្នាក់​វ័យ​ ៤៧​ឆ្នាំ រង​របួស​ត្រង់​ជើង ដោយ​ត្រូវ​បញ្ជូន​ទៅ​សង្គ្រោះ​បន្ទាន់​នៅ​មន្ទីរ​ពេទ្យ​មិត្តភាព​ កម្ពុជា-សូវៀត។ លោកស្រី អិន ធូ ចាត់​ទុក​ទង្វើ​ពី​សំណាក់​អាជ្ញាធរ​មក​លើ​ពួកគាត់​​ថា ​គំរាម​កំហែង​​សិទ្ធិ​ជា​មូលដ្ឋាន​របស់​ប្រជា​ពលរដ្ឋ​ ដែល​ការពារ​ដោយ​ច្បាប់៖ «ខ្ញុំ​មក​ដល់​ព្រឹក​មិញ​មក​ធ្វើ​បាប​ប្រជា​ពលរដ្ឋ​ពួក​ខ្ញុំ។ ពួក​ខ្ញុំ​អត់​មាន​មក​ធ្វើ​បាតុកម្ម​ប្រឆាំង​អី​ទេ គ្រាន់​តែ​នាំ​គ្នា​យក​ញត្តិ​ទៅ​ដាក់​នៅ​ការិយាល័យ​សម្ដេច​តេជោ​ ហ៊ុន សែន វាយ​ពួកគាត់ ច្រាន​ពួកគាត់ ជាន់​ជើង​គាត់​ មិន​ដឹង​ជា​បាក់​ ឬ​បែក​ឆ្អឹង​ទេ ម្នាក់​ទៅ​មន្ទីរ​ពេទ្យ​បាត់​ហើយ»

តំណាង​ពលរដ្ឋ​រូប​នេះ ស្នើ​សុំ​មេដឹកនាំ​របប​ក្រុង​ភ្នំពេញ ជួយ​អន្តរាគមន៍​ និង​ដោះស្រាយ​ករណី​ឲ្យ​ពួក​គាត់​៖ «ខ្ញុំ​សូម​សំណូមពរ​សម្ដេច​តេជោ​ ហ៊ុន សែន ចេញ​បទ​បញ្ជា​ឲ្យ​ឯកឧត្ដម​ ជា សុផារ៉ា ឲ្យ​គាត់​ចុះ​ដោះស្រាយ​ពលរដ្ឋ​រងគ្រោះ​ ១៩៧​គ្រួសារ ហ្នឹង​ដែល​មាន​ជម្លោះ​ដីធ្លី​ជាមួយ​ឧកញ៉ា ហេង ហ៊ុយ។ សូមឲ្យ​គាត់​ចុះ​ទៅ​ដល់​ដី​ ទីតាំង​ប្រជា​ពលរដ្ឋ​ នៅ​ភូមិ​តានី និង​នៅ​ភូមិ​ជី​ខ​លើ ៥​គ្រួសារ និង​ភូមិ​ចំបក់ ជីខក្រោម​ ហ្នឹង​ ១០​គ្រួសារ»

គិត​មក​ដល់​ថ្ងៃ​ទី​៤​ កក្កដា ពលរដ្ឋ​ឲ្យ​ដឹង​ថា មិន​ឃើញ​មាន​មន្ត្រី​ណា​ម្នាក់​ចេញ​ពី​​ក្រសួង​មក​ឆ្លើយ​តប​នឹង​សំណើ​របស់​ពួកគាត់​ឡើយ។ ទាក់​ទង​នឹង​ដំណោះស្រាយ​រឿង​នេះ អ្នកនាំពាក្យ​នៃ​ក្រសួង​រៀង​ចំ​ដែន​ដី ប្រាប់​ឲ្យ​ទៅ​សាក​សួរ​អ្នកនាំពាក្យ​សាលា​ខេត្ត​កោះកុង លោក សុខ សុទ្ធី វិញ ព្រោះ​លោក​ជាប់​ប្រជុំ។

លោក សុខ សុទ្ធី ​ប្រាប់​អាស៊ី​សេរី​ថា អាជ្ញាធរ​ខេត្ត​ពុំ​មាន​គោលការណ៍​ណាមួយ​ ក្នុង​ការ​ដោះស្រាយ​វិវាទ​ដីធ្លី​នេះ​បាន​ទេ បន្ទាប់​ពី​រក​ឃើញ​ថា​ក្រុមហ៊ុន ហេង ហ៊ុយ អេ​ហ្គ្រី​ខលឈើរ​ គ្រុប (Heng Huy Agriculture Group) មាន​ប្លង់​កម្មសិទ្ធិ​កម្ម​ដី និង​ឯកសារ​ត្រឹមត្រូវ​តាម​ច្បាប់​ក្នុង​នាម​ជា​ម្ចាស់​ដី ហើយ​ពលរដ្ឋ​ជិត​​ ២០០​គ្រួសារ​ ក៏​បាន​ទទួល​សំណង​រួច​រួចរាល់​ដែរ។ លោក សុខ សុទ្ធី លើក​ឡើង​ថា ពលរដ្ឋ​អាច​ដាក់​​បណ្ដឹង​ទៅ​តុលាការ ដើម្បី​ស្នើ​សុំ​សើរើ​ប្លង់​កម្មសិទ្ធិ​របស់​ភាគី​ក្រុមហ៊ុន​បាន។

មន្ត្រី​សាលា​ខេត្ត​កោះកុង​រូប​នេះ ក៏​ព្រមាន​ដល់​បុគ្គល​ណា ​ដែល​ញុះញង់​ឲ្យ​ប្រជា​ពលរដ្ឋ​នាំ​គ្នា​តវ៉ា​រក​ដំណោះស្រាយ៖ «ជំហរ​មិច​បង​។ បើ​ដី​គេ​មាន​ប្លង់​រឹង​។ កាល​ណា​អ្នក​ញុះញង់​ អ្នកទៅដណ្ដើមរបស់គេដីកម្មសិទ្ធិរបស់គេដែលមានប័ណ្ណកម្មសិទ្ធិមានន័យថា គាត់ប្រព្រឹត្តអំពើខុសច្បាប់។ ហ្នឹង! គាត់​ត្រូវ​ទទួល​ទោស។ ហ្នឹង​ចំណុច​ទី១។ ចំណុច​ទី២ រឿង​ស្រាវ​ជ្រាវ​ជា​ភារកិច្ច​របស់​តុលាការ។ គាត់​អាច​ប្ដឹង​ទៅ​តុលាការ ហើយ​ឲ្យ​តុលាការ​បើក​ការ​ស៊ើប​អង្កេត​កន្លង​មក​ទៅ។ បើ​សិន​ជា​យ៉ាង​ម៉េច​ តុលាការ​ចេញ​បទ​បញ្ជា​មក​វិញ អា​ហ្នឹង យើង​ធ្វើ​តាម​នីតិវិធី​របស់​តុលាការ។ ពេល​គាត់​យក​កម្លាំង​ប្រជា​ពលរដ្ឋ​មក​ធ្វើ​អ៊ីចឹង​ម៉េច​​បាន។ ដូច្នេះ​អ្នក​ញុះញង់​ពី​ក្រោយ គឺ​ត្រូវ​តែ​ទទួល​ទោស គឺ​ជា​ចំណុច​ដែល​ធំ»

ចំណែក​អ្នក​សម្រប​សម្រួល​សមាគម​ អាដហុក​ ប្រចាំ​ខេត្ត​កោះកុង លោក មាន ព្រហ្មមុនី លើក​ឡើង​ថា​ ដើម​ហេតុ​នៃ​វិវាទ​​នេះ ដោយ​សារ​តែ​ក្រុមហ៊ុន​ ហេង ហ៊ុយ ទៅ​រំលោភ​យក​ដីធ្លី​ពលរដ្ឋ ទើប​ធ្វើ​ពួក​គាត់​ងើប​ឡើង​តវ៉ា​ឲ្យ​អាជ្ញាធរ​ជួយ​ដោះ​ស្រាយ​គ្មាន​អ្នក​ណា​ទៅ​ញុះញង់​ពលរដ្ឋ​ឡើយ។

លោក មាន​ព្រហ្ម មុនី យល់​ថា អាជ្ញាធរ​ខេត្ត​កោះកុង គួរ​រក​មធ្យោបាយ​ដោះស្រាយ​បញ្ចប់​បញ្ហា​ឲ្យ​ពលរដ្ឋ​ នោះ​​ការ​​តវ៉ា​​នឹង​​មិន​​មាន​​ទេ៖ «រដ្ឋ​ជា​អាជ្ញាធរ​ទទួល​ទាន​ប្រាក់​ខែ​ពី​ប្រជា​ពលរដ្ឋ ហើយ​គិត​ផ្ដល់​សេវា​ឲ្យ​ប្រជា​ពលរដ្ឋ​ពិត​មែន​ អា​ហ្នឹង ​ត្រូវ​តែ​ដោះស្រាយ​ឲ្យ​ប្រជា​ពលរដ្ឋ​ហើយ ព្រោះ​ប្រជា​ពលរដ្ឋ​មាន​បញ្ហា។ បើ​យើង​មិន​ដោះ​ស្រាយ​ឲ្យ​គ្នា​ទៅ​សង្ឃឹម​អ្វី។ អ៊ីចឹងហើយ​ យើង​ស្ដាប់​​ពិចារណា​ទាំង​អស់​គ្នា ​ទៅ​លើ​មតិ​ប្រជា​ពលរដ្ឋ​ ហើយ​សាធារណជន។ ប្រជា​ពលរដ្ឋ​គាត់​រស់​ពឹង​លើ​ដី តែ​បើ​អត់​ដី គាត់​សង្ឃឹម​លើ​អ្វី ហើយ​អាជ្ញាធរជា​អ្នក​បម្រើ​ប្រជា​ពលរដ្ឋ​ ហើយ​គេ​អត់​ដោះ​ស្រាយ​ឲ្យ​ផង គាត់​សង្ឃឹម​ឯណា​ទៀត។ អា​ហ្នឹង​ ការ​សម្រេច​របស់​ប្រជា​ពលរដ្ឋ​ គាត់​សម្រេច​ចិត្ត​ទៅ»

កាល​ពី​ថ្ងៃ​ទី១ កក្កដា ក្រសួង​រៀបចំ​ដែន​ដី ​សម្រេច​មិន​ទទួល​យក​សំណើ​ពលរដ្ឋ​ទៅ​ដោះ​ស្រាយ​ទេ ដោយ​អះអាង​ថា ​ពលរដ្ឋ ១៩៧គ្រួសារ មិន​មាន​ជាប់​ពាក់ព័ន្ធ​នឹង​ករណី​វិវាទ​ដី​សម្បទាន​ដាំ​ដំណាំ​អំពៅ​ផលិត​ស្ករ​ស​នាំ​ចេញ ក្នុង​ភូមិ​សាស្ត្រ​ខេត្ត​កោះកុង​ទេ។

រដ្ឋបាល​ខេត្ត​កោះកុង ក៏​បាន​​បដិសេធ​សំណើ​ពលរដ្ឋ​ដែល​សុំ​កាត់​ឆ្វៀល​ដី​ទំហំ ៤២១​ហិកតារ ចេញ​ពី​គម្រោង​របស់​ក្រុមហ៊ុន ហេង ហ៊ុយ អេ​ហ្គ្រី​ខលឈើរ​ គ្រុប (Heng Huy Agriculture Group) ស្ថិត​នៅ​ក្នុង​ឃុំ​ជី​ខ​លើ​ ស្រុក​ស្រែ​អំបិល។ ក្នុង​លិខិត​នោះ អាជ្ញាធរ​ខេត្ត​កោះកុង អះអាង​ថា ទី​តាំង​ដែល​ពលរដ្ឋ​ស្នើ​សុំ​កាត់​ឆ្វៀល​នោះ គឺ​ស្ថិត​លើ​ដី​ដែល​មាន​ប័ណ្ណ​កម្មសិទ្ធិ​រួច​ហើយ​របស់​ក្រុមហ៊ុន ហេង ហ៊ុយ។ អាជ្ញាធរ​បញ្ជាក់​ថា ការ​ដោះស្រាយ ​គឺ​សមត្ថកិច្ច​របស់​ស្ថាប័ន​តុលាការ។

របប​ក្រុង​ភ្នំពេញ​បាន​ផ្ដល់​ដី​សម្បទាន​សេដ្ឋកិច្ច​ទៅ​ឲ្យ​ក្រុមហ៊ុន​ ហេង ហ៊ុយ​ អភិវឌ្ឍន៍ ជាង ៤ពាន់​ហិកតារ ដើម្បី​វិនិយោគ​ដំណាំ​​​អំពៅ​ កាល​ពី​ឆ្នាំ២០០៧។ នៅ​ឆ្នាំ២០១០ ពលរដ្ឋ​ចោទ​ក្រុមហ៊ុន ហេង ហ៊ុយ ថា បាន​យក​គ្រឿងចក្រ​ទៅ​ឈូស​ឆាយ​ដី​លំនៅ​ប្រជា​ពលរដ្ឋ និង​គំរាម​ចាប់​ខ្លួន​ប្រជា​ពលរដ្ឋ​ណា​ដែល​ហ៊ាន​តវ៉ា​ចំពោះ​ការ​ឈូស​ឆាយ​វាទ​យក​ដី​របស់​ក្រុមហ៊ុន។ ពួក​គាត់​អះអាង​ថា បាន​ចូល​កាន់​កាប់ និង​អាស្រ័យ​ផល​លើ​ដីធ្លី​ចាប់​តាំង​ពី​ឆ្នាំ១៩៩៣ មក​ម្ល៉េះ ដោយ​មាន​ប័ណ្ណ​កាន់​កាប់​ដីធ្លី​ទទួល​ស្គាល់​ពី​អាជ្ញាធរ​មូលដ្ឋាន។

ក្នុង​រយៈ​ពេល ២ឆ្នាំ​ចុង​ក្រោយ​នេះ ពលរដ្ឋ​ឲ្យ​ដឹង​ថា ក្រុមហ៊ុន ហេង ហ៊ុយ អេហ្គ្រីខលឈើរ គ្រុប (Heng Huy Agriculture Group) ដែល​ប្ដូរ​ឈ្មោះ​ទៅ​ជា ហេង ហ៊ុយ អភិវឌ្ឍន៍ បាន​ឈប់​ដាំ​ដំណាំ​អំពៅ ចំណែក​រោងចក្រ​ផលិត​ចេញ​ស្ករ​ស ក៏​មិន​ឃើញ​មាន​សកម្មភាព​មមាញឹក​នោះ​ដែរ។

ទោះ​បី​ជា​យ៉ាង​ណា ក្រុម​ពលរដ្ឋ​មាន​ជម្លោះ​ដីធ្លី​ ប្រកាន់​ជំហរ​ថា ពួក​គេ​នៅ​តែ​បន្ត​តវ៉ា​នៅ​ក្នុង​រាជធានី​ភ្នំពេញ​ត​ទៅ​ទៀត លុះ​ត្រាតែ​មាន​កិច្ច​អន្តរាគមន៍​ពី​លោក​នាយករដ្ឋមន្ត្រី ហ៊ុន សែន ក្នុង​វិវាទ​ដីធ្លី​នេះ៕


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល