កម្លាំង​ប៉េអិម​ខេត្ត​ព្រះសីហនុ ចាប់​ពលរដ្ឋ​មាន​ទំនាស់​ដីធ្លី ៤នាក់ ផ្គាប់​​ចិត្ត​ថៅកែ​ចិន

ដោយ ទីន ហ្សាការីយ៉ា
2019-01-09
អ៊ីម៉ែល
មតិ
Share
បោះពុម្ព
rfa.png
rfa.png
Photo: RFA

មន្ត្រី​ឃ្លាំមើល​សិទ្ធិមនុស្ស បាន​ឲ្យ​ដឹង​ថា កម្លាំង​កង​រាជ​អាវុធហត្ថ​ខេត្ត​ព្រះសីហនុ បាន​ចាប់​ខ្លួន​ប្រជា​ពលរដ្ឋ​មាន​ទំនាស់​ដីធ្លី​ចំនួន​ ៤នាក់​ដាក់​ខ្នោះ​ភ្លាមៗ ដើម្បី​ផ្គាប់ចិត្ត​ថៅកែ​ចិន ដែល​ពលរដ្ឋ​ទាំង​នោះ​​ហ៊ាន​ចេញ​មុខ​តវ៉ា​រារាំង​មិន​ឲ្យ​ក្រុមហ៊ុន នាំ​យក​គ្រឿងចក្រ​ទៅ​ឈូស​ឆាយ​លើ​ដី​កំពុង​មាន​ទំនាស់ ដែល​អាជ្ញាធរ​មិន​ទាន់​ដោះ​ស្រាយ​ជូន។

សកម្មភាព របស់​កម្លាំង​កង​រាជ​អាវុធហត្ថ​ចាប់ចង​ពលរដ្ឋ​រង​គ្រោះ​ដីធ្លី​នេះ ក៏​បណ្តាល​ឲ្យ​ប្រជា​ពលរដ្ឋ​មួយ​ចំនួន​រង​របួស​ដែរ។

តំណាង​ប្រជា​ពលរដ្ឋ​រង​គ្រោះ​ទាំង ២៤​គ្រួសារ រស់នៅភូមិ១ សង្កាត់​៣ ក្រុង-ខេត្ត​ព្រះសីហនុ បាន​ឲ្យ​ដឹង​ថា កង​កម្លាំង​កង​រាជ​អាវុធហត្ថ​ខេត្ត​នេះ បាន​ដាក់​ពង្រាយ​ជា​ច្រើន​នាក់ និង​បាន​ប្រើ​អំពើ​ហិង្សា និង​ចាប់​ខ្លួន​ពលរដ្ឋ ៤នាក់​វៃ​ខ្នោះ​ដៃ​បញ្ជូន​ទៅ​កាន់​អង្គភាព​របស់​ពួក​គេ​យ៉ាង​តក់​ក្រហល់ កាល​ពី​រសៀល​ថ្ងៃ​ទី៨ មករា។

ប្រជាពលរដ្ឋ​រង​គ្រោះ ឈ្មោះ សៀង វុទ្ធី ចំណោម​ពលរដ្ឋ​រង​គ្រោះ​ដីធ្លី​ទាំង ២៤គ្រួសារ អំពាវនាវ​ឲ្យ​អាជ្ញាធរ​ពាក់ព័ន្ធ ជួយ​រក​យុត្តិធម៌​ជូន​ពួក​គាត់ ព្រោះ​ទំនាស់​ដីធ្លី​នេះ​បាន​អូស​បន្លាយ​ពេល តាំង​ពី​ឆ្នាំ១៩៩៦ មក។ ពលរដ្ឋ​នៅ​ដី​មាន​ជម្លោះ​នោះ ត្រូវ​បាន​ភាគី​មាន​ទ្រព្យ និង​អំណាច ឃុបឃិត​លក់​ដី​នេះ បន្ត​ទៅ​ឲ្យ​ឈ្មួញ​ជន​ជាតិ​ចិន និង​បាន​នាំ​យក​គ្រឿងចក្រ​បម្រុង​ឈូស​ឆាយ​ដី​កំពុង​មាន​ទំនាស់ កាល​ពី​រសៀល​ថ្ងៃ​ទី៨ ខែ​មករា​នេះ៖ «ខាង​កម្លាំង​ប៉េអិម​បាន​មក​ចាប់​ខ្លួន​ពលរដ្ឋ​ពួក​ខ្ញុំ​ចំ​នួន ៤នាក់។ ហើយ​ដី​កំពុង​មាន​ទំនាស់​ហ្នឹង គឺ​មាន​គេ​នាំ​គ្រឿងចក្រ​មក​បម្រុង​ឈូស​ឆាយ ប៉ុន្តែ​ត្រូវ​ប្រជា​ពលរដ្ឋ​មក​រារាំង​មិន​ឲ្យ​ដាក់​គ្រឿងចក្រ​ឈូស​ឆាយ​ដី​ទំនាស់​នេះ​ទេ ព្រោះ​មិន​ទាន់​មាន​ដំណោះ​ស្រាយ ហើយ​ក៏​ឈាន​ដល់​កម្លាំង​ប៉េអិម បាន​ប្រើ​អំពើ​ហិង្សា​វាយដំ​ប្រជា​ពលរដ្ឋ​រង​របួស​មួយ​ចំនួន​ផង។ ខ្ញុំ​សូម​អំពាវនាវ​ដល់​សម្ដេច ហ៊ុន សែន និង​សម្ដេច ប៊ុន រ៉ានី សូម​ឲ្យ​ជួយ​ប្រជា​ពលរដ្ឋ ដែល​រងគ្រោះ​ដីធ្លី​នៅ​ក្រុង​ព្រះសីហនុ​ផង កុំ​ឲ្យ​អ្នក​មាន​ទ្រព្យ និង​មាន​អំណាច នាំ​យក​កម្លាំង​សមត្ថកិច្ច​មក​វាយ​ដំ និង​គំរាម​កំហែង ចាប់​ប្រជា​ពលរដ្ឋ​ដាក់​គុក ដោយ​ពុំ​មាន​ដំណោះ​ស្រាយ​ដូច​រាល់​ថ្ងៃ​នេះ​ទៀត»

ទន្ទឹម​គ្នា​នេះ​ដែរ តំណាង​ប្រជា​ពលរដ្ឋ​រស់​នៅ​សហគមន៍​កំពេញ​ចាស់​ចំនួន ២៤គ្រួសារ ក៏​ស្នើសុំ​ដល់​លោក ហ៊ុន សែន ឲ្យ​ពិនិត្យ​ទៅ​លើ​សកម្ម​ភាព​ដឹក​នាំ​ដោយ លោក ហេង ប៊ុនទី មេបញ្ជាការ​កង​រាជ​អាវុធហត្ថ​ខេត្ត​ព្រះសីហនុ ដែល​តែង​បញ្ជូន​កម្លាំង​កង​រាជ​អាវុធហត្ថ ​ទៅ​សម្លុត​គំរាម​កំហែង និង​​ប្រើ​អំពើ​ហិង្សា​ដាក់​ប្រជា​ពលរដ្ឋ​មាន​ទំនាស់​ដីធ្លី​ជា​បន្ត​បន្ទាប់ ដើម្បី​ការពារ​ក្រុម​ឈ្មួញ​ចង់​រឹប​អូស​ដី​ពលរដ្ឋ មាន​ផ្ទៃ​ដី​ជាង ៤​ហិកតារ ស្ថិត​នៅ​ក្បែរ​ឆ្នេរ​ឯក​រាជ្យ ឬ​នៅ​ជាប់​មាត់​បឹង​ព្រែក​ទប់ គឺ​នៅ​តាម​បណ្ដោយ​ផ្លូវ​ថ្នល់​ទល់​មុខ​សាលា​ដំបូង​ខេត្ត​ព្រះសីហនុ។

តំណាង​ពលរដ្ឋ​ឲ្យ​ដឹង​បន្ត​ថា រហូត​មក​ដល់​ល្ងាច​ថ្ងៃ​ទី៨ ខែ​មករា ឆ្នាំ​២០១៩ កម្លាំង​កង​រាជ​អាវុធហត្ថ​ខេត្ត​ព្រះសីហនុ មិន​ទាន់​ដោះលែង​ពលរដ្ឋ​រង​គ្រោះ​ដីធ្លី​ទាំង ៤នាក់ ឲ្យ​មាន​សេរីភាព​វិញ​ទេ។

អាស៊ី​សេរី មិន​ទាន់​អាច​ទាក់ទង​លោក ហេង ប៊ុនទី មេបញ្ជាការ​កង​រាជ​អាវុធហត្ថ​ខេត្ត​ព្រះសីហនុ ដើម្បី​បំភ្លឺ​ជុំវិញ​ការ​ចាប់​ខ្លួន​ពលរដ្ឋ​ចំនួន ៤នាក់​នេះ បាន​ទេ​នៅ​ល្ងាច​ថ្ងៃ​ទី​៨ មករា។

កន្លង​មក ភាគី​ទំនាស់​ម្ខាង​ទៀត ដែល​មាន​ងារ​ជា​ឧកញ៉ា និង​ជា​ឈ្មួញ​មាន​ទ្រព្យ ហើយ​មាន​អំណាច​ ដែល​យក​ដី​មាន​ជម្លោះ​នេះ​លក់​ឲ្យ​ជនជាតិ​ចិន​នោះ បាន​អះអាង​ថា ទីតាំង​ដី​ដែល​ប្រជា​ពលរដ្ឋ​ទាំង ២៤​គ្រួសារ​តវ៉ា​ទាមទារ​នោះ គឺ​លោក​មាន​ប្លង់​កម្មសិទ្ធិ​តាំង​ពី​ឆ្នាំ​២០០៨ និង​បាន​បង់​ពន្ធ​ដី​ជូន​រដ្ឋ​រាល់​ឆ្នាំ​ថែម​ទៀត​ផង។

ពលរដ្ឋ​រងគ្រោះ​បាន​អះអាង​ថា ពួក​គេ​បាន​ទន្ទឹង​រង់ចាំ​យុត្តិធម៌​លើ​ទំនាស់​ដីធ្លី​រ៉ាំរ៉ៃ​នេះ អស់​រយៈ​ពេល​ជាង ២០​ឆ្នាំ​មក​ហើយ ប៉ុន្តែ​នៅ​តែ​មិន​ឃើញ​មាន​ស្ថាប័ន​ពាក់ព័ន្ធ​ចាប់​ពី​ថ្នាក់​ខេត្ត រហូត​ដល់​ស្ថាប័ន​កំពូលៗ ថ្នាក់​ជាតិ ចេញ​មុខ​ដោះ​ស្រាយ​បញ្ចប់​ជម្លោះ​នេះ​ទេ។

មន្ត្រី​សម្របសម្រួល​អង្គការ លីកាដូ (Licadho) ប្រចាំ​ខេត្ត​ព្រះសីហនុ លោក ស្រេង វ៉ាន់លី ដែល​ចុះ​អង្កេត​ផ្ទាល់​ដល់​កន្លែង​កើត​មាន​ទំនាស់​ដីធ្លី និង​ឃើញ​សកម្មភាព​កម្លាំង​កង​រាជ​អាវុធហត្ថ​ខេត្ត​ព្រះសីហនុ ចាប់​ខ្លួន​ពលរដ្ឋ ៤នាក់ ឲ្យ​ដឹង​ថា មុន​ពេល​កម្លាំង​កង​រាជ​អាវុធហត្ថ​ចាប់​ខ្លួន ពលរដ្ឋ​ក៏​មាន​សកម្មភាព​ប្រតាយប្រតប់​គ្នា បណ្តាល​របួស​ប្រជា​ពលរដ្ឋ​មួយ​ចំនួន៖ «ថ្ងៃ​ទី៨ ខែ​មករា​នេះ មាន​កម្លាំង​ប៉េអិម​ខេត្ត​ព្រះ​សីហនុ បាន​ចុះ​មក​ចាប់​ប្រជា​ពលរដ្ឋ ៤នាក់ ដែល​ប្រមូល​ផ្តុំ​គ្នា​ហាម​មិន​ឲ្យ​គ្រឿង​ចក្រ​មិន​ឲ្យ​ចូល​ទៅ​ក្នុង​ដី​ទំនាស់​រុំារៃ​ជា​ឆ្នាំ​មក​ហើយ នៅ​សហគមន៍ ២៤គ្រួសារ។ ក្នុង​ការ​តវ៉ា​នេះ ក៏​មាន​ការ​រារាំង និង​ប្រតាយប្រតប់​គ្នា រវាង​កម្លាំង​ប៉េអ៊ឹម និង​ប្រជា​ពលរដ្ឋ​មួយ​ចំនួន​ផង​ដែរ រហូត​ដល់​មាន​ពលរដ្ឋ​មួយ​ចំនួន​បាន​រង​របួស ហើយ​ពលរដ្ឋ​ខ្លះ ត្រូវ​កម្លាំង​កង​រាជ​អាវុធហត្ថ​ចាប់​ប្រជា​ពលរដ្ឋ​ចំនួន ៤នាក់។ ក្នុង​នោះ ក៏​មាន​ពលរដ្ឋ​ខ្លះ​ទៀត ត្រូវ​កម្លាំង​ប៉េអិម ប្រើ​ហិង្សា​ឲ្យ​រង​របួស​ស្នាម និង​បាន​ចាប់​យក​ទូរស័ព្ទ​ដៃ​ពលរដ្ឋ​មួយ​ចំនួន​ផង»

តំណាង​ពលរដ្ឋ​មាន​ទំនាស់​ដីធ្លី ២៤​គ្រួសារ នៅ​សហគមន៍​កំពេញ​ចាស់ លោកស្រី ហង្ស ចិន្តា ​បាន​ឲ្យ​ដឹង​ថា ទំហំ​ផ្ទៃ​ដី​របស់​ពួក​គាត់​ទាំង​២៤​គ្រួសារ ហើយ​ត្រូវ​ឈ្មួញ​មាន​ទ្រព្យ​ធន​ឃុបឃិត​ជាមួយ​អតីត​​មន្ត្រី​មន្ទីរ​រៀបចំ​ដែនដី នគរូបនីយកម្ម និង​សំណង់​ខេត្ត​ព្រះសីហនុ និង​អតីត​អភិបាល​ខេត្ត​ព្រះសីហនុ អាណត្តិ​មុនៗ បាន​លួច​ធ្វើ​ប្លង់​កម្ម​សិទ្ធិ រំលោភ​យក ទោះ​បី​ពួក​គាត់​បាន​ដាក់​បណ្ដឹង​តវ៉ា ឬ​ជំទាស់​ជា​ហូរហែ​បែប​ណា​ក្តី។

លោកស្រី ហង្ស ចិន្តា បាន​អំពាវនាវ​ដល់​អង្គភាព​ប្រឆាំង​អំពើ​ពុក​រលួយ និង​លោក ហ៊ុន សែន ​ឲ្យ​ជួយ​បញ្ជូន​មន្ត្រី​ជំនាញ​ឯករាជ្យ ចុះ​ស៊ើប​អង្កេត​ភាព​មិន​ប្រក្រតី​នៃ​ការ​ឃុបឃិត​ជា​លក្ខណៈ​ប្រព័ន្ធ លួច​ចេញ​ប្លង់​កម្មសិទ្ធិ​រំលោភ​យក​ដីធ្លី​ពួក​គាត់ ដែល​ធ្លាប់​រស់នៅ​ក្រោយ​ឆ្នាំ​១៩៧៩ មក។

អភិបាល​ខេត្ត​ព្រះសីហនុ លោក យន្ត មីន ក៏​បាន​ដឹង​ឮ​ចំពោះ​ការ​តវ៉ា ​របស់​ប្រជាពលរដ្ឋ​មាន​ទំនាស់​ដីធ្លី​នៅ​សហគមន៍​កំពេញ​ចាស់​ទាំង ២៤​គ្រួសារ​នេះ​ដែរ ព្រោះ​ទីតាំង​មាន​ទំនាស់​នេះ​ នៅ​ក្បែរ​លំនៅ​ឋាន និង​នៅ​​ជាប់​ផ្លូវ​ថ្នល់ ដែល​រូប​លោក​ឆ្លង​កាត់​រាល់​ថ្ងៃ។ លោក យន្ត មីន ថា លោក​អាច​ជួយ​ដោះ​ស្រាយ​តែ​ទំនាស់​ដីធ្លី​ណា​មិន​ទាន់​ធ្លាក់​ទៅ​ដល់​ដៃ​តុលាការ​តែ​ប៉ុណ្ណោះ ប៉ុន្តែ​បើ​ទំនាស់​ទាំង​នោះ​ បាន​ធ្លាក់​ដល់​អំណាច​តុលាការ ឬ​ក៏​តុលាការ​សម្រេច​សាលក្រម​ស្ថាពរ​រួច​ហើយ គឺ​រូប​លោក​​គ្មាន​សិទ្ធិ​ដោះ​ស្រាយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

នេះហេីយនយោបាយឈ្នះឈ្នះឈ្នះចាញ់នោះ ព្រោះថាចិន យួន សៀម ឈ្នះ ឯខ្មែរជាអ្នកចាញ់ ដូចក្នុងឧទាហរណ៍នៅកោះកុងនេះស្រាប់។

Jan 09, 2019 11:52 AM

គេហទំព័រ​ទាំងមូល