ពលរដ្ឋ​បាត់​ខ្លួន​ជាង ២ខែ ដែល​គ្រួសារ​រក​ឃើញ​វិញ ស្នើសុំ​តុលាការ​ខេត្ត​ព្រះវិហារ​ឱ្យ​ដោះ​លែង​កូន​ប្រុស​គាត់ និង​អ្នក​ភូមិ ១៣នាក់

ដោយ ទីន ហ្សាការីយ៉ា
2019.04.08
ស៊ុម ម៉ឺន ៦២២ កូន​ប្រុស​លោក ស៊ុម ម៉ឺន និង​​ឈ្មោះ ម៉ឺន មាន (ឆ្វេងដៃ) ដៃ​ជាប់​ចំណង ពេល​​ទាហាន​មួយ​ក្រុម ចាប់​ខ្លួន​យក​ទៅ​ឃុំ​នៅ​ការិយាល័យ​ដែន​ជម្រក​សត្វ​ព្រៃ​គូលែន​ព្រហ្ម​ទេព កាលពី​ថ្ងៃ​ទី២០ ខែ​មករា ឆ្នាំ២០១៩។
រូប៖ ហ្វេសប៊ុក អភិបាលស្រុក ជាំ ក្សាន្ត

ជុំវិញ​ករណី​ពលរដ្ឋ​ឃុំ​ខ្លួន ១៤នាក់ ក្នុង​ជម្លោះ​ដីធ្លី​មួយ​នៅ​ខេត្ត​ព្រះវិហារ​វិញ ពលរដ្ឋ​ម្នាក់​ដែល​ក្រុម​គ្រួសារ​រក​ឃើញ​ក្រោយ​បាត់​ខ្លួន​ជាង ២ខែ ស្នើ​សុំ​តុលាការ​ព្រះវិហារ​ដោះ​លែង​កូន​ប្រុស​គាត់ ដើម្បី​ឲ្យ​បាន​ជួប​ជុំ​គ្រួសារ​ឡើង​វិញ ព្រោះ​កូន​គាត់​មិន​បាន​ប្រព្រឹត្ត​កំហុស​ដូច​ការ​ចោទ​ប្រកាន់​នោះ​ទេ។ ចំណែក​អង្គការ​សង្គម​ស៊ីវិល​ដែល​តាម​រឿង​នេះ​យល់​ថា ប្រសិន​បើ​តុលាការ​រក​ពុំ​ឃើញ​ភស្តុតាង​ដាក់​បន្ទុក​ពលរដ្ឋ​ទេ គួរ​ពិចារណា​ដោះលែង​ពួកគេ​ឲ្យ​មាន​សេរីភាព​វិញ។

ពលរដ្ឋ​ដែល​បាត់​ពី​ខ្លួន ២ខែ ក្រោយ​មក​ត្រូវ​អ្នក​ជិត​ខាង​ប្រទះ​ឃើញ​នៅ​ខេត្ត​ព្រះសីហនុ លោក ស៊ុម ម៉ឺន ឲ្យ​អាស៊ី​សេរី​ដឹង​ថា មក​ដល់​ពេល​នេះ​កូន​ប្រុស​គាត់​ឈ្មោះ «ម៉ឺន មៀន» អាយុ ២៦ឆ្នាំ និង​អ្នក​ភូមិ​ ១៣នាក់​ទៀត នៅ​ជាប់​ឃុំ​ក្នុង​ពន្ធនាគារ​ខេត្ត​ព្រះវិហារ​នៅ​ឡើយ។

ពលរដ្ឋ​វ័យ ៥៤ឆ្នាំ​រូប​នេះ ស្នើសុំ​អាជ្ញាធរ​ និង​តុលាការ​ខេត្ត​ព្រះវិហារ​ដោះ​លែង​កូន​ប្រុស​គាត់​ឲ្យ​បាន​វិល​ជួប​ក្រុម​គ្រួសារ​វិញ ដើម្បី​ប្រកប​របរ​ចិញ្ចឹម​ជីវិត​ត​ទៅ​ទៀត ព្រោះ​ពួក​គាត់​សព្វ​ថ្ងៃ​នេះ​រស់​នៅ​អាស្រ័យ​នឹង​ការ​ធ្វើ​ចម្ការ។ ក្រោយ​ពី​បែក​គ្រួសារ​ដោយ​សារ​ភ័យខ្លាច​ក្នុង​រយៈ​ពេល​ជាង​ ២ខែ លោក ស៊ុម ម៉ឺន ថ្លែង​ថា នៅ​ពេល​នេះ រូប​គាត់ និង​គ្រួសារ​គ្មាន​ត្រូវ​ការ​អ្វី​ ក្រៅ​ពី​ចង់​ជួបជុំ​កូន​ប្រុស​វិញ និង​រស់​នៅ​ដោយ​សេចក្ដី​សុខ​នោះ​ទេ៖ «ឥឡូវ ខ្ញុំ​សូម​សំណូម​ពរ​ដល់​អាជ្ញាធរ​ទាំង​អស់ យោគយល់​ដល់​ខ្ញុំ​បាទ​ ជា​ប្រជាជន​ល្ងង់​ខ្លៅ សូម​ឲ្យ​អាជ្ញាធរ​ហ្នឹង​ដោះ​លែង​កូន​ប្រជា​ពលរដ្ឋ​ទាំង​អស់ ឲ្យ​មាន​សេរីភាព។ មាន​តែ​ការ​លើក​ដៃ​ទទូច​អង្វរ​ដល់​រដ្ឋាភិបាល​តែ​ប៉ុណ្ណឹង​ឯង​ខ្ញុំ។ ខ្ញុំ​គ្មាន​អី​ក្រៅ​ពី​ដី​បន្តិច​បន្តួច​ហ្នឹង​ទេ លោក​គ្រូ។ រឿង​រ៉ាវ​អី​ ខ្ញុំ​មិន​គិត​គូរ​អី​វែង​ឆ្ងាយ​ទេ​លោក​គ្រូ កុំ​ឲ្យ​វែង​ឆ្ងាយ​ថា ឲ្យ​ម៉ា​សុខ​ខ្លួន​ខ្ញុំ និង​ក្រុម​គ្រួសារ​ និង​សុំ​ឲ្យ​អាជ្ញាធរ​ដោះ​លែង​អ្នក​ ដែល​ជាប់​នៅ​ពន្ធនាគារ​ហ្នឹង មាន​សេរីភាព។ ខ្ញុំ​មិន​ចង់​មាន​រឿង​រ៉ាវ​អី ប្ដឹង​ផ្ដល់​អី​ទេ»

កាលពី​ថ្ងៃ​ទី២០ ខែ​មករា លោក ស៊ុម ម៉ឺន និង​កូន​ប្រុស​ឈ្មោះ ម៉ឺន មាន ត្រូវ​បាន​ទាហាន​មួយ​ក្រុម ចាប់​ខ្លួន​យក​ទៅ​ឃុំ​នៅ​ការិយាល័យ​ដែន​ជម្រក​សត្វ​ព្រៃ​គូលែន​ព្រហ្ម​ទេព នៅ​ពេល​ពួក​គេ​បើក​គោ​យន្ត​ដឹក​ឥវ៉ាន់​លក់​ដូរ​សំដៅ​ទៅ​ផ្ទះ ដោយ​ធ្វើដំណើរ​តាម​ផ្លូវ​ឆ្លងកាត់​រនាំង​ក្រុមហ៊ុន​ មេត្រី​ភាព។ ក្នុង​ពេល​ចាប់​ខ្លួន​នោះ ភរិយា​របស់​លោក ស៊ុម ម៉ឺន​ ប្រាប់​ថា កម្លាំង​ទាហាន​បាន​វាយ​ធ្វើ​បាប​ប្ដី​ និង​កូន​ប្រុស​គាត់។

មន្ត្រី​អង្កេត​ជាន់​ខ្ពស់​របស់​សមាគម​សិទ្ធិ​មនុស្ស​ អាដហុក (Adhoc) ​លោក យី សុខសាន្ត​ លើក​ឡើង​ថា ករណី​ចាប់​ខ្លួន​ពលរដ្ឋ​អត់​មាន​ទោស​យក​ទោ​ដាក់​ឃុំ​ ហើយ​មិន​មាន​ភស្តុតាង​ត្រឹម​ត្រូវ ដើម្បី​ដាក់​បន្ទុក​ នោះ​ជា​រឿង​អយុត្តិធម៌ និង​បង្ក​ការ​ឈឺ​ចាប់​ដល់​ជន​រងគ្រោះ ៖ «ខ្ញុំ​ស្នើ​សុំ​ថា បើ​គ្មាន​ភស្តុតាង​ដាក់​បន្ទុក​ទេ តុលាការ​គួរ​ដោះលែង​ពួក​គាត់​ឲ្យ​មាន​សេរីភាព។ កាល​ណា​ពួក​គាត់​មាន​សេរីភាព ទី១ ពួកគាត់​បាន​ជួប​ជុំ​គ្រួសារ ហើយ​រកស៊ី​ទទួល​ទាន​ជួយ​គ្រួសារ​គាត់​បាន ហើយ​ទី២ យើង​មិន​ខ្ជះខ្ជាយ​ចំណាយ​ថវិកា​ចិញ្ចឹម​គាត់​នៅ​កន្លែង​ឃុំឃាំង​ផង»

អាស៊ី​សេរី មិន​អាច​សុំ​ការ​ឆ្លើយ​បំភ្លឺ​ចំពោះ​ការ​ស្នើ​សុំ​នេះ ពី​អ្នក​នាំ​ពាក្យ​សាលាដំបូង​ខេត្ត​ព្រះ​វិហារ អ្នក​ស្រី ជុំ កន្និយ៉ា បាន​ទេ ដោយ​ហៅ​ទូរស័ព្ទ​តែ​ពុំ​មាន​អ្នក​ទទួល។

ប្រធាន​គ្រប់គ្រង​ការិយាល័យ​ស៊ើប​អង្កេត​សិទ្ធិមនុស្ស​នៃ​អង្គការ លីកាដូ លោក អំ សំអាត យល់​ថា​ ដើម្បី​ដោះ​ស្រាយ​វិវាទ​ដីធ្លី​នៅ​ខេត្ត​ព្រះ​វិហារ​នេះ ជា​ជំហាន​ដំបូង អាជ្ញាធរ​ខេត្ត​ គួរ​ធ្វើ​កិច្ច​អន្តរាគមន៍​យ៉ាង​ណា ដើម្បី​ជួយ​ឲ្យ​ពលរដ្ឋ​១៤​នាក់​ដែល​កំពុង​ជាប់ឃុំ អាច​មាន​សិទ្ធិ​នៅ​ក្រៅ​ឃុំ​បាន។ លោក បន្ត​ថា ​ចំពោះ​ជំហាន​បន្ទាប់​ទៀត អាជ្ញាធរ​គួរ​អនុវត្ត​នូវ​វិធានការ​សម្រាប់​ដោះស្រាយ ​ដែល​ដាក់​ចេញ​កន្លង​មក ឲ្យ​បាន​លឿន​តាម​តែ​អាច​ធ្វើ​ទៅ​បាន៖ «ខ្ញុំ​មើល​ជា​បទ​ពិសោធ​កន្លង​មក មាន​ប្រជាពលរដ្ឋ​មួយ​ចំនួន​ជាប់​នៅ​ក្នុង​ពន្ធនាគារ ហើយ​បញ្ហា​ក៏​ដោះ​មិន​ទាន​ចប់ យើង​ឃើញ​ថា ព្រឹត្តិការណ៍ បញ្ហា​ហ្នឹង​វា​ចេះ​បង្ក​កើតឡើង។ អ៊ីចឹង! អនុសាសន៍​ឯកឧត្ដម​នៃ​គណៈ​អភិបាល​ខេត្ត​ព្រះវិហារ ​ក្នុង​ការ​ដោះ​ស្រាយ​បញ្ហា​ដីធ្លី​ហ្នឹង អនុវត្ត​ឲ្យ​ទៅ ប្រហែល​ជា​យើង​អាច​បញ្ចប់​រឿង​ហ្នឹង​បាន​ហើយ បាទ!»

អភិបាល​ខេត្ត​ព្រះវិហារ លោក អ៊ុន ចាន់ដា បាន​សម្រេច​ដាក់​ចេញ​វិធានការ ៥ចំណុច ដើម្បី​ដោះ​ស្រាយ​វិវាទ​ដី​ធ្លី​នេះ​ កាល​ពី​ដើម​ខែ​កុម្ភៈ។ វិធានការ​ទាំង​នោះ​រួមមាន បង្កើត​ក្រុមការងារ វាស់វែង​និង​ដោះស្រាយ​ផល​ប៉ះពាល់​ជាក់ស្ដែង ជំរុញ​ឱ្យ​មានការ​ចុះបញ្ជី​ដី​ក្រុមហ៊ុន​មេត្រីភាព ស្នើ​ឱ្យ​ក្រុមហ៊ុន កំណត់​ព្រំ​ដី ឱ្យ​បាន​ច្បាស់លាស់ និង​ត្រូវ​មាន​កម្លាំង​ការពារ​សន្តិសុខ​របស់​ខ្លួន។ ស្នើ​ឱ្យ​ពលរដ្ឋ ដែល​បាន​អាស្រ័យ​ផល​ហើយ ត្រូវ​រក្សា​ភាព​ស្ងប់ស្ងាត់ និង​បញ្ឈប់​ការ​កាប់​ទន្ទ្រាន​លើ​ដី​មាន​ជម្លោះ​បន្ត​ទៀត ត្រូវ​រង់ចាំ​អាជ្ញាធរ​ពាក់ព័ន្ធ​សម្របសម្រួល និង​ស្នើ​ឱ្យ​តុលាការ​ខេត្ត​នេះ បញ្ឈប់​ការ​ចេញ​ដីកា​កោះហៅ ឬ​ចាប់ខ្លួន​ពលរដ្ឋ​បន្ត​ទៀត។

ប៉ុន្តែ​ជាង ២ខែ​មក​នេះ ក្រុម​អង្គការ​សង្គម​ស៊ីវិល​សង្កេត​ឃើញ​ថា វិធានការ​ដោះ​ស្រាយ​វិវាទ​ដីធ្លី​រវាង​ពលរដ្ឋ​ជាង ៣៣០គ្រួសារ ជាមួយ​នឹង​ក្រុមហ៊ុន​មេ​ត្រី​ភាព នៅ​ស្រុក​ជាំ​ក្សាន្ត​ ខេត្ត​ព្រះវិហារ នៅ​មិន​ទាន់​លេច​ចេញ​ជា​ផ្លែ​ផ្កា​នៅ​ឡើយ​ទេ។ អង្គការ​សង្គម​ស៊ីវិល ទទូច​ស្នើ​ដល់​អាជ្ញាធរ​ខេត្ត​ព្រះវិហារ ពន្លឿន​ដំណោះស្រាយ​ដីធ្លី​ឲ្យ​ពលរដ្ឋ​ឲ្យ​បាន​ឆាប់ ដើម្បី​ឲ្យ​ពលរដ្ឋ​មាន​ពេល​វេលា​ធ្វើ​ស្រែ​ចម្ការ ដើម្បី​ចិញ្ចឹម​ក្រុម​គ្រួសារ និង​រស់​នៅ​ក្នុង​ភាព​ថ្លៃ​ថ្នូរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។