ប្រជាពលរដ្ឋរស់នៅក្បែរបឹងតាមោក ស្ថិតនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ ប្ដេជ្ញាស៊ូស្លាប់លើដីមិនព្រមចុះចេញពីលំនៅឋាននោះទេ។ ពួកគាត់បានតវ៉ា កាលពីថ្ងៃទី២៣ ខែមិថុនា ដើម្បីជំទាស់នឹងអាជ្ញាធរ ដែលមានគម្រោងបណ្ដេញពួកគាត់។ មន្ត្រីសិទ្ធិមនុស្ស ជំរុញឲ្យអាជ្ញាធរដោះស្រាយ តាមសំណូមពររបស់ពលរដ្ឋ ដោយមិនត្រូវប្រើវិធានការបណ្ដេញពួកគាត់ចេញពីលំនៅឋានដោយបង្ខំនោះទេ៖ «អយុត្តិធម៌អត់ ? បងប្អូន ។ អយុត្តិធម៌ណាស់ ! អយុត្តិធម៌ទេ ? ពួកយើង១០៨គ្រួសារអយុត្តិធម៌ណាស់ !»។
ក្រុមប្រជាពលរដ្ឋប្រមាណជាងពីររយ(២៥០)គ្រួសារ នៅភូមិសំរោងត្បូង ខណ្ឌព្រែកព្នៅ ជាប់បឹងតាមោក អង្វរដល់អាជ្ញាធរ និងលោកនាយករដ្ឋមន្ត្រី ហ៊ុន សែន ថា ពួកគាត់មិនចង់ចាកចេញពីកន្លែងដែលរស់នៅសព្វថ្ងៃនេះទេ ហើយក៏មិនចង់បានសំណងអ្វីជាដុំកំភួនដែរ គ្រាន់តែចង់បានសៀវភៅស្នាក់នៅ និងប័ណ្ណកម្មសិទ្ធិដីធ្លីប៉ុណ្ណោះ។ ប្រជាពលរដ្ឋជិត១០០នាក់ កាលពីថ្ងៃទី២៣ មិថុនា បាននាំគ្នាប្រមូលផ្ដុំឈរលើកបដា និងរូបថតលោក ហ៊ុន សែន និងភរិយារបស់លោក នៅក្នុងសហគមន៍របស់ពួកគេ ដើម្បីទាមទារទៅអាជ្ញាធរខណ្ឌព្រែកព្នៅ បញ្ឈប់គម្រោងបណ្ដេញពួកគាត់ ទៅទីតាំងថ្មី។
ពលរដ្ឋម្នាក់ទៀត លោកយាយ អំ យេត និយាយថា ពលរដ្ឋរស់នៅក្បែរបឹងតាមោក ឃុំសំរោងត្បូង មាន២៥០គ្រួសារ ស្មើនឹងផ្ទះ១០៨ខ្នង ហើយពួកគាត់ មិនសុខចិត្តចាកចេញពីផ្ទះរបស់គាត់ទេ ទោះបីអាជ្ញាធរមកដេញពួកគាត់យ៉ាងណាក៏ដោយ ។ លោកយាយបន្តថា រាល់ថ្ងៃនេះអាជ្ញាធរមកអុកឡុកលោកយាយទាំងព្រឹកទាំងល្ងាច ទាមទារបណ្ដេញលោកយាយ និងពលរដ្ឋដែលរស់នៅទីនេះ ឲ្យខាងតែបាន៖ «ហើយខ្ញុំមកនៅនេះពួកអាជ្ញាធរហ្នឹងដេញខ្ញុំព្រឹកល្ងាចខ្ញុំទៅដកត្រកួនចួនណាឲ្យកូនទៅតាមហៅ គេឲ្យខ្ញុំរុះផ្ទះចេញ ហើយកាលហ្នឹងមិនទាន់មានផ្ទះទើបមានខ្ទមនៅទេ ខ្ញុំមកនៅ ហើយដេញព្រឹកដេញល្ងាច ដេញ ។ ទៅរកស៊ីអីក៏អត់បានដែរ ដេញរហូត អ្នកថ្មី ( អភិបាលរងខណ្ឌ ) និយាយទៅមកពីគាត់លុបដីចាក់ដី គាត់ចង់ដេញប្រជាពលរដ្ឋមិនឲ្យរស់នៅលើទឹកដីហ្នឹង គាត់អត់ព្រមដោះស្រាយឲ្យ។ គ្មានផ្ដល់ព័ត៌មានឲ្យប្រជាពលរដ្ឋមុនដំបូងដឹងផង។ អត់ដឹងមូលហេតុរឿងអី គាត់ដេញពួកខ្ញុំ»។
ពលរដ្ឋរស់នៅជិតបឹងតាមោកលោកស្រី ផន សុខុម ប្រាប់ថាថ្មីៗនេះ អភិបាលរងខណ្ឌព្រែកព្នៅ លោក ឈឹម សុផង់ ចុះមកប្រាប់ពលរដ្ឋផ្ទាល់ថា រដ្ឋាភិបាលត្រូវការតំបន់ភូមិសំរោងត្បូងយកទៅអភិវឌ្ឍ ហើយតម្រូវឲ្យពលរដ្ឋរុះរើផ្ទះទៅនៅតំបន់ផ្សេង ដោយលើកហេតុផលថា ពលរដ្ឋរស់នៅលើដីរដ្ឋខុសច្បាប់។ លោកស្រីអះអាងថា ពួកគាត់បានរស់នៅ និងអាស្រ័យផលដោយចិញ្ចឹមត្រី ដាំឈូក និងបន្លែលើផ្ទៃបឹងតាមោក តាំងពីឆ្នាំ១៩៩០ ប៉ុន្តែអាជ្ញាធរ មិនព្រមចេញប្លង់កម្មសិទ្ធិដីធ្លីជូនពួកគាត់ឡើយ៖ «ទឹកប្រាក់គេធ្វើអីក៏បានដែរ ដូច្នេះពួកខ្ញុំលើកដៃសំពះ ឲ្យទាំងលុយគេមិនធ្វើឲ្យខ្ញុំទេចាស ។ អីចឹង សូមឲ្យរដ្ឋាភិបាលជួយ ( សម្ដេចអើយជួយកូនចៅ អាជ្ញាធរខណ្ឌព្រែកព្នៅ គេចង់តែបានដីប្រជាពលរដ្ឋ ) ខ្ញុំអត់មានការហាមឃាត់អាជ្ញាធរខណ្ឌ អាជ្ញាធរសង្កាត់ទេ ព្រោះគាត់ជាម៉ែឪយើង ប៉ុន្តែខ្ញុំសំណូមពរគាត់ គាត់មិនយកចិត្តទុក្ខដាក់ទេ គាត់ ( អាជ្ញាធរ ) នៅតែចោទខ្ញុំថា អ្នកឯងទន្ទ្រាន ទន្ទ្រានដីបឹង»។
ស្រដៀងគ្នាដែរ ពលរដ្ឋរងការបណ្ដេញចេញនៅភូមិសំរោងត្បូង លោកស្រី គង់ តឿ ពោលទាំងមិនសុខចិត្ត ស្នើឲ្យរដ្ឋាភិបាលលោក ហ៊ុន សែន មើលទុក្ខលំបាករបស់ពលរដ្ឋ និងឲ្យពលរដ្ឋរស់ក្រោមដំបូលសន្តិភាពរបស់លោកដោយកក់ក្ដៅផង។ លោកស្រីបន្ថែមថា ពីលើកមុនលោកស្រីបានទៅតវ៉ានៅសាលាខណ្ឌម្ដងហើយ តែអាជ្ញាធរលួងលោមក្រុមលោកស្រីឲ្យត្រឡប់មកផ្ទះសិន ដោយសន្យាថា នឹងដោះស្រាយធ្វើប្លង់កម្មសិទ្ធិឲ្យ តែមកដល់ពេលនេះមិនទាន់ធ្វើប្លង់ឲ្យទេ ។ លោកស្រីលើកឡើងថា គាត់ឃើញអ្នកមានលុយ មានអំណាចចង់បានដីកន្លែងណាមានប្លង់ទាំងអស់ លោកស្រីលើកជាសំណួរថា តើដីរបស់រដ្ឋ មានសិទ្ធិសម្រាប់តែមន្ត្រីរាជការរស់នៅទេ?៖ «ពីមុនដំបូងខ្ញុំធ្វើស្រូវ ធ្វើស្រែប្រាំងដល់គេបូមទឹកដាក់ទៅ ខ្ញុំបានធ្វើជាស៊ងត្រីមួយតិចតួចកូនអាជីវកម្មនៅក្នុងហ្នឹង ។ ប៉ុន្តែខ្ញុំឆ្ងល់ថាអីចេះ ពីមុនមកខ្ញុំនៅដូចជាធម្មតាចាក់ដីចាក់អីបាន ប៉ុន្តែត្រង់នឹងគេបង្កើតផ្សារនេះ ខណ្ឌមិនឲ្យធ្វើផ្ទះធ្វើសម្បែងអីហ្មង ហើយបើបាក់ជើងសសរមួយឲ្យខ្ញុំធ្វើជើងសសរមួយឲ្យត្រឹមតែជួសជុល ។ ប៉ើងផ្ទះប៉ើងសម្បែងខ្ញុំអស់រលីង ហើយខ្ញុំឆ្ងល់អីចេះទៀត ខ្ញុំឆ្ងល់ថាបុរី ប៊ុន ជេស្ឋ ហេតុអី គេធ្វើលើមាត់បឹងបាន»។
វិទ្យុអាស៊ីសេរី មិនអាចទាក់ទងសុំការស្រាយបំភ្លឺអំពីរឿងនេះ ពីអ្នកនាំពាក្យរដ្ឋាភិបាល លោក ផៃ ស៊ីផាន អភិបាលរងរាជធានីភ្នំពេញ លោក សេង រតនៈ និងអភិបាលរងខណ្ឌព្រែកព្នៅ លោ ឈឹម សុផង់ បានទេនៅថ្ងៃទី២៤ ខែមិថុនា ដោយទូរស័ព្ទហៅចូលមិនមានអ្នកទទួល។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក សឹង សែនករុណា ថ្លែងថា អាជ្ញាធរគួរតែពិនិត្យនិងដោះស្រាយទៅលើសំណើរបស់ប្រជាពលរដ្ឋនៅមូលដ្ឋាន ជាជាងអាជ្ញាធរមកបណ្ដេញពលរដ្ឋចេញពីលំនៅឋានទាំងបង្ខំ ពីព្រោះពលរដ្ឋរស់នៅលើដីធ្លីនេះ តាំងពីមិនទាន់អភិវឌ្ឍន៍ ។ លោកបន្តថា ពួកគាត់បានកាន់កាប់មកតាំងពីយូរ ស្រាប់តែរដ្ឋាភិបាលបែរជាយកតំបន់នោះ ទៅអភិវឌ្ឍគួរតែចរចាជាមួយពលរដ្ឋឲ្យបានត្រឹមត្រូវ និងមានតម្លាភាព៖ «ពលរដ្ឋក៏អាចទទួលយកបាន ហើយទាំងខាងអាជ្ញាធរ ក៏រកវិធីក្នុងការដោះស្រាយដោយកុំឲ្យមានការ អឺ ! ប៉ះពាល់ទៅដល់អ្វីដែលជាការចង់បានរបស់ពួកគាត់ហ្នឹង ។ អីចឹងគួរតែមានការសម្របសម្រួលយ៉ាងណា រវាងអាជ្ញាធរហើយនឹងប្រជាពលរដ្ឋហ្នឹង កុំឲ្យពួកគាត់មានការប៉ះទង្គិច ឬក៏ការបណ្ដេញចេញ ឬក៏ធ្វើឲ្យគាត់មានការលំបាកក្នុងជីវភាព ដូចដែលគាត់ថាពិបាកក្នុងការរស់នៅ ឬក៏គាត់ចង់យ៉ាងណានោះ ចង់ជជែកគ្នាឲ្យអស់លទ្ធភាព ឬក៏រកដំណោះស្រាយឲ្យអស់លទ្ធភាពអីចឹងណាបាទ»។
ផ្ទៃបឹងតាមោក មានទំហំជាង ៣ ពាន់ហិកតារ (៣.២៣៩) តាមអនុក្រឹត្យចុះថ្ងៃទី៣ ខែកុម្ភៈ ឆ្នាំ២០១៦ ប៉ុន្តែបឹងនេះបានរួមតូចបន្តិចម្ដងៗ បន្ទាប់ពីរដ្ឋាភិបាល លោក ហ៊ុន សែន សម្រេចកាត់ផ្ទៃបឹង និងអនុញ្ញាតឱ្យចាក់ដីលុបអស់រាប់រយហិកតារ ក្រោមហេតុផលអភិវឌ្ឍន៍។
គិតត្រឹមឆ្នាំ២០១៨ ដល់ឆ្នាំ២០២១ ទំហំដីបឹងតាមោកមានចំនួនជាងពីរពាន់ (២.០០០) ហិកតារ ដែលរដ្ឋាភិបាលបានកាត់ និងដោះដូរ ទៅស្ថាប័នរដ្ឋ ក្រុមហ៊ុនឯកជន និងមនុស្សមួយក្រុម ដែលពលរដ្ឋដឹងថា ជាអ្នកមានលុយមានអំណាច ដើម្បីឲ្យពួកគេកសាងអគារ បុរី វីឡា ខុនដូ និងធ្វើជាកម្មសិទ្ធិឯកជនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។