ពលរដ្ឋ​មាន​ជម្លោះដីធ្លី​នៅ​បឹង​តា​មោក​ប្ដេជ្ញា​ថា ពួកគាត់​ស៊ូស្លាប់​ការពារ​ដី​ផ្ទះ

ដោយ ម៉ៅ សុធានី
2024.03.01
ពលរដ្ឋ​មាន​ជម្លោះដីធ្លី​នៅ​បឹង​តា​មោក​ប្ដេជ្ញា​ថា ពួកគាត់​ស៊ូស្លាប់​ការពារ​ដី​ផ្ទះ ពលរដ្ឋរងគ្រោះនៅតំបន់បឹងតាមោក ខណ្ឌព្រែកព្នៅ​ តវ៉ាក្បែរដងផ្លូវ ជាប់ផ្ទះរបស់ខ្លួនដែលអាជ្ញាធរបណ្ដេញពួកគាត់ កាលពីថ្ងៃទី២៩ ខែ​កុម្ភៈ ឆ្នាំ​២០២៤។
រូប​៖ ពលរដ្ឋ​ផ្តល់ឱ្យ

ប្រជាពលរដ្ឋ​មាន​ជម្លោះដីធ្លី​នៅ​បឹង​តាមោក​ប្ដេជ្ញា​ថា ពួកគាត់​ស៊ូស្លាប់​ដើម្បី​ការពារ​ដី​សហគមន៍​។ ពួកគាត់​អះអាង​ថា ដី​ផ្ទះ​គឺជា​អាយុជីវិត និង​ជម្រក​សម្រាប់​កូនៗ​របស់​ពួកគាត់​រស់នៅ។

ពលរដ្ឋ​បឹងតាមោក និង​កុមារ​ប្រមាណ​ជិត​១០០​នាក់ នៅ​ថ្ងៃទី​២៩ ខែ​កុម្ភៈ បាន​ជួបជុំគ្នា​តវ៉ា​នៅ​ខាង​មុខ​ផ្លូវ​១៥១ ខណ្ឌ​ព្រែក​ព្នៅ ដើម្បី​ឱ្យ​រដ្ឋាភិបាល​ដោះស្រាយ​បញ្ហា​ដីធ្លី​ជូន​ពួកគាត់ និង​បញ្ឈប់​ការប្រើ​អំពើ​ហិង្សា​លើ​ស្ត្រី និង​កុមារ។ ពួកគាត់​នាំគ្នា​ស្រែក​ទាមទារ​រក​យុត្តិធម៌ និង​សុំ​សិទ្ធិ​រស់នៅ​ដី​លំនៅឋាន​របស់​ពួកគាត់ និង​អ្នក​ខ្លះទៀត​កាន់​បដា ដោយ​សរសេរ​ថា «​យើងខ្ញុំ​ជា​ប្រជាពលរដ្ឋ​រស់នៅ​លើ​ផ្លូវ​លេខ​១៥១ ភូមិ​សំរោង​ត្បូង មិន​ព្រម​ដោះដូរ​ដី​ទេ សុំ​អភិវឌ្ឍន៍​នៅ​នឹង​កន្លែង​» ជាដើម​។

ការ​តវ៉ា​នេះ​ក៏​មាន​ការ​ឃ្លាំមើល​ពី​អាជ្ញាធរ​ស្លៀកពាក់​ស៊ីវិល និង​ឯកសណ្ឋាន​ជិត​២០​នាក់​ផង​ដែរ។ពលរដ្ឋ​រស់នៅ​ក្បែរ​បឹងតាមោក​លោកស្រី យន គឹមយឿន ប្រាប់​វិទ្យុ​អាស៊ីសេរី​នៅ​ថ្ងៃទី​២៩ ខែ​កុម្ភៈ ថា ប្រសិនបើ​អត់​ពី​ដី​ផ្ទះ​លោកស្រី មិនដឹង​រំពឹង​អ្វី​ទៀត​នោះ​ទេ ព្រោះ​ដី​ផ្ទះ​គឺជា​មរកត ចុងក្រោយ​ដែល​លោកស្រី​បន្សល់​ទុក​ឱ្យ​កូន​។ លោកស្រី​បន្ត​ថា ដោយសារតែ​អាជ្ញាធរ​បន្ត​ធ្វើ​ទុក្ខបុកម្នេញ​ពលរដ្ឋ ធ្វើ​ឱ្យ​រំខាន​ដល់​ការរស់នៅ និង​ធ្វើ​ឱ្យ​កូនៗ​លោកស្រី​មិន​បាន​ទៅ​សាលារៀន។

លោកស្រី យន គឹមយឿន៖ «ប៉ះពាល់​ខ្លាំង​ពីព្រោះ​គាត់​កាយ​ប្រឡាយ​ហើយ​គាត់​នឹង​ពង្រីង​ផ្លូវ​ទៀត គាត់​កាយ​ប្រឡាយ​៥០​ម៉ែត្រ ពង្រីក​ផ្លូវ​ប្រហែល ២៥​ម៉ែត្រ​ទៀត ហើយ​ប្រហែលជា​គាត់​ធ្វើ​អី​ផ្សេងទៀត​បាត់បង់​អស់ហើយ ដី​ផ្ទះ​ពួក​ខ្ញុំ​នោះ​វា​នៅសល់​ប្រហែលជា​៧០​ម៉ែត្រ ដល់​គាត់​កាយ​ប្រឡាយ​៥០​ម៉ែត្រ ហើយ​ផ្លូវ ២៥​ម៉ែត្រ​គឺ​ពួក​ខ្ញុំ​អស់​ជម្រក​នៅ»

វិទ្យុ​អាស៊ីសេរី​មិន​អាច​ទាក់ទង​អភិបាល​រាជធានី​ភ្នំពេញ លោក ឃួង ស្រេង និង​អភិបាល​ខណ្ឌ​ព្រែកព្នៅ លោក ធឹម សំអាន ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃទី​២៩ ខែ​កុម្ភៈ។

កាលពី​ថ្ងៃ​ទី២៧ ខែកុម្ភៈ អាជ្ញាធរ​ខណ្ឌ​ព្រែកព្នៅ ប្រមាណ​២០០​នាក់​បាន​ប្រើ​អំពើ​ហិង្សា​លើ​ស្ត្រី និង​កុមារ​បណ្ដាល​ឱ្យ​ស្ត្រី​ម្នាក់​ដួល​សន្លប់ និង​កុមារ​៧​នាក់​រង​របួស​ស្រាល ក្រោយ​ពួកគាត់​រារាំង​មិន​ឱ្យ​គ្រឿងចក្រ​កាយ​ប្រឡាយ​បង្ហូរទឹក​ស្អុយ​ចូល​ផ្ទះ​ពួកគាត់​។ ពលរដ្ឋ​អះអាង​ថា កូនៗ​របស់​ពួកគាត់​មិន​ហ៊ាន​ទៅ​រៀន​នោះ​ទេ ពីព្រោះ​ខ្លាច​បាត់បង់​ផ្ទះ។

វិវាទ​ដីធ្លី​អូស​បន្លាយ​រយៈពេល​ជិត​៥​ឆ្នាំ​មក ធ្វើ​ឱ្យ​ប្រជាពលរដ្ឋ​មួយចំនួន​ធ្លាក់ខ្លួន​ក្រីក្រ ជំពាក់​បំណុល​ធនាគារ និង​ក្មេងៗ​មួយចំនួន​បោះបង់​ការសិក្សា ដោយ​ពួកគេ​ងាក​មក​ជួយ​ឪពុកម្ដាយ​រក​ប្រាក់​ដោះស្រាយ​ជីវភាព​គ្រួសារ​វិញ​។ ពលរដ្ឋ​ទទូច​ឱ្យ​រដ្ឋាភិបាល​អនុវត្ត​ច្បាប់​ឱ្យ​មាន​តម្លាភាព និង​ចេញ​ប័ណ្ណ​កម្មសិទ្ធិ​ដីធ្លី ជូន​ពួកគាត់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។