ពលរដ្ឋ​មាន​ជម្លោះដីធ្លី​នៅ​បឹងតាមោក​ចោទ​អាជ្ញាធរ​យក​លេស​ឱ្យ​ពលរដ្ឋ​រុះរើ​ផ្ទះ​ដើម្បី​យក​ដី

ដោយ សេក បណ្ឌិត
2024.02.24
ពលរដ្ឋ​មាន​ជម្លោះដីធ្លី​នៅ​បឹងតាមោក​ចោទ​អាជ្ញាធរ​យក​លេស​ឱ្យ​ពលរដ្ឋ​រុះរើ​ផ្ទះ​ដើម្បី​យក​ដី ពលរដ្ឋសហគមន៍​ដី​ធ្លី​បឹង​តាមោក ភូមិ​សំរោង​ខាងត្បូង ខណ្ឌព្រែកព្នៅ រាជធានីភ្នំពេញ ដែលតែងតវ៉ាប្រឆាំង​ការបណ្ដេញចេញពីអាជ្ញាធរ។
រូប​៖ ពលរដ្ឋ​ផ្តល់ឱ្យ

ពលរដ្ឋ​មាន​ជម្លោះដីធ្លី​នៅ​បឹងតាមោក​ចោទ​អាជ្ញាធរ​ខណ្ឌ​ព្រែក​ព្នៅ​ថា ឱ្យ​ពលរដ្ឋ​រុះរើ​ផ្ទះ​ដើម្បី​កាយ​ប្រឡាយ​ធ្វើ​ផ្លូវ​មេ​រំដោះ​ទឹក​គឺ​គ្រាន់តែ​ជា​លេស ចង់​បណ្ដេញ​ពលរដ្ឋ​ចេញ​តែប៉ុណ្ណោះ​។ ទោះជា​យ៉ាងណា​ពួកគាត់​ប្រកាន់​គោលជំហរ​ថា នឹង​ស៊ូស្លាប់​ការពារ​ដី​សហគមន៍​ឱ្យ​គង់វង្ស។

ប្រជាពលរដ្ឋ​រស់នៅ​ក្បែរ​បឹងតាមោក ជាង ​១០០​គ្រួសារ ក្នុង​សង្កាត់​សំរោង ខណ្ឌ​ព្រែកព្នៅ រាជធានី​ភ្នំពេញ អះអាង​ថា អាជ្ញាធរ​ខណ្ឌ​ព្រែក​ព្នៅ​នៅតែ​បន្ត​ធ្វើ​ទុក្ខបុកម្នេញ និង​ចង់​បណ្ដេញ​ប្រជា​ពលរដ្ឋ​ចេញ​ទាំង​បង្ខំ។

ពលរដ្ឋ​រស់នៅ​ក្បែរ​បឹងតាមោក លោកស្រី ស៊ា ដាវី ប្រាប់​វិទ្យុ​អាស៊ីសេរី​នៅ​ថ្ងៃ​ទី២៣ ខែ​កុម្ភៈថា គឺ​ជា​រឿង​ហួសចិត្ត និង​មិន​អាច​ទទួល​យក​បាន នៅ​ពេល​អាជ្ញាធរ​ខណ្ឌ​ព្រែកព្នៅ​ជូនដំណឹង​ដល់​ពលរដ្ឋ​ឱ្យ​រុះរើ​ផ្ទះ ទាំង​បំពាន​ច្បាប់​បែប​នេះ​។ លោកស្រី​បន្ត​ថា អាជ្ញាធរ​យក​លេស​ឱ្យ​ពលរដ្ឋ​រុះរើ​ផ្ទះ តូប​លក់​អីវ៉ាន់ និង​មិន​ឱ្យ​ចិញ្ចឹម​ត្រី​លើទឹក​របស់​ពលរដ្ឋ​ខ្លួនឯង គឺ​ក្នុង​គោលបំណង​យក​ដី​ពលរដ្ឋ​ឱ្យទៅ​ក្រុមហ៊ុន​ឯកជន​ធ្វើជា​កម្ម​សិទ្ធ។

លោកស្រី ស៊ា ដាវី៖ «ខ្ញុំ​យល់​ថា រឿង​នេះ​គឺជា​រឿង​អយុត្តិធម៌​ដែល​រដ្ឋបាល​ខណ្ឌ​ព្រែកព្នៅ ធ្វើ​នេះ​គឺ​ធ្វើ​ទាំង​បំពាន​ច្បាប់រដ្ឋធម្មនុញ្ញ​ស្រុក​ខ្មែរ បំពាន​ច្បាប់​ភូមិបាល បំពាន​ទាំង​ច្បាប់​ក្រសួង​បរិស្ថាន​ទៀត មុននឹង​មានការ​អភិវឌ្ឍ​អ្វីមួយ​គួរតែ​មាន​ការវាយតម្លៃ និង​ជូនដំណឹង​ជា​សាធារណៈ​ឱ្យ​ប្រជាពលរដ្ឋ​ថា ការ​អភិវឌ្ឍ ហេដ្ឋារចនាសម្ពន្ធ អ្វីមួយ​ហ្នឹង​តើ​ប៉ះពាល់​ដល់​បរិស្ថាន ឬក៏​សង្គម​អត់»

ដោយឡែក​ពលរដ្ឋ​រស់​នៅ​ក្បែរ​បឹងតាមោក​ម្នាក់​ទៀត គឺ​លោកស្រី សឿន ស្រីសុត ថ្លែង​ថា អាជ្ញាធរ​តែង​មក​គំរាមកំហែង និង​ប្រើ​ហិង្សា​លើ​ពលរដ្ឋ​គ្រប់​រូបភាព​ដើម្បី​ឱ្យ​ពួកគាត់​ចេញ​ពី​លំនៅឋាន។ លោកស្រី​បន្ត​ថា ការ​យក​ដី​ក្រោយ​ផ្ទះ​ពលរដ្ឋ​ដើម្បី​កាយ​ប្រឡាយ​ធ្វើ​ផ្លូវ​រំដោះ​ទឹក​នេះ គឺ​ប៉ះពាល់​ដល់​ផ្ទះ និង​មាន​ទឹក​ស្អុយ​ហូរ​ចូល​ដល់​កន្លែង​អាស្រ័យ​ផល​របស់​ពួកគាត់។

លោកស្រី សឿន ស្រីសុត៖ «ការ​កាយ​ប្រឡាយ​ស្ដារ​ប្រពន្ធ​បង្ហូរទឹក​ស្អុយ​ហ្នឹង​គឺ​វា​ប៉ះពាល់​ច្រើន​ដូចជា​ប៉ះពាល់​សុវត្ថិភាព​លំនៅឋាន បាក់​ស្រុត ឬក៏​បង្ហូរ​ទឹក​ស្អុយ​ប៉ះពាល់​ដល់​សុខភាព ដូចជា​សួត ផ្លូវ​ដង្ហើម​ជាដើម។ អ៊ីចឹង​ អាច​បង្ក​ហានិភ័យខ្លាំង​ដល់​ពួក​ខ្ញុំ ដែល​រស់នៅ​ហ្នឹង។​ អ៊ីចឹង ​ខ្ញុំ​សុំ​បដិសេធ​រាល់​ការ​កាយ​ប្រឡាយ​ សូម​ឱ្យ​គាត់​បញ្ចៀស​ទៅ​កន្លែង​ផ្សេង»

ការ​លើកឡើង​របស់​ពល​រដ្ឋ​ទាំងនេះ​គឺ​ក្រោយ​ពេល​អភិបាល​ខណ្ឌ​ព្រែកព្នៅ លោក ធឹម សំអាន កាលពី​ថ្ងៃទី​២០ ខែ​កុម្ភៈ បាន​យក​លិខិត​ជូនដំណឹង​ឱ្យ​ពលរដ្ឋ​រុះរើ​ផ្ទះ ឃ្លាំង​ដាក់​សម្ភារៈ តូប​លក់​អីវ៉ាន់ ការ​ចិញ្ចឹម​ត្រី និង​ការសាងសង់​សំណង់​មិន​រៀបរយ​ផ្សេងទៀត​ឱ្យ​ចេញ​ពី​ដី​រដ្ឋ​ឱ្យ​ឆាប់​រហ័ស ដើម្បី​យក​ដី​កាយ​ប្រឡាយ​រំដោះ​ទឹក​បម្រើ​ផលប្រយោជន៍​សាធារណៈ​។ លោក ធឹម សំអាន បញ្ជាក់​ថា ប្រសិនបើ​ពលរដ្ឋ​មិន​ព្រម​រុះរើ​ចេញ​តាម​ការ​ជូន​ដំណឹង​របស់​អាជ្ញាធរ​ទេ នោះ​ការ​ខូចខាត​ទ្រព្យសម្បត្តិ​ទាំងអស់​អាជ្ញាធរ​មិន​ទទួលខុសត្រូវ​ឡើយ។

ប៉ុន្តែ​ពលរដ្ឋ​អះអាង​ថា ការ​កាយ​ប្រឡាយ​ដែល​មាន​ប្រវែង​ប្រហែល ៧០​ម៉ែត្រ គឺ​ដើម្បី​បង្ហូរទឹក​ស្អុយ​ដែល​ចេញ​ពី​បុរី​មិន​បាន​ផ្ដល់​ផលប្រយោជន៍​ដល់​ពលរដ្ឋ​ឡើយ ហើយ​ធ្វើ​ឱ្យ​ខូចខាត​អាង​ចិញ្ចឹម​ត្រី​ពលរដ្ឋ​ប្រមាណ​ជិត​ ២ហិកតារ​ថែម​ទៀត។

វិទ្យុ​អាស៊ីសេរី​មិន​អាច​ទាក់ទង អភិបាល​ខណ្ឌ​ព្រែកព្នៅ លោក ធឹម សំអាន និង​អភិបាល​រាជធានី​ភ្នំពេញ លោក ឃួង ស្រេង ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃទី​២៣ ខែកុម្ភៈ។

ជុំវិញ​រឿង​នេះ​អ្នកសម្របសម្រួល​គម្រោង​ធុរកិច្ច និង​សិទ្ធិមនុស្ស​របស់​មជ្ឈមណ្ឌល សិទ្ធិមនុស្ស​កម្ពុជា (CCHR) លោក វណ្ណ សុផាត យល់​ឃើញ​ថា អាជ្ញាធរ​ខណ្ឌ​ព្រែក​ព្នៅ​ឱ្យ​ពលរដ្ឋ​រុះរើ​ផ្ទះ​របស់​ពួកគាត់​នេះ គឺ​ហាក់ដូចជា​បណ្ដេញ​ពលរដ្ឋ​ទាំង​បង្ខំ​ឱ្យ​ចុះចេញ​លំនៅឋាន​របស់​ខ្លួន​ដូច្នេះ​ដែរ​។ លោក​បន្ត​ថា គ្រប់ការ​សាងសង់​ហេដ្ឋារចនា​សម្ពន្ធ​អ្វីមួយ ​គឺ​រដ្ឋាភិបាល​គួរតែ​សិក្សា​ពី​ផល​ប៉ះពាល់​ដល់​ជីវភាព​ពលរដ្ឋ​ជាមុន​សិន។

លោក វណ្ណ សុផាត៖ «ទាក់ទង​នឹង​នីតិរដ្ឋ​ហ្នឹង ហើយ​រដ្ឋ​យើង​អ្នក​អនុវត្ត​ច្បាប់ ហើយ​ដល់ពេល​មន្ត្រី​អនុវត្ត​ច្បាប់​ គាត់​មិន​អើពើ​។ អ៊ីចឹង ​ថ្នាក់លើ​របស់​គាត់ ឬ​រដ្ឋាភិបាល​គួរតែ​ពិនិត្យមើល​ឱ្យ​ច្បាស់លាស់ ទៅលើ​ដំណើរការ ហើយ​និង​ការអនុវត្ត​របស់​មន្ត្រី​របស់​ពួកគាត់​ហ្នឹង​ថា​ ធ្វើ​អ៊ីចឹង វា​មិន​ស្រប​ទៅ​នឹង​ច្បាប់​អ៊ីចឹង​ យើង​ត្រូវ​មានការ​ទទួលខុស​ត្រូវ ចំពោះ​ជីវភាព​រស់នៅ​របស់​ប្រជាពលរដ្ឋ​រស់នៅ​ទីនោះ»

ការ​បង្ខំ​ឱ្យ​ពលរដ្ឋ​ចេញពី​លំនៅឋាន​នេះ​គឺ​មិនមែន​ជា​លើក​ទី​១​ ទេ ពោល​គឺ​អាជ្ញាធរ​រក​វិធី​គ្រប់​បែប​យ៉ាង ដើម្បី​បណ្ដេញ​ពលរដ្ឋ​ចេញពី​តំបន់​បឹងតាមោក ដោយមាន​ការ​គំរាមកំហែង ការ​តាម​ឃ្លាំមើល និង​ការប្រើ​អំពើ​ហិង្សា​លើ​ស្ត្រី​ជាដើម។

ការ​ទាមទារ​ឱ្យ​មាន​ដំណោះស្រាយ​ដីធ្លី​នេះ​ធ្វើ​ឱ្យ​ពលរដ្ឋ​ខ្លះ​ជាប់​បណ្ដឹង​នៅ​តុលាការ និង​អ្នក​ខ្លះ​ទៀត​បាន​រត់​ភៀស​ខ្លួន​ទៅ​ក្រៅប្រទេស ដើម្បី​គេច​ពី​ការ​យាយី​របស់​អាជ្ញាធរ។ ពលរដ្ឋ​អះអាង​ថា ដី​ផ្ទះ​ជា​អាយុ​ជីវិត និង​ជា​ដង្ហើម​សេដ្ឋកិច្ច​របស់​ពួកគាត់ ដូច្នេះ​ពួកគាត់​ស៊ូ​បាត់បង់​ជីវិត​ក៏​មិន​ព្រម​រើ​ចេញ​នោះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។