ប្រជាពលរដ្ឋរស់នៅឃុំ ត្រពាំងស្រែ ស្រុកមេសាង ខេត្តព្រៃវែង អះអាងថា អាជ្ញាធរឃុំបានឃុបឃិតគ្នាជាមួយឈ្មួញខិលខូច លួចបោះបង្គោល និងចាក់លុបយកដីព្រែក ដែលជាសម្បត្តិរបស់រដ្ឋ។អាជ្ញាធរឃុំទទួលស្គាល់ថា ពិតជាមានការចាក់ដីលុបព្រែកពិតមែន។
ប្រជាពលរដ្ឋចំនួនពីរ ភូមិ ដែលស្ថិតនៅឃុំត្រពាំងស្រែ ស្រុកមេសាង ខេត្តព្រៃវែង បានអះអាងប្រាប់វិទ្យុអាស៊ីសេរីនៅថ្ងៃទី២០ ខែមេសាថា មានជនខិលខូចលួចបោះបង្គោល និងចាក់លុបដីព្រែកប្រហ៊ូត ធ្វើជាកម្មសិទ្ធិផ្ទាល់ខ្លួន ដោយឃុបឃិតជាមួយអាជ្ញាធរមូលដ្ឋាន ចេញប័ណ្ណកម្មសិទ្ធិ ថា ជាដីស្របច្បាប់ទៅវិញ ។ ប្រជាពលរដ្ឋបន្ថែមទៀតថា ជនខិលខូចទាំងអស់នោះមានភាពស្និតស្នាលជាមួយអាជ្ញាធរភូមិឃុំ ដូច្នេះប្រជាពលរដ្ឋនៅតំបន់នោះមិនហ៊ានរិះគត់ទេ ខ្លាចអាជ្ញាធរធ្វើបាប។
ប្រជាពលរដ្ឋរស់នៅឃុំត្រពាំងស្រែ លោក សឿន មករា ប្រាប់វិទ្យុអាស៊ីសេរី នៅមុនពេលបោះឆ្នោតនេះ លោកសង្កេតឃើញមានការបោះបង្គោលនៅក្នុងដីព្រែក និងបានចាក់ដីលុបដើម្បីធ្វើជាកម្មសិទ្ធិផ្ទាល់ខ្លួន ។ លោកបន្តថា ប្រជាពលរដ្ឋនៅតំបន់មិនសប្បាយចិត្តនោះទេ ប៉ុន្តែពួកគេមិនហ៊ាននិយាយរិះគត់អាជ្ញាធរដោយសារអាជ្ញាធរទាំងអស់ ហាក់គាំទ្រឲ្យមានការចាក់ដីលុបព្រែកធម្មជាតិមួយនេះ ។ លោកបន្ថែមទៀតថា ព្រែកប្រហ៊ូត គឺជាប្រភពត្រីមួយកន្លែង ដែលប្រជាពលរដ្ឋរស់នៅភូមិត្រពាំងស្រែ និងភូមិប្រហ៊ូត អាស្រ័យផលជីវភាពប្រចាំថ្ងៃ។
លោក សឿន មករា៖ «ដីព្រែកក៏ដូចជាដីបឹង នឹងបាត់ម្ដងបន្តិច ហើយក៏បាត់សាបសូន្យ ទៅមុខទៀតបើសិនជាការបោះបង្គោល និងចាក់ដីលុបនឹងបន្តកើតមានជាបន្តបន្ទាប់ បើសិនជាមិនមានវិធានការក្នុងការទប់ស្កាត់និងក្នុងដោះស្រាយ»។
ស្រដៀងគ្នានេះដែរ យុវជន រំចង់ សំណាង ដែលបានចុះទៅដល់ទីតាំង បានលើកឡើងថា លោកមានការព្រួយបារម្ភចំពោះទង្វើទាំងអស់នេះ ធ្វើឲ្យប៉ះពាល់ទៅដល់អ្នកភូមិនៅក្បែរនោះ នៅពេលខែវស្សា ដែលមានទឹកជនឡើងខ្លាំង នឹងលិចផ្ទះរបស់អ្នកភូមិផង បាត់បង់ជម្រកសត្វត្រី ព្រមទាំងប៉ះពាល់ការអាស្រ័យផលប្រចាំថ្ងៃរបស់ប្រជាពលរដ្ឋ ។ លោកដាក់ការសង្ស័យថា អាជ្ញាធរនៅតំបន់នោះអាចជាប់ពាក់ព័ន្ធអំពើពុករលួយ ទើបបណ្ដែតបណ្ដោយមានការបោះបង្គោលចាក់ដីព្រែកធ្វើជាកម្មសិទ្ធិបែបនេះ។
លោក រំចង់ សំណាង៖ «ខ្ញុំជឿថា ការចាក់ដីប៉ុណ្ណឹងហើយមន្ត្រីមូលដ្ឋានគាត់ធ្វើមិនដឹងមិនឮ វាជាអំពើពុករលួយជាប្រព័ន្ធចាប់តាំងពីថ្នាក់ក្រោមឡើងទៅ»។
ពាក់ព័ន្ធនឹងបញ្ហានេះ មេឃុំត្រពាំងស្រែ លោក ហម អឿន ទទួលស្គាល់ថា នៅតំបន់ព្រែកប្រហ៊ូត ពិតជាមានការចាក់ដីលុបពិតមែន ប៉ុន្តែមិនមានការចាក់ដីធំដុំអ្វីនោះទេ ហើយអាជ្ញាធរស្រុកក៏បានចុះត្រួតពិនិត្យវាយតម្លៃរួចរាល់ ព្រមទាំងស្នើឲ្យប្រជាពលរដ្ឋបញ្ឈប់ការចាក់ដីលុបព្រែកបន្តទៀត រហូតដល់មានការអនុញ្ញាតចេញពីមន្ត្រីជំនាញចុះមកត្រួតពិនិត្យត្រឹមត្រូវ។ លោកបន្ថែមថា ដីព្រែកទាំងអស់នោះមិនមានកម្មសិទ្ធិប្លង់រឹងនោះ គ្រាន់តែមានប័ណ្ណសម្គាល់ប្រើប្រាស់តែប៉ុណ្ណោះ។
លោក ហម អឿន៖ «វាជាប់ជាលក្ខណៈជាដីព្រែកមែន ប៉ុន្តែមិនមែនលុបចំកណ្ដាលព្រែកទេ នៅតាមផ្លូវទំនប់ ខែវស្សាមានទឹកទៅវាហាក់ដូចជាតួព្រែកទាំងអស់ ការបោះបង្គោលហូរហែនឹងគឺមិនទាន់មាននរណាអនុញ្ញាតនោះទេ ភាពជាក់ស្ដែងដល់ថ្ងៃនេះគឺមានចាក់បីកន្លែងប៉ះពាល់ដល់តួព្រែក»។
ប្រជាពលរដ្ឋ ស្នើឲ្យអាជ្ញាធរគ្រប់ជាន់ថ្នាក់ទាំងអស់ត្រូវចាត់វិធានការជាបន្ទាន់ និងដកហូតដីព្រែកទាំងអស់នោះទុកជាសម្បត្តិរដ្ឋ។ ព្រមទាំងចាត់វិធានការតាមផ្លូវច្បាប់ចំពោះអ្នកដែលពាក់ព័ន្ធ ដែលឃុបឃិតគ្នា ចាក់ដីលុបព្រែកជាសម្បត្តិរបស់រដ្ឋ។
ការចាក់លុប ឬចាក់បំពេញដី ឬចាក់បំពេញដែនទឹកដោយគ្មានការអនុញ្ញាត ត្រូវបានកំណត់ក្នុងច្បាប់ស្ដីពីតំបន់ការពារធម្មជាតិថា ជាបទល្មើសឧក្រិដ្ឋ ដែលជនល្មើសនឹងត្រូវផ្ដន្ទាទោសដាក់ពន្ធនាគារពី ៥ឆ្នាំ ដល់ ១០ឆ្នាំ និងទោសពិន័យជាប្រាក់ពី ១៥លានរៀល ទៅ ១៥០លានរៀល។ច្បាប់នេះក៏ចែងដែរថា អាជ្ញាធរមានសមត្ថកិច្ចណាដែលសមគំនិតនឹងអ្នកប្រព្រឹត្តបទល្មើស ឬជួយសម្រួលការប្រព្រឹត្តបទល្មើសនោះ ក៏នឹងត្រូវផ្ដន្ទាទោសដូចជនប្រព្រឹត្តដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។