ប្រជាពលរដ្ឋ និងតំណាងសហគមន៍ព្រៃឈើនៅស្រុកក្រគរ ខេត្តពោធិ៍សាត់ គ្រោងប្រមូលស្នាមមេដៃឲ្យបាន ៣០០នាក់ ដើម្បីប្ដឹងអាជ្ញាធរភូមិអន្សាចំបក់ នៃស្វាយស និងឈ្មួញមួយចំនួនដែលរំលោភយកដីព្រៃរបស់រដ្ឋទៅធ្វើជាកម្មសិទ្ធិឯកជន។
សកម្មភាពទន្ទ្រានដីព្រៃរបស់រដ្ឋនៅចំណុចភ្នំតាកុច និងច្រាបផ្ចឹក ដោយក្រុមឈ្មួញ និងអ្នកមានលុយខ្លះ កំពុងដាក់គ្រឿងចក្រឈូសឆាយដីព្រៃដែលអ្នកភូមិចំនួន ៤ភូមិ ធ្លាប់ចូលទៅរកឧស ជីកទំពាំង និងមើលគោក្របី ជាដើម។ អ្នកភូមិអះអាងថា សកម្មភាពបំផ្លាញព្រៃនេះមានការបើកដៃពីអាជ្ញាធរមូលដ្ឋាន។
តំណាងពលរដ្ឋភូមិក្បាលទាហាន នៃឃុំឈើតុំ លោក ម៉េង ប៊ុនរឿន ថ្លែងនៅថ្ងៃទី១២ ខែកក្កដា ថា ទីតាំងដីព្រៃដែលក្រុមអ្នកមានលុយកំពុងឈូសរំលោភយកនោះ គឺឋិតនៅចំណុចប្រសព្វគ្នារវាងភូមិចំនួនបួន គឺអន្សាចំបក់ កាប៉ាស់ ក្បាលទាហាន និងភូមិបំណក់។ ព្រៃនេះនៅក្បែរផ្ទះពលរដ្ឋ ហើយអ្នកភូមិទាំងបួនចូលអាស្រ័យផលក្នុងព្រៃនេះជាយូរមកហើយ ដូច្នេះគេគប្បីទុកជាដីព្រៃសហគមន៍៖ «អាជ្ញាធរអត់មានឃើញទៅរារាំងជនល្មើសដែលឈូសព្រៃឈើចោល មានតែដើរបំផុសឲ្យពលរដ្ឋទៅដណ្ដើមដីគ្នានៅកន្លែងហ្នឹង។ ពួកខ្ញុំសំណូមពរដល់អភិបាលស្រុក អភិបាលខេត្តជួយដោះស្រាយរឿងហ្នឹងជាបន្ទាន់ ព្រោះគ្រឿងចក្រកំពុងឈូសឆាយបន្តហើយ»។
លោកបញ្ជាក់ថា អ្នកចូលចាប់ និងទិញដីនៅចំណុចភ្នំតាកុច និងច្រាបផ្ចឹក បានដឹកគ្រឿងចក្រចំនួនបីគ្រឿងចូលឈូសឆាយជាថ្មីទៀតនៅថ្ងៃទី១២ ខែកក្កដា ក្រោយពីអ្នកភូមិជាង ៣០នាក់ ចូលរារាំងគ្រឿងចក្រចំនួន ៤គ្រឿងមិនឲ្យឈូសឆាយកាលពីដើមឆ្នាំ២០១៥។ លោកថា ក្រុមពលរដ្ឋនឹងប្រមូលស្នាមមេដៃនៅភូមិក្បាលទាហាន និងភូមិបំណក់ នៃឃុំឈើតុំ នៅដើមសប្ដាហ៍ទី២ ក្នុងខែកក្កដា ដើម្បីប្ដឹងទៅអាជ្ញាធរស្រុកក្រគរ សាលាខេត្តពោធិ៍សាត់ និងអាចដាក់ទៅស្ថាប័នតុលាការមួយច្បាប់ដែរ។
វិទ្យុអាស៊ីសេរី មិនអាចទាក់ទងអនុប្រធានភូមិអន្សាចំបក់ លោក នៅ វង្ស និងមេភូមិក្បាលទាហាន គឺលោក គល់ សុគន់ ព្រមទាំងអ្នកចូលទៅចាប់ដីឈ្មោះ សេង ហៀង និង ញ៉ាំង ញិន ដើម្បីសុំការបំភ្លឺចំពោះការចោទប្រកាន់នេះបានទេ នៅថ្ងៃទី១២ ខែកក្កដា។ ប៉ុន្តែ លោក នៅ វង្ស ធ្លាប់ប្រតិកម្មនឹងការចោទប្រកាន់នេះថា រូបលោកមិនបានជាប់ពាក់ព័ន្ធនឹងរឿងពុករលួយលក់ដីព្រៃអ្វីឡើយ។ ផ្ទុយទៅវិញ តំណាងពលរដ្ឋ គឺលោក ម៉េង ប៊ុនរឿន ទេដែលពូកែរករឿង និងចោទប្រកាន់គេឯងគ្មានភស្តុតាង។
ចំណែកមេភូមិអន្សាចំបក់ លោក ខ្លឹម ពៅ បញ្ជាក់ថា អ្នកភូមិដែលនាំគ្នាប្ដឹងតវ៉ានោះមិនរស់នៅក្នុងភូមិរបស់លោកទេ ដូច្នេះការតវ៉ាសុំទុកដីនោះជាដីព្រៃសហគមន៍ គឺមិនអាចទៅរួចឡើយ។ លោកថា បច្ចុប្បន្នលោកបានបែងចែកដីទំហំប្រមាណជិត ២០ហិកតារនៅក្បែរភ្នំតាកុច និងច្រាបផ្ចឹក ទៅឲ្យពលរដ្ឋក្នុងភូមិចំនួន ១៧៨គ្រួសារ ខណៈអ្នកភូមិអន្សាចំបក់ របស់លោកមានដីព្រៃសហគមន៍ទំហំ ១០០ហិកតារ ដើម្បីប្រើប្រាស់រួចហើយ៖ «ដីព្រៃនេះមិនមែនជាដីព្រៃរបស់ឯកជនណាមួយទេ ជាដីព្រៃរបស់រដ្ឋមែន វានៅជាប់ជើងភ្នំ ប៉ុន្តែនៅប្លុកភូមិខ្ញុំ ហើយខ្ញុំបានចែកឲ្យពលរដ្ឋម្នាក់បន្តិច។ គ្រឿងចក្រឈូសឆាយនោះ សម័យតេជោហើយវាតែងតែមានហើយ បងប្អូនប្អូនអ្នកដែលប្រកបអាជីវកម្មស៊ីឈ្នួលពីប្រជាពលរដ្ឋ»។
មន្ត្រីសម្របសម្រួលនៃសមាគមអាដហុក (Adhoc) ប្រចាំខេត្តពោធិ៍សាត់ លោក ភួង សុធា ថ្លែងថា សមាគមរបស់លោកកំពុងស៊ើបអង្កេតករណីក្រុមឈ្មួញ និងអាជ្ញាធរមូលដ្ឋានក្នុងស្រុកក្រគរ ទាក់ទងរឿងឈូសឆាយដីព្រៃរបស់រដ្ឋនេះដែរ។ លោកថា បើពលរដ្ឋប្រមូលភស្តុតាងបាន រួចដាក់បណ្ដឹងប្ដឹងទៅតុលាការ គឺលោកគាំទ្រ ហើយខាងលោកនឹងផ្ដល់មេធាវីជូនក្រុមប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។