ប្រជាពលរដ្ឋដែលមានទំនាស់ដីធ្លីជាមួយនឹងក្រុមហ៊ុន អិម.ឌី.អែស (MDS) របស់លោកឧកញ៉ា ទ្រី ភាព នៅឃុំអន្លង់រាប ស្រុកវាលវែង ខេត្តពោធិ៍សាត់ កំពុងតែព្រួយបារម្ភពីសុវត្ថិភាពផ្ទាល់ខ្លួន បន្ទាប់ពីមានករណីលួចដុតរោងចាំដីរបស់ពួកគាត់ និងមានការបាញ់បោះជាច្រើនគ្រាប់នៅក្បែរនោះ។ មន្ត្រីសមាគមការពារសិទ្ធិមនុស្សអាដហុក (Adhoc) បានចាត់ទុកករណីនេះថា ជាការគំរាមកំហែង និងរំលោភសិទ្ធិមនុស្សធ្ងន់ធ្ងរ។
តំណាង និងប្រជាពលរដ្ឋចំនួន ៣គ្រួសារ ដែលមានដីនៅភូមិក្រាំងរងៀង នៃឃុំអន្លង់រាប បានបញ្ជាក់ប្រាប់វិទ្យុអាស៊ីសេរី នៅថ្ងៃទី១០ ខែកុម្ភៈ ថា ក្រោយពីខ្លួនបានចូលទៅបោះបង្គោល និងធ្វើរោងចាំដីចំនួន ៩ហិកតារ នៅចំណុច អិម.ឌី.អែស ២ (MDS2) ដែលខ្លួនធ្លាប់កាន់កាប់នោះ ស្រាប់តែមានករណីគំរាមកំហែងផ្ទួនៗគ្នា នៅថ្ងៃទី៤ ទី៥ ទី៦ និងថ្ងៃទី៨ ខែកុម្ភៈ ដែលធ្វើឲ្យពួកគាត់កាន់តែមានភាពភ័យខ្លាចខ្លាំងក្នុងការទាមទារដីរបស់ពួកគាត់មកវិញ។
ប្រជាពលរដ្ឋម្នាក់ក្នុងចំណោម ៣គ្រួសារ អ្នកស្រី អ៊ុន ចោច មានប្រសាសន៍ថា រោងចាំដីរបស់អ្នកស្រីដែលមានទំហំទទឹង ៥ម៉ែត្រ បណ្ដោយ ៨ម៉ែត្រ ត្រូវបានគេលួចដុតនៅក្រោយពេលដែលសន្តិសុខរបស់ក្រុមហ៊ុន អិម.ឌី.អែស ចូលមកហាមឃាត់ និងធ្វើសកម្មភាពដកបង្គោលរបងអ្នកស្រីក្រវាត់ចោល៖ «ខ្លាចណាស់ក្នុងចិត្តណាលោកគ្រូ! ដូចថាឯងមើលមិនឃើញ ខ្លាចគេលួចបាញ់លួចអីអ៊ីចឹង។ បាញ់ម៉ោង៩ ទៅម៉ោង១០ ហ្នឹង បាញ់ប្រាំគ្រាប់ប៉ូងៗជាប់គ្នាអ៊ីចឹង ដល់បន្ទាប់មកទៀត ៣គ្រាប់ផាំងៗជាប់ៗគ្នាទៀត»។
ចំណែកតំណាង និងជាប្រជាពលរដ្ឋម្នាក់ទៀត លោក ជុំ សារ៉ាត បញ្ជាក់ថា បច្ចុប្បន្នរូបលោកត្រូវបានតំណាងក្រុមហ៊ុនប្ដឹងទៅសាលាឃុំអន្លង់រាប ពីបទថាលោករំលោភកាន់កាប់លើដីរបស់ក្រុមហ៊ុនចំនួន ៩ហិកតារនេះ ក៏ប៉ុន្តែលោកយល់ថា ការចោទប្រកាន់ និងរូបភាពនៃការគំរាមកំហែងផ្សេងៗកាលពីពេលថ្មីៗនេះ គឺដោយសារតែលោកមានភាពសកម្មនិយមក្នុងការតវ៉ារឿងដីធ្លីជាមួយនឹងក្រុមហ៊ុន។
វិទ្យុអាស៊ីសេរី មិនអាចទាក់ទងប្រធានសន្តិសុខក្រុមហ៊ុន អិម.ឌី.អែស លោក កេត ប៊ុនថៃ ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី១០ ខែកុម្ភៈ។
ទោះជាយ៉ាងណា អនុប្រធានក្រុមហ៊ុនគ្រប់គ្រងនៅចំណុច អិម.ឌី.អែស ២ លោក ទ្រា ងិន មានប្រសាសន៍យ៉ាងខ្លីថា លោកទើបតែចូលមកកាន់តំណែងជាអនុប្រធាននេះ ដូច្នេះការងារមួយចំនួន លោកមិនបានដឹងច្បាស់នោះទេ។ ហើយលោកបានជំរុញឲ្យវិទ្យុអាស៊ីសេរី សួររឿងនេះទៅមេឃុំអន្លង់រាប វិញ។
ចំណែកមេឃុំអន្លង់រាប លោក អ៊ុំ សេង មានប្រសាសន៍ថា កន្លងមកលោកពិតជាបានប្រាប់ឲ្យប្រជាពលរដ្ឋដែលមានបញ្ហាដីធ្លីជាមួយនឹងក្រុមហ៊ុន ចូលទៅបោះបង្គោលសម្គាល់ព្រំដីដែលខ្លួនធ្លាប់កាន់កាប់ពិតមែន ក៏ប៉ុន្តែករណីក្រុមហ៊ុនប្ដឹងប្រជាពលរដ្ឋចំនួន ៣គ្រួសារនេះ ភាគីទាំងសងខាងសុទ្ធតែអះអាងថា ជាដីរបស់ខ្លួនរៀងៗខ្លួន៖ «វាពិបាកដែរ ខ្ញុំអត់ទាន់ថានរណាខុស ឬត្រូវទេ ពីព្រោះក្រុមហ៊ុនគេថាជួលគេធ្វើ ដល់អាណត្តិគេឈូសហើយ យើងទៅបោះយក (បោះបង្គោល) ខ្ញុំត្រូវដោះថ្ងៃហ្នឹង ហើយម្សិលមិញ តែរវល់ម្សិលមិញការក្មួយ ហើយថ្ងៃនេះខ្ញុំប្រជុំនៅខេត្ត ខ្ញុំត្រឡប់ទៅវិញដោះហើយបាទ»។
មន្ត្រីសម្របសម្រួលសមាគមអាដហុក ប្រចាំខេត្តពោធិ៍សាត់ លោក ភួង សុធា ថ្លែងថា ទាក់ទងនឹងករណីលួចដុតរោង និងបាញ់បោះគំរាមកំហែងយ៉ាងអនាធិបតេយ្យនេះ វាគឺជារឿងរំលោភសិទ្ធិមនុស្ស។ លោកនឹងធ្វើលិខិតអន្តរាគមន៍មួយទៅសាលាខេត្ត ដើម្បីពិនិត្យមើល និងចាត់វិធានការចំពោះករណីនេះឲ្យបានឆាប់៖ «ករណីនេះ យើងឃើញថា វាអាចពាក់ព័ន្ធនឹងរឿងនយោបាយផងដែរ ព្រោះអីរោងដែលគេដុតហ្នឹង គឺជារបស់មនុស្សម្នាក់សកម្មក្នុងការតវ៉ារឿងដីហ្នឹង ហើយគាត់ក៏ជាសកម្មជនរបស់គណបក្សសង្គ្រោះជាតិ ដែរ»។
ក្រុមហ៊ុន អិម.ឌី.អែស របស់លោកឧកញ៉ា ទ្រី ភាព ចាប់ផ្ដើមមានទំនាស់ជាមួយនឹងប្រជាពលរដ្ឋតាំងពីឆ្នាំ២០១០។ បច្ចុប្បន្ន មានប្រជាពលរដ្ឋចំនួន ១០៧គ្រួសារ មកពីភូមិចំនួន៣ គឺភូមក្រាំងរងៀង ចម្ការជ្រៃខាងជើង និងភូមិចម្ការជ្រៃខាងត្បូង នៃឃុំអន្លង់រាប បានធ្វើញត្តិភ្ជាប់ស្នាមមេដៃដាក់ជូនសាលាខេត្តពោធិ៍សាត់ តាមរយៈសមាគមអាដហុក ប្រចាំខេត្តនេះ ដើម្បីឲ្យជួយដោះស្រាយ ក៏ប៉ុន្តែរហូតមកដល់ពេលនេះ គេមិនទាន់ឃើញមានដំណោះស្រាយនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។