ពលរដ្ឋនៅខេត្តក្រចេះខកចិត្តដែលអាជ្ញាធរមិនដោះស្រាយបញ្ហាដីធ្លីជូនពួកគាត់
2024.11.29
ពលរដ្ឋដែលមានវិវាទដីធ្លីជាមួយក្រុមហ៊ុនវៀតណាម កាម៉ាដេនូ វេនឈ័រ (ខេមបូឌា) លីមីធីត (Kamdhenu Ventures Cambodia Limited) (KVCL) បានប្រមូលផ្ដុំគ្នាដាក់ញត្តិនៅក្រសួងដែនដីនគរូបនីយកម្ម និងសំណង់ កាលពីថ្ងៃទី៧ ខែវិច្ឆិកា ឆ្នាំ២០២៤។
រូប៖ ពលរដ្ឋផ្ដល់ឱ្យ
ពលរដ្ឋមានវិវាទដីធ្លីជាមួយក្រុមហ៊ុនវៀតណាម កាម៉ាដេនូ វេនឈ័រ ខេមបូឌា (Kamdhenu Ventures Cambodia Limited) (KVCL) នៅខេត្តក្រចេះ ខកចិត្តដែលមន្ទីរកសិកម្មរុក្ខា ប្រមាញ់ និងនេសាទ មិនដោះស្រាយបញ្ហាដីធ្លីជូនពួកគាត់ទាំងស្រុង ដោយអាជ្ញាធរកាត់ឆ្វៀលដីជូនពលរដ្ឋតែ ១១គ្រួសារ ក្នុងចំណោម២៥០គ្រួសារ។ ការលើកឡើងនេះ ធ្វើឡើងក្រោយពេលមន្ទីរកសិកម្មខេត្តក្រចេះ បានកោះហៅពលរដ្ឋទៅដោះស្រាយបញ្ហាដីធ្លី នៅសាលាឃុំកោះខ្ញែរ នៅថ្ងៃទី២៧ ខែវិច្ឆិកា។
ពលរដ្ឋមានជម្លោះដីធ្លីជាមួយក្រុមហ៊ុនវៀតណាម នៅខេត្តក្រចេះប្រមាណជិត ១០០គ្រួសារ បានប្រមូលម្ដុំគ្នា ជាថ្មីនៅឯសាលាឃុំកោះខ្ញែរស្រុកសំបូរ ដើម្បីទាមទារឱ្យអាជ្ញាធរឃុំលើកយកបញ្ហាដីធ្លីរបស់ពួកគាត់ទៅដោះស្រាយជាមួយមន្ទីរកសិកម្ម រុក្ខាប្រមាញ់ និងនេសាទ។
ពលរដ្ឋរស់នៅភូមិស្វាយចេក លោក ស៊ឹង ករុណា ប្រាប់វិទ្យុអាស៊ីសេរី នៅថ្ងៃទី២៨ ខែវិច្ឆិកា ថា ពលរដ្ឋខកចិត្តចំពោះមន្ទីរកសិកម្មខេត្តក្រចេះ ដែលពុំកាត់ឆ្វៀលដីពីក្រុមហ៊ុនជូនពលរដ្ឋទាំង២៥០គ្រួសារ តែបែរជាកាត់ឆ្វៀលដី ឱ្យពលរដ្ឋតែ ១១គ្រួសារ ដោយអាជ្ញាធរអះអាងថា ពលរដ្ឋទាំង ១១គ្រួសារនោះ ធ្លាប់ឱ្យលុយទៅមន្ត្រីសុរិយោដីខេត្តក្រចេះ និងមានលិខិតកាត់ឆ្វៀលដី តាំងពីយូរមកហើយ។
លោក ស៊ឹង ករុណា៖ «ទៅគ្នាច្រើនមកដោះតែ១១គ្រួសារ វាអត់ត្រឹមត្រូវទេ ប្រជាពលរដ្ឋអត់ទទួលយកបានទេ។ និយាយរួមទៅមន្ត្រីនេះ វាធ្វើបំបែកក្រុម។ ខ្ញុំគិតថាពួកគាត់មកនេះ មកបែបណាថា យកព័ត៌មានយកទៅផ្សព្វផ្សាយឱ្យថ្នាក់ដឹកនាំយល់ច្រឡំមកលើប្រជាពលរដ្ឋដែលមិនយល់ស្រប»។
ជាច្រើនខែមកនេះពលរដ្ឋទាំង ៥ភូមិ នៅក្នុងឃុំកោះខ្ញែរ ស្រុកសំបូរ ដែលមានវិវាទដីធ្លីជាមួយក្រុមហ៊ុនវៀតណាម គឺ គឺភូមិកំពង់ព្នៅ កោះច្បារ ស្វាយចេក បាយសំណុំ និងភូមិជើងពាត បានខ្នះខ្នែងរកកិច្ចអន្តរាគមន៍រឿងដីធ្លីជាមួយអាជ្ញាធរពាក់ព័ន្ធ ជាច្រើនដងតែគ្មានដំណោះស្រាយ។ ជាក់ស្ដែងចាប់តាំងពីថ្ងៃទី៧ រហូតដល់ថ្ងៃទី១៧ ខែវិច្ឆិកា កន្លងមក ពលរដ្ឋបានមកដាក់ញត្តិសុំកិច្ចអន្តរាគមន៍នៅក្រសួងដែនដី ក្រសួងកសិកម្ម ក្រសួងយុត្តិធម៌ ខុទ្ទកាល័យនាយករដ្ឋមន្ត្រី និងក្រសួងមហាផ្ទៃ ក៏ប៉ុន្តែ ពួកគាត់នៅតែមិនទទួលបានដំណោះស្រាយដដែល។ ផ្ទុយទៅវិញ ពលរដ្ឋថា អាជ្ញាធរបានគំរាមកំហែងចាប់ដាក់គុក ប្រសិនបើពួកគាត់ពុំឈប់តវ៉ារឿងដីធ្លីនេះ។
វិទ្យុអាស៊ីសេរីពុំអាចទាក់ទងប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ លោក ទ្រី សុភក្តិ និងអភិបាលរងស្រុកសំបូរ លោក ចេង គឹមជប់ ដើម្បីឆ្លើយតបជុំវិញរឿងនេះបានទេ នៅថ្ងៃទី២៨ ខែវិច្ឆិកា។
ទោះជាយ៉ាងណា លោក ចេង គឹមជប់ ធ្លាប់ប្រាប់វិទ្យុអាស៊ីសេរីថា វិវាទដីធ្លីរវាងពលរដ្ឋ និងក្រុមហ៊ុនវៀតណាមនេះ អាជ្ញាធរខេត្ត និងស្រុក គ្មានវិធានការកាត់ឆ្វៀលដីជូនពលរដ្ឋនោះឡើយ ព្រោះថា ដីដែលពលរដ្ឋទាមទារយកកាន់កាប់នោះ គឺជាកម្មសិទ្ធិស្របច្បាប់របស់ក្រុមហ៊ុន។
ពាក់ព័ន្ធរឿងដីធ្លីនេះ លោកនាយករដ្ឋមន្ត្រី ហ៊ុន ម៉ាណែត នៅថ្ងៃទី២៨ ខែវិច្ឆិកា បានបង្ហោះវីដេអូខ្លីមួយមានរយៈពេល ១នាទី ដោយបញ្ជាក់ថា នៅក្នុងអាណត្តិទី៧នេះ លោកប្ដេជ្ញាចិត្តថាត្រូវតែបញ្ចប់បញ្ហាវិវាទដីធ្លីរបស់ពលរដ្ឋនៅទូទាំងប្រទេស។ ក្នុងនោះលោកបានសម្រេចចំណាយថវិកាចំនួន ១០០លានដុល្លារអាមេរិក ដើម្បីជំរុញឱ្យអាជ្ញាធរពាក់ព័ន្ធរៀបចំចុះបញ្ជីកម្មសិទ្ធិដីធ្លី ជូនពលរដ្ឋ។
លោក ហ៊ុន ម៉ាណែត៖ «តាំងពីដើមអាណត្តិខ្ញុំបានឯកភាពជាមួយនឹងសំណើក្រសួង។ ទី១ បង្កើនកញ្ចប់ថវិកាដើម្បីធ្វើការងារនេះ។ ខ្ញុំប្រាប់ថារុញឱ្យលឿន កាលមុនយើងមានក្រុមការងារចុះតូចៗ អាណត្តិថ្មីនេះយើងរៀបចំជាង៥នាក់សម្រាប់ចុះធ្វើ។ ខ្ញុំចុះហត្ថលេខាថវិកានេះ ដើម្បីបង្កើនសម្រាប់ធ្វើការងារនេះ ទាំងការលើកទឹកចិត្តប្អូនធ្វើការ។ យើងគ្រោង១០០លានដុល្លារដើម្បីរុញបញ្ចប់ ហើយខ្ញុំថាអាណត្តិនេះអាចបញ្ចប់តែម្ដង។»
អនុប្រធានផ្នែកសិទ្ធិមនុស្សដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី សង្កេតឃើញថា វិវាទដីធ្លីនៅខេត្តក្រចេះរវាងពលរដ្ឋ និងក្រុមហ៊ុនវៀតណាមនេះ មានភាពមិនប្រក្រតីច្រើន ដែលអាជ្ញាធរពាក់ព័ន្ធត្រូវតែពិនិត្យឱ្យបានច្បាស់លាស់។ ទន្ទឹមនឹងនោះលោកថា ករណីនេះអាជ្ញាធរពាក់ព័ន្ធ ក៏គួរតែកាត់ឆ្វៀលដី ជូនពលរដ្ឋឱ្យបានសមរម្យ ហើយមិនត្រូវបដិសេធសំណើរបស់ពួកគាត់ ដោយគ្មានហេតុផលត្រឹមត្រូវនោះឡើយ។
លោក យិន ម៉េងលី៖ «សូមឱ្យក្រសួង ក៏ដូចជាមន្ទីរ ព្រមទាំងអាជ្ញាធរ ធ្វើការពិនិត្យលើចំណុចនេះឱ្យបានច្បាស់លាស់ឡើងវិញ ដើម្បីធ្វើការសម្របសម្រួលជាមួយប្រជាពលរដ្ឋ ហើយប្រជាពលរដ្ឋចូលរួមជាមួយអាជ្ញាធរដើម្បីលិខិតកាត់ឆ្វៀលជាមួយអាជ្ញាធរទៅ ហើយយើងចុះពិនិត្យទិដ្ឋភាពជាក់ស្ដែង។ ថាតើក្រុមហ៊ុន កាម៉ាដេនូ វេនឈ័រ កាត់ឱ្យប្រជាពលរដ្ឋនឹងនៅចំណុចណា? ហើយថាតើក្រុមហ៊ុនយុវជនស្វាយរៀងបានទៅរំលោភ មែនឬក៏មិនមែន ហើយយើងសម្របសម្រួលគ្នាទៅដើម្បីបញ្ចប់បញ្ហាហ្នឹង»។
ពលរដ្ឋដែលមានវិវាទដីធ្លីជាមួយក្រុមហ៊ុនវៀតណាម កាម៉ាដេនូ វេនឈ័រ ខេមបូឌា មានចំនួន២៥០គ្រួសារ ក្នុងទំហំដីជាង ១ពាន់(១.១១១)ហិកតារ។ ពលរដ្ឋអះអាងថា បានចូលមកអាស្រ័យផលលើដីនោះ អ្នកខ្លះតាំងពីឆ្នាំ១៩៨០ និងខ្លះទៀតនៅឆ្នាំ២០០៨។ រីឯក្រុមហ៊ុនទើបតែទទួលបានសិទ្ធិវិនិយោគលើដីសម្បទានសេដ្ឋកិច្ច ពីរដ្ឋាភិបាលនៅឆ្នាំ២០០៩ ដូច្នេះពលរដ្ឋថា ដីនោះ គឺជាកម្មសិទ្ធិរបស់ពលរដ្ឋពុំមែនជារបស់ក្រុមហ៊ុននោះឡើយ។
ប្រជាពលរដ្ឋអះអាងថា ពួកគាត់នឹងឡើងទៅតវ៉ានៅរាជធានីភ្នំពេញ ដើម្បីស្នើសុំកិច្ចអន្តរាគមន៍ជាថ្មីទៀតពីរដ្ឋាភិបាល លោក ហ៊ុន ម៉ាណែត ប្រសិនបើអាជ្ញាធរពាក់ព័ន្ធ នៅតែមិនព្រមកាត់ឆ្វៀលដីធ្លីជូនដល់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ