សាក្សី​ប្ដឹង​រក​យុត្តិធម៌​រឿង​សមត្ថកិច្ច​វាយ​ពលរដ្ឋ​ម្នាក់​ស្លាប់ ពេល​ជាប់​ឃុំ​នៅ​បន្ទាយមានជ័យ

ដោយ ថន ថារ៉ូ
2020-01-11
អ៊ីម៉ែល
មតិ
Share
បោះពុម្ព
អ្នក​តវ៉ា​រឿង​ដីធ្លី ៥នាក់​ ដែល​អាជ្ញាធរ​ចាប់​​ឃុំឃាំង និង​វាយដំ កាល​ពី​ថ្ងៃ​ទី២៨ ខែ​ធ្នូ ឆ្នាំ២០១៩។ ក្នុង​ចំណោម​អ្នក​ជាប់​ឃុំ ៥នាក់ មាន​ម្នាក់ គឺ​លោក ទុយ ស្រស់ បាន​​ស្លាប់​ក្នុង​អំឡុង​ពេល​ឃុំ​ខ្លួន ពី​ថ្ងៃ​ទី១ ខែ​មករា ឆ្នាំ២០២០។
អ្នក​តវ៉ា​រឿង​ដីធ្លី ៥នាក់​ ដែល​អាជ្ញាធរ​ចាប់​​ឃុំឃាំង និង​វាយដំ កាល​ពី​ថ្ងៃ​ទី២៨ ខែ​ធ្នូ ឆ្នាំ២០១៩។ ក្នុង​ចំណោម​អ្នក​ជាប់​ឃុំ ៥នាក់ មាន​ម្នាក់ គឺ​លោក ទុយ ស្រស់ បាន​​ស្លាប់​ក្នុង​អំឡុង​ពេល​ឃុំ​ខ្លួន ពី​ថ្ងៃ​ទី១ ខែ​មករា ឆ្នាំ២០២០។
Photo Provided

សាក្សី ៣​នាក់ បាន​ប្ដឹង​រក​យុត្តិធម៌​ទៅ​សាលាដំបូង​ខេត្ត​បន្ទាយមានជ័យ ករណី​ដែល​សមត្ថកិច្ច​វាយ​ធ្វើ​ទារុណកម្ម​ប្រជាពលរដ្ឋ​មាន​ទំនាស់​ដីធ្លី​ម្នាក់​ស្លាប់​ក្នុង​ពេល​ជាប់ឃុំ​នៅ​ទីបញ្ជាការ​កង​រាជ​អាវុធ​ហត្ថ​ខេត្ត កាលពី​ថ្ងៃ​ទី​១ មករា។ មន្ត្រី​សង្គម​ស៊ីវិល ចាត់​ទុក​ទង្វើ​របស់​សមត្ថកិច្ច​នេះ​ថា ជា​អំពើ​មនុស្សឃាត​ឃោរឃៅ ដែល​តុលាការ​ត្រូវ​ចាត់ការ​តាមច្បាប់។

សាក្សី​ទាំង ៣​នាក់ បាន​បញ្ជូន​ពាក្យ​បណ្ដឹង​របស់​ខ្លួន​ទៅ​ដល់​សាលាដំបូង​ខេត្ត​បន្ទាយមានជ័យ​រួច​ហើយ កាល​ពី​រសៀល​ថ្ងៃ​ទី​១០ មករា។

តំណាង​សាក្សី​ម្នាក់​ក្នុងចំណោម ៣​នាក់ ដែល​បាន​ប្ដឹង​រក​យុត្តិធម៌ គឺ​លោក អាន រួន ប្រាប់​អាស៊ីសេរី នៅ​រសៀល​ថ្ងៃ​ទី​១១ មករា​ថា ពួក​លោក​ទាំង ៣​នាក់ ក៏​ជា​ជនរងគ្រោះ ដែល​មន្ត្រី​កង​រាជ​អាវុធ​ហត្ថ​ខេត្ត​បន្ទាយមានជ័យ​ ចាប់​ឃុំ​ខ្លួន និង​វាយដំ​អស់​ជាច្រើន​ថ្ងៃ​ដែរ។ លោក​បញ្ជាក់​ថា មូល​ហេតុ​ដែល​ពួកគាត់​ប្ដឹង ដើម្បី​ទាមទារ​តុលាការ​ឱ្យ​ជួយ​រក​យុត្តិធម៌​ដល់​ពួកគាត់ និង​លោក ទុយ ស្រស់ ដែល​សមត្ថកិច្ច​វាយ​ធ្វើ​ទារុណកម្ម​រហូតដល់​ស្លាប់​នៅ​ពេល​ឃុំខ្លួន និង​ដើម្បី​ឱ្យ​ចាប់​ជនល្មើស​ផ្ដន្ទាទោស​តាម​ច្បាប់៖ «ទី១ ឱ្យ​ដក​ចេញពី​តំណែង ទី​២​សុំ​ឱ្យ​ជាប់ពន្ធនាគារ កុំ​ឱ្យ​វា​ចេះតែ​វា​ចេះតែ​ធ្វើបាប​ពលរដ្ឋ​ស្លូតត្រង់ ខ្ញុំ​ឈឺចាប់​ណាស់​គេ​វាយ​ធ្វើបាប​ខ្ញុំ សម្លុត​សួរ​បែបយ៉ាង​ទាំងអស់។ ខ្ញុំ​សុំ​ឱ្យ​ដាក់គុក​ហើយ​ឱ្យ​វា​បង់​ជំងឺ​ចិត្ត​ខ្ញុំ​ទៀត ព្រោះ​គាត់​មក​ទាត់​ខ្ញុំ ហើយ​មក​សម្លុត​ខ្ញុំ​ថា ជា​ចោរលួច​ដី​គេ»

លោក ទុយ ស្រស់ តំណាង​ពលរដ្ឋ​មាន​ទំនាស់​ដីធ្លី​នៅ​ភូមិ​ជ្រៃ ឃុំ​ចង្ហា ស្រុក​អូរជ្រៅ បាន​ស្លាប់​នៅ​ថ្ងៃ​ទី​១ មករា គឺ​ក្រោយ​ពេល​មន្ត្រី​កងរាជអាវុធហត្ថ​ខេត្ត​បន្ទាយមានជ័យ​ចាប់ខ្លួន និង​បញ្ជូន​ទៅ​ដាក់​ឃុំ​នៅ​ទីបញ្ជាការ​កងរាជអាវុធហត្ថ​ខេត្ត ចាប់ពី​ថ្ងៃ​ទី​២៨ ដល់​ថ្ងៃ​ទី​៣១ ខែ​ធ្នូ ឆ្នាំ​២០១៩។ កាលនោះ សមត្ថកិច្ច​បាន​ចាប់ខ្លួន​ប្រជាពលរដ្ឋ​ចំនួន ៥​នាក់​យក​ទៅ​សាកសួរ ដោយសារតែ​ពួកគេ​បាន​តវ៉ា​រឿង​ទំនាស់​ដី​របស់​ពួកគាត់​នៅ​ស្រុក​ស្វាយចេក។

កាល​ពី​ថ្ងៃ​ទី​២៨ ខែ​ធ្នូ នោះ ប្រជាពលរដ្ឋ​ជាង ១០០​នាក់ បាន​នាំគ្នា​តវ៉ា​នៅមុខ​សាលាខេត្ត​បន្ទាយមានជ័យ ទាមទារ​ឱ្យ​អាជ្ញាធរ​ខេត្ត ចេញទៅ​ជួប​ពួកគាត់​ពន្យល់​អំពី​មូលហេតុ ដែល​មិន​ឱ្យ​ពួក​គាត់​​កាន់កាប់​ដី​ទំនាស់ ប៉ុន្តែ​ពេលនោះ​អាជ្ញាធរ​ខេត្ត​មិនបាន​ចេញ​ជួប​ក្រុម​អ្នកតវ៉ា​នោះ​ឡើយ​។ នៅ​ថ្ងៃ​នោះ ពលរដ្ឋ​ក៏​មិន​ព្រម​ត្រឡប់​ទៅ​ផ្ទះ​វិញ​ដែរ ដោយ​រង់ចាំ​ក្បែរ​របង​សាលាខេត្ត រហូតដល់​ម៉ោង ២​រសៀល ស្រាប់តែ​មន្ត្រី​កងរាជអាវុធហត្ថ​ខេត្ត​ជាច្រើន​នាក់​ ទៅ​បង្ក្រាប​ក្រុម​អ្នកតវ៉ា​ទាំងនោះ និង​បាន​ចាប់​មនុស្ស ៥​នាក់​យក​ទៅ​ឃុំខ្លួន​។ អំឡុង​ពេល​សមត្ថកិច្ច​ឃុំខ្លួន​នោះ មាន​ពលរដ្ឋ​ម្នាក់​​បាន​ស្លាប់ និង ៤​នាក់​ផ្សេងទៀត ត្រូវ​បាន​ដោះលែង​វិញ​នៅ​ថ្ងៃ​ទី​៣ មករា។

ទាក់ទង​នឹង​បញ្ហា​នេះ ​អ្នកនាំពាក្យ​កងរាជអាវុធហត្ថ​លើ​ផ្ទៃ​ប្រទេស លោក អេង ហ៊ី ប្រាប់​អាស៊ីសេរី​​នៅ​​ថ្ងៃ​ទី​១០ ​មករា​ថា មន្ត្រី​អាវុធហត្ថ​មិន​បាន​ប្រើ​ហិង្សា​លើ​ជនរងគ្រោះ​ដូច​ការ​ចោទ​ប្រកាន់​​​ឡើយ។ លោក​បញ្ជាក់​ថា អាជ្ញាធរ​ខេត្ត​ក៏បាន​ចេញ​សេចក្ដី​ថ្លែងការណ៍​ជុំវិញ​បញ្ហា​នេះ​រួច​ហើយ​ដែរ​៖ «បើ​មាន​មែន​សូម​សាក្សី​ហ្នឹង​គាត់​ឱ្យ​ប្ដឹង​ទៅ​តុលាការ យើង​នឹង​ទទួល​យក ព្រោះ​ធម្មតា​ទេ អ្នកណា​ដែល​ប្រើ​ហិង្សា ទោះបី​សមត្ថកិច្ច​ក៏ដោយ​ត្រូវតែ​ទទួលខុសត្រូវ​ចំពោះ​មុខ​ច្បាប់។ អីចឹង​យើង​ចាំ​ទទួល​យក​នៅ​ពេល​ដែល​មាន​ពាក្យបណ្ដឹង។ បាទ​យើង​ហ្នឹង​ចាត់វិធានការ​តាម​ផ្លូវ​ច្បាប់ ព្រោះ​យើង​បាន​អប់រំ​ណែន​ធ្វើ​អ្វី​ទៅតាម​នីតិវិធី​ទាំងអស់»

អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (Adhoc) លោក សឹង សែនករុណា ថ្លែង​ថា លោក​បាន​ត្រៀម​មេធាវី​ការពារ​ក្ដី ដល់​សាក្សី​លើ​សំណុំរឿង​រួច​ហើយ ដើម្បី​ស្វែងរក​យុត្តិធម៌​ដល់​ជនរងគ្រោះ​។ លោក​បញ្ជាក់​ថា សំណុំ​រឿង​នេះ បើ​តាម​ដូច​ការ​អះអាង​របស់​សាក្សី​មែន នោះ​គឺជា​អំពើ​មនុស្សឃាត​ឃោរឃៅ ដែល​ជន​ប្រព្រឹត្ត​ត្រូវ​ទទួលទោស​ឱ្យ​បាន​ធ្ងន់ធ្ងរ​តាមច្បាប់ ដោយ​មិន​អាច​លើកលែង​បាន​ឡើយ៖ «អីចឹង​ហើយ​យើង​អត់​ចង់​ឃើញ​អំពើ​បែបនេះ​កើតឡើង​បន្ត​ទៀត នៅ​ក្នុង​ប្រព័ន្ធ​អនុវត្ត​របស់​កម្ពុជា​នោះ​ទេ។ បើសិនជា​សង្ស័យ​ណា​ម្នាក់​មាន​បទល្មើស​ណាមួយ​គួរតែ​បញ្ជូន​ទៅ​តាម​សន្តិវិធី ដោយ​មិន​ត្រូវ​បើ​ហិង្សា​ធ្វើទុក្ខបុកម្នេញ​ទៅលើ​ពួកគេ​ទេ ហើយ​យើង​ចង់​ឃើញ​អ្នក​ទាំងអស់​នោះ​ត្រូវ​គោរព​ទៅតាម​តួនាទី​របស់​ខ្លួន ដើម្បី​ធ្វើការ​ងារ​តាម​តួនាទី​ឱ្យ​បាន​ត្រឹមត្រូវ ហើយ​យើង​ពង្រឹង​យុត្តិធម៌​សង្គម​របស់​ប្រទេស​យើង​ហ្នឹង​ឱ្យ​បាន​ត្រឹមត្រូវ​ផង​ដែរ»

សាក្សី​ទាំងនោះ​បញ្ជាក់​ថា សមត្ថកិច្ច​បាន​វាយដំ​ទាត់​ធាក់ និង​ដាល់​ទៅលើ​ផ្ទៃមុខ​លោក ទុយ ស្រស់ សន្លប់​បាត់ស្មារតី​ម្ដង​ហើយ​ម្ដងទៀត តាំង​ពី​ថ្ងៃ​ចាប់ខ្លួន​ដំបូង ដល់​ថ្ងៃ​ទី​៣១ ខែ​ធ្នូ រហូតដល់​ជនរងគ្រោះ​ធ្លាក់ខ្លួន​ឈឺ​ធ្ងន់ ទើប​មន្ត្រី​អាវុធហត្ថ​បញ្ជូន​ពួក​លោក និង​ជនរងគ្រោះ​ទៅ​ពន្ធនាគារ​ខេត្ត​បន្ទាយមានជ័យ។

លោក សឹង សែនករុណា ថ្លែង​ថា អង្គការ​របស់​លោក​បន្ត​តាមដាន​រឿង​នេះ​ទៀត យ៉ាង​ចិត្ត​ទុកដាក់ ដើម្បី​ផ្ដល់​យុត្តិធម៌​ជនរងគ្រោះ​ផង និង​ការពារ​កុំ​ឱ្យ​ជនល្មើស ចេះតែ​វាយដំ​ប្រជាពលរដ្ឋ​ដោយ​ខុសច្បាប់​តាម​អំពើ​ចិត្ត​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

សំបូរ

ពី ភ្នំពេញ

ខ្ញុំមិនសង្ឃឹមថាទទួលបានយុត្តិធម៌នោះទេ

Jan 15, 2020 08:11 PM

គេហទំព័រ​ទាំងមូល