អ្នកស្រី ជ័យ ផល្លា បានឲ្យដឹងនៅថ្ងៃទី៣០ មិថុនា ថា ប្ដីគាត់ឈ្មោះ ជុំ សុន អាយុ ៣៩ឆ្នាំ និងបងប្រុសឈ្មោះ ជុំ សន អាយុជាង ៤០ឆ្នាំ នៅម៉ោងជាង ៩ព្រឹក ថ្ងៃ៣០ មិថុនា បានទៅរារាំងគ្រឿងចក្រក្រុមហ៊ុនសាណាន កុំឲ្យឈូសចូលដីស្រែគាត់ ក៏ត្រូវអ្នកស្លៀកពាក់យោធាបាញ់ឲ្យរបួស និងវាយក្បាលប្ដីគាត់ និងបងថ្លៃគាត់ដោយដំបង បណ្ដាលឲ្យរបួសទាំង ២នាក់បងប្អូន។
មេឃុំតាំងសំរោង លោក គង់ សឿន មានប្រសាសន៍ថា អាជ្ញាធរខេត្តកំពង់ស្ពឺ ប្រគល់ដីប្រមាណ ៩០០ហិកតារនៅឃុំក្រាំងដីវ៉ាយ ឲ្យក្រុមហ៊ុនសាណាន ធ្វើការអភិវឌ្ឍតាំងពីឆ្នាំ២០០៨មក។ ក្រោយមកអ្នកភូមិកកោះ ចំនួន ៣៦គ្រួសារ ត្រូវកាត់ពីឃុំក្រាំងដីវ៉ាយ មកឲ្យពលរដ្ឋឃុំតាំងសំរោង តែដីស្រែគាត់នៅឃុំក្រាំងដីវ៉ាយ ដដែលទេ។ នៅពេលដែលក្រុមហ៊ុនសាណាន ប្រើគ្រឿងចក្រចូលឈូសដី អ្នកភូមិលើកគ្នាទៅការពារដី ស្រាប់តែខាងក្រុមហ៊ុនសាណាន ប្រើអាវុធ និងដំបង បាញ់និងវាយបណ្ណាល័យឲ្យអ្នកភូមិរបួសដៃឆ្វេងម្នាក់ និងវាយដំបន្ថែមឲ្យរបួសម្នាក់ទៀត។
វិទ្យុអាស៊ីសេរី មិនអាចទាក់ទងក្រុមហ៊ុនសាណាន ជម្រាបសួរព័ត៌មានបានទេ។ ក្រុមគ្រួសារជនរងគ្រោះបានឲ្យដឹងថា អាវុធហត្ថខេត្តកំពង់ស្ពឺ កំពុងយកចិត្តទុកដាក់ជួយជនរងគ្រោះ៕