ក្រសួងយុត្តិធម៌បានដាក់ទណ្ឌិតចំនួន១២រូប ឲ្យរស់នៅក្រៅពន្ធនាគារដោយភ្ជាប់លក្ខខណ្ឌ កាលពីឆ្នាំ២០២២។ ក្រសួងយុត្តិធម៌ឲ្យដឹងថា ទណ្ឌិតទាំង១២នាក់នេះ បានអនុវត្ដទោសនៅក្នុងពន្ធនាគារមួយរយៈរួចហើយ ដើម្បីឱ្យពួកគាត់បានជួបជុំក្រុមគ្រួសារ ប្រកបមុខរបរ និងមានសិទ្ធិសេរីភាពអាចចូលរួមក្នុងសង្គមឡើងវិញបាន។
ក្នុងសន្និបាតបូកសរុបការងារយុត្តិធម៌ឆ្នាំ២០២២ និងកំណត់ទិសដៅការងារអាទិភាពឆ្នាំ២០២៣ របស់ក្រសួងយុត្តិធម៌ កាលពីថ្ងៃទី២៣ ខែមីនា ឆ្នាំ២០២៣ រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក គឹម សន្តិភាព បានបញ្ជាក់ថា នីតិវិធីនៃការដោះលែងដោយមានលក្ខខណ្ឌនេះ គឺដើម្បីជួយសម្រួលដល់ទណ្ឌិតណា ដែលបានដឹងពីទោសកំហុសរបស់ខ្លួន ហើយមានឆន្ទៈកែប្រែខ្លួនឡើងវិញ។
គេហទំព័រក្រសួងយុត្តិធម៌ចុះផ្សាយការអះអាងរបស់ លោក គឹម សន្តិភាព ថា ទណ្ឌិតអាចត្រូវបានដោះលែងឱ្យមានសេរីភាព មុនកាលកំណត់នៃការអនុវត្ដទោស គឺយោងតាមលក្ខខណ្ឌចំនួន២ រួមមាន កិរិយាមារយាទល្អរបស់ទណ្ឌិតក្នុងអំឡុងពេលពេលជាប់ឃុំ និងបានធ្វើសកម្មភាពផ្សេងៗ ក្នុងនោះ បានយល់ដឹងពីកំហុស និងបង្ហាញឆន្ទៈសោកស្ដាយនូវទង្វើរបស់ខ្លួន ជាដើម។
ចំពោះលក្ខខណ្ឌទី២ វិញ គឺយោងតាមរយៈពេលនៃការអនុវត្តទោស ក្នុងនោះរួមមាន អ្នកជាប់ទោសពាក់កណ្ដាលនៃទោស ប្រសិនបើទោសនោះតិចជាង ឬស្មើ ១ឆ្នាំ ទណ្ឌិតដែលបានជាប់ទោសពីរភាគបី នៃទោសក្នុងករណីផ្សេងៗទៀត និងទណ្ឌិតត្រូវបានកាត់ទោសឲ្យជាប់ពន្ធនាគារអស់មួយជីវិត ក៏ប៉ុន្តែទណ្ឌិតនោះ បានអនុវត្តទោសជាប់ពន្ធនាគារយ៉ាងតិច អស់រយៈពេល២០ឆ្នាំ រួចមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។