ព្រះសង្ឃគង់នៅវត្តភូមិធំ គណៈកម្មការអាចារ្យវត្ត និងពុទ្ធបរិស័ទរស់នៅឃុំសណ្ដាន់ ស្រុកសំបូរ ខេត្តក្រចេះ ជួបជុំគ្នានៅសាលាដំបូងខេត្តស្ទឹងត្រែង រយៈពេលពីរថ្ងៃហើយ ដើម្បីសុំឲ្យសាលាដំបូងខេត្តនេះ លើកលែងបទចោទដល់បុរស ៣នាក់ ដែលមន្ត្រីអាវុធហត្ថឃាត់ខ្លួនកាលពីថ្ងៃទី២៣ តុលា ដោយចោទថាដឹកជញ្ជូនឈើគ្មានលិខិតអនុញ្ញាត។
ព្រះចៅអធិការវត្តពោធិ៍យារាម ហៅវត្តភូមិធំ ឃុំសណ្ដាន់ ស្រុកសំបូរ ខេត្តក្រចេះ អំពាវនាវឲ្យសាលាដំបូងខេត្តស្ទឹងត្រែង ដោះលែងពលរដ្ឋ ៣នាក់ដែលត្រូវតុលាឃុំខ្លួនកាលពីថ្ងៃទី២៦ តុលា ដោយចោទថាដឹកជញ្ជូនឈើខុសច្បាប់។ ក៏ប៉ុន្តែឈើដែលពួកគាត់ដឹកជញ្ជូននោះ ជាឈើរបស់វត្តសម្រាប់កសាងព្រះវិហារ ដែលមានការទទួលស្គាល់ពីអាជ្ញាធរមូលដ្ឋាន។
ព្រះចៅអធិការវត្តភូមិធំ គឺព្រះតេជព្រះគុណ សូរ អោក មានថេរដីកាថា ឈើប្រភេទសុក្រំជាង ១ម៉ែត្រគូបដែលពុទ្ធបរិស័ទបានដឹកពីខេត្តព្រះវិហារ ឆ្លងកាត់ខេត្តស្ទឹងត្រែង បំណងប្រគេនព្រះអង្គសម្រាប់កសាងព្រះវិហារ តែត្រូវសមត្ថកិច្ចឃាត់ទុក។ ព្រះអង្គមានថេរដីកាបន្តថា អាជ្ញាធរភូមិ-ឃុំក៏បានចេញលិខិតទទួលស្គាល់ថា ឈើទាំងនេះជាឈើរបស់វត្ត។ ហេតុនេះ ព្រះអង្គទទូចឲ្យសាលាដំបូងខេត្តស្ទឹងត្រែង មេត្តាយោគយល់ករណីនេះ៖ « សុំលើកលែងទោសកំហុសខុសឆ្គងដែលនាំឈើធ្វើសន្លឹកទ្វារ យកទៅធ្វើព្រះវិហារ នេះ សុំខាងសមត្ថកិច្ចលើកលែងទោសឲ្យអាត្មាផង។ អ្នកដែលជាប់ទោសហ្នឹង ក៏សុំលើកលែងដែរ »។
ឆ្លើយតបការលើកឡើងនេះ ប្រធានសាលាដំបូងខេត្តស្ទឹងត្រែង លោក អៀង គីមថុល ឲ្យដឹងថា តាមច្បាប់ សាមីខ្លួនដែលជាប់ឃុំត្រូវប្រើសិទ្ធិរបស់ខ្លួនធ្វើពាក្យស្នើនៅក្រៅឃុំ និងស្នើយករថយន្តជាវត្ថុតាងវិញ។ លោកថា ប្រសិនបើអ្នកជាប់ឃុំទាំងនោះធ្វើពាក្យស្នើសុំតាមនីតិវិធី ចៅក្រមនឹងពិចារណាលើសំណុំរឿងនេះ៖ « គាត់ប្រើសិទ្ធិរបស់គាត់ធ្វើពាក្យលាយលក្ខណ៍អក្សរមកសុំនៅក្រៅឃុំអ៊ីចឹង ហើយសុំឡានជាវត្ថុតាង គឺគាត់មានសិទ្ធិសុំ ហើយការសម្រេចរបស់តុលាការ នឹងពិចារណាជាមួយតំណាងអយ្យការទៀត »។
កាលពីថ្ងៃទី២៣ តុលា មន្ត្រីអាវុធហត្ថលើផ្ទៃប្រទេស សហការជាមួយមន្ត្រីជំនាញរដ្ឋបាលព្រៃឈើខេត្តស្ទឹងត្រែង បានឃាត់រថយន្តស៊ាំយ៉ុង ១គ្រឿងផ្ទុកឈើសុក្រំជាងមួយម៉ែត្រគូប (១,២២៧ម៉ែត្រគូប) ឃាត់ខ្លួនបុរស ៣នាក់ និងបញ្ជូនទៅតុលាការដោយចោទថាប្រមូលផល និងដឹកជញ្ជូនឈើគ្មានលិខិតអនុញ្ញាត ព្រមទាំងបានបញ្ជូនជនសង្ស័យទៅពន្ធនាគារឃុំខ្លួនបណ្ដោះអាសន្ននៅថ្ងៃទី២៦ តុលា។
មន្ត្រីសម្របសម្រួលសមាគមអាដហុក (ADHOC) ខេត្តស្ទឹងត្រែង លោក ហូ សំអុល យល់ថា ការដឹកជញ្ជូនឈើដោយគ្មានលិខិតអនុញ្ញាត វាជាករណីខុសច្បាប់ បើទោះបីជាប្រយោជន៍វត្តអារាមក៏ដោយ ក៏ប៉ុន្តែករណីនេះ ព្រះសង្ឃបានធ្វើលិខិតបញ្ជាក់ពីអាជ្ញាធរភូមិ-ឃុំ ថាជាឈើរបស់វត្តពិតប្រាកដ។ ដូច្នេះ តំណាងអយ្យការ និងចៅក្រម គួរតែប្រើឆន្ទានុសិទ្ធិរបស់ខ្លួន ពិនិត្យ អនុគ្រោះ ឬអប់រំណែនាំដោយធ្វើកិច្ចសន្យាបញ្ឈប់ប្រសើរជាងដាក់ទណ្ឌកម្មច្បាប់៖ « រឿងដែលគាត់ត្រូវធ្វើបែរជាគាត់មិនធ្វើ បើរឿងមិនត្រូវធ្វើបែរជាគាត់ធ្វើ បទល្មើសគរគោកមិនត្រូវធ្វើទេ ! នៅក្នុងខេត្តស្ទឹងត្រែង ហ្នឹង សុទ្ធតែធំៗបែរជាមកធ្វើរឿងកំប៉ិកកំប៉ុកជាឈើសុក្រំ ណាមួយមានភូមិ - ឃុំដឹងឮថាជាឈើជាកុដិវិហារអ៊ីចឹង របស់លោក លោកចៅក្រមគាត់គួរតែពិនិត្យមើលចំណុចហ្នឹងផង »។
លោក ហូ សំអុល កត់សម្គាល់ថា កន្លងទៅ សមត្ថកិច្ច និងមន្ត្រីរដ្ឋបាលព្រៃឈើអនុវត្តច្បាប់ព្រៃឈើចន្លោះប្រហោងច្រើន ហើយលោកកម្រឃើញសមត្ថកិច្ច និងមន្ត្រីរដ្ឋបាលព្រៃឈើ ចាប់ជនល្មើសដែលកាប់ទន្ទ្រានព្រៃរានយកដីអស់រាប់ពាន់ហិកតារអនុវត្តច្បាប់ បើទោះបីជាព្រៃឈើនៅស្រុកថាឡាបរិវ៉ាត់ និងព្រៃសហគមន៍រងការកាប់ទន្ទ្រានអស់រាប់ម៉ឺនហិកតារក្តី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។