តំណាងពលរដ្ឋមានជម្លោះដីធ្លី ៤នាក់ ក្នុងចំណោមពលរដ្ឋជិត ៤០០គ្រួសារ ត្រូវបានសាលាដំបូងខេត្តក្រចេះ កោះហៅមកសាកសួរកាលពីព្រឹកថ្ងៃទី១៥ ខែកុម្ភៈ ក្រោយពីមានពាក្យបណ្ដឹងរបស់តំណាងក្រុមហ៊ុន ប៊ិញភឿក ២ (Binh Phuoc 2)។ ពួកគេត្រូវបានតំណាងក្រុមហ៊ុនសម្បទានសេដ្ឋកិច្ចរបស់វៀតណាម ប៊ិញភឿក ២ ប្ដឹងចោទពីបទកាន់កាប់ដីធ្លីរបស់ក្រុមហ៊ុនខុសច្បាប់។
សាលាដំបូងខេត្តក្រចេះ សម្រេចអនុញ្ញាតឲ្យតំណាងពលរដ្ឋ ៤នាក់ ត្រឡប់មកលំនៅឋានវិញ ក្រោយពីសួរនាំរយៈពេលប្រហែល ៣ម៉ោង ទាក់ទងសំណុំរឿងដឹកនាំពលរដ្ឋរាប់រយគ្រួសារ មកបោះរោងស្នាក់នៅ ឬកាន់កាប់ដីជាកម្មសិទ្ធិឯកជន ឋិតក្នុងបរិវេណដីសម្បទានសេដ្ឋកិច្ច ប៊ិញភឿក ២ របស់វៀតណាម កាលពីខែធ្នូ ឆ្នាំ២០១៦។
តំណាងពលរដ្ឋ លោក កែវ វន្ថា ដែលត្រូវបានតុលាការកោះហៅសួរនាំនោះ ឲ្យដឹងនៅថ្ងៃទី១៥ ខែកុម្ភៈ ថា ក្នុងចំណោមពលរដ្ឋ ៣៦៥គ្រួសារ មានមួយចំនួនជាអ្នកចំណូលថ្មីដែលបាននាំគ្នាមករស់នៅលើដីចំណីព្រែក ឋិតនៅចំណុចអូរច្រា រយៈពេលជាង ១ខែមកហើយ ដោយខ្លះបានបោះតង់ និងសង់ផ្ទះ។ ការមកស្នាក់នៅលើដីនេះ ព្រោះពួកគាត់មើលឃើញថា តំបន់នោះមានប្រភពទឹកប្រើប្រាស់ និងជិតសាលារៀន មានផ្លូវគមនាគមន៍ ងាយស្រួលឲ្យកូនចៅរបស់ពួកគេទៅសាលារៀន ខណៈលំនៅឋានបច្ចុប្បន្នឋិតនៅចម្ការឆ្ងាយពីសាលារៀន ផ្លូវលំបាកធ្វើដំណើរ មិនអាចឲ្យក្មេងៗមានលទ្ធភាពធ្វើទៅសាលាបាន។
លោកទទួលស្គាល់ថា ការមករស់នៅលើដីចំណីព្រែកពុំមានការអនុញ្ញាត ឬយល់ព្រមពីអាជ្ញាធរពាក់ព័ន្ធទេ ក៏ប៉ុន្តែតំបន់នោះជាដីទំនេរ ទើបពលរដ្ឋក្រីក្របង្ខំចិត្តតាំងទីលំនៅចិញ្ចឹមគ្រួសារ៖ «សុទ្ធតែតែអ្នកភូមិនៅស្រុកហ្នឹង ហើយនៅចម្ការឆ្ងាយពីគ្នា លំបាកកូនទៅរៀន និងឈឺជាវាលំបាកបានគាត់ឃើញដីទំនេរនាំគ្នាទៅនៅតែម្ដង។ ក្រុមហ៊ុនប្ដឹងថា យើងរំលោភដីគេ»។
លោក កែវ វន្ថា បន្ថែមថា នៅព្រឹកថ្ងៃទី១៥ ខែកុម្ភៈ អាជ្ញាធរស្រុកស្នូល និងមន្ត្រីអាវុធហត្ថជាង ២០នាក់ បានយកគ្រឿងចក្រមួយគ្រឿងឈូសឆាយបំផ្លាញផ្ទះ និងដុះខ្ទមពួកគេធ្វើឲ្យប៉ះពាល់ការរស់នៅរបស់ពលរដ្ឋក្រីក្រគ្មានដី ហេតុនេះអ្នកភូមិអំពាវនាវឲ្យអាជ្ញាធរខេត្តក្រចេះ រកលទ្ធភាពកាត់ដីនោះជាដីសម្បទានសង្គមកិច្ចជូនពលរដ្ឋក្រីក្រ។
អាស៊ីសេរី មិនអាចរកប្រភពទាក់ទងតំណាងក្រុមហ៊ុនសម្បទានសេដ្ឋកិច្ច ប៊ិញភឿក ២ ដើម្បីសុំការបំភ្លឺករណីនេះបានទេ នៅថ្ងៃទី១៥ ខែកុម្ភៈ។
អភិបាលរងស្រុកស្នូល លោក សាន់ ណាល់ ឲ្យដឹងថា អាជ្ញាធរស្រុកបានជូនដំណឹង និងចុះណែនាំពលរដ្ឋឲ្យរុះរើរោងចេញពីដីដែលពលរដ្ឋកំពុងកាន់កាប់នោះច្រើនសាមកហើយ មុននឹងអាជ្ញាធរសម្រេចរុះរើ ដោយសំអាងថា ជាដីឯកជនរបស់រដ្ឋដែលវិនិយោគឲ្យក្រុមហ៊ុនសម្បទានសេដ្ឋកិច្ច។ លោកថា ពលរដ្ឋទាំងនោះភាគច្រើនជាពលរដ្ឋចំណូលថ្មីបានសង់រោងចំនួន ១២០រោង ក្នុងនោះមានរោងស័ង្កសីចំនួន ៤រោង។
លោកបញ្ជាក់ថា តំបន់នោះអាជ្ញាធរពាក់ព័ន្ធនឹងមិនអនុញ្ញាតឲ្យមានការសាងសង់លំនៅឋានដាច់ខាត ហើយប្រសិនបើពលរដ្ឋណា គ្មានដីពិតប្រាកដ ឲ្យស្នើសុំដីសម្បទានសង្គមកិច្ចតាមរយៈអាជ្ញាធរមូលដ្ឋានស្របតាមនីតិវិធី៖ «សកម្មភាពវាហួសហេតុពេក ហើយគាត់តែងតែប្រជុំគ្នា ហើយចោលសម្ដីថា បើយើងយកអាហ្នឹងបានហើយ យើងនឹងបន្តការយកទៀតក្នុងទីតាំងក្រុមហ៊ុនផ្សេងៗ ហើយទីតាំងទាំងអស់ហ្នឹង គឺដីបានចុះបញ្ជីរួចហើយជាដីឯកជនរបស់រដ្ឋយើងបានជួលទៅក្រុមហ៊ុនក្នុងរយៈពេលវែង»។
ក្រុមហ៊ុនសម្បទានសេដ្ឋកិច្ច ប៊ិញភឿក ២ របស់វៀតណាម ទទួលសិទ្ធិវិនិយោគដំណាំឧស្សាហកម្មកៅស៊ូ តាំងពីឆ្នាំ២០១១ លើផ្ទៃដីជិត ១ម៉ឺនហិកតារ ក៏ប៉ុន្តែក្រុមហ៊ុននេះ បានឆ្វៀលដីរងផលប៉ះពាល់ជូនពលរដ្ឋនៅតំបន់នោះ ហើយបច្ចុប្បន្នផ្ទៃដីក្រុមហ៊ុន វិនិយោគនៅសល់ជាង ៤.៥០០ហិកតារ។
មន្ត្រីស៊ើបអង្កេតនៃសមាគមអាដហុក (ADHOC) ខេត្តក្រចេះ លោក ប៊ី វណ្ណនី ចាត់ទុកការមកតាំងទីលំនៅរបស់ពលរដ្ឋទាំងនោះថា ជាករណីខុសច្បាប់ ក៏ប៉ុន្តែអាជ្ញាធរពាក់ព័ន្ធគួរតែពិនិត្យលទ្ធភាពជាក់ស្ដែងពីជីវភាពរស់នៅរបស់ពលរដ្ឋដែលខ្វះខាតដីពិតប្រាកដ និងព្យាយាមណែនាំឲ្យពួកគេជ្រាបពីនីតិវិធីបំពេញបែបបទស្នើសុំដីសម្បទានសង្គមកិច្ចមកអាជ្ញាធរពាក់ព័ន្ធ ហើយអាជ្ញាធរពាក់ព័ន្ធត្រូវយកចិត្តទុកដាក់ពន្លឿនផ្ដល់ដីសម្បទានសង្គមកិច្ចជូនពលរដ្ឋក្រីក្រ អនុលោមតាមយុទ្ធសាស្ត្រកាត់បន្ថយភាពក្រីក្ររបស់រដ្ឋាភិបាល៖ «ប្រសិនបើពលរដ្ឋអត់ដី ហើយសុំគ្រាន់តែមកស្នាក់នៅអាហ្នឹងវាគ្រាន់តែជាការដោះស្រាយ យើងត្រូវមានវិធានការដោះស្រាយមួយសមស្រប»។
ពលរដ្ឋចំនួន ៣៦៥គ្រួសារ បានមកចាប់ដីនៅតំបន់នោះក្នុងទំហំដីក្បាល ១០ម៉ែត្រ បណ្ដោយ ៣០ម៉ែត្រ សរុបចំនួនជាង ១០ហិកតារ ដែលជាប្រភេទដីធ្វើលំនៅឋាន។ ពួកគេភាគច្រើនជាពលរដ្ឋចំណូលថ្មី មកពីខេត្តកំពង់ចាម និងខេត្តត្បូងឃ្មុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។