ក្រុម​គ្រួសារ អះម៉ាត់ យ៉ះយ៉ា និង​​ក្មួយ​ប្រុស​​គ្រោង​​ដាក់​​ពាក្យ​​ប្ដឹង​​ជំទាស់​​សាលក្រម​​ផ្ដន្ទាទោស

ដោយ ទីន ហ្សាការីយ៉ា
2019-08-15
អ៊ីម៉ែល
មតិ
Share
បោះពុម្ព
អតីត​រដ្ឋលេខាធិការ​ក្រ​សួង​សង្គមកិច្ច លោក អះម៉ាត់ យ៉ះយ៉ា និយាយ​ជាមួយ​អ្នក​កាសែត​ក្រោយ​ពេល​បំភ្លឺ​នៅ​សាលា​ដំបូង​រាជធានី​ភ្នំពេញ កាល​ពី​​ថ្ងៃ​ទី​១០ ខែ​ឧសភា ឆ្នាំ​២០១៦។
អតីត​រដ្ឋលេខាធិការ​ក្រ​សួង​សង្គមកិច្ច លោក អះម៉ាត់ យ៉ះយ៉ា និយាយ​ជាមួយ​អ្នក​កាសែត​ក្រោយ​ពេល​បំភ្លឺ​នៅ​សាលា​ដំបូង​រាជធានី​ភ្នំពេញ កាល​ពី​​ថ្ងៃ​ទី​១០ ខែ​ឧសភា ឆ្នាំ​២០១៦។
Photo: RFA

ក្រុម​គ្រួសារ និង​សាក្សី​ក្នុង​សំណុំរឿង​ចោទប្រកាន់​លោក អះម៉ាត់ យ៉ះយ៉ា និង​ក្មួយប្រុស​ពី​បទ​កន្លែង​បន្លំ​ឯកសារ ឬ​ជួញដូរ​មនុស្ស​ថា ជា​រឿង​អយុត្តិធម៌ ហើយ​ថា ជា​ការ​រៀបចំឡើង​ដើម្បី​ចាប់ខ្លួន​អ្នក​ទាំងពីរ​។ ក្រុម​គ្រួសារ លោក អះម៉ាត់ យ៉ះយ៉ា និង​ក្មួយប្រុស​របស់​លោក នឹង​ដាក់​ពាក្យ​ប្ដឹង​ទៅ​សាលាឧទ្ធរណ៍ ឆាប់ៗ​នេះ។

ក្រុម​គ្រួសារលោក អ៊ីស្មាឯល ពិនអូស្មាន និង អ្នកចូលរួម​ស្ដាប់​សវនាការ អះអាង​ថា សាលាដំបូង​រាជធានី​ភ្នំពេញ ផ្ដន្ទាទោស​លោក អះ​ម៉ាត់ យ៉ះយ៉ា និង​ក្មួយប្រុស​ម្នាក់ ១៥​ឆ្នាំ គឺជា​អយុត្តិធម៌ និង​គ្មាន​ភស្តុតាង​ច្បាស់លាស់។

ភរិយា​លោក អ៊ីស្មាឯល ពិនអូស្មាន គឺ​អ្នកស្រី នាគ កញ្ញា ឱ្យ​ដឹង​នៅ​ថ្ងៃ​ទី​១៤ សីហា​​ថា អ្នកស្រី​បាន​ពឹង​ពាក់​មេធាវី​ឱ្យ​ដាក់ពាក្យ​ប្ដឹង​ទៅ​សាលាឧទ្ធរណ៍​ឆាប់ៗ​ នេះ ជំទាស់​សាលា​ក្រម​សាលា​ដំបូង ដែល​បាន​ផ្ដន្ទាទោស​ស្វាមី​អ្នកស្រី​ធ្ងន់ធ្ងរ​ទាំង​គ្មាន​ភស្តុតាង​ច្បាស់​លាស់។ អ្នកស្រី​បន្ថែម​ថា សំណុំរឿង​ផ្ដន្ទាទោស​ស្វាមី​របស់​អ្នកស្រី​នេះ គឺជា​ការ​រៀបចំឡើង​ដើម្បី​ធ្វើបាប​ស្វាមី​របស់​អ្នកស្រី ពី​ព្រោះ​ថា ការសម្រេច​ផ្ដន្ទាទោស​របស់​តុលាការ ដែល​ប្រើ​ពេល​សវនាការ​ប្រមាណ​ជា​បី​ម៉ោង ដោយ​យោង​លើ​ដើមបណ្ដឹង​តែ​ម្នាក់ ហើយ​ដើមបណ្ដឹង​នេះ និយាយ​ម្ដង​ស្គាល់​ស្វាមី​របស់​អ្នកស្រី ម្ដង​ថា មិន​ស្គាល់ និង​ខុស​ពី​ចម្លើយ​ប្រាប់​ពី​ប៉ូលិស។ អ្នកស្រី​បន្ថែម​ថា ដើម​បណ្ដឹង​ទាំងអស់​មាន​ពីរ​នាក់ តែ​ម្នាក់​ទៀត​ឈ្មោះ ឡោះ ណៈ បាន​ប្រាប់​មេធាវី​ស្វាមី​អ្នកស្រី​ថា គាត់​បាន​ដក​ពាក្យ​ប្ដឹង​វិញ​ហើយ៖ «រឿង​នេះ​អយុត្តិធម៌​សម្រាប់​ប្ដី​ខ្ញុំ​ណាស់ នៅ​ក្នុង​បន្ទប់​សវនាការ​ដើមបណ្ដឹង​ឈ្មោះ អេង ពៅ នេះ គឺ​មាន​បុរស​ម្នាក់​អះអាង​ថា ជា​ប្ដី គឺ​និយាយ​ប្រាប់ អេង ពៅ ឱ្យ​និយាយ​តាម​ខ្លួន​ឆ្លើយ​ប្រាប់​តុលាការ រហូត​ដល់​មេធាវី​របស់​ស្វាមី​គាត់​ស្នើ​តុលាការ​ម្ដង​ជា​ពីរ​ដង​ឱ្យ​ចេញពី​បន្ទប់​សវនាការ»

សាលាដំបូង​រាជធានី​ភ្នំពេញ​កាលពី​ថ្ងៃ​ទី​១៣ សីហា បាន​ផ្ដន្ទាទោស លោក អ៊ីស្មាឯល ពិនអូស្មាន និង លោក អះម៉ាត់ យ៉ះយ៉ា ម្នាក់​ ១៥​ឆ្នាំ និង​ពិន័យ​ជា​ប្រាក់​រួមគ្នា​ចំនួន ២០០​លាន​រៀល ស្នើ​ប្រមាណ ៥​ម៉ឺន​ដុល្លារ ទៅ​ឱ្យ​ជនរងគ្រោះ​ពីរ​នាក់ តាម​មាត្រា​១១​ នៃ​ច្បាប់​ប្រឆាំង​ការ​ជួញដូរ​មនុស្ស។

នៅ​មុន​ពេល​សវនាការ​មួយថ្ងៃ លោក អះម៉ាត់ យ៉ះយ៉ា ប្រាប់​អាស៊ីសេរី​ថា ទាំង​រូបលោក និង​មេធាវី​របស់​លោក មិន​ទទួល​បាន​លិខិត​កោះហៅ​ពី​ចៅក្រម​ជំនុំជម្រះ​ដើម្បី​ទៅ​ចូលរួម​សវនាការ​ឡើយ ទោះជា​យ៉ាង​នេះ​ក្ដី លោក​និង​មេធាវី​សម្រេច​ទៅ​ចូល​រួម​សវនាការ​នេះ ដើម្បី​ទាមទារ​យុត្តិធម៌​។ រីឯ​ភរិយា​លោក អ៊ីស្មាឯល ពិនអូស្មាន អះអាង​ដែរ​ថា អ្នកស្រី និង​មេធាវី​ស្វាមី​របស់​អ្នកស្រី​ក៏​មិន​បាន​​ទទួល​លិខិត​កោះហៅ​ពី​តុលាការ​ទៅ​ចូលរួម​សវនាការ​ដែរ តែ​អ្នកស្រី​ដឹង​តាមរយៈ​សាក្សី​ម្នាក់​ប្រាប់​ពី​ថ្ងៃ​សវនាការ​នេះ។

ឆ្លើយតប​នឹង​ការ​លើក​ឡើង​នេះ អ្នកនាំពាក្យ​អយ្យការ​អម​សាលាដំបូង​រាជធានី​ភ្នំពេញ លោក គុជ គឹមឡុង ឱ្យ​ដឹង​យ៉ាង​ខ្លី​នៅ​ថ្ងៃ​ទី​១៤ សីហា​ថា បើ​ភាគី​ជនជាប់ចោទ​មិន​សុខចិត្ត​អាច​ដាក់​ពាក្យ​ប្ដឹង​ជំទាស់​សាលក្រម​នេះ​ទៅតាម​នីតិវិធី​ច្បាប់​បាន​៖ «ជនសង្ស័យ​បើ​មិន​សុខចិត្ត​អាច​បន្ត​នីតិវិធី​ប្ដឹង​ទាស់​ទៀត​បាន»

លោក អះម៉ាត់ យ៉ះយ៉ា បាន​ប្រាប់​អាស៊ីសេរី​កាលពី​ថ្ងៃ​ទី​១២ សីហា នៅមុន​ពេល​លោក ទៅ​ចូល​ស្ដាប់​សវនាការ​នៅ​ថ្ងៃ​ទី​១៣ សីហា​ថា សំណុំរឿង​ចាប់ខ្លួន​ក្មួយប្រុស​លោក និង​ចោទ​លោក ពី​បទ​ជួញដូរ​មនុស្ស​នេះ គឺជា​ការ​ប្រឌិត​ឡើង ដោយ​មាន​លោក ឧស្មាន ហាស្សាន់ ដែល​ត្រូវជា​ក្មួយជីដូនមួយ​របស់​លោក ដែល​បច្ចុប្បន្ន​ជា​រដ្ឋមន្ត្រី​ទទួលបន្ទុក​បេសកកម្ម​ពិសេស​។ លោក​ថា លោក អូស្មាន ហាស្សាន់ ជា​អ្នក​នៅ​ពី​ក្រោយខ្នង​ចង់​ចាប់ខ្លួន​លោក ដោយសារតែ​លោក និង​ពលរដ្ឋ​ជាច្រើន​ទៀត​ធ្លាប់​មាន​ទំនាស់​ជាមួយ​លោក អូស្មាន ហាស្សាន់ រឿង​មិន​គាំទ្រ​រឿង​ពុះ​ដី​វិហារ​បឹងកក់​ធ្វើ​ផ្លូវ។ លោក អះម៉ាត់ យ៉ះយ៉ា អះអាង​ថា លោក​និង​ពលរដ្ឋ​មិន​ជំទាស់​លោក អូស្មាន ហាស្សាន់ ចង់​ធ្វើ​ពុះ​ដី​វិហារ​បឹងកក់​ចង់​ធ្វើ​ផ្លូវ​នេះ​ទេ ប៉ុន្តែ​លោក​និង​ពលរដ្ឋ​ចង់​ឱ្យ​សាលាក្រុង​ធ្វើ​វាង​របប​វិហារ។

ទេសរដ្ឋមន្ត្រី និង​រដ្ឋមន្ត្រី​ទទួលបន្ទុក​បេសកកម្ម​ពិសេស​លោក អូស្មាន់ ហាសាន់ មិន​ធ្វើ​អធិប្បាយ​ចំពោះ​ការចោទប្រកាន់​នេះ​ទេ នៅ​ថ្ងៃ​ទី​១៤ សីហា។ ប៉ុន្តែ​លោក​បាន​ប្រាប់​វិទ្យុ​វីអូឌី (VOD) យ៉ាង​ខ្លី​ថា សំណុំ​រឿង​នេះ មិន​ជាប់​ទាក់ទង​លោក​ទេ គឺ​ជា​ការ​សម្រេច​របស់​តុលាការ លោក​គ្មាន​អី​ត្រូវ​ពន្យល់​ឡើយ។

ទោះជា​យ៉ាង​នេះ​ក្ដី នាយរង​ទទួលបន្ទុក​ផ្នែក​ឃ្លាំមើល​ការរំលោភ​សិទ្ធិមនុស្ស លោក អំ សំអាត ឱ្យ​ដឹង​ថា តាម​មន្ត្រី​របស់​លោក​ទៅ​ឃ្លាំមើល​សវនាការ​នៅ​ថ្ងៃ​ទី​១៣ សីហា​នេះ ឃើញ​ថា សវនាការ​នេះ មាន​ភាព​មិន​ប្រក្រតី​មួយ​ចំនួន ដែល​ធ្វើ​ឱ្យ​មាន​ភាព​អយុត្តិធម៌​សម្រាប់​ជនជាប់ចោទ​ទាំងពីរ​នេះ៖ «សាល​សវនាការ​ហ្នឹង​ក្នុង​គម្រោង​សាល​ទី​៥ វា​តូច ដោយសារ​ជាន់​រឿង​គ្នា​គេ​ប្ដូរ​ទៅ​សាល​ទី​១​វិញ ហាក់បីដូចជា​គេ​មិន​ប្រកាស​ជា​សាធារណៈ​ឱ្យ​ដឹង​ជា​សាធារណៈ ទី​២​ការ​ជជែក​ដេញដោល​រក​ភស្តុតាង​ហ្នឹង​មិន​មាន​អ្វី​គ្រប់គ្រាន់ ហើយ​ដើមបណ្ដឹង​ហ្នឹង​គឺ​មាន​អ្នក​បោះ​ប្រ៊ីយ៉ុង គឺ​មាន​អ្នក​ប្រាប់​ហើយ​ចាំ​ឆ្លើយ​តាម»

យុវជន​ម្នាក់​ឈ្មោះ សុខ ក្រី ដែល​បាន​ចូលរួម​ក្នុង​សវនាការ​នៅ​ថ្ងៃ​ទី​១៣ សីហា ប្រាប់​អាស៊ីសេរី​ថា តុលាការ​មិនបាន​បង្ហាញ​ភស្តុតាង​ណាមួយ​រឹងមាំ​មក​ដាក់​បន្ទុក​ទៅលើ​ជនសង្ស័យ​ទាំងពីរ​នោះ​ទេ​។ លោក​បាន​ថ្លែង ថា លោក អះម៉ាត់ យ៉ះយ៉ា មិន​ជាប់​ពាក់ព័ន្ធ​នឹង​ករណី​ជួញដូរ​មនុស្ស​ទេ​៖ «​លោក អះម៉ាត់ យ៉ះយ៉ា មិនមែន​សម្រាប់​ខ្លួន​ខ្ញុំ​ទេ គឺ​សម្រាប់​ជនជាតិ​ចាម​នៅ​ទូទាំង​ប្រទេស​ទាំង​អស់ គឺ​ចាត់​ទុក​គាត់​ជា​មនុស្ស​ល្អ​ដោយសារ​អី​? ដោយសារ​គាត់​ជា​មនុស្ស​ដំបូង​គេ​បង្អស់​នៅ​ក្នុង​ប្រទេស​កម្ពុជា​ដែល​មាន​គំនិត​ផ្ដួចផ្ដើម​ដល់​កូន​ខ្មែរ​អ្នក​កាន់សាសនា​ឥស្លាម​ទាំងអស់​បាន​រៀន​សូត្រ​ខាង​ចំណេះដឹង​ទូទៅ ហើយ​សរុប កូនសិស្ស​ដែល​គាត់​ជួយ​ហ្នឹង​បាន​ជាង ១.០០០​នាក់​ហើយ គឺ​ឱ្យ​បណ្ដុះបណ្ដាល​ឱ្យ​ចប់​មានការ​ងារ​ធ្វើ​ល្អ អ្នកខ្លះ​បាន​ធ្វើ​ជា​ឯកឧត្ដម​អី​ច្រើន​ណាស់​តាម​រយៈ​គាត់​ហ្នឹង»

លោក អ៊ីស្មាអែល ពិនឧស្ម័ន ត្រូវជា​ក្មួយបង្កើត​លោក អះម៉ាត់ យ៉ះយ៉ា និង​ជា​ប្អូនជីដូនមួយ​លោក អូស្មាន ហាស្សាន់។ លោក​ត្រូវ​កម្លាំង​នគរបាល នៃ​នាយកដ្ឋាន​ប្រឆាំង​ការ​ជួញដូរ​មនុស្ស និង​ការពារ​អនីតិជន ចាប់ខ្លួន​កាលពី​ថ្ងៃ​ទី​៩ ខែ​កុម្ភៈ ឆ្នាំ​២០១៨ សង្ស័យ​ថា ជាប់​ពាក់ព័ន្ធ​ករណី​នាំ​ពលករ​ទៅ​ធ្វើ​ការ​ខុសច្បាប់ នៅ​ប្រទេស អារ៉ាប៊ី សាអ៊ូឌីត របស់​ក្រុមហ៊ុន លោក អះម៉ាត់ យ៉ះយ៉ា កាល​ពី​ជាង​ ១០​ឆ្នាំមុន។ រីឯ​លោក អះម៉ាត់ យ៉ះយ៉ា ដែល​ត្រូវជា​ឪពុក​មា​របស់​លោក អូស្មាន ហាស្សាន់ តុលាការ​ចាប់ខ្លួន​នៅ​ថ្ងៃ​ទី​១៣ សីហា ខណៈ​លោក​ទៅ​អង្គុយ​ស្ដាប់​សវនាការ​ក្នុង​សំណុំ​រឿង​​ចោទប្រកាន់​ក្មួយប្រុស​របស់​លោក និង​រូបលោក​ទាក់ទង​នឹង​ការ​នាំ​ពលករ​ទៅ​ប្រទេស​ អារ៉ាប៊ី សាអ៊ូឌីត​ នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល