ក្រសួងមហាផ្ទៃកម្ពុជា បានបណ្ដេញជនជាតិចិនចំនួន ១១៦នាក់ ក្នុងនោះមានស្រី ២៩នាក់ ទៅប្រទេសចិនវិញ កាលពីថ្ងៃទី២៨ ខែកញ្ញា។
ជនជាតិចិនទាំងនោះរងការចោទថា បានប្រព្រឹត្តបទល្មើសឆបោក តាមប្រព័ន្ធទូរគមនាគមន៍ (VOIP) ហើយការបណ្ដេញចេញនេះ ត្រូវបានធ្វើឡើងតាមដីកាពីអាជ្ញាធរប្រទេសចិនផងដែរ។ អ្នកនាំពាក្យអគ្គនាយកដ្ឋានអន្តោប្រវេសន៍ លោក កែវ វណ្ណថន បានប្រាប់អាស៊ីសេរីនៅថ្ងៃច័ន្ទទី ៣០ ខែកញ្ញានេះថា ជនជាតិចិនទាំងនេះត្រូវបានបញ្ជូនចេញតាមជើងយន្តហោះ Charter Flight ចំនួនពីរគ្រឿង នៅព្រឹកថ្ងៃទី២៨ កញ្ញា។
លោក កែវ វណ្ណថន បន្ថែមថា អគ្គនាយកដ្ឋានក៏បានបញ្ជូនជនជាតិចិនចំនួន២៦នាក់ ទៅប្រទេសចិនវិញផងដែរ កាលពីថ្ងៃទី២៥ ខែកញ្ញានេះ បន្ទាប់ពីបានរកឃើញថា ពួកគេបានប្រព្រឹត្តបទល្មើសឆបោកតាមប្រព័ន្ធទូរគមនាគមន៍។
លោកបន្តថា ជនជាតិចិន ១១៦ នាក់នោះត្រូវបានចាប់ខ្លួន ដោយអគ្គស្នងការនគរបាលជាតិ ក្រសួងមហាផ្ទៃ កាលពីដើមខែកញ្ញាកន្លងទៅនេះ នៅទីក្រុងភ្នំពេញ។ ចំណែកជនជាតិចិនចំនួន ២៦ នាក់ ត្រូវបានចាប់ខ្លួនកាលពីខែមុន នៅក្រុងបាវិត ខេត្តស្វាយរៀង៖ «មិនមែនថា បញ្ជូនចេញលើកនេះគឺអស់ទេ កន្លងមកយើងចាប់មួយ ចាប់ពីរ អីហ្នឹងបា មាននៅសល់ខ្លះ នៅកន្លែងខ្ញុំហ្នឹង មិនទាន់បានប្រកាសបណ្ដេញចេញ កាលណាមានប្រកាស យើងនឹងបណ្ដេញចេញបន្តទៀត»។
លោកមានប្រសាសន៍ថា ឥឡូវនេះមានជនជាតិចិនចំនួន ៧២នាក់ ទៀតមិនទាន់បានធ្វើការបណ្ដេញចេញ ព្រោះរដ្ឋមន្ត្រីក្រសួងមហាផ្ទៃលោក ស ខេង មិនទាន់បានចុះហត្ថលេខា ធ្វើការបណ្ដេញចេញ ហើយជនជាតិចិនទាំងនេះ កំពុងឃុំខ្លួនបណ្ដោះអាសន្ន នៅមន្ទីរឃុំខ្លួន ក្រុងភ្នំពេញ ខេត្តសៀមរាប និងខេត្តព្រះសីហនុ។ លោកថា ជនជាតិចិនដែលបានចាប់ខ្លួនកន្លងទៅនេះ សុទ្ធតែជាជនជាតិចិនដីគោក៖ «រដ្ឋមន្ត្រីក្រសួងមហាផ្ទៃស៊ីញេ ( ចុះហត្ថលេខា ) ប្រកាសបណ្តេញចេញ យើងបណ្ដេញចេញ ហើយអត់មានចាំភាគីខាងចិនណាទេ»។
ក្រសួងមហាផ្ទៃបានឃាត់ខ្លួនជនជាតិចិនចំនួន៣២៣នាក់ ក្នុងករណីបីដាច់ដោយឡែកពីគ្នានៅរាជធានីភ្នំពេញ កាលពីដើមខែសីហាកន្លងទៅ ពីបទសង្ស័យថា ប្រព្រឹត្តករណីចាប់ជំរិត គំរាមកំហែងទារប្រាក់ តាមប្រព័ន្ធទូរគមនាគមន៍។
មកទល់ពេលនេះ អគ្គនាយកដ្ឋានអន្តោប្រវេសន៍បានបណ្ដេញជនជាតិចិនចំនួន ៣៨៥នាក់ហើយ។
កន្លងទៅសង្គមស៊ីវិលបានរិះគន់អាជ្ញាធរភ្នំពេញថា មិនបានផ្ដន្ទាទោសជនជាតិចិន មុននឹងបញ្ជូនទៅប្រទេសចិនវិញនោះទេ ដែលបណ្ដាលឱ្យជនជាតិចិនទាំងនោះ មិនខ្លាចនឹងបន្តប្រព្រឹត្តបទល្មើសតទៅទៀត ក្នុងពេលដែលពួកគេស្នាក់នៅប្រទេសមួយផ្សេងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។