កម្ពុជា​ថា គោរព​​សេចក្ដី​សម្រេច​របស់​អ.ស.ប​ករណី​បញ្ជូន​ពលករ​កូរ៉េខាងជើង​ទៅ​ប្រទេស​ដើម​វិញ

ដោយ មាន ឫទ្ធិ
2019-12-21
អ៊ីម៉ែល
មតិ
Share
បោះពុម្ព
មន្ត្រី​អ្នក​នាំ​ពាក្យ​ក្រសួង​ការបរទេស​កម្ពុជា លោក កុយ គួង ផ្ដល់​បទ​សម្ភាសន៍​ដល់​អ្នក​កាសែត នៅ​ក្រសួង​ការបរទេស​កម្ពុជា បន្ទាប់​ពី​ជំនួប​រវាង​រដ្ឋមន្ត្រី​ក្រសួង​ការបរទេស​កម្ពុជា លោក ហោ ណាំហុង ជាមួយ​ឯកអគ្គរាជទូត​ថៃ ប្រចាំ​កម្ពុជា នៅ​ថ្ងៃ​ទី​១៥ ខែ​មីនា ឆ្នាំ​២០១១។
មន្ត្រី​អ្នក​នាំ​ពាក្យ​ក្រសួង​ការបរទេស​កម្ពុជា លោក កុយ គួង ផ្ដល់​បទ​សម្ភាសន៍​ដល់​អ្នក​កាសែត នៅ​ក្រសួង​ការបរទេស​កម្ពុជា បន្ទាប់​ពី​ជំនួប​រវាង​រដ្ឋមន្ត្រី​ក្រសួង​ការបរទេស​កម្ពុជា លោក ហោ ណាំហុង ជាមួយ​ឯកអគ្គរាជទូត​ថៃ ប្រចាំ​កម្ពុជា នៅ​ថ្ងៃ​ទី​១៥ ខែ​មីនា ឆ្នាំ​២០១១។
Photo: RFA

ក្រសួងការបរទេស​កម្ពុជា អះអាង​ថា កម្ពុជា បាន​គោរព និង​អនុវត្ត​តាម​សេចក្តី​សម្រេច​របស់​ក្រុមប្រឹក្សាសន្តិសុខ​អង្គការសហប្រជាជាតិ​ករណី​ចាត់វិធានការ​ចាប់​បញ្ជូន​ពលករ​កូរ៉េខាងជើង​ទៅ​ប្រទេស​កំណើត​វិញ​។ ការ​លើកឡើង​នេះ បន្ទាប់ពី​ក្រុមប្រឹក្សាសន្តិសុខ​អង្គការសហប្រជាជាតិ បាន​ស្នើ​សុំ​ឱ្យ ប្រទេស​ជា​សមាជិក​ទាំងអស់ ផ្អាក​ជំនួញ​រកស៊ី និង​ចាប់​បញ្ជូន​ពលករ​កូរ៉េខាងជើង​ទៅ​ប្រទេស​ប្រទេស​ដើម​វិញ ដោយសារ​ពួកគេ​បរិច្ចាគ​ប្រាក់ខែ ដើម្បី​ផលិត​នុយក្លេអ៊ែរ និង​គ្រាប់​មីស៊ីល។

អ្នកនាំពាក្យ​ក្រសួង​ការបរទេស​កម្ពុជា លោក កុយ គួង ប្រាប់​អាស៊ីសេរី​យ៉ាង​ខ្លី​ថា ក្នុងនាម​ប្រទេស​កម្ពុជា​ជា​សមាជិក​របស់​អង្គការសហប្រជាជាតិ គឺ​កម្ពុជា​សន្យា​គោរព​និង​អនុវត្ត​តាម​សេចក្ដី​សម្រេច របស់​ក្រុមប្រឹក្សាសន្តិសុខ​អង្គការសហប្រជាជាតិ​។ ទោះ​យ៉ាង​ណា​ក្តី លោក កុយ គួង មិន​បញ្ជាក់​ថា កម្ពុជា បាន​ចាប់​បញ្ជូន​ពលករ​កូរ៉េខាងជើង​ទៅវិញ​ប៉ុន្មាន​នាក់​នោះ​ទេ ដោយ​នៅតែ​អះអាង​ដដែលៗ​ថា កម្ពុជា ប្ដេជ្ញា​គោរព និង​អនុវត្ត​សេចក្ដី​សម្រេច​របស់​ក្រុមប្រឹក្សាសន្តិសុខ​អង្គការសហប្រជាជាតិ៖ «ខ្ញុំ​អត់​ច្បាស់​ទេ មិន​ដឹង​មាន​ចំនួន​ណា​ពិតប្រាកដ​ប៉ុន្មាន​ទេ ដោយសារ​ខ្ញុំ​គ្មាន​តួលេខ​ក្នុង​ដៃ។ អ្វី​ដែល​ខ្ញុំ​ចង់​បញ្ជាក់​គឺ​កម្ពុជា គោរព​តាម និង​អនុវត្ត​នូវ​សេចក្តី​សម្រេច​របស់​ក្រុមប្រឹក្សាសន្តិសុខ​អង្គការ​សហប្រជាជាតិ ពាក់ព័ន្ធ​ករណី​កូរ៉េខាងជើង​នេះ»

កាល​ពី​ថ្ងៃ​ទី​២២ ខែ​ធ្នូ ឆ្នាំ​២០១៧ ក្រុមប្រឹក្សាសន្តិសុខ​អង្គការសហប្រជាជាតិ បានសម្រេច​ដាក់ទណ្ឌកម្ម​ថ្មី​មួយទៀត ប្រឆាំង​នឹង​ប្រទេស​កុម្មុយនីស្ត​កូរ៉េខាងជើង ដែល​ពិភពលោក​មិន​រាប់រក ដើម្បី​ឆ្លើយតប​នឹង​កម្មវិធី​ផលិត​អាវុធ​នុយក្លេអ៊ែរ និង​មីស៊ីល​របស់​ប្រទេស​នេះ។ វិធានការណ៍​នោះ បាន​ហាមប្រាម​រដ្ឋ​សមាជិក​ទាំង​អស់​នៃ​អង្គការសហប្រជាជាតិ មិន​ឱ្យ​ផ្ដល់​ការអនុញ្ញាត​ឱ្យ​ពលករ​ជនជាតិ​កូរ៉េខាងជើង​ធ្វើការ​នៅ​ក្នុង​ប្រទេស​សមាជិក​ទាំង​នោះ​ឡើយ។ វិធានការណ៍​ដដែល​នេះ ក៏​តម្រូវ​ឱ្យ​រដ្ឋ​សមាជិក​ទាំងអស់​បញ្ជូន​ពលករ​ជនជាតិ​កូរ៉េខាងជើង​ទាំងអស់ និង​មន្ត្រី​អនុពន្ធ​សន្តិសុខ​របស់​រដ្ឋាភិបាល​កូរ៉េខាងជើង (DPRK government safety oversight attache) ឱ្យ​ត្រឡប់​ទៅកាន់​ស្រុកកំណើត​ខ្លួន​វិញ ត្រឹម​ថ្ងៃ​ទី​២២ ខែ​ធ្នូ ឆ្នាំ​២០១៩។ ក្រុមប្រឹក្សាសន្តិសុខ​អង្គការ​សហប្រជាជាតិ រក​ឃើញ​ថា របប​ក្រុង​ព្យុងយ៉ាង បាន​យក​លុយ​ប្រមូល​ពី​ពលករ​ខ្លួន​នៅ​បរទេស ទៅ​អភិវឌ្ឍន៍​កម្មវិធី​ផលិត​អាវុធ​នុយក្លេអ៊ែរ និង​ផលិត​គ្រាប់​មីស៊ីល។

របាយការណ៍​លម្អិត​របស់​ក្រុម​អ្នកជំនាញការ​អង្គការ​សហ​ប្រជា​ប្រជាជាតិ​ស្ដីពី​ករណី​កូរ៉េខាងជើង (UN Panel of Experts on North Korea) ផ្សាយ​កាលពី​ខែ​មីនា ឆ្នាំ​២០១៩ សរសេរ​ថា កន្លងទៅ កម្ពុជា​ធ្លាប់​បាន​ឆ្លើយតប​ទៅ​នឹង​ការស៊ើបអង្កេត​របស់​អង្គការសហប្រជាជាតិ ជុំវិញ​ក្រុមហ៊ុន​វិនិយោគ​របស់​កូរ៉េខាងជើង​មួយ​ឈ្មោះ Mnsudae New Tech Corporation។ កម្ពុជា​ឆ្លើយតប​ថា ក្រុមហ៊ុន​នេះ​បាន​ចុះ​ហត្ថលេខា​ជាមួយ​រដ្ឋាភិបាល​កម្ពុជា​វិនិយោគ​បង្កើត​សារមន្ទីរ​ឈ្មោះ Grand Angkor Panorama Museum នៅ​ក្នុង​ទឹកដី​ខេត្ត​សៀមរាប​។ កម្ពុជា​ក៏​បាល​ផ្ដល់​ទិន្នន័យ​អំពី​ជនជាតិ​កូរ៉េខាងជើង​ចំនួន ១២​នាក់ ធ្វើការ​ឱ្យ​ក្រុមហ៊ុន​នោះ​ដែរ​។ ក៏ប៉ុន្តែ របាយការណ៍​របស់​ក្រុម​អ្នក​ជំនាញការ​អង្គការសហប្រជាជាតិ​ដដែល​នេះ បញ្ជាក់​ថា កម្ពុជា​នៅ​ពុំ​ទាន់​បាន​ឆ្លើយ​បំភ្លឺ​តប​ទៅ​នឹង​លិខិត​ចុងក្រោយ​អំពី​ការអនុវត្ត​តាម​វិធានការណ៍​របស់​អង្គការសហប្រជាជាតិ នេះ​នៅឡើយ​ទេ។

ក្រៅ​ពី​នេះ ផ្អែក​តាម​ការស្រាវជ្រាវ​របស់​ក្រុម​អ្នក​ជំនាញ​អង្គការសហប្រជាជាតិ​ដដែល​នេះ ក៏​រកឃើញ​ថា យ៉ាងហោចណាស់​នៅ​មាន​ភោជនីយដ្ឋាន​របស់​កូរ៉េខាងជើង​ចំនួន​បី កំពុង​ប្រតិបត្តិការ​នៅ​កម្ពុជា ក្នុង​នោះ​មាន​ភោជនីយដ្ឋាន​ឈ្មោះ Pyongyang (koryo) ស្ថិត​នៅ​តាម​បណ្ដោយ​វិថី​ព្រះមុនីវង្ស ភោជនីយដ្ឋាន Pyongyang Arirang ស្ថិត​នៅ​តាម​បណ្ដោយ​វិថី​នេរុហ៍ និង​ភោជនីយដ្ឋាន Pyongyang Unhasu ស្ថិតនៅ​ខណ្ឌ​ទួលគោក។ របាយការណ៍​សរសេរ​ថា ក្រុមហ៊ុន​ភោជនីយដ្ឋាន​ចុងក្រោយ​នេះ ក៏​មាន​ជាប់​ពាក់ព័ន្ធ​នឹង​សកម្មភាព​ហិរញ្ញវត្ថុ​ដទៃ​ទៀត​ដែរ។

អ្នកនាំពាក្យ​ក្រសួងការបរទេស លោក កុយ គួង បដិសេធ​អត្ថាធិប្បាយ​លម្អិត​ជុំវិញ​ករណី ថា​តើ​រដ្ឋាភិបាល​ពិត​បាន​បិទ​អាជីវកម្ម​របស់​ក្រុមហ៊ុន​កូរ៉េខាងជើង​ទាំងនេះ​ដែរ​ឬ​យ៉ាងណា​នោះ​ទេ គិត​ត្រឹម​ថ្ងៃ​ទី​២០ ធ្នូ ដោយ​លោក​ស្នើ​ឱ្យ​អ្នកសារព័ត៌មាន​សង្កេត​មើល​ដោយ​ខ្លួនឯង។

អាស៊ីសេរី​ពុំ​ទាន់​អាច​ទាក់ទង​អ្នកនាំពាក្យ​ក្រសួង​ពាណិជ្ជកម្ម លោក សៀង ថៃ ដើម្បី​សួរនាំ​បន្ថែម​ជុំវិញ​ស្ថានភាព​ប្រតិបត្តិការ​អាជីវកម្ម​របស់​ក្រុមហ៊ុន​កូរ៉េខាងជើង​ដែល​មាន​ឈ្មោះ​ក្នុង​បញ្ជី​របក​គំហើញ​របស់​ក្រុម​អ្នកជំនាញការ​អង្គការសហប្រជាជាតិ​នៅឡើយ​ទេ។

កន្លងមក ក្រុមប្រឹក្សាសន្តិសុខ អង្គការសហប្រជាជាតិ ក៏បាន​ដាក់​ទណ្ឌកម្ម​លើ​ប្រទេស​កុម្មុយនិស្ត​កូរ៉េខាងជើង​ជា​បន្តបន្ទាប់​ដែរ ខាង​វិស័យ​សេដ្ឋកិច្ច និង​ការនាំចេញ ដើម្បី​កាត់ផ្ដាច់​នូវ​ហិរញ្ញប្បទាន​ទាំងឡាយ ដែល​អាច​យក​ទៅ​ចិញ្ចឹម​ដល់​កម្មវិធី​នុយក្លេអ៊ែរ​របស់​កូរ៉េខាងជើង៕

ព័ត៌មាន (0)
Share
គេហទំព័រ​ទាំងមូល