មន្ត្រី​សង្គម​ស៊ីវិល និង​មន្ត្រី​បក្ស​ប្រឆាំង​រិះគន់​ការ​តែងតាំង​ទីប្រឹក្សា​ក្រសួងយុត្តិធម៌​ច្រើន​ហួសហេតុ

ដោយ ទីន ហ្សាការីយ៉ា
2020-08-31
អ៊ីម៉ែល
មតិ
Share
បោះពុម្ព
លោក កើត រិទ្ធ រដ្ឋមន្ត្រី​ក្រសួងយុត្តិធម៌​ ថ្លែង​ក្នុងពិធី​ចូល​កាន់​ដំណែង កាល​ពី​ថ្ងៃទី១ មេសា ឆ្នាំ​២០២០។
លោក កើត រិទ្ធ រដ្ឋមន្ត្រី​ក្រសួងយុត្តិធម៌​ ថ្លែង​ក្នុងពិធី​ចូល​កាន់​ដំណែង កាល​ពី​ថ្ងៃទី១ មេសា ឆ្នាំ​២០២០។
រូប​ហ្វេសប៊ុក លោក ស ខេង

មន្ត្រី​សង្គម​ស៊ីវិល និង​មន្ត្រី​បក្ស​ប្រឆាំង​​ថា ការតែងតាំង​ទីប្រឹក្សា​ក្រសួងយុត្តិធម៌​ចំនួន ៣៨​នាក់​នាំ​ឱ្យ​មាន​ការរិះគន់ និង​សង្ស័យ​ពី​ប្រសិទ្ធភាព​ការងារ​។ ពួកគេ​មិនសូវ មាន​ជំនឿ​ថា ការតែងតាំង​ទីប្រឹក្សា​ទាំងនោះ នឹង​ជួយ​ឱ្យ​ការងារ​ក្រសួង​នោះ​ទេ ប៉ុន្តែ មន្ត្រី​រដ្ឋាភិបាល​ថា ការតែងតាំង​ជា​តម្រូវការ​ចាំបាច់​របស់​ក្រសួង​យុត្តិធម៌​ក្នុង​ពេលនេះ។

នាយករង​ទទួលបន្ទុក​ផ្នែក​ឃ្លាំមើល​នៃ​សិទ្ធិមនុស្ស លីកាដូ លោក អំ សំអាត មានប្រសាសន៍ថា ការ​ធ្វើ​កំណែទម្រង់​ប្រព័ន្ធ​យុត្តិធម៌​មិន​ចាំ​បាច់​ត្រូវការ​ទីប្រឹក្សា​ច្រើនពេក​នោះ​ទេ។ លោក​បន្ត​ថា ត្បិត​ទីប្រឹក្សា​ទាំង​៣៨​នាក់​នេះ មិន​ទទួល​ប្រាក់​បំណាច់​មុខងារ​ក្ដី ប៉ុន្តែ​ក៏​ធ្វើ​ឲ្យ​រដ្ឋ​ត្រូវ​ចំណាយ​ថវិកា​លើ​ផ្នែក​ផ្សេង ឬ​សម្ភាស​សម្រាប់​អ្នក​ទាំង​នោះ​ដែរ​។ មន្ត្រី​សិទ្ធិមនុស្ស​រូប​នេះ យល់​ថា ដើម្បី​ធ្វើ​កំណែ​ទម្រង់​ប្រព័ន្ធ​យុត្តិធម៌​អ្វី​ដែល​សំខាន់​គឺ​ឆន្ទៈ និង​ការ​កំណែទម្រង់​ប្រព័ន្ធ​ច្បាប់ និង​តុលាការ​ដើម្បី​ឱ្យ​តុលាការ​ក្លាយ​ជា​តុលាការ​ឯករាជ្យ​ដូច​ច្បាប់​ចែង៖ «មិនមែន​ទាល់​តែ​មាន​ទីប្រឹក្សា​របស់​ក្រសួង​ច្រើន​បាន​ធ្វើ​ការ​កំណែទម្រង់​បានទេ ហើយ​យើង​ទទួលស្គាល់​ហើយ​ថា ឯកឧត្ដម​រដ្ឋមន្ត្រី​ថ្មី​ដែល​ឡើង​មក​គឺ​លោក​បាន​បើក​យុទ្ធនាការ​មួយ​ថា ពន្លឿន​នីតិវិធី​ការ​កកស្ទះ​នៅ​តាម​តុលាការ​អញ្ចឹង​បញ្ហា​កំណែទម្រង់​ប្រព័ន្ធ​តុលាការ​នេះ​មិន​អាស្រ័យ​លើ​ទីប្រឹក្សា​ច្រើន ឬ​តិច​ទេ»

ចំណែក​អ្នកនាំពាក្យ​សមាគម​អាដហុក (Adhoc) លោក ស៊ឹង សែនករុណា ជំរុញ​ទៅ​បណ្ដា​ក្រសួង​នានា ឬ​ក្រសួងយុត្តិធម៌ គួរ​ព្យាយាម​ប្រើប្រាស់​មន្ត្រី​របស់​ខ្លួន​ដែល​មាន​ស្រាប់​ឱ្យ​អស់​លទ្ធភាព​ជាមុន​សិន មុននឹង​ជ្រើសរើស​មន្ត្រី ឬ​ទីប្រឹក្សា​បន្ថែម​។ លោក​សង្កេត​ឃើញ​ថា ក្រសួង​នានា​មាន​ការ​តែងតាំង​ទីប្រឹក្សា​ច្រើន​ហួសហេតុ ប៉ុន្តែ​មិនទាន់​បាន​ដឹង​ថា តើ​ទីប្រឹក្សា​ទាំងនោះ​បាន​ជួយ​ការងារ​កម្រិត​ណា​នោះ​ទេ៖ «ការ​ព្រួយបារម្ភ​ចំពោះ​ការចាត់ចែង​ទាំងអស់​ហ្នឹង​ធ្វើ​ឱ្យ​ប៉ះពាល់​និង​ខាត​ប្រយោជន៍​ទៅដល់​ធនធាន​របស់​ជាតិ អ៊ីចឹង​យើង​ចង់​ឃើញ​អ្នក​មាន​ធនធាន​ស្រាប់​ក៏​គួរ​យើង​ពិនិត្យ​ឬក៏​កែប្រែ​ប្រើប្រាស់​ឱ្យ​អស់​លទ្ធភាព​សិន​ជាជាង​យើង​បន្ថែម​ការ​រើស​បន្ថែម​ទៀត»

ការរិះគន់​បែបនេះ​របស់​មន្ត្រី​សង្គម​ស៊ីវិល ក្រោយ​រដ្ឋាភិបាល លោក ហ៊ុន សែន ទូល​ថ្វាយទៅ​ព្រះមហាក្សត្រ​ស្នើ​តែងតាំង​ទីប្រឹក្សា​ក្រសួងយុត្តិធម៌​ចំនួន ៣៨​នាក់​។ ព្រះរាជក្រឹត្យ​របស់​ព្រះមហាក្សត្រ​ចុះ ថ្ងៃ​ទី​២៩ ខែ​សីហា បាន​ត្រាស់បង្គាប់​តែងតាំង និង​ផ្ដល់​ឋានៈ​ទីប្រឹក្សា​ក្រសួង​យុត្តិធម៌​ចំនួន ៣៨​រូប ដោយ​ក្នុង​នោះ​មាន​ឋានៈ​ស្មើ​អនុរដ្ឋលេខាធិការ​ចំនួន ៦​នាក់ និង​ឋានៈ​ស្មើ​អគ្គនាយក​ចំនួន ៣២​នាក់​។ ព្រះរាជក្រឹត្យ​ដដែល​បញ្ជាក់​ថា ទីប្រឹក្សា​ទាំង​៣៨​រូប​នេះ មិន​ទទួល​ប្រាក់​បំណាច់​មុខងារ​ឡើយ។

អាស៊ី​សេរ​មិន​អាច​សុំ​ប្រតិកម្ម​តប​ពី​អ្នកនាំពាក្យ​ក្រសួង​យុត្តិធម៌​លោក ជិន ម៉ាលីន បាន​នោះ​ទេ នៅ​ថ្ងៃទី​៣០ ខែ​សីហា។

រីឯ អ្នកនាំពាក្យ​រដ្ឋាភិបាល លោក ផៃ ស៊ីផាន យល់​ថា ការរិះគន់​របស់​មន្ត្រី​សង្គម​ស៊ីវិល​នេះ អាច​មក​ពី​ពួកគេ​មិន​ដឹង​ពី​តម្រូវការ និង​ភាព​ចាំបាច់​នៃ​ការងារ​របស់​ក្រសួងយុត្តិធម៌​។ លោក​អះអាង​ថា ទីប្រឹក្សា​ទាំងនោះ​គឺ​មក​ជួយ​ការងារ​ក្រសួង មិនមែន​ឱ្យ​ពួកគេ​មក​អង្គុយលេង​នោះ​ឡើយ៖ «ការតែងតាំង​ហ្នឹង​មិនមែន​តែងតាំង​ដើម្បី​បក្សពួក គឺ​ដើម្បី​កែទម្រង់​ប្រព័ន្ធ​យុត្តិធម៌ ដូច្នេះ​អ្នក​ទាំង​អស់ហ្នឹង​មិនមែន​គ្រាន់តែ​បាន​ងារ​ហើយ​អង្គុយលេង​នៅ​ក្នុង​ការិយាល័យ​ទេ»

ប៉ុន្តែ តំណាងរាស្ត្រ​គណបក្ស​គណបក្ស​សង្គ្រោះ​ជាតិ​លោក អ៊ុំ សំអាន លើកឡើង​ថា ទីប្រឹក្សា​ភាគច្រើន​មិនបាន​ផ្ដល់​គំនិត​យោបល់​អ្វី​ដើម្បី​ធ្វើការ​កំណែទម្រង់​នោះ​ទេ​។ លោក​សង្កេត​ឃើញ​ថា អ្នក​ទាំងនោះ​ភាគច្រើន​យក​តួនាទី​នោះ​ទៅ​កាង​មុខរបរ​របស់​ខ្លួន និង​យក​តួនាទី​នោះ​ទៅ​រំលោភ​បំពាន​ដីធ្លី​របស់​ពលរដ្ឋ​ទៅវិញ៖ «រដ្ឋាភិបាល​លោក ហ៊ុន សែន គឺ​ក្បាល​ធំ​ជាង​ខ្លួន​ប្រទេស​ក្រ​ផង​យក​មនុស្ស​មក​ដាក់​ធ្វើការ​ឯកឧត្ដម​ទីប្រឹក្សា​ច្រើន​ហួសពេក​អ៊ីចឹង​នាំ​ឱ្យ​អតិផរណា​ឯកឧត្ដម»

មាត្រា​៣៥ នៃ​ច្បាប់​សហ​លក្ខន្តិកៈ​មន្ត្រី​រាជការ​ស៊ីវិល​ចែងថា មន្ត្រីរាជការ​ត្រូវ​ហាម​ដាច់ខាត​មិន​ឲ្យ​ចូល​ជា​សមាជិក​ក្នុង​ក្រុមប្រឹក្សាភិបាល ឬ​គ្រប់គ្រង​ក្រុមហ៊ុន​ឯកជន​ដោយ​ផ្ទាល់ ឬ​ប្រយោល​នោះ​ទេ។ នេះ​មិនមែន​ជា​លើកទីមួយ​ទេ ដែល​មាន​ការតែងតាំង​ទីប្រឹក្សា​រាប់​សិប​នាក់​តាម​ក្រសួង​នីមួយៗ របស់​រដ្ឋាភិបាល​លោក ហ៊ុន សែន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល