សង្គម​ស៊ីវិល​រិះគន់​ការ​អនុញ្ញាត​ឱ្យ​ឧកញ៉ា គិត ធាង នៅ​ក្រៅ​គុក និង​បើក​សវនាការ​អសាធារណៈ

ដោយ សុ ជីវី
2020-02-19
អ៊ីម៉ែល
មតិ
Share
បោះពុម្ព
ឧកញ៉ា គិត ធាង ម្ចាស់​ក្លឹប​កម្សាន្ត រ៉ុក (Rock) មុន​ពេល​អាជ្ញាធរ​រាជធានី​ភ្នំពេញ​ចាប់​ខ្លួន កាល​ពី​ថ្ងៃ​ទី១១ ខែ​មីនា ឆ្នាំ២០១៩។
ឧកញ៉ា គិត ធាង ម្ចាស់​ក្លឹប​កម្សាន្ត រ៉ុក (Rock) មុន​ពេល​អាជ្ញាធរ​រាជធានី​ភ្នំពេញ​ចាប់​ខ្លួន កាល​ពី​ថ្ងៃ​ទី១១ ខែ​មីនា ឆ្នាំ២០១៩។
រូប៖ ហ្វេសប៊ុក Royal Financial Corp

មន្ត្រី​សង្គម​ស៊ីវិល​រិះគន់​អាជ្ញាធរ​និង​តុលាការ ដែល​អនុញ្ញាត​ឱ្យ​ឧកញ៉ា គិត ធាង ម្ចាស់​ក្លឹប​កម្សាន្ត រ៉ក់ (ROCK) ដែល​ជាប់ចោទ​ពី​បទ​សម្រួល​ឱ្យ​មានការ​ប្រើប្រាស់​គ្រឿងញៀន​នោះ បន្ត​រស់នៅ​ក្រៅ ពន្ធនាគារ ជិត​១​ឆ្នាំ​ហើយ និង​ការ​បើក​សវនាការ​ជំនុំជម្រះ​ធ្វើឡើង​ដោយ​អសាធារណៈ។ មន្ត្រី​សិទ្ធិមនុស្ស យល់ថា ករណី​នេះ ធ្វើ​ឱ្យ​សាធារណជន មើល​ឃើញ​អំពី​ការអនុវត្ត​ច្បាប់ មាន​ស្តង់ដារ​ពីរ និង​មាន​ការ​សង្ស័យ​ពី​អំពើពុករលួយ​ជា​ប្រព័ន្ធ។

ការរិះគន់​ពី​សំណាក់​មន្ត្រី​អង្គការ​សង្គម​ស៊ីវិល​នេះ គឺ​បន្ទាប់ពី​សាលាដំបូង​ក្រុងភ្នំពេញ​បាន​បើកសវនាការ​ជំនុំជម្រះ​សំណុំរឿង​លោក គិត ធាង ជា​អសាធារណៈ ឬ​បិទទ្វារ បិទ​បាំង​ពី​ភ្នែក​មហាជន កាលពី​ថ្ងៃ​ទី​១៨ កុម្ភៈ។ លើស​ពី​នេះ ឧកញ៉ា​គិត ធាង ដែល​ពាក់ព័ន្ធ​នឹង​អំពើ​ជួញដូរ​គ្រឿងញៀន​ជិត ៥០​គីឡូក្រាម នៅ​ក្លឹប​កម្សាន្ត​រ៉ក់ (Rock) នៅតែ​ទទួល​បាន​សិទ្ធិ​ពិសេស គឺ​អាច​រស់នៅ​ក្រៅ​ពន្ធនាគារ​ក្រោម​ហេតុផល​ព្យាបាល​ជំងឺ​ជិត ១​ឆ្នាំ​មក​ហើយ។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ លីកាដូ (LICADHO) លោក អំ សំអាត មាន​ប្រសាសន៍ថា សំណុំរឿង​ជួញដូរ​គ្រឿងញៀន ដែល​មាន​ជនជាប់ចោទ​ជា​ឧកញ៉ា គិត ធាង នេះ​គឺជា​សំណុំរឿង​ធំ​មួយ និង​មានការ​ចាប់អារម្មណ៍​ពី​សាធារណជន​ខ្លាំង ដូច្នេះ​នៅ​ពេល​ដែល​តុលាការ​ក្រុង​ភ្នំពេញ បើក​សវនាការ​ជា​អសាធារណៈ ដោយ​គ្មាន​សំអាង​ហេតុ​ត្រឹមត្រូវ គឺ​កាន់​តែ​​ធ្វើ​ឱ្យ សាធារណជន បន្ត​រិះគន់ និង​មាន​មន្ទិលសង្ស័យ​អំពី​ភាព​មិន​ប្រក្រតី​ជាច្រើន​។ លោក អំ សំអាត ពន្យល់​ថា ការ​បើក​សវនាការ​អសាធារណៈ​នេះ គឺ​កម្រ​មាន​ណាស់ លុះត្រាតែ​តុលាការ​មាន​​សំអាង ហេតុ​ច្បាស់លាស់​ត្រឹមត្រូវ ជា​ឧទាហរណ៍​ដូចជា​ពាក់ព័ន្ធ​នឹង​ករណី​រំលោភ​សេពសន្ថវៈ និង​រឿង​អនីតិជន​ជាដើម ទើប​តុលាការ​អាច​ធ្វើ​ជា​អសាធារណៈ ឬ​បិទ​ទ្វារ​បាន ដើម្បី​កុំ​ឱ្យ​ប៉ះពាល់​ដល់​ឯកជន​ភាព ឬ​កិត្តិយស​របស់​ពួកគេ៖ «ប៉ុន្តែ​រឿង​បទឧក្រិដ្ឋ រឿង​សំខាន់​ធំៗ​ដែល​គេ​ហៅថា ជា​សវនាការ​ជា​សាធារណៈ​នោះ គឺ​ត្រូវតែ​បើក​ជា​ឡាយ (Live) ហើយ​។ កាលណា​រឿង​បទល្មើស​ធំៗ​ដែល​ប្រជាពលរដ្ឋ និង​អ្នកសារព័ត៌មាន ចង់​ដឹង​ហើយ​ធ្វើជា​អសាធារណៈ គឺ​វា​ធ្វើ​ឱ្យ​មានការ​សង្ស័យ​ច្រើន​ទៅវិញ។ បទល្មើស​គ្រឿងញៀន​ដែល​មានការ​ល្បីល្បាញ​ខ្ចរខ្ចាយ​ច្រើន ហេតុ​អី​បាន​ធ្វើ​អសាធារណៈ។ ករណី​នេះ នាំ​ឱ្យ​មាន​មន្ទិលសង្ស័យ​ជាច្រើន​ទៀត បន្ទាប់​ពី​កន្លងមក លោក​ឧកញ៉ា គិត ធាង នៅតែ​ក្នុង​មន្ទីរពេទ្យ ដោយ​គាត់​មិន​បាន​ជាប់​នៅ​ក្នុង​ពន្ធនាគារ​នោះ​ទេ»

កាលពី​ថ្ងៃ​ទី​១៨ ខែ​កុម្ភៈ សាលាដំបូង​រាជធានី​ភ្នំពេញ បាន​បើក​សាវ​នា​ការ​ជំនុំជម្រះ​ជា​អសាធារណៈ​លើ​​ជនជាប់ចោទ​ឧកញ៉ា គិត ធាង និង​ស្ត្រី​ចំនួន ៣នាក់ ក្នុងចំណោម​ជនជាប់ចោទ ២៧នាក់ ដែល​ពាក់ព័ន្ធ​នឹង​ អំពើ​ជួញដូរ​គ្រឿងញៀន​ជិត ៥០​គីឡូក្រាម ក្នុង​ក្លឹប​កម្សាន្ត​រ៉ក់ (Rock)​។ សវនាការ​កាលពី​ថ្ងៃ​ពុធ​នោះ​គឺជា​លើកទីមួយ​ហើយ ដែល​លោក គិត ធាង បង្ហាញ​ខ្លួន​ក្នុង​បន្ទប់​សវនាការ ខណៈ​ដែល​តុលាការ បាន​បើក​សវនាការ​ជា​អសាធារណៈ​ចំនួន ៣ ទៅ ៤​ដង​រួច​មក​ហើយ តែ​មិន​មាន​វត្តមាន​លោក គិត ធាង។

មន្ត្រី​ពន្ធនាគារ បាន​នាំ​ខ្លួន​ឧកញ៉ា គិត ធាង ចូល​ក្នុង​បន្ទប់​សវនាការ​ដោយ​មិន​មាន​ដាក់​ខ្នោះដៃ ហើយ​មាន​សំលៀកបំពាក់​ធម្មតា ថែមទាំង​មាន​ក្រវាត់​ក ពាក់​ម៉ាស់​ការពារ ខុស​ពី​ជនជាប់ចោទ​ផ្សេង​ទៀត។

នៅ​មុន​សវនាការ​ចាប់ផ្ដើម ប្រធាន​ក្រុមប្រឹក្សា​ជំនុំជម្រះ​សាលាដំបូង​រាជធានី​ភ្នំពេញ លោក អ៊ឹម វណ្ណៈ បាន​ប្រកាស​ថា តុលាការ មិន​អនុញ្ញាត​ឱ្យ​អ្នក​មិន​ជាប់​ពាក់ព័ន្ធ និង​អ្នកសារព័ត៌មាន​ចូល ស្តាប់​នោះ​ទេ ក្រោម​ហេតុផល​ថា សំណុំ​រឿង​នេះ មាន​ជនជាប់ចោទ​ជា​អនីតិជន។

ទោះជា​យ៉ាងណា កាសែត​ភ្នំពេញ​ប៉ុស្តិ៍ បាន​ស្រង់​សម្ដី​មេធាវី​មួយ​រូប​ដែល​សុំ​មិន​បញ្ចេញ​ឈ្មោះថា ក្នុង​ចំណោម​ជនជាប់ចោទ​ទាំង ២៧ នាក់ នៅ​ក្នុង​ឃុំ​មាន​ជន​មិនទាន់​គ្រប់​អាយុ ឬ​អនីតិជន​តែ​ម្នាក់​ទៅ ២ នាក់​ប៉ុណ្ណោះ ហើយ​ពួកគេ​ត្រូវ​បាន​សួរដេញដោល​រួច​អស់ហើយ កាលពី​សវនាការ​លើក​មុន​។ មេធាវី​រូប​នោះ បន្ត​ថា សវនាការ​នៅ​ថ្ងៃ​១៨ កុម្ភៈ​នោះ អត់​មាន​អនីតិជន​ទេ គឺ​សុទ្ធតែ​មនុស្ស​គ្រប់​អាយុ​ទាំងអស់ ហើយ​លោក ក៏​មាន​ចម្ងល់​ដែរ​ថា ហេតុអ្វី​ក៏​តុលាការ នៅតែ​ត្រូវ​ជំនុំជម្រះ​ជា​អសាធារណៈ។

អាស៊ីសេរី បាន​ព្យាយាម​ទូរស័ព្ទ​ជាច្រើនលើក​ទៅ​ប្រធាន​ក្រុមប្រឹក្សា​ជំនុំជម្រះ លោក អ៊ឹម វណ្ណៈ និង តំណាង​អយ្យកា​រលោក សុក កែវ​បណ្ឌិត ប៉ុន្តែ​ទូរស័ព្ទ​ចូល​ពុំ​មាន​អ្នកទទួល។

ចំណែក​មេធាវី​ការពារ​ក្តី​មួយ​រូប​ឱ្យ​ឧកញ៉ា គិត ធាង គឺ​លោក សួង ចាន់ថន បដិសេធ​មិន​ឆ្លើយ​តប ជាមួយ​អាស៊ីសេរី​នោះ​ទេ ដោយ​បង្វែរ​ឱ្យ​ទៅ​សួរ​មេធាវី​មួយ​រូប​ទៀត គឺ​អ្នកស្រី ទី គឹមស្រ៊ាន៖ «អូ​! សូម​បង​ជួយខល​ទៅ​មេធាវី ទី គឹមស្រ៊ាន វិញ»

អាស៊ីសេរី បាន​ទាក់ទង​ទៅ​អ្នកស្រី​មេធាវី ទី គឹមស្រ៊ា​ន ជាច្រើន​ដង​ដែរ តែ​គ្មាន​អ្នក​ទទួល​ទូរស័ព្ទ។

បងប្រុស​បង្កើត​របស់​ឧកញ៉ា គិត ម៉េង គឺ​ឧកញ៉ា គិត ធាង ត្រូវ​បាន​បញ្ជូន​ចេញពី​ពន្ធនាគារ​ទៅ សម្រាក​ព្យាបាល​នៅ​មន្ទីរ​ពេទ្យ​រុស្ស៊ី​តាំងពី​ថ្ងៃ​ទី១ ខែ​មេសា ឆ្នាំ​២០១៩ ក្រោម​ហេតុផល​ថា មាន​ជំងឺ​សួត និង​ស្ទះ​ដង្ហើម បន្ទាប់ពី​ជាប់ឃុំ​ក្នុង​ពន្ធនាគារ​រាជ​ធានីភ្នំពេញ​ប៉េហ្ស៊ី (PJ) រយៈពេល​ប្រមាណ​កន្លះ​ខែ។ គិត​មក​ទល់​ពេល​នេះ​លោក គិត ធាង នៅ​ក្រៅ​ពន្ធនាគារ ក្រោម​ហេតុផល​ព្យាបាល​ជំងឺ​អស់​រយៈ​ពេល​ជាង ​១០​ខែ​មក​ហើយ​។ កន្លង​មក សារព័ត៌មាន​ក្នុងស្រុក ក៏បាន​ចុះផ្សាយ​ដោយ​ស្រង់​សម្ដី​បុគ្គលិក​ពេទ្យ​រស្ស៊ី​ថា លោក គិត ធាង គ្មាន​ជំងឺ​អ្វី​ធ្ងន់ធ្ងរ​ដល់​ថ្នាក់​ចាក់​ថ្នាំ ឬ​ឱ្យ​ថ្នាំ​លេប​​នោះ​​ទេ ប៉ុន្តែ លោក គិត ធាង មិន​ព្រម​ត្រឡប់​ទៅវិញ ព្រោះ​លោក​មាន​សមត្ថភាព​ជួល​បន្ទប់​ពិសេស​របស់​មន្ទីរ​ពេទ្យ​ដើម្បី​ស្នាក់នៅ​ដែល​អាច​ងាយស្រួល​ជាង​ការ​រស់នៅ​ក្នុង​ពន្ធនាគារ។

អ្នកនាំពាក្យ​អគ្គនាយកដ្ឋាន​ពន្ធនាគារ​នៃ​ក្រសួងមហាផ្ទៃ លោក នុត សាវនា ប្រាប់​អាស៊ីសេរី​ថា ក្រោយ​បញ្ចប់​ការ​សួរ​ដេញដោល​នៅ​តុលាការ គឺ​លោក គិត ធាង ត្រូវ​បាន​បញ្ជូន​ទៅ​មន្ទីរពេទ្យ​រុស្ស៊ី វិញ​។ លោក នៅតែ​បញ្ជាក់​ដដែល​ថា ការ​មិន​អាច​នាំ​ខ្លួន​លោក គិត ធាង ចូល​ពន្ធនាគារ​វិញ​នេះ គឺ ដោយសារតែ​ខាង​មន្ទីរពេទ្យ មិន​ព្រម​ចេញ​លិខិតបញ្ជាក់​ពី​ស្ថានភាព​ជំងឺ និង​អនុញ្ញាត​ឱ្យ​នាំ​ខ្លួន​ទៅ ឃុំ​នៅ​ក្នុង​ពន្ធនាគារ​វិញ៖ «ហេតុផល​សាមញ្ញ គឺ​ពេទ្យ​អត់​ឱ្យ​ចេញ ហើយ​ឱ្យ​ខ្ញុំ​ទៅ​អូស​ក​គាត់​មក​ម៉េច អា​នឹង​វា​មិន​ខុសច្បាប់។ ពេទ្យ​គេ​អះអាង​ថា គាត់​កំពុង​មាន​ជំងឺ​រ៉ាំរ៉ៃ​ត្រូវ​តាមដាន​សុខ ភាព​និង​ព្យាបាល​នៅ​ទីនោះ ហើយ​បើ​ខ្ញុំ​ទៅដល់​ថា អត់​ទេ តើ​ខ្ញុំ​សំអាង​លើ​អី បើ​ខ្ញុំ​មិន​មាន​ជំនាញ​វេជ្ជសាស្ត្រ​ផង»

លោក នុត សាវនា ឱ្យ​ដឹង​ដែរ​ថា ការ​អនុញ្ញាត​ឱ្យ​លោក គិត ធាង ស្លៀកពាក់​ស៊ីវិល និង​មិន​ដាក់​ខ្នោះ ដៃ​ឡើង​សវនាការ​នេះ ដោយសារតែ​ជនជាប់ចោទ​រូប​នេះ មាន​សុខភាព​ទ្រុឌទ្រោម និង​ងាយស្រួល​កំណត់​អត្តសញ្ញាណ៖ «ដោយឡែក​ចំពោះ​ជន​ជាប់ឃុំ​មួយ​ចំនួន​ដែល​ឡើង​សវនាការ​ពាក់អាវ​អ្នកទោស​នេះ គឺ​ទី​១​គាត់​មិន​បាន​ស្នើ​ពាក់អាវ​ស៊ីវិល​មក​យើង ហើយ​បើ​គាត់​ស្នើ ក៏​យើង​ពិចារណា អនុញ្ញាត​ឱ្យ​ដែរ​។ មួយទៀត ករណី​ខ្លះ​យើង​ធ្វើ​ដើម្បី​ហេតុផល​សន្តិសុខ ហើយ​បើ​គាត់​ពាក់​ស៊ីវិល​ទៅ និង​ករណី​មុខសញ្ញា​ខ្លះ​គាត់​អាច​លួច​រត់គេច​ខ្លួន​ឬ​យ៉ាងម៉េច​នោះ គឺ​យើង​ប្រថុយប្រថាន​ដែរ»

មន្ត្រី​សង្គម​ស៊ីវិល ពិនិត្យ​ឃើញ​ថា ការអនុវត្ត​ច្បាប់​លើ​ឧកញ៉ា គិង ធាង នេះ មាន​លក្ខណៈ​ស្តង់ដារ​ពីរ​តាំង​ពី​ដើម​មក​។

កាលពី​យប់​ថ្ងៃ​ទី​២៣ ខែ​កុម្ភៈ ឆ្នាំ២០១៩ កម្លាំង​សមត្ថកិច្ច​ចម្រុះ​ដែល​ដឹកនាំ​ផ្ទាល់​ដោយ​ស្នងការ​នគរបាល​រាជធានី​ភ្នំពេញ លោក ស ថេត បាន​ចុះ​បង្ក្រាប​ទីតាំង​មជ្ឈមណ្ឌល​កម្សាន្ត​រ៉ក ពាក់ព័ន្ធ​ករណី​ប្រើប្រាស់​សម្រួល និង​ចាត់ចែង​ដោយ​ខុសច្បាប់​នូវ​សារធាតុ​ញៀន​។ ក្នុង​ប្រតិបត្តិ​ការ​បង្ក្រាប​នោះ​កម្លាំង​ចម្រុះ​បាន​ឃាត់ខ្លួន​មនុស្ស ៣១១នាក់ ជាមួយ​វត្ថុ​តាង​គ្រឿងញៀន​ផ្សេងៗ​ សរុប​ទាំង​អស់​ជិត ៥០ ( ៤៩,៤៤) គីឡូក្រាម​។ ប៉ុន្តែ​ក្នុង​សមត្ថកិច្ច មិនបាន​ចាប់ខ្លួន​ម្ចាស់​ក្លិប កម្សាន្ត​រ៉ក ភ្លាមៗ​ទេ ពោល​គឺ​ទាល់តែ​លោកនាយក​រដ្ឋមន្ត្រី ហ៊ុន សែន បញ្ជា​ដោយ​ផ្ទាល់ ទើប​សមត្ថកិច្ច​ចាប់​ខ្លួន​លោក គិត ធាង នៅ​ថ្ងៃ​ទី​១១ ខែ​មីនា ឆ្នាំ​២០១៩។​ បទបញ្ជា​របស់​លោក ហ៊ុន សែន ពេលនោះ​ទៀតសោត ក៏​ដោយសារតែ​មានការ​រិះគន់​ខ្លាំង​លើ​បណ្ដាញ​សង្គម​ហ្វេសប៊ុក។ ទាក់ទង​នឹង​​ករណី​នេះ តុលាការ​បាន​សម្រេច​ចោទប្រកាន់ និង​ឃុំខ្លួន​មនុស្ស​ចំនួន​ ២៧​នាក់ ចំណែក​​អ្នក​​ផ្សេង​ទៀត ​ត្រូវ​​បាន​​ដោះលែង​​វិញ​​ជា​​បន្តបន្ទាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល