ក្រុម​សង្គម​ស៊ីវិល​ថា ការ​បន្ត​ជួប​ជជែក​គ្នា ដើម្បី​កែ​ប្រែ​ច្បាប់​អង្គការ​សមាគម មាន​ភាព​យឺតយ៉ាវ​ខ្លាំង

ដោយ អាស៊ីសេរី
2019-12-03
អ៊ីម៉ែល
មតិ
Share
បោះពុម្ព
កិច្ចប្រជុំ​រវាង​ក្រសួង​មហាផ្ទៃ និង​និង​អង្គការ​មិន​មែន​រដ្ឋាភិបាល ដើម្បី​ពិនិត្យ និង​ពិភាក្សា​លើ​ការ​ធ្វើ​វិសោធនកម្ម​ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល នា​ទីស្ដីការ​ក្រសួងមហាផ្ទៃ នៅ​ថ្ងៃ​ទី៣ ខែ​ធ្នូ ឆ្នាំ២០១៩។
កិច្ចប្រជុំ​រវាង​ក្រសួង​មហាផ្ទៃ និង​និង​អង្គការ​មិន​មែន​រដ្ឋាភិបាល ដើម្បី​ពិនិត្យ និង​ពិភាក្សា​លើ​ការ​ធ្វើ​វិសោធនកម្ម​ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល នា​ទីស្ដីការ​ក្រសួងមហាផ្ទៃ នៅ​ថ្ងៃ​ទី៣ ខែ​ធ្នូ ឆ្នាំ២០១៩។
រូប៖ ហ្វេសប៊ុក​ក្រសួងមហាផ្ទៃ

ការ​ពិភាក្សា​ស្ដីពី​ការ​ធ្វើ​វិសោធនកម្ម​ច្បាប់​ស្ដីពី​ សមាគម អង្គការ​មិន​មែន​រដ្ឋាភិបាល នៅ​ក្រសួង​មហាផ្ទៃ នៅ​ព្រឹក​ថ្ងៃ​ទី៣ ធ្នូ មាន​ភាព​យឺតយ៉ាវ​ខ្លាំង ស្ទើរ​តែ​នៅ​ទ្រឹង​តែ​ម្ដង។ តំណាង​អង្គការ​សង្គម​ស៊ីវិល ដែល​បាន​ចូលរួម​ក្នុង​កិច្ច​ពិភាក្សា​នោះ​ ឲ្យ​ដឹង​ថា​មូលហេតុ​ចម្បង ដែល​ធ្វើ​ឲ្យ​កិច្ច​ពិភាក្សា​នេះ ស្ទើរ​តែ​ទៅ​មុខ​មិន​រួច គឺ​ដោយសារ​ ក្រសួង​មិន​បាន​ដាក់​គោលការណ៍​ជាក់លាក់ ចំពោះ​​សមាសភាព​ អ្នក​ចូលរួម​ប្រជុំ។

អ្នក​សម្រប​សម្រួល​ និង​អង្កេត​នៃ​អង្គការ​ខុមហ្វ្រែល លោក កន សាវាង្ស ប្រាប់​ថា ការ​ជជែក​គ្នា​រវាង​ក្រុម​អង្គការ សមាគម ជាមួយ​ក្រសួង​មហាផ្ទៃ បន្ត​បាន​ចំនួន ២មាត្រា គឺ​មាត្រា៨ និង​មាត្រា៩ បន្ថែម​ទៀត។ លោក​ថា ក្រសួង​មហាផ្ទៃ បាន​អនុញ្ញាត​ឲ្យ​សង្គម​ស៊ីវិល​ផ្សេង​ទៀត ដែល​មិន​សូវ​មាន​សកម្មភាព​ការពារ​សិទ្ធិ​មនុស្ស​ ចូលរួម​ផ្ដល់​មតិ​យោបល់ និង​​ជំទាស់​ការ​លើក​ឡើង​របស់​ក្រុម​សង្គម​ស៊ីវិល សកម្ម​ខាង​ការពារ​សិទ្ធិ​មនុស្ស។ លោក​បន្ត​ថា ការ​មិន​បាន​កំណត់​ពី​គោលការណ៍​សមាស​ភាព​អ្នក​ចូលរួម​​​ជាក់លាក់​នាំ​ឱ្យ​ការ​ជជែក​មាន​ភាព​យឺតយ៉ាវ។ មិន​តែ​ប៉ុណ្ណោះ​ លោក​ថា តំណាង​ក្រសួង​មហាផ្ទៃ​បាន​លើក​យក​មាត្រា​ ដែល​ធ្លាប់​ជជែក​គ្នា​រួច​ហើយ មក​ជជែក​គ្នា​ឡើង​វិញ​ថែម​ទៀត ដែល​ធ្វើ​ឲ្យ​កាន់​តែ​មាន​ភាព​យឺតយ៉ាវ។

(លោក កន សាវាង្ស អ្នក​សម្រប​សម្រួល​ និង​អង្កេត​នៃ​អង្គការ​ខុមហ្វ្រែល (COMFREL)


អ្នក​តំណាង​​ឲ្យ​ក្រុម​អង្គការ​សមាគម​សិទ្ធិ​មនុស្ស​ធំៗ នៅ​កម្ពុជា​រូប​នេះ​បារម្ភ​ថា បើ​​ការ​ជជែក​ ផ្ដល់​យោបល់​លើ​ច្បាប់​នេះ នៅ​បន្ត​ភាព​យឺតយ៉ាវ និង​នៅ​ទ្រឹង​ ត្រឹម​​ដំណាក់​ក្រសួង​មហាផ្ទៃ បែប​នេះ នឹង​មិន​អាច​បញ្ជូន​ទៅ​គណៈ​រដ្ឋមន្ត្រី ឬ​រដ្ឋសភា​អនុម័ត​ឆាប់ៗ ​​បាន​ទេ។ លោក​បញ្ជាក់​ថា ប្រការ​នេះ នឹង​​ធ្វើ​ឲ្យ​អង្គការ​សង្គម​ស៊ីវិល នៅ​ក្នុង​ប្រទេស​កម្ពុជា នៅ​តែ​បន្ត​រង​ផល​ប៉ះពាល់​ដល់​​ការ​ធ្វើ​សកម្ម​ភាព​។ ឯ​រដ្ឋាភិបាល នឹង​​បន្ត​​មាន​ឈ្មោះ​មិន​ល្អ ពី​ការ​រឹតត្បិត​សិទ្ធិ​ សេរីភាព សង្គម​ស៊ីវិល​ដដែល៖ «ការ​បើក​ដោយ​ទូលាយ​អ៊ីចឹង យើង​គិត​ថា កិច្ចការ​ងារ​ហ្នឹង យើង​មិន​អាច​ជជែក​បាន​ច្រើន​ ឲ្យ​បាន​ទាន់​ពេល​វេលា​ទេ។ ទី​២ យើង​ចង់​បាន​ដែរ ឆន្ទៈ​ក្រសួង​ក្នុង​ការ​ ដែល​លើក​ឲ្យ​ជជែក​ហ្នឹង ថា​តើ​មាន​ផែន​ការ​​ពេល​ណា ព្រោះ​យើង​អត់​ចង់​​បាន​ ទៅ​ប្រជុំ​ម្ដង​ ពីរ​មាត្រា បី​​មាត្រា។ ក្នុង​ករណី​ ដែល​យើង​ជជែក​ក្នុង​ក្រុម​របស់​យើង​រួចរាល់​ហើយ ស្រាប់​តែ​ប្រទូស្តប្រទាំង​ជាមួយ​ស្ថាប័ន​​ផ្សេង ដែល​យើង​អត់​ដែល​ស្គាល់ ហើយ​​ក៏​អត់​ដឹង​ថា គាត់​ដាក់​ ឬ​ក៏​មិន​មក​យ៉ាង​ម្ដេច​ផង ហើយ​យើង​មក​លើក​បញ្ហា​ជំទាស់​ដែរ ហើយ​មក​ថា សង្គម​ស៊ីវិល​អត់​ត្រូវ​គ្នា ខ្ញុំ​គិត​ថា ចំណុច​នេះ ហាក់​ដូច​​ជា​យើង​មិន​ដឹង​ជា យល់​ឃើញ​បែប​ម្ដេច​ណា? យើង​មិន​ចង់​ឃើញ​ការ​ធ្វើ​កិច្ចការ​ងារ​​ណាមួយ ដែល​វា​អត់​ឃើញ​មាន​សញ្ញា​ណា​មួយ ជា​លទ្ធផល​វិជ្ជមាន​ទេ​ណា»

ក្រសួង​មហាផ្ទៃ និង​ក្រុម​អង្គការ​សមាគម បាន​បន្ត​កិច្ច​ប្រជុំ​លើកទី២ ​ដើម្បី​ពិគ្រោះ​យោបល់​ពិនិត្យ និង​ពិភាក្សា​លើ​ខ្លឹមសារ​ ដើម្បី​ស្នើសុំ​ធ្វើ​វិសោធនកម្ម​ ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល តាម​សំណើ​របស់​អង្គការ​សង្គម​ស៊ីវិល។ គេហទំព័រ​ក្រសួង​មហាផ្ទៃ ចុះ​ផ្សាយ​ថា​ ក្រុម​តំណាង​អង្គការ​សង្គម​ស៊ីវិល​មួយ​ចំនួន បាន​ស្នើសុំ​​​ធ្វើ​វិសោធនកម្ម​ច្បាប់​ស្ដីពី​​សមាគម និង​អង្គការ​មិនមែន​រដ្ឋាភិបាល​ចំនួន ១៧​មាត្រា ដែល​ពួកគេ​ ចាត់​ទុក​ថា បាន​ធ្វើ​ឲ្យ​ប៉ះពាល់​ដល់​សិទ្ធិ និង​លទ្ធិ​ប្រជាធិបតេយ្យ។

អាស៊ី​សេរី មិន​អាច​សុំ​ការ​បញ្ជាក់​បន្ថែម​ពី​​រដ្ឋ​លេខាធិការ​ក្រសួង​មហាផ្ទៃ លោក ប៊ុន ហុន ដែល​ដឹកនាំ​កិច្ច​ប្រជុំ និង​អគ្គ​នាយក នៃ​អគ្គ​នាយកដ្ឋាន​រដ្ឋបាល លោក ប្រាក់​ សំអឿន បាន​ទេ នៅ​ថ្ងៃ​ទី​៣ ធ្នូ ដោយសារ​ ទូរស័ព្ទ​រោទ៍​គ្មាន​អ្នក​ទទួល។

 

​​(លោក ប៊ុន ហុន រដ្ឋ​លេខាធិការ​ក្រសួង​មហាផ្ទៃ)

ទោះ​យ៉ាង​ណា លោក ប៊ុន ហុន ក៏​ធ្លាប់​លើក​ឡើង​ពី​ផល​លំបាក​ នៃ​ក្រុម​អង្គការ​​សង្គម​ស៊ីវិល​ខ្លះ​ នៅ​មិន​ទាន់​​យល់​ច្បាស់​ខ្លឹមសារ ដែល​​ចង់​កែប្រែ។ តំណាង​ភាគី​​ក្រសួង​មហាផ្ទៃ​រូប​នេះ ​ធ្លាប់​ប្រាប់​ក្រុម​អ្នក​សារ​ព័ត៌មាន ក្រោយ​បញ្ចប់​កិច្ច​ប្រជុំ​​លើក​ទី១ កាល​ពី​ថ្ងៃ​ទី៤ វិច្ឆិកា​ថា ក្រសួង​មហាផ្ទៃ​ចង់​ឲ្យ​តំណាង​អង្គការ សមាគម​ទាំង​អស់ លើក​យក​អំណះអំណាង​ផ្សេងៗ ដែល​ចង់​ឲ្យ​​ធ្វើ​វិសោធនកម្ម​​​ឲ្យ​បាន​ច្បាស់ កុំ​ឲ្យ​មាន​មតិ​ច្របូក​ច្របល់​គ្នា។ តែ​លោក​​ថា ​រដ្ឋាភិបាល​​ស្វាគមន៍​ ចំពោះ​ការ​ស្នើសុំ​របស់​អង្គការ សមាគម ដែល​បាន​ចុះ​បញ្ជី​ត្រឹមត្រូវ​ នៅ​ក្រសួង​មហាផ្ទៃ​ ក្នុង​ការ​ផ្ដល់​យោបល់​ស្នើសុំ​​កែប្រែ​ច្បាប់​ ស្ដីពី​សមាគម​ និង​អង្គការ​មិន​មែន​រដ្ឋាភិបាល​នេះ។

ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល មាន​ភាព​ចម្រូងចម្រាស និង​រង​ការ​រិះគន់​ តាំង​ពី​​មិន​ទាន់​អនុម័ត​មក​ម្ល៉េះ។ ច្បាប់​នេះ ត្រូវ​បាន​ព្រះមហាក្សត្រ​ឡាយ​ព្រះហស្ត​លេខា ​ដាក់​ឱ្យ​ប្រើ កាល​ពី​ខែ​សីហា ឆ្នាំ២០១៥ មាន ៩ជំពូក និង ៣៩មាត្រា ហើយ​​ច្បាប់​នេះ តាក់តែង និង​អនុម័ត​តំណាល​គ្នា ​ជាមួយ​ច្បាប់​ស្ដីពី​សហជីព ​ព្រោះ​តែ​កំហឹង​របស់​លោក ហ៊ុន សែន។ ​ពេលនោះ​ លោក ហ៊ុន សែន ​បាន​ប្រើ​ហេតុផល​​ថា ក្រុម​អង្គការ និង​សហជីព​ឯករាជ្យ​ខ្លះ មាន​ចេតនា​ជួយ​គាំទ្រ​គណបក្ស​ប្រឆាំង ធ្វើ​បាតុកម្ម​ប្រឆាំង​​រដ្ឋាភិបាល​ ក្រោយ​ការ​បោះឆ្នោត​ឆ្នាំ២០១៣។ ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល​នេះ ក៏​ទទួល​បាន​សំឡេង​អនុម័ត​ តែ​ពី​ក្រុម​សមាជិក​រដ្ឋសភា មក​ពី​គណ​បក្ស​កាន់​អំណាច​ប៉ុណ្ណោះ ព្រោះ​តំណាង​រាស្ត្រ​បក្ស​ប្រឆាំង យល់​ថា ច្បាប់​នេះ រឹតត្បិត​សិទ្ធិ​សេរីភាព​សង្គម​ស៊ីវិល ដូច្នេះ​ មិន​ចូលរួម​លើកដៃ​អនុម័ត​ឡើយ។

អ្នក​នាំ​ពាក្យ​សមាគម​ការពារ​សិទ្ធិ​មនុស្ស អាដហុក លោក ស៊ឹង សែន​ករុណា ដែល​បាន​ចូលរួម​ក្នុង​​ការ​ពិភាក្សា​ផ្ដល់​យោបល់​លើ​​វិសោធនកម្ម​ច្បាប់​អង្គការ​សមាគម សង្ឃឹម​ថា ក្រសួង​មហាផ្ទៃ នឹង​សម្រួល​បរិយាកាស​ឲ្យ​មាន​ការ​​ជជែក​គ្នា ល្អ​ប្រសើរ​ជាង​នេះ ដើម្បី​ឆាប់​​សម្រេច​បាន​នូវ​សំណើ​ស្នើសុំ​កែប្រែ​ច្បាប់​នេះ៖ «ប្រសិន​បើ​យើង​អត់​មាន​ការ​កែប្រែ​ទេ អ្វី​ដែល​យើង​ប្រឹងប្រែង​ជជែក​ទាំង​អស់​ហ្នឹង យើង​មាន​ការ​សោកស្ដាយ ដែល​​មិន​មាន​ការ​គិតគូរ​អំពី​បញ្ហា​ទាំង​អស់​ហ្នឹង​ណា។ ជា​ការ​ពិត​ទៅ ​កាតព្វកិច្ច​ទទួល​បន្ទុក​ទាំង​អស់​នេះ​ គឺ​រដ្ឋាភិបាល។ ប្រសិន​បើ​សង្គម​ស៊ីវិល មាន​ការ​ប្រឈម​នឹង​បញ្ហា​ទាំង​អស់​ហ្នឹង គឺ​ជា​មុខ​មាត់​របស់​រដ្ឋាភិបាល​ដែរ​ទេ»

ក្រុម​អង្គការ​ សង្គម​ស៊ីវិល​ជាតិ និង​អន្តរជាតិ​ បាន​អះអាង​ថា ច្បាប់​​ស្ដីពី​សមាគម និង​អង្គការ​មិនមែន​រដ្ឋាភិបាល​ មាន​ចរិត​គាប​សង្កត់​លំហ​សេរីភាព​របស់​សង្គម​ស៊ីវិល។ ​ច្បាប់​នេះ ត្រូវ​បាន​រក​ឃើញ​ថា មាន​ភាព​អធម្មនុញ្ញភាព​ ដោយសារ​​បាន​រំលោភ​លើ​មាត្រា​ជា​ច្រើន​ នៃ​រដ្ឋធម្មនុញ្ញ ហើយ​ច្បាប់​នេះ ក៏​បាន​បើក​ដៃ​​ឲ្យ​របប​ក្រុង​ភ្នំពេញ​ប្រើ​អំណាច​​ដោយ​បំពាន ដើម្បី​គំរាម​កំហែង និង​ដាក់​ទណ្ឌកម្ម​ ​លើ​​សង្គម​ស៊ីវិល​ឯករាជ្យ​​ក្នុង​ប្រទេស​កម្ពុជា។ ទោះ​យ៉ាង​ណា ក្រសួង​មហា​ផ្ទៃ​មិន​ទាន់​កំណត់​ថ្ងៃ​​បន្ត​កិច្ច​ប្រជុំ​ទៀត​​ នៅ​ពេល​ណា​នៅ​ឡើយ​ទេ៕

(ឆ្វេង) លោក សុក សំអឿន ប្រធាន​ក្រុម​អ្នក​ច្បាប់ អមរិន្ទ្រ លោក យង់ គិមអេង (កណ្ដាល) ប្រធាន​មជ្ឈមណ្ឌល​ប្រជាពលរដ្ឋ ដើម្បី​ការ​អភិវឌ្ឍ​នៅ​កម្ពុជា និង​(ស្ដាំ) លោក គឹម ឈន នាយក​ប្រតិបត្តិ​នៃ​​អង្គការ​ខុមហ្វ្រែល (COMFREL) តំណាង​ឱ្យ​សមាគម និង​អង្គការ​មិន​មែន​រដ្ឋាភិបាល ក្នុង​កិច្ច​ប្រជុំ​ជា​មួយ​ក្រសួង​មហាផ្ទៃ នៅ​ថ្ងៃ​ទី៣ ខែ​ធ្នូ ឆ្នាំ២០១៩ ពិភាក្សា​អំពី​ការ​កែ​ប្រែ​ច្បាប់​ស្ដីពី​អង្គការ​សមាគម អង្គការ​មិន​មែន​រដ្ឋាភិបាល។ រូប៖ ក្រសួង​មហាផ្ទៃ)


កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល