សង្គម​ស៊ីវិល​គ្រោង​ពិភាក្សា​ពី​ការ​កែប្រែ​ច្បាប់​ស្ដីពី​អង្គការ​សមាគម​លើក​ទី៤ ជាមួយ​ក្រសួង​មហាផ្ទៃ

ដោយ ខែ សុណង
2020-02-07
អ៊ីម៉ែល
មតិ
Share
បោះពុម្ព
(​ឆ្វេង) ​សមាគម​គ្រូ​បង្រៀន​កម្ពុជា​ឯករាជ្យ អ្នកស្រី អ៊ុក ឆាយ៉ាវី និង​ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ លោក យង់ គិមអេង (ស្ដាំ) ក្នុង​​វេទិកា​អ្នក​ស្ដាប់​របស់​វិទ្យុ​អាស៊ីសេរី នៅ​យប់​សុក្រ ទី ២៩ ខែ សីហា ឆ្នាំ​២០១៤។
(​ឆ្វេង) ​សមាគម​គ្រូ​បង្រៀន​កម្ពុជា​ឯករាជ្យ អ្នកស្រី អ៊ុក ឆាយ៉ាវី និង​ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ លោក យង់ គិមអេង (ស្ដាំ) ក្នុង​​វេទិកា​អ្នក​ស្ដាប់​របស់​វិទ្យុ​អាស៊ីសេរី នៅ​យប់​សុក្រ ទី ២៩ ខែ សីហា ឆ្នាំ​២០១៤។
Photo: RFA

ក្រុម​អង្គការ​សង្គម​ស៊ីវិល​គ្រោង​នឹង​ជួប​ពិភាក្សា​ពិគ្រោះ​យោបល់​លើក​ទី​៤ ជាមួយ​ក្រសួង​មហាផ្ទៃ លើ​ការ​កែប្រែ​ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល នៅ​ថ្ងៃ​ទី​១០ កុម្ភៈ គឺ​នៅ​ថ្ងៃ​ច័ន្ទ ដើម​សប្ដាហ៍​ក្រោយ។

ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍​និង​សន្តិភាព លោក យង់ គិមអេង ដែល​និង​ចូល​ពិភាក្សា​ថ្លែង​ថា ច្បាប់​នេះ​មាន​បញ្ហា​ដល់​សង្គម​ស៊ីវិល​ក្នុង​ការ​អនុវត្ត និង​ងាយ​នៅ​ក្នុង​ការ​បកស្រាយ​ដែល​ធ្វើ​ឱ្យ​សង្គម​ស៊ីវិល​រងគ្រោះ​ដល់​បិទ ឬ​រំលាយ​អង្គការ។ លោក​ថា មាន ១៤​មាត្រា​ដែល​សង្គម​ស៊ីវិល​មានការ​ព្រួយបារម្ភ​ស្នើ​ឱ្យ​កែប្រែ​ពាក្យ​ពេជន៍​និង​ស្នើ​លុបចោល​តែម្ដង។

លោក យង់ គិមអេង សង្ឃឹម​ថា ការ​ជួប​ពិភាក្សា​ជាមួយ​ក្រសួងមហាផ្ទៃ​លើក​នេះ នឹង​ទទួល​បាន​លទ្ធផល​ល្អ​ជា​ជាង​ការដែល​ក្រសួង​លើកឡើង​ថា សង្គម​ស៊ីវិល​មិនទាន់​រួម​សំឡេង​គ្នា៖ «តាម​មាត្រា ១ មាត្រា ២ ហ្នឹង គឺ​ច្បាប់​នេះ​សរសេរ​ល្អ​ណាស់​បាទ! និយាយ​អំពី​ការ​កំណត់​បែបបទ​នៅ​ក្នុង​ការ​ចុះបញ្ជី និយាយ​អំពី​ទំនាក់ទំនង​រវាង​សមាគម និង​អង្គការ​មិនមែន​រដ្ឋាភិបាល​ជាមួយ​ហ្នឹង​រដ្ឋាភិបាល អាជ្ញាធរ​សាធារណៈ​ជា​ដើម។ បើ​សិន​ត្រឹម​កម្រិត​ហ្នឹង​វា​មិន​ធ្វើ​ឲ្យ​មាន​បញ្ហា​ទេ​ប៉ុន្តែ​ក្នុង​នោះ​គឺ​ការ​ផ្ដល់​សិទ្ធិ​អំណាច​ច្រើន​សម្រាប់​ក្រសួង​មហា​ផ្ទៃ ដូច​ជា​ផ្អាក​សកម្មភាព ដូចជា ការ​ផ្ដល់​ព័ត៌មាន​ការ​ផ្ដល់​របាយការណ៍​ផ្សេងៗ ដែល​មាន​នៅ​ក្នុង​ច្បាប់​នេះ ទាំង​អស់​នេះ​ហើយ​ដែល​ឃើញ​ថា​ជា​ការ​ដាក់​បន្ទុក​តាំង​ពី​រឿង​ពន្ធដារ រឿង​អី​ហ្នឹង។ បើ​យើង​មើល​ទៅ​រឿង​នីតិបុគ្គល​អង្គការ​សង្គម​ស៊ីវិល​ជា​នីតិបុគ្គល​មួយ​ក្រសួង​មហាផ្ទៃ​គឺ​ជា​នីតិបុគ្គល​មួយ​ដែរ​គួរ​តែ​នីតិបុគ្គល​មួយៗ​ត្រូវ​មាន​កាតព្វកិច្ច​រាយការណ៍​អ៊ីចឹង​ឬ​យ៉ាង​ម៉េច? បើ​អង្គការ​សង្គម​ស៊ីវិល​មិនមែន​ជា​ថ្នាក់​ក្រោម​របស់​ក្រសួង​មហាផ្ទៃ​ផង​ហ្នឹង»

បន្ទាប់ពី​ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល បាន​ចូល​ជា​ធរមាន ពួកគេ​យល់​ថា ជា​ឧបសគ្គ​និង​ជួបប្រទះ​បញ្ហា​ចម្បងៗ​មួយ​ចំនួន​ដូចជា បញ្ហា​នីតិវិធី​នៃ​ការ​ចុះ​បញ្ជី ការ​ផ្លាស់ប្ដូរ​ថ្នាក់ដឹកនាំ និង​អាសយដ្ឋាន ការ​បើក​គណនេយ្យ​ធនាគារ ការ​បំពេញ​កាតព្វកិច្ច​ពន្ធដារ និង​ការ​ដាក់​របាយការណ៍​ជូន​រដ្ឋាភិបាល​ជាដើម។ ក្រៅ​ពី​នេះ ពាក្យពេចន៍​និង​ខ្លឹមសារ​នៅ​ក្នុង​ច្បាប់​នេះ នាំ​ឱ្យ​មានការ​ព្រួយបារម្ភ​ពី​ការ​បកស្រាយ​ហាក់​មាន​ភាព​ទូលំទូលាយ​ពេក ដែល​នឹង​នាំ​ឱ្យ​មាន​បទល្មើស ឬ​ថា​អាច​មាន​ការ​បកស្រាយ​តាម​កាលៈទេសៈ ឬ​ស្ថានភាព​នយោបាយ។

ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល បាន​តាក់តែង​ឡើង​ជាង ១០​ឆ្នាំ​មក​ហើយ និង​បាន​ដាក់​ឱ្យ​ជជែក​គ្នា​ម្ដង​នៅ​ឆ្នាំ​២០១១។ កាលណោះ ច្បាប់​នេះ​មាន ១១​ជំពូក និង ៥៨​មាត្រា ហើយ​បង្រួម​ទៅ​នៅសល់ ៩​ជំពូក និង ៣៤​មាត្រា​វិញ​។ ក្រោយ​មក សេចក្ដី​ព្រាង​ច្បាប់​នេះ​ហាក់​ត្រូវ​បាន​កែសម្រួល​ឡើងវិញ​យ៉ាង​អាថ៌កំបាំង ចន្លោះ​ឆ្នាំ​២០១១ ដល់​ឆ្នាំ​២០១៥ ដោយ​បង្កើន​ដល់ ៩​ជំពូក និង ៣៩​មាត្រា ហើយ​គ្មាន​ការ​ពិគ្រោះ​យោបល់​នោះ​ទេ​។ ច្បាប់​នេះ​ត្រូវ​បាន​អនុម័ត​ដាក់​ឱ្យ​ប្រើប្រាស់​នៅ​ឆ្នាំ​២០១៥៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល