មេធាវី​លោក ញ៉យ ចំរើន នៅ​អាមេរិក​ថា​កូន​ក្ដី​លោក​នឹង​ឈ្នះ​បណ្ដឹង​ប្រឆាំង​រដ្ឋាភិបាល​កម្ពុជា

ដោយ តាំង សារ៉ាដា
2016-11-08
Share
មូរតុន ក្លារ ៨៥៥ លោក​មេធាវី មូរតុន ក្លារ (Morton Sklar) ផ្ដល់​បទសម្ភាសន៍​ដល់​អាស៊ីសេរី កាល​ពី​ថ្ងៃ​ទី​២៦ សីហា ឆ្នាំ​២០១៦។
Photo: RFA

មេធាវី​របស់​លោក ញ៉យ ចំរើន គឺ​លោក មូរតុន ក្លារ (Morton Sklar) អះអាង​ថា កូន​ក្តី​លោក​នឹង​ឈ្នះ​បណ្ដឹង​ប្រឆាំង​លោក ហ៊ុន ម៉ាណែត កូន​ប្រុស​លោក​នាយក​រដ្ឋមន្ត្រី នៅ​តុលាការ​សហព័ន្ធ​ក្នុង​សហរដ្ឋ​អាមេរិក ដោយសារ​តែ​ភាគី​ចុង​បណ្ដឹង​មិន​ចូលរួម​សវនាការ​កាល​ពី​ដើម​ខែ​វិច្ឆិកា។ ប៉ុន្តែ​មន្ត្រី​ជាន់​ខ្ពស់​របស់​រដ្ឋាភិបាល​កម្ពុជា មិន​ចាប់​អារម្មណ៍​ចំពោះ​ការ​ប្រកាស​នេះ​ឡើយ។

លោក មូរតុន ក្លារ (Morton Sklar) នឹង​ស្នើ​ឲ្យ​តុលាការ​សហរដ្ឋ​អាមេរិក ចេញ​សាលក្រម​ឲ្យ​លោក ញ៉យ ចំរើន ឈ្នះ​ក្តី​លើ​រដ្ឋាភិបាល​កម្ពុជា ដោយ​ស្វ័យប្រវត្តិ។ លោក​បន្ត​ថា នេះ​ជា​ជ័យជម្នះ​ដ៏​ធំធេង​សម្រាប់​ដើម​បណ្ដឹង។ លោក មូរតុន ក្លារ បាន​ប្រាប់​អាស៊ីសេរី​តាម​ទូរស័ព្ទ​ថា ការ​មិន​ចូលរួម​ដំណើរ​ការ​ក្តី​របស់​រដ្ឋាភិបាល​កម្ពុជា ក្នុង​តុលាការ​សហរដ្ឋ​អាមេរិក ដោយសារ​រដ្ឋាភិបាល​កម្ពុជា ខ្លាច​ភាព​អាម៉ាស់​ចំពោះ​ការ​រំលោភ​សិទ្ធិ​មនុស្ស​លើ​ឆាក​អន្តរជាតិ។

លោក មូរតុន ក្លារ មាន​ប្រសាសន៍​បន្ត​ថា៖ «តាម​ការ​វាយ​តម្លៃ​របស់​ខ្ញុំ គឺ​ថា​រដ្ឋាភិបាល​ខ្លាច​ខ្លាំង​ណាស់​នូវ​អ្វី​ដែល​អាច​កើត​មាន​ឡើង​ក្នុង​ពេល​ដែល​ក្តី​ក្ដាំ​នេះ​កំពុង​ដំណើរ​ការ។ ម្យ៉ាង​ទៀត​ប្រសិន​បើ​គេ​ឆ្លើយតប​ទៅ​នឹង​បណ្ដឹង​នេះ​មែន នោះ​រដ្ឋាភិបាល​កម្ពុជា នឹង​ក្លាយ​ទៅ​ជា​គូ​ភាគី​នៃ​ដំណើរ​ការ​ក្តី​ទូទៅ​មួយ​ហើយ។ សម្រាប់​ប្រព័ន្ធ​តុលាការ​នៅ​កម្ពុជា វិញ វា​មិន​មាន​អ្វី​ចោទ​ជា​បញ្ហា​នោះ​ទេ ពីព្រោះ​អ្នក​ណា​ក៏​ដឹង​ដែរ​ថា ដំណើរ​ការ​ក្តី​នៅ​ទីនោះ​គ្រប់គ្រង​ដោយ​រដ្ឋាភិបាល​លោក ហ៊ុន សែន។ ប៉ុន្តែ​នៅ​សហរដ្ឋ​អាមេរិក គេ​មិន​អាច​ធ្វើ​តាម​ទំនើង​ចិត្ត​នោះ​ទេ។ ដូច្នេះ​តុលាការ​នៅ​អាមេរិក អាច​បង្ហាញ​ពី​ភាព​អាម៉ាស់​របស់​ពួក​គេ​លើ​ឆាក​អន្តរជាតិ ចំពោះ​ទង្វើ​ដែល​ពួក​គេ​បាន​ប្រព្រឹត្ត ជាពិសេស​ការ​ប្រើប្រាស់​ប្រព័ន្ធ​តុលាការ​របស់​ពួក​គេ​ក្នុង​ការ​គំរាម​កំហែង និង​ដាក់​ទោស​ទណ្ឌ​ដល់​ក្រុម​អ្នក​រិះគន់ ឬ​ក្រុម​បក្ស​ប្រឆាំង»

លោក ញ៉យ ចំរើន បាន​ប្ដឹង​រដ្ឋាភិបាល​កម្ពុជា និង​លោក ហ៊ុន ម៉ាណែត កូន​ប្រុស​របស់​លោក ហ៊ុន សែន ពី​បទ​ប្រើ​អំពើ​ហិង្សា​ដោយ​ចេតនា និង​ប៉ុនប៉ង​ធ្វើ​ឃាត​លើ​រូប​លោក​កាល​ពី​ថ្ងៃ​ទី​២៦ ខែ​តុលា ឆ្នាំ​២០១៥។

ទោះ​បី​ជា​យ៉ាង​ណា​ក៏ដោយ អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន អះអាង​ថា កម្ពុជា មិន​ខ្វល់​ពី​បណ្ដឹង​របស់​លោក ញ៉យ ចំរើន នៅ​សហរដ្ឋ​អាមេរិក នោះ​ទេ។ លោក​អះអាង​ថា កម្ពុជា មាន​អធិបតេយ្យភាព​របស់​ខ្លួន​ដែល​មិន​ស្ថិត​ក្រោម​ឥទ្ធិពល​របស់​ប្រទេស​ណា​មួយ​នោះ​ឡើយ៖ «ប្រសិន​បើ​យុត្តាធិការ ឬ​នីតិវិធី​ត្រូវ​ប្ដឹង​ទៅ​ក្រៅ​ប្រទេស អា​ហ្នឹង​ជា​រឿង​មួយ ប៉ុន្តែ​បើ​គេ​និយាយ​អំពី​អធិបតេយ្យភាព ឬ​ឯករាជ​ភាព អា​ហ្នឹង​ជា​រឿង​មួយ​ផ្សេង​ទៀត។ អ៊ីចឹង​ទេ​ខ្ញុំ​យល់​ថា ពាក់ព័ន្ធ​នឹង​ករណី​នេះ​ហើយ​ដោយ​ឯកឧត្តម ញ៉យ ចំរើន គាត់​យល់​ផ្សេង ហើយ​រាជ​រដ្ឋាភិបាល​យល់​ផ្សិង អា​ហ្នឹង​វា​ជា​រឿង​ផ្ទុយ​គ្នា។ គាត់​សញ្ជាតិ​អាមេរិកាំង ហើយ​គាត់​ទៅ​ប្ដឹង​នៅ​តុលាការ​សហរដ្ឋ​អាមេរិក អា​ហ្នឹង​ខ្ញុំ​ក៏​មិន​យល់​ដែរ មិន​ដឹង​ថា​ច្បាប់​គេ​ហ្នឹង​វា​ពាក់ព័ន្ធ​យ៉ាង​ម៉េច? រឿង​នេះ​កើត​ឡើង​នៅ​កម្ពុជា ហើយ​ហេតុ​ម៉េច​បាន​ជា​ទៅ​ប្ដឹង​នៅ​សហរដ្ឋ​អាមេរិក

ច្បាប់​ប្រឆាំង​ភេរវកម្ម​របស់​សហរដ្ឋ​អាមេរិក ដែល​ត្រូវ​បាន​អនុម័ត​ចូល​ជា​ធរមាន​កាល​ពី​ឆ្នាំ​២០០១ ចែង​យ៉ាង​ច្បាស់​ថា ពលរដ្ឋ​អាមេរិកាំង គ្រប់​រូប​មាន​សិទ្ធិ​ប្ដឹង​រដ្ឋាភិបាល​បរទេស​ទាំងឡាយ​ដែល​បាន​ធ្វើ​ទារុណកម្ម និង​ប៉ុនប៉ង​សម្លាប់​ពលរដ្ឋ​របស់​ខ្លួន។

លោក ញ៉យ ចំរើន បញ្ជាក់​ថា ការ​ប្ដឹង​រដ្ឋាភិបាល​កម្ពុជា នៅ​តុលាការ​សហរដ្ឋ​អាមេរិក ដោយសារ​តុលាការ​កម្ពុជា មិន​អាច​ផ្តល់​យុត្តិធម៌​ឲ្យ​លោក។

កាល​ពី​ថ្ងៃ​ទី​២៤ ខែ​សីហា ឆ្នាំ​២០១៦ មេធាវី​ដើម​បណ្ដឹង​បាន​ផ្ញើ​ឯកសារ​បណ្ដឹង​ចំនួន ៥៧​ទំព័រ​ជា​ភាសា​អង់គ្លេស និង ៦៣​ទំព័រ​ជា​ភាសា​ខ្មែរ ទៅ​រដ្ឋាភិបាល​កម្ពុជា ហើយ​បណ្ដឹង​នោះ​បាន​បោះ​ត្រា​ទទួល​ដោយ​លោក ប្រាក់ សុខុន រដ្ឋមន្ត្រី​ក្រសួង​ការ​បរទេស នៅ​ថ្ងៃ​ទី​៨ ខែ​តុលា ឆ្នាំ​២០១៦។ ពាក្យ​បណ្តឹង​តម្រូវ​ឲ្យ​ចុង​ចោទ​មក​ឆ្លើយ​បំភ្លឺ​មុខ​សវនាការ​តុលាការ​សហព័ន្ធ​របស់​អាមេរិក នៅ​ថ្ងៃ​ទី​៤ ខែ​វិច្ឆិកា ឆ្នាំ​២០១៦ ប៉ុន្តែ​រដ្ឋាភិបាល​មិន​បាន​ចូល​ខ្លួន​តាម​ការ​កំណត់​នេះ​ទេ។

មេធាវី​ក្នុង​ក្រុម​អ្នក​ច្បាប់​របស់​លោក មូរតុន ក្លារ (Morton Skla) គឺ​លោក អ៊ុច ខែមសុខាំបូរ ថ្លែង​ថា ប្រសិន​បើ​តុលាការ​សហរដ្ឋ​អាមេរិក ចេញ​សាលក្រម​ឲ្យ​លោក ញ៉យ ចំរើន ឈ្នះ​មែន​នោះ រដ្ឋាភិបាល​កម្ពុជា ត្រូវ​តែ​មាន​កាតព្វកិច្ច​ក្នុង​ការ​សង​ជំងឺ​ចិត្ត​ដល់​ដើម​បណ្ដឹង​មួយ​ទ្វេ​ជា​បី និង​ដោះលែង​សកម្មជន​នយោបាយ​ដែល​កំពុង​ជាប់​ឃុំ រួម​មាន​លោក មាជ សុវណ្ណារ៉ា លោក ហុង សុខហួរ លោក អ៊ុំ សំអាន និង​មនុស្ស​ជាច្រើន​រូប​ទៀត៖ «ទី​មួយ យើង​បាន​ផល​អ្វី​ដែល​យើង​បាន​ពី​ការ​ចោទ​ប្រកាន់​ហ្នឹង។ ហើយ​ទី​ពីរ យើង​បាន​ឈ្នះ​ជា​ស្វ័យប្រវត្តិ។ ហើយ​ទី​បី រដ្ឋាភិបាល​ខ្មែរ​ដែល​ចាញ់​ហ្នឹង ត្រូវ​បង់​ការ​ខូចខាត។ ទាមទារ​ឲ្យ​សកម្មជន​ទាំងអស់​ចេញ​ពី​ការ​ឃុំឃាំង​ដែល​ខុស​ច្បាប់ អយុត្តិធម៌ ធ្វើ​បាប ធ្វើ​ទុក្ខបុកម្នេញ​គេ ធ្វើ​ទារុណកម្ម និង​ភេរវកម្ម មិន​មែន​តែ​ទៅ​លើ​លោក មាជ សុវណ្ណារ៉ា ប៉ុណ្ណោះ​ទេ តែ​ទាំងអស់។ បើ​មិន​អាច​ធ្វើ​បាន នោះ​នឹង​មាន​សម្ពាធ​យ៉ាង​ខ្លាំង​ពី​អន្តរជាតិ»

លោក​បន្ត​ថា ដើម​បណ្ដឹង​ប្រឆាំង​រដ្ឋាភិបាល​កម្ពុជា និង​លោក ហ៊ុន ម៉ាណែត ក្នុង​ករណី​នេះ​មាន​ចំនួន ៦​នាក់​រួម​មាន លោក ញ៉យ ចំរើន លោក មាជ សុវណ្ណារ៉ា អ្នកស្រី ជេមី មាជ និង​កូន​ស្រី​របស់​លោក មាជ សុវណ្ណារ៉ា បី​នាក់​ទៀត។

ពួក​គេ​ទាំងនេះ​បាន​ប្ដឹង​រដ្ឋាភិបាល​កម្ពុជា និង​លោក ហ៊ុន ម៉ាណែត កូន​ប្រុស​របស់​លោក ហ៊ុន សែន ពី​បទ​ប៉ុនប៉ង​ធ្វើ​ឃាត​បំពារបំពាន​រូប​រាងកាយ​ធ្ងន់ធ្ងរ ធ្វើ​ទារុណកម្ម​តាម​ទំនើង​ចិត្ត អំពើ​ភេរវកម្ម​អន្តរជាតិ ការ​ឃុំឃាំង​រយៈពេល​យូរ ការ​ធ្វើ​ឲ្យ​ឈឺ​ចាប់​ដោយ​ចេតនា​ដែល​បណ្ដាល​ឲ្យ​មាន​ទុក្ខ​ព្រួយ​ផ្លូវ​អារម្មណ៍ និង​ការ​ចាប់​ដាក់​គុក​ដោយ​ខុស​ច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល