សមត្ថកិច្ច ដែលចុះស្រាវជ្រាវករណីក្រុមចោរប្លន់ធនាគារ អ អេច ប៊ី ឥណ្ឌូឆៃណា (RHB Indochina Bank)នៅរាជធានីភ្នំពេញ មិនទាន់កំណត់បានមុខសញ្ញាជាក់លាក់នៅឡើយទេ។ ក្រុមប៉ូលីសជំនាញ បានបញ្ចប់ការស៊ើបអង្កេតនៅទីតាំងកើតហេតុ នៅម៉ោងប្រមាណជិត ៧យប់ ថ្ងៃទី២៣ សីហា បានប្រាប់ថា ករណីនេះ ស្ថិតក្នុងការស៊ើបអង្គេតនៅឡើយ និងមិនទាន់អាចផ្ដល់ភស្ដុតាងច្រើន ឲ្យអ្នកសារព័ត៌មានទេ។
សមត្ថកិច្ចជំនាញពីរនាក់ ស្លៀកពាក់ស៊ីវិល បានប្រាប់អ្នកសារព័ត៌មាន នៅក្រោយការស៊ើបអង្គេតទីតាំងធនាគារ នៅព្រលប់ថ្ងៃទី២៣ សីហាថា ទឹកប្រាក់ដែលក្រុមចោរប្លន់ មានចំនួនជាង ១០ម៉ឺនដុល្លារសហរដ្ឋអាមេរិក ហើយតាមរយៈកាមេរ៉ាសុវត្ថិភាព សមត្ថកិច្ចបានឃើញក្រុមចោរមានគ្នា ៤នាក់ ធ្វើសកម្មភាពប្លន់ក្នុងធនាគារ។ ទោះយ៉ាងនេះក្ដី ដោយសារករណីនេះស្ថិតក្នុងការស៊ើបអង្កេត សមត្ថកិច្ចមិនទាន់អាចបង្ហាញបានច្រើនទេ៖ «»
អាស៊ីសេរីមិនអាចសុំការបញ្ជាក់បន្ថែមជុំវិញករណីនេះ ពីអ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធិ និងអ្នកនាំពាក្យក្រសួងមហាផ្ទៃ លោក ខៀវ សុភគ្គ បានទេ នៅថ្ងៃទី២៣ សីហា ដោយសារមិនលោកលើកទូរស័ព្ទ។
ប៉ុន្ដែ គេហទំព័រអគ្គស្នងការនគរបាលជាតិ ចុះផ្សាយនៅថ្ងៃទី២៣ សីហា បង្ហាញថា អំពើប្លន់ធនាគារ បានកើតឡើងនៅម៉ោងប្រហែល ១រសៀល នៅធនាគារ អ អេច ប៊ី ឥណ្ឌូឆៃណា (RHB Indochina Bank) ស្ថិតនៅតាមបណ្តោយផ្លូវ ម៉ៅ សេទុង សង្កាត់ទំនប់ទឹក ខណ្ឌចំការមន រាជធានីភ្នំពេញ។ គេហទំព័រប៉ូលិស បង្ហាញថា ជនសង្ស័យ មានគ្នា ៥នាក់ ស្លៀកពាក់ស៊ីវិលប្រដាប់ដោយកាំភ្លើងខ្លីជាច្រើនដើម បានចូលទៅក្នុងធនាគារធ្វើសកម្មភាពប្លន់ បានសម្រេច និងបានគេចខ្លួនដោយសុវត្ថិភាពភ្លាមៗ។
គេហទំព័រនេះ បានស្រង់សម្ដីរបស់សន្តិសុខយាមការពារធនាគារ រៀបរាប់ថានៅមុនពេលកើតហេតុ រូបគាត់ ជាសន្តិសុខកំពុងអង្គុយយាមធម្មតា នៅក្រោមឆ័ត្រមុខធនាគារ ស្រាប់តែជនសង្ស័យស្លៀកពាក់ស៊ីវិល បានដើរមកក្បែរសន្តិសុខ រួចធ្វើសកម្មភាពភ្ជង់ និងចាប់ក្រៀកសន្តិសុខ រួចនាំចូលទៅក្នុងធនាគារ ហើយបន្ទាប់មកធ្វើសកម្មភាពភ្ជង់បុគ្គលិកធនាគារគំរាមឲ្យប្រមូលលុយឲ្យក្រុមចោរ រួចក្រុមចោរបាននាំគ្នារត់ចេញ ឡើងជិះម៉ូតូ ដោយមានបក្ខពួក រង់ចាំនៅខាងក្រៅធនាគារ រួចជិះគេចខ្លួនបាត់ដោយសុវត្ថិភាព។ ទោះយ៉ាងណាក្ដី អំពើប្លន់នោះ មិនបានបណ្ដាលឲ្យនរណាម្នាក់រងរបួសទេ។
អំពើប្លន់ធនាគារនេះ កើតឡើងក្រោយពេលដែលធនាគារជាតិ លើកទឹកចិត្តឲ្យធនាគារឯកជន និងគ្រឹះស្ថានហិរញ្ញវត្ថុទាំងអស់នៅកម្ពុជា បញ្ឈប់ការប្រើប្រាស់ភ្នាក់ងារសន្តិសុខប្រដាប់អាវុធ នៅក្នុង ឬនៅក្បែរបរិវេណ យាមកាមទីស្នាក់ការគ្រឹះស្ថានរបស់ខ្លួន។
កាលពីថ្ងៃទី២០ ខែកក្កដា ធនាគារជាតិ បានលើកជូនដំណឹងថា ធនាគារជាតិ បានពិនិត្យឃើញថា គ្រឹះស្ថានមួយចំនួន កំពុងប្រើប្រាស់ភ្នាក់ងារសន្តិសុខប្រដាប់អាវុធការពារនៅក្នុង ឬនៅក្បែរបរិវេណទីស្នាក់ការរបស់ខ្លួន ដែលអាចបង្កហានិភ័យជាយថាហេតុ ដល់អាយុជីវិតប្រជាជន និងសណ្តាប់ធ្នាប់សាធារណៈ។ ធនាគារជាតិរបបក្រុងភ្នំពេញ បានប្រាប់ម្ចាស់ធនាគារឯកជន នៅមុនព្រឹត្តិការណ៍ ថ្ងៃទី២៩ កក្កដាថា របបក្រុងភ្នំពេញ មានសន្ដិភាព និងសន្ដិសុខពេញលេញហើយ មិនចាំបាច់ប្រើកងកម្លាំងប្រដាប់អាវុធយាមធនាគារឯកជនទេ។
ក្នុងលិខិតរបស់ធនាគារជាតិ ក៏បានដាក់កំហិតឲ្យធនាគារឯកជន និងគ្រឹះស្ថានហិរញ្ញវត្ថុ ត្រូវរាយការណ៍ទៅធនាគារជាតិ ឲ្យបានមុនថ្ងៃទី២៨ ខែកក្កដា ឆ្នាំ២០១៨ អំពីបញ្ជីឈ្មោះភ្នាក់ងារសន្តិសុខ និងចំនួនអាវុធ ដែលធនាគារ ឬគ្រឹះស្ថានហិរញ្ញវត្ថុ បានដាក់យាម។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង យល់ថា អាជ្ញាធររបស់រដ្ឋ ត្រូវធានាពង្រឹងសន្ដិសុខ លុបបំបាត់ករណីប្លន់ប្រដាប់អាវុធ ជូនពលរដ្ឋគ្រប់រូប និងអ្នករកស៊ីឲ្យបានទាំងស្រុង ទើបវិធានការនេះ អាចទទួលបានជោគជ័យ។ លោក យង់ គឹមអេង បន្ដថា នៅពេលដែលរដ្ឋ អាចធានាទាំងស្រុង លើហានិភ័យប្លន់ប្រដាប់អាវុធបានម្ចាស់ធនាគារ និងអ្នករកស៊ីដទៃ ពិតជាមិនចង់ដាក់កងកម្លាំងប្រដាប់អាវុធ យាមនៅតាមធនាគារ និងគ្រឹះស្ថានហិរញ្ញវត្ថុទេ ហើយប្រសិនបើហានិភ័យបែបនេះ នៅតែកើតមាន បើទោះជាគ្រប់ធនាគារ ឬហាងរកស៊ីទាំងអស់ ដាក់កងកម្លាំងប្រដាប់អាវុធ ក៏មិនអាចទប់ទល់ជាប់ដែរ៖ «»
សង្គមស៊ីវិលរូបនេះ បន្ដថា នៅពេលមានករណីប្លន់ប្រដាប់អាវុធបែបនេះកើតឡើង អាចធ្វើឲ្យវិនិយោគិនដទៃទៀត មានការបារម្ភ ភ័យ បាត់ទំនុកចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។