តំណាងសហគមន៍ជនជាតិដើមភាគតិចកួយ និងបុគ្គលិកអង្គការក្រៅរដ្ឋាភិបាល សរុបចំនួន ៤នាក់ ចូលបំភ្លឺនៅតុលាការ នៅព្រឹកថ្ងៃទី៣០ កក្កដា តាមដីកាកោះរបស់ព្រះរាជអាជ្ញារងខេត្តព្រះវិហារ។ ពួកគេទាំង ៤នាក់នោះ ត្រូវបានក្រុមហ៊ុនចិន រូយ ហ្វេង ប្ដឹងពីបទធ្វើឲ្យខូចខាតដោយចេតនា។
អង្គការសង្គមស៊ីវិលដែលឃ្លាំមើលរឿងនេះ រិះគន់ថា ក្រុមហ៊ុនបានយកប្រព័ន្ធតុលាការ ដើម្បីគំរាមកំហែងបំបាក់ស្មារតី មិនឲ្យពលរដ្ឋតវ៉ារឿងទំនាស់ដីធ្លីជាមួយក្រុមហ៊ុនទៀត។
ព្រះរាជអាជ្ញារងសាលាដំបូងខេត្តព្រះវិហារ លោក ឡុង ស៊ីថា សម្រេចឲ្យតំណាងសហគមន៍ជនជាតិដើមភាគតិច និងបុគ្គលិកអង្គការក្រៅរដ្ឋាភិបាលចំនួន ៤នាក់ ត្រឡប់ទៅផ្ទះវិញ ក្រោយបញ្ចប់ការសួរដេញដោលជុំវិញការដកអំពៅរបស់ក្រុមហ៊ុនចិន រូយ ហ្វេង។
ក្រុមហ៊ុនចិន រូយ ហ្វេង បានដាក់ពាក្យបណ្ដឹងទៅតុលាការ ប្ដឹងតំណាងសហគមន៍ជនជាតិដើមភាគតិច ៣នាក់ រួមមាន លោកស្រី ស៊ឹង សាំ លោកស្រី នួន ម៉ុន លោកស្រី រឿង ខាន់ និងបុគ្គលិកអង្គការពន្លកខ្មែរម្នាក់ទៀត គឺលោក លូត សាំង ពីបទបង្កឲ្យខូចខាតដោយចេតនា។
អ្នកភូមិជាង ១០០នាក់ ដែលភាគច្រើនជាស្ត្រីជនជាតិដើមភាគតិចកួយ បានជិះគោយន្តអមដំណើរពួកគេមកតុលាការ និងបានឈរនៅហាលភ្លៀងរង់ចាំរហូតទាល់តែព្រះរាជអាជ្ញារងសួរអ្នកទាំង ៤នាក់នោះចប់ ដោយព្រួយបារម្ភថាខ្លាចមានការចាប់ខ្លួនតំណាងសហគមន៍របស់ពួកគេ។
អនុប្រធានសហគមន៍ជនជាតិដើមភាគតិចកួយ លោកស្រី រឿង ខាន់ បញ្ជាក់ថា ខាងព្រះរាជអាជ្ញា បានសួរច្រើនជុំវិញពីមូលហេតុដែលពលរដ្ឋដកដើមអំពៅរបស់ក្រុមហ៊ុន។ លោកស្រីអះអាងថា មូលហេតុដែលដកអំពៅក្រុមហ៊ុននោះ ព្រោះក្រុមហ៊ុនបានយកអំពៅទៅដាំលើដីស្រែរបស់ពួកគាត់ ដែលទើបតែព្រោះរួច៖ «ក្រុមហ៊ុនត្រូវតែដឹងដែរថា កន្លែងស្រែកន្លែងទួល កន្លែងណាប៉ះពាល់ កន្លែងណាមិនប៉ះពាល់ នេះមកយកតែដីស្រែ កន្លែងទួលអត់មកយកផង»។
កាលពីថ្ងៃទី១ មេសា ជនជាតិដើមភាគតិចកួយ នៅឃុំប្រមេរ ស្រុកត្បែងមានជ័យ ខេត្តព្រះវិហារ ប្រមាណជាង ៣០០នាក់ បានទៅរារាំងសកម្មភាពគ្រឿងចក្ររបស់ក្រុមហ៊ុន រូយ ហ្វេង ដែលឈូសដីពង្រោះរបស់ពួកគាត់ជាង ១ហិកតារ ទៅដាំអំពៅ និងបានដកអំពៅរបស់ក្រុមហ៊ុនយកទៅដាក់លើចិញ្ចើមថ្នល់។ រីឯក្រុមហ៊ុនចិន បានប្ដឹងតំណាងសហគមន៍ និងបុគ្គលិកអង្គការពន្លកខ្មែរ ថាបង្កឲ្យខូចខាតទ្រព្យសម្បត្តិរបស់ក្រុមហ៊ុន។
អ្នកសម្របសម្រួលអង្គការអាដហុក (adhoc) ប្រចាំខេត្តព្រះវិហារ លោក ឡោ ចាន់ គិតថា ក្រុមហ៊ុនចិន រូយ ហ្វេង បានយកប្រព័ន្ធតុលាការមកគាបសង្កត់ និងបំបាក់ស្មារតីរបស់ពលរដ្ឋ មិនឲ្យហ៊ានងើបតវ៉ាជាមួយក្រុមហ៊ុនទៀត បន្ទាប់ពីភាគីទាំងពីរជាគូទំនាស់ដីធ្លីតាំងពីឆ្នាំ២០១១ ក្រោយពេលដែលរាជរដ្ឋាភិបាល បានផ្តល់ដីសម្បទានសេដ្ឋកិច្ចជិត ៩ពាន់ហិកតារ (៨.៨៤១) ឲ្យវិនិយោគដាំអំពៅលើដីសហគមន៍ ដោយពុំមានការឯកភាពពីពលរដ្ឋជាមុន៖ «គាត់ (អ្នកភូមិ) តែងប្រាប់ថាគាត់សុខចិត្តស្លាប់លើដីកំណើតពីដូនតារបស់ពួកគាត់ គឺគាត់មិនចាកចេញទៅទីណាទេ។ ប៉ុន្តែក្រុមហ៊ុននៅតែបន្តប្ដឹងផ្តល់ពួកគាត់រហូត»។
លោកកត់សម្គាល់ថា ស្ថាប័នតុលាការបានកោះហៅពលរដ្ឋមកសាកសួរភ្លាមៗ ពេលមានបណ្ដឹងក្រុមហ៊ុន ប៉ុន្តែចំពោះបណ្ដឹងរបស់ពលរដ្ឋដែលដាក់ទៅតុលាការ ជុំវិញការឈូសឆាយដីសហគមន៍យូរហើយនោះ បែរជាតុលាការតម្កល់ទុកឥតចាត់ការទៅវិញ។
មន្ត្រីអង្គការសិទ្ធិមនុស្សរូបនេះ មិនទាន់ច្បាស់ទេថា ក្រោយពីសាកសួរចប់ តើតំណាងអយ្យការសាលាដំបូងខេត្តព្រះវិហារ តម្កល់ទុករឿងនេះឥតចាត់ការ ឬបញ្ជូនបន្តទៅចៅក្រមស៊ើបអង្កេតនោះទេ។ តែព្រះរាជអាជ្ញារង លោក ឡុង ស៊ីថា បានអនុញ្ញាតឲ្យចុងចោទទាំង ៤នាក់នោះ ត្រឡប់ទៅផ្ទះវិញក្រោយការសាកសួររួច។
អនុប្រធានសហគមន៍ជនជាតិដើមភាគតិចកួយ លោកស្រី រឿង ខាន់ បានស្នើសុំនៅមុខតំណាងអយ្យការ ឲ្យទម្លាក់ការចោទប្រកាន់ទៅលើតំណាងសហគមន៍ និងបុគ្គលិកអង្គការពន្លកខ្មែរ ដោយប្រាប់ព្រះរាជអាជ្ញាថា ខាងសហគមន៍នឹងមិនធ្វើអ្វីទៅដល់ក្រុមហ៊ុនទេ ប្រសិនបើមិនមានការបៀតបៀនពីក្រុមហ៊ុនមុន។
ព្រះរាជអាជ្ញារង លោក ឡុង ស៊ីថា មិនអាចទំនាក់ទំនងសុំការបំភ្លឺបានទេ ដោយលោកមិនលើកទូរស័ព្ទ។
ជនជាតិដើមភាគតិចកួយ នៅឃុំប្រមេរ ធ្លាប់ស្នើសុំដល់រាជរដ្ឋាភិបាលកម្ពុជា ឲ្យលុបចោលកិច្ចសន្យាដីសម្បទានសេដ្ឋកិច្ចក្រុមហ៊ុន ឡាន ហ្វេង និងក្រុមហ៊ុន រូយ ហ្វេង និងចេញវិធានការការពារបណ្ដោះអាសន្នដីសហគមន៍ជនជាតិដើមភាគតិចកួយ ព្រមទាំងពន្លឿនការចុះបញ្ជីដីសមូហភាពរបស់សហគមន៍ជនជាតិដើមភាគតិចកួយ។ ប៉ុន្តែខាងរាជរដ្ឋាភិបាលនៅមិនទាន់ឆ្លើយតបចំពោះសំណើរបស់ពួកគាត់នៅឡើយ ខណៈដែលរាជរដ្ឋាភិបាលផ្តល់ដីសម្បទានសេដ្ឋកិច្ចឲ្យក្រុមហ៊ុនចិន វិនិយោគនៅឃុំប្រមេរ រយៈពេល ៩៩ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។