មន្ត្រីជាន់ខ្ពស់ប៉ូលិសជាតិប្រាប់អាស៊ីសេរីឲ្យដឹងថា សមត្ថកិច្ច ត្រូវការពេលវេលាបន្ថែមទៀតទាក់ទិន សំណុំរឿងឃាត់ខ្លួនមនុស្សជិត៤០០នាក់នៅក្នុងក្លឹបកម្សាន្តមួយកន្លែងនៅក្នុងខេត្តព្រះសីហនុ។អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន មានប្រសាសន៍ថា មូលហេតុដែលនាំឲ្យមានការពន្យារពេលនេះ ដោយសារតែសំណុំរឿងនេះមានលក្ខណៈស្មុគស្មាញ ហើយចំនួនមនុស្សច្រើន និងពិបាកក្នុងការរកអ្នកបកប្រែភាសាចិនមកជាភាសាខ្មែរ។ លោកបន្ថែមថា សមត្ថកិច្ចកំពុងបំបែកសំណុំរឿងនេះជាផ្នែកៗ ដើម្បីងាយស្រួលក្នុងការចោទប្រកាន់ដោយសារពាក់ព័ន្ធនឹងបទល្មើសផ្សេងៗគ្នា ហើយជនសង្ស័យមានចម្រុះជាតិសាសន៍ មានជនជាតិចិននិងជនជាតិខ្មែរ។បច្ចុប្បន្នមិនទាន់មានការដោះលែងជនសង្ស័យណាម្នាក់ទេ ក្នុងចំណោមមនុស្សដែលត្រូវចាប់ខ្លួនទាំងអស់នោះ។
កាលពីរំលងអធ្រាត្រឆ្លងចូលថ្ងៃទី៣០ ខែកញ្ញា កម្លាំងមានសមត្ថកិច្ច បានចុះឆ្មក់ចូលទៅបង្ក្រាបក្លឹប កម្សាន្ត មួយកន្លែងឈ្មោះ ចិនស៊ីនខាយសៀនមិន មានទីតាំងនៅភូមិ៤ សង្កាត់លេខ ៤ ក្រុងព្រះសីហនុ បានឃាត់ខ្លួនមនុស្សមនុស្សចំនួន៣៧៥នាក់ អាវុធចំនួន៣ ដើម (អាវុធខ្លីចំនួន២ ដើម អាវុធវែង១) ដើម និងគ្រឿងញៀនមួយចំនួនធំ។
ការចាប់ខ្លួនមនុស្សជិត៤០០នាក់ នៅក្នុងខេត្តព្រះសីហនុនេះ បានធ្វើឡើងលក្ខណៈទ្រង់ទ្រាយធំជាលើកទី២ បន្ទាប់ពីសមត្ថកិច្ចក្រុងភ្នំពេញកាលពី ខែកុម្ភៈ ឆ្នាំ២០១៩ កន្លងទៅនេះ បានឆ្មក់ចូលមជ្ឈមណ្ឌលកម្សាន្តរ៉ុក បានឃាត់ខ្លួនមនុស្សជាង៣០០នាក់ ក្នុងនោះមានជនជាតិចិនចំនួន ១៣នាក់ និងថ្នាំញៀនជិត៥០ គីឡូក្រាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។