តុលាការ​កំពូល​បង្វិល​រឿង​លោក រ៉ាត់ រត្ន​មុនី ឱ្យ​ឧទ្ធរណ៍​ជម្រះ​ឡើងវិញ និង​ឱ្យ​ស៊ើបអង្កេត​បន្ថែម​សំណុំរឿង​អតីត​អ្នកយកព័ត៌មាន​អាស៊ី​សេរី

ដោយ មាន ឫទ្ធិ
2020-07-15
អ៊ីម៉ែល
មតិ
Share
បោះពុម្ព
លោក រ៉ាត់ រត្ន​មុនី (ឆ្វេង) សកម្មជន​សិទ្ធិ​ការងារ និង​លោក អ៊ួន ឈិន (កណ្ដាល) លោក យាង សុធារិន្ទ អតីត​អ្នកយកព័ត៌មាន​អាស៊ី​សេរី នៅ​មុខ​តុលាការ​កំពូល​នៅ​ថ្ងៃ​ទី១៥ ខែ​កក្កដា ឆ្នាំ២០២០។ រូប៖ Provided photos
លោក រ៉ាត់ រត្ន​មុនី (ឆ្វេង) សកម្មជន​សិទ្ធិ​ការងារ និង​លោក អ៊ួន ឈិន (កណ្ដាល) លោក យាង សុធារិន្ទ អតីត​អ្នកយកព័ត៌មាន​អាស៊ី​សេរី នៅ​មុខ​តុលាការ​កំពូល​នៅ​ថ្ងៃ​ទី១៥ ខែ​កក្កដា ឆ្នាំ២០២០។ រូប៖ Provided photos
Photo: RFA

តុលាការ​កំពូល​នៅ​ថ្ងៃ​ទី១៥ កក្កដា ប្រកាស​សាលដីកា​សំណុំរឿង​ពីរ​ទាក់ទង​នឹង​អ្នក​សារ​ព័ត៌មាន។ នោះ​គឺ​សំណុំរឿង​អ្នកបកប្រែ​ភាពយន្តឯកសារ “ម្ដាយ​ខ្ញុំ លក់​ខ្ញុំ​” លោក រ៉ាត់ រត្ន​មុនី និង​សំណុំរឿង​របស់​អតីត​អ្នកយកព័ត៌មាន​អាស៊ី​សេរី​ពីរ​រូប គឺ​លោក អ៊ួន ឈិន និង​លោក យាង សុ​ធារិន្ទ។ មេធាវី និង​មន្ត្រី​សិទ្ធិមនុស្ស​ថា សេចក្ដី​សម្រេច​របស់​តុលាការ​កំពូល មិនបាន​ផ្តល់​យុត្តិធម៌​ដល់​អ្នក​ទាំង​បី​ឡើយ ហើយ​កាន់តែ​ធ្វើ​ឱ្យ​សំណុំរឿង​ត្រូវ​អូស​បន្លាយ​គ្មាន​កាលកំណត់។

តុលាការ​កំពូល​សម្រេច​បង្វិល​សំណុំរឿង​សកម្មជន​សិទ្ធិ​ការងារ លោ រ៉ាត់ រត្ន​មុនី ឱ្យ​សាលាឧទ្ធរណ៍​ភ្នំពេញ​ជំនុំជម្រះ​ឡើងវិញ ក្រោម​ហេតុផល​ថា ការសម្រេច​របស់​សាលាឧទ្ធរណ៍​ភ្នំពេញ​នា​ពេល​កន្លងទៅ នៅ​មាន​ភាព​ខ្វះ​ចន្លោះ។ មេធាវី​សមាគម​អាដហុក​ដែល​ជួយ​ការពារ​ក្ដី​ឱ្យ​លោក រ៉ាត់ រត្ន​មុនី គឺ​លោក សំ ទិត្យ​សីហា ថ្លែង​ថា ការសម្រេច​នេះ​អាច​បញ្ជាក់​ថា​កូន​ក្ដី​របស់​លោក​មិនទាន់​មានទោស​កំហុស​អ្វី​នោះ​ទេ តែ​ក៏​មិនមែន​ជា​យុត្តិធម៌​សម្រាប់​គាត់​ដែរ។ លោក​ពន្យល់​ថា ការ​បង្វិល​រឿង​ឱ្យ​សាលា​ឧទ្ធរណ៍​ភ្នំពេញ​ជម្រះ​ឡើងវិញ ដោយ​មិន​បាន​កំណត់​ពេល​វេលា​ជាក់លាក់​បែប​នេះ ធ្វើ​ឱ្យ​រឿង​ក្ដី​នេះ​កាន់តែ​អូស​បន្លាយ ស្រប​ពេល​កូន​ក្ដី​របស់​លោក​បាន​ជាប់ឃុំ​ជិតដល់​ពេលកំណត់​នៃ​ទោស​ទៅ​ហើយ៖ «ចំណុច​ដែល​យើង​សោក​ស្ដាយ​ដែរ បើ​ខាង​តុលាការ​កំពូល​គាត់​សម្រេច​តែ​ម្តង​ដោយ​មិន​បង្វិល អា​ហ្នឹង​ជា​ការ​មួយ​ល្អ ហើយក៏​ជា​ផល​ប្រយោជន៍​ទៅដល់​លោក រ៉ាត់ រត្នមុនី ដែរ ប៉ុន្តែ​ចំពោះ​ការដែល​គាត់​បង្វិល​វិញ វា​អាច​អូស​បន្លាយ​ពេល​វេលា​នៃ​ការ​ឃុំខ្លួន​លោក រ៉ាត់ រត្ន​មុនី ក្នុង​ពន្ធនាគារ​បន្ត​ទៀត»

តុលាការ​ក្រុង​ភ្នំពេញ​បាន​កាត់ទោស​ប្រធាន​សហព័ន្ធ​សហជីពកម្មករ​សំណង់​កម្ពុជា (CCTUF​) លោក រ៉ាត់ រត្ន​មុនី ឱ្យ​ជាប់​ពន្ធនាគារ ២ឆ្នាំ ពី​បទ “ញុះញង់​ឱ្យ​មានការ​រើសអើង” ហើយ​សាលា​ឧទ្ធរណ៍​ភ្នំពេញ​បាន​តម្កល់​សាលក្រម​នេះ​ទុកជា​បានការ​ដដែល។ រឿង​ក្ដី​នេះ កើត​ឡើង​ដោយសារតែ​លោក រ៉ាត់ រត្ន​មុនី បាន​ជួយ​ផលិតភាព​យន្ត​ឯកសារ​ស្តី​ពី​ការ​ជួញដូរ​ផ្លូវ​ភេទ​នៅ​កម្ពុជា ក្រោម​ចំណងជើង​ថា “ម្ដាយ​ខ្ញុំ លក់​ខ្ញុំ​” ឱ្យ​សារព័ត៌មាន​រុស្ស៊ី RT (Russia Today​)។ គិត​ត្រឹម​ពាក់​កណ្ដាល​ខែ​កក្កដា​នេះ លោក រ៉ាត់ រត្ន​មុនី បាន​ជាប់ឃុំ​ក្នុង​ពន្ធនាគារ​ព្រៃស​អស់​រយៈពេល​ជាង ១៩ខែ​មក​ហើយ ស្រប​ពេល​កាលកំណត់​នៃ​ទោស​មាន​រយៈ​ពេល ២៤ខែ។ មេធាវី សំ ទិត្យ​សីហា រំពឹង​ថា សាលាឧទ្ធរណ៍​ភ្នំពេញ​នឹង​ពន្លឿន​រឿង​ក្ដី​នេះ​ដើម្បី​ផ្តល់​យុត្តិធម៌​ដល់​កូន​ក្ដី​របស់​លោក ក្រោយ​មាន​សាលដីកា​ពី​តុលាការ​កំពូល។

លោក រ៉ាត់ រត្ន​មុនី សកម្មជន​សិទ្ធិ​ការងារ នៅ​មុខ​តុលាការ​កំពូល​នៅ​ថ្ងៃ​ទី១៥ ខែ​កក្កដា ឆ្នាំ២០២០។ រូប៖ Provided photos
លោក រ៉ាត់ រត្ន​មុនី សកម្មជន​សិទ្ធិ​ការងារ នៅ​មុខ​តុលាការ​កំពូល​នៅ​ថ្ងៃ​ទី១៥ ខែ​កក្កដា ឆ្នាំ២០២០។ រូប៖ Provided photos

ងាក​ទៅ​សំណុំរឿង​របស់​អតីត​អ្នកយកព័ត៌មាន​អាស៊ី​សេរី​លោក អ៊ួន ឈិន និង​លោក យាង សុធារិន្ទ វិញ តុលាការ​កំពូល​បាន​តម្កល់​ការសម្រេច​របស់​តុលាការ​ថ្នាក់ក្រោម ដែល​ឱ្យ​ស៊ើបអង្កេត​បន្ថែម​រឿង​វីដេអូ​អាសអាភាស ទុកជា​បានការ​ដដែល ដោយ​មិនបាន​ប្រាប់​ពី​សម្អាង​ហេតុ​ឡើយ។ មេធាវី​ការពារ​ក្ដី​ឱ្យ​អតីត​អ្នកយកព័ត៌មាន​អាស៊ី​សេរី​ទាំងពីរ​រូប គឺ​លោក សំ ចំរើន ថ្លែង​ថា ការសម្រេច​របស់​តុលាការ​កំពូល​នេះ អយុត្តិធម៌​ខ្លាំង​សម្រាប់​កូន​ក្ដី​របស់ និង​មិន​ស្របតាម​វិធាន​នៃ​ច្បាប់។ លោក​ថា ក្រម​នីតិវិធី​ព្រហ្មទណ្ឌ​តម្រូវ​ឱ្យ​តុលាការ​ប្រកាស​ថា ជន​ណា​ម្នាក់​មាន​ទោស ឬ​មិន​មាន​ទោស​នៅ​ក្នុង​ដំណាក់កាល​សវនាការ លើក​លែង​តែ​ក្នុង​ករណី​ចាំបាច់​បំផុត ទើប​អនុញ្ញាត​ឱ្យ​មានការ​ស៊ើបសួរ​បន្ថែម។ លោក​អះអាង​ថា ចំពោះ​សំណុំរឿង​កូន​ក្តី​របស់​លោក​នេះ គ្មាន​ភាព​ចាំបាច់​ដើម្បី​ស៊ើបអង្កេត​ទៀត​ទេ ព្រោះ​ភាគី​ពាក់ព័ន្ធ​ទាំង​អស់​យល់​ស្រប​គ្នា​ហើយ​ថា ដំណើរការ​នីតិវិធី​កន្លង​មក ធ្វើឡើង​ដោយ​ពេញលេញ ជាពិសេស តំណាង​អយ្យការ​ក៏​យល់​ថា អង្គហេតុ​នៃ​ការ​ចោទ​ប្រកាន់​របស់​ខ្លួន​ក៏​គ្រប់គ្រាន់​ហើយ​ដែរ៖ «មិន​មាន​តុល្យភាព​ទេរ​វាង​ការ​អនុញ្ញាត​ឱ្យ​ស៊ើបសួរ​បន្ថែម ពន្លាត​អង្គហេតុ​បែប​ហ្នឹង ហើយនិង​សិទ្ធិ​របស់​កូន​ក្ដី​ខ្ញុំ​ទាំងពីរ។ ធ្វើ​ឱ្យ​ប៉ះពាល់​ដល់​សិទ្ធិ​របស់​កូន​ក្តី​យ៉ាង​ធំធេង ដោយ​មិន​អាច​រៀបរាប់​អស់​ទេ ជាពិសេស​គឺ​សិទ្ធិ​ទទួល​បាន​សវនាការ​ដោយ​ត្រឹមត្រូវ និង​យុត្តិធម៌ ហើយ​សិទ្ធិ​មួយ​ដែល​ចម្បង​ជាងគេ គឺ​សិទ្ធិ​ទទួល​បានការ​សន្មត​ទុក​ជា​មុន​ថា គ្មាន​ទោស។ បើ​សួរដេញដោល​នៅ​ពេល​អង្គ​សវនាការ​ទៅ មិន​ឃើញ​មាន​ភស្តុតាង​គ្រប់​គ្រាន់ មាន​ន័យ​ថា គ្រាន់តែ​សង្ស័យ។ សង្ស័យ គឺជា​ប្រយោជន៍​របស់​ជនជាប់ចោទ អ៊ីចឹង​សម្រេច​ឱ្យ​ជនជាប់ចោទ​រួចផុត​ពី​បទ​ចោទ។ បើ​តុលាការ​អនុវត្ត​ផ្សេង មានន័យថា នេះ​ជា​ការអនុវត្ត​ដែល​មិន​ស្ថិត​ក្នុង​គន្លងច្បាប់»

តុលាការ​ក្រុង​ភ្នំពេញ​បាន​ចោទប្រកាន់​លោក អ៊ួន ឈិន និង​លោក យាង សុធារិន្ទ ពី​បទ “ផលិត និង​កាន់កាប់​រូបភាព​អាសអាភាស​”។ ការចោទប្រកាន់​នេះ ជា​ការ​បន្ថែម​បទ​ចោទ​ថ្មី​មួយទៀត​លើ​អ្នក​ទាំងពីរ បន្ទាប់ពី​តុលាការ​បាន​ចោទ​អ្នក​ទាំងពីរ​ថា​បាន “ប្រគល់​ឱ្យ​រដ្ឋ​បរទេស​នូវ​ព័ត៌មាន​ជាអាទិ៍ ដែល​អាច​ធ្វើ​ឱ្យ​អន្តរាយ​ការ​ការពារ​ជាតិ​”។ តុលាការ​បាន​ជំនុំជម្រះ​រឿង​ក្តី​ទាំងពីរ​នេះ​រួចហើយ និង​ពន្យារពេល​ប្រកាស​សាលក្រម​ម្ដង ប៉ុន្តែ​នៅដើម​ខែតុលា ឆ្នាំ២០១៩ ស្រាប់តែ​តុលាការ​បង្គាប់​ឱ្យ​ស៊ើបអង្កេត​រឿង​ក្តី​ទាំងពីរ​នេះ​បន្ថែម​ទៀត​ទៅវិញ។

ជុំវិញ​ការសម្រេច​របស់​តុលាការ​នេះ លោក យាង សុធារិន្ទ ថា ការសម្រេច​របស់​តុលាការ​កំពូល​នា​ពេលនេះ ជា​ការសម្រេច​ធ្វើឲ្យ​ពួកលោក​ទាំងពីរ​នាក់ មិន​ទទួលបាន​ការជនុំជម្រះ​ប្រកបដោយ​យុត្តិធម៌ ដោយសារតែ​ តុលាការចេះតែ​បន្ត​អូសបន្លាយ​សំណុំរឿង​នេះ អស់រយៈពេល​ជិត៣ឆ្នាំ​មកហើយ។ លោកថា មុននឹង​ជំនុំជម្រះ ចៅក្រម​ស៊ើបអង្កេត​បាន​មាន​ពេលវេលា​គ្រប់គ្រាន់​រួច​ទៅហើយ​ក្នុង​ការស៊ើបអង្កេត។ ដូច្នេះ​ហើយ នៅពេល​ចៅក្រម​ជំនុំជម្រះ មិនអាច​រក​ភស្តុតាង​ដាក់បន្ទុក​លើ​ពួកលោកបាន ផលប្រយោជន៍​គួរតែ​បានមក​ពួកលោក​ទាំងពីរនាក់ តាមរយៈ​ការទម្លាក់ចោល​បទចោទ​តែម្តង៖ «ពីព្រោះ​អ្វីៗ​គឺ​តុលាការ សមត្ថកិច្ច បានប្រមូល​យកទៅ​ទាំងអស់។ អ៊ីចឹង បានជា​ខ្ញុំតែង​និយាយថា ទោះបីជា​ស៊ើបអង្កេត​យ៉ាងម៉េច វានៅតែ​ប៉ុណ្ណឹង​ដដែល។ ដូច្នេះ ខ្ញុំគិតថា ការចេះតែ​រក្សាទុក​សំណុំរឿង​របស់​ពួកខ្ញុំ​ដែលមាន​រយៈពេល​ជិត ៣ឆ្នាំ ចេះតែ​បន្ត​ទៅទៀត​ហ្នុង ហាក់បី​ដូចជា​ចាត់ទុក​ពួកខ្ញុំ ជា​ចំណាប់ខ្មាំង​សម្រាប់​អ្វីមួយ​អញ្ចឹង។ អ្វីដែល​ខ្ញុំចង់​សំណូមពរ​ទៅ​តុលាការ គឺ​សូម​កុំយក​ពួកខ្ញុំ​ធ្វើជា​ចំណាប់ខ្មាំង​ សម្រាប់​ផលប្រយោជន៍​អ្វីមួយ ពីព្រោះ​ពួកខ្ញុំ​ជា​ប្រជាពលរដ្ឋ ពួកខ្ញុំ​ជា​មនុស្ស។ សូម​ផ្តល់​សិទ្ធិសេរីភាព​ឲ្យពួក​ខ្ញុំ​ឡើងវិញ ក្នុងនាមជា​ប្រជាពលរដ្ឋ​ទូទៅ»

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO​) លោក អំ សំអាត សោក​ស្ដាយ​ចំពោះ​ការសម្រេច​របស់​តុលាការ​កំពូល ទាំង​ចំពោះ​សំណុំរឿង​លោក រ៉ាត់ រត្ន​មុនី និង​សំណុំរឿង​របស់​អតីត​អ្នក​យក​ព័ត៌មាន​អាស៊ី​សេរី​ទាំងពីរ​រូប។ លោក​យល់​ថា ការសម្រេច​នេះ​មាន​ភាព​អយុត្តិធម៌ ព្រោះ​អ្នក​ទាំង​បី​មិន​បាន​ប្រព្រឹត្ត​កំហុស​ដូច​ការ​ចោទ​ប្រកាន់​ឡើយ ហើយ​តុលាការ​ក៏​គ្មាន​ភស្តុតាង​រឹងមាំ​ដើម្បី​បន្ត​ចោទ​ប្រកាន់​ពួក​គេ​នោះ​ដែរ៖ «ទាំង​រឿង​លោក រ៉ាត់ រត្ន​មុនី ទាំង​រឿង​លោក អ៊ួន ឈិន និង​លោក យាង សុធារិន្ទ គឺ​យើង​ឃើញ​ថា ប៉ះពាល់​ទៅ​ដល់​សេរីភាព​សារព័ត៌មាន ដែល​យើង​ឃើញ ទាំង​សហរដ្ឋ​អាមេរិក សហភាព​អឺរ៉ុប និង​អង្គការ​សហប្រជាជាតិ គេ​ទាមទារ​ឱ្យ​មានការ​ទម្លាក់​ចោល​ដោយ​ឥតមាន​លក្ខខណ្ឌ​ទៅលើ​បទ​ចោទ ដើម្បី​ឱ្យ​អ្នក​ទាំង​អស់​ហ្នឹង​បំពេញ​កាតព្វកិច្ច​របស់​ខ្លួន​ក្នុងនាម​វិជ្ជាជីវៈ​អ្នក​សារ​ព័ត៌មាន​ឡើងវិញ»

សម្ព័ន្ធ​អ្នក​សារ​ព័ត៌មាន​កម្ពុជា ហៅ​កាត់​ថា ខេមបូចា (CamboJA) បាន​ចាត់​ទុក​ការ​បន្ត​នីតិវិធី​លើ​សំណុំរឿង​ទាំង​ពីរ​នេះ​ថា ជា​ឧបសគ្គ​ដល់​ការ​អនុវត្ត​សេរីភាព និង​វិជ្ជាជីវៈ​សារ​ព័ត៌មាន​នៅ​កម្ពុជា។ ខេមបូចា លើក​ឡើង​ក្នុង​ថ្លែង​ការណ៍​នៅ​ថ្ងៃ​ទី១៥ កក្កដា​ថា ការ​សម្រេច​បែប​នេះ​កាន់​តែ​បង្ក​ផល​ប៉ះពាល់​ដល់​សិទ្ធិ​សេរីភាព និង​ជីវភាព​រស់​នៅ​របស់​លោក រ៉ាត់ រត្ន​មុនី លោក អ៊ួន ឈិន និង​លោក យាង សុ​ធារិ​ន្ទ។ ខេមបូចា ស្នើ​យ៉ាង​ទទូច​ដល់​តុលាការ​ឱ្យ​ទម្លាក់​ចោល​បទ​ចោទ​ប្រកាន់​ទាំង​អស់​លើ​អ្នក​ទាំង​បី ដោយ​មិន​ត្រូវ​បន្ត​រាល់​នីតិវិធី​មិន​ចាំបាច់​ទាំង​ឡាយ​ណា ដែល​ប៉ះពាល់​ដល់​សិទ្ធិ​ទទួល​បាន​យុត្តិធម៌​របស់​ពួក​គេ​នោះ​ឡើយ។ ជា​មួយ​គ្នា​នេះ ខេមបូចា អំពាវនាវ​ដល់​រដ្ឋាភិបាល​ឱ្យ​បញ្ឈប់​ការ​ប្រើ​ប្រាស់​ក្រម​ព្រហ្មទណ្ឌ ក្នុង​ការ​ចាត់​វិធានការ​លើ​អ្នក​សារ​ព័ត៌មាន ព្រម​ទាំង​បញ្ឈប់​ការ​ចាប់​ខ្លួន និង​ឃុំខ្លួន​អ្នក​សារ​ព័ត៌មាន​ត​ទៅ​ទៀត៕

លោក អ៊ួន ឈិន (ឆ្វេង) និង​លោក យាង សុធារិន្ទ អតីត​អ្នកយកព័ត៌មាន​អាស៊ី​សេរី និយាយ​ជាមួយ​អ្នកកាសែត នៅ​មុខ​តុលាការ​កំពូល​នៅ​ថ្ងៃ​ទី១៥ ខែ​កក្កដា ឆ្នាំ២០២០។ រូប៖ Provided photos
លោក អ៊ួន ឈិន (ឆ្វេង) និង​លោក យាង សុធារិន្ទ អតីត​អ្នកយកព័ត៌មាន​អាស៊ី​សេរី និយាយ​ជាមួយ​អ្នកកាសែត នៅ​មុខ​តុលាការ​កំពូល​នៅ​ថ្ងៃ​ទី១៥ ខែ​កក្កដា ឆ្នាំ២០២០។ រូប៖ Provided photos

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល