តុលាការ​ខេត្ត​រតនគិរី​បិទ​ការ​ស៊ើបសួរ​សំណុំ​រឿង​ញុះញង់​របស់​មន្ត្រី អាដហុក

ដោយ ទីន ហ្សាការីយ៉ា
2020-02-09
Share
លោក ប៉ែន ប៊ុណ្ណារ៍ 051217 ៦២២ មន្ត្រី​កម្មវិធី​បណ្ដាញ​សហគមន៍​នៃ​សមាគម​អាដហុក (ADHOC) លោក ប៉ែន ប៊ុណ្ណារ៍ ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ីសេរី កាល​ពី​ថ្ងៃ​ទី​១២ ខែ​ឧសភា ឆ្នាំ​២០១៧។
RFA

ចៅក្រម​ស៊ើបសួរ​នៃ​តុលាការ​ខេត្ត​រតនគិរី បាន​សម្រេច​បិទ​ការ​ស៊ើបអង្កេត​លើ​មន្ត្រី​ជាន់ខ្ពស់​សមាគម អាដហុក (ADHOC) និង​ប្រជា​សហគមន៍​ឃុំ​សេដា​ហើយ ក្នុង​សំណុំ​រឿង​ញុះញង់។ ចៅក្រម​សម្រេច​បិទ​ការ​ស៊ើបអង្កេត​នេះ កាល​ពី​ខែ​មករា​កន្លង​ទៅ ប៉ុន្តែ​សាមីខ្លួន​ទើប​តែ​ទទួល​បាន​ដំណឹង​នេះ​ទេ។ អ្នក​ការពារ​សិទ្ធិ​មនុស្ស​ជំរុញ​ឱ្យ​តុលាការ​ទម្លាក់​ចោល​បទ​ចោទ​ប្រកាន់​នេះ ព្រោះ​ជា​រឿង​មិន​សម​ហេតុផល និង​ខ្វះ​មូលដ្ឋាន​គ្រប់គ្រាន់។

មន្ត្រី​ពង្រឹង​សិទ្ធិ​អំណាច​សហគមន៍​មូលដ្ឋាន​នៃ​សមាគម អាដហុក (ADHOC) លោក​ ប៉ែន បុណ្ណារ៍ ឱ្យ​អាស៊ី​សេរី​ដឹង​នៅ​ថ្ងៃ​ទី៩ កុម្ភៈ​ថា លោក​ទើប​តែ​ទទួល​បាន​លិខិត​ជូន​ដំណឹង​ស្ដីពី​ការ​បិទ​ការ​ស៊ើប​សួរ​សំណុំ​រឿង​នេះ កាល​ពី​សប្ដាហ៍​មុន​ប៉ុណ្ណោះ ពោល​គឺ​នៅ​ពេល​លោក​ទៅ​បង្ហាញ​​ខ្លួន​តាម​ការ​បង្គាប់​របស់​ចៅក្រម​ស៊ើបសួរ។ លោក​បញ្ជាក់​ថា ​មេធាវី​របស់​លោក​នឹង​ដាក់​លិខិត​ស្នើសុំ​ឱ្យ​ចៅក្រម​ស៊ើប​សួរ​ទម្លាក់​ចោល​បទ​ចោទ​ប្រកាន់​​នៅ​ត្រឹម​​ដំណាក់​កាល​នេះ៖ «ទាំង​អស់​ហ្នឹង សុទ្ធ​តែ​ជា​ការ​រៀប​ចំ​​​បំបាក់​ស្មារតី​យើង អ៊ីចឹង​យើង​ដូច​ជា​មិន​​មាន​អ្វី​ដែល​​ត្រូវ​បាក់ទេ ពីព្រោះយើង​បាន​ឆ្លង​រឿង​ជា​ច្រើន​ហើយ។ គេ​ចោទ​យើង​តាំងពី​​ភេរវកម្មទាំងអស់មក ក៏​ប៉ុន្តែ​យើង​បាន​​ដោះ ពីព្រោះ​យើង​អត់​បាន​ធ្វើ។ អ៊ីចឹង​អំពើ​ល្អ​របស់​យើង វា​នឹង​ការពារ​យើង។ ទោះបី​​ជា​ធ្ងន់ធ្ងរ​យ៉ាងម៉េច រហូត​ដល់​គេ​ផ្តន្ទាទោស​យើង​ ដាក់​យើង​ក្នុង​ពន្ធនាគារ ក៏​វា​បង្ហាញ​នៅក្នុង​សង្គម​មួយ​​អយុត្តិធម៌​ដែរ ពីព្រោះ​វា​មិន​មែន​មាន​តែ​ភ្នែក​របស់​អាជ្ញាធរ​ហ្នឹងឯណា សូម្បីតែ​ភ្នែក​​​ទូទាំង​ប្រទេស​ហ្នឹងក៏​គេ​ដឹង​ថា យើង​​ជា​មនុស្ស​ដូច​ម្តេច​ដែរ»

ទោះ​ជា​យ៉ាង​ណា លិខិត​ជូន​ដំណឹង​ស្ដីពី​ការ​បិទ​​បញ្ចប់​ការ​ស៊ើបសួរ​នេះ មិន​បាន​កំណត់​ថា លោក ប៉ែន ប៊ុណ្ណារ៍ និង​ប្រជា​សហគមន៍​ឃុំ​សេដា ត្រូវ​រួច​ផុត​ពី​កាតព្វកិច្ច​ស្ថិត​ក្រោម​ការ​ត្រួតពិនិត្យ​តាម​ផ្លូវ​តុលាការ​នោះ​ឡើយ។ នេះ​មាន​ន័យ​ថា មន្ត្រី​ជាន់ខ្ពស់​​សមាគម​អាដហុក​រូប​នេះ និង​ប្រជា​សហគមន៍​នៅ​តែ​ត្រូវ​ទៅ​បង្ហាញ​​ខ្លួន​នៅ​តុលាការ​ខេត្ត​រតនគិរី​រយៈ​ពេល ២ខែ​ម្តង​ដដែល ហើយ​ពួក​​គេ​មិន​អាច​ផ្លាស់​ប្ដូរ​ទីលំនៅ​​ដោយ​គ្មាន​ការ​អនុញ្ញាត​ពី​តុលាការ​ឡើយ។

អាស៊ី​សេរី​មិន​អាច​សុំ​ការ​បំភ្លឺ​រឿង​នេះ​ពី​អ្នក​នាំ​ពាក្យ​តុលាការ​ខេត្ត​រតនគិរី លោក កែវ ពិសុទ្ធ បាន​ទេ​នៅ​ថ្ងៃ​ទី៩ កុម្ភៈ ដោយ​ទូរស័ព្ទ​ចូល តែ​ពុំ​មាន​អ្នក​ទទួល។ ចំណែក​ចៅក្រម​ស៊ើបសួរ លោក សេង ស៊ឹម​សូរិយា ក៏​មិន​អាច​ទាក់ទង​បាន​ដូច​គ្នា។

មន្ត្រី​ជាន់ខ្ពស់​សមាគម​អាដហុក លោក ប៉ែន ប៊ុណ្ណារ៍ និង​ប្រជា​សហគមន៍​ឃុំ​សេដា​មួយ​ចំនួន​​ទៀត ត្រូវ​បាន​ចៅក្រម សេង ស៊ឹមសូរិយា ដាក់​ឱ្យ​ស្ថិត​ក្រោម​ការ​ត្រួត​ពិនិត្យ​ពី​បទ “ញុះញង់​ឱ្យ​ប្រព្រឹត្ត​បទឧក្រិដ្ឋ​ជា​អាទិ៍” កាល​ពី​ខែ​តុលា ឆ្នាំ២០១៩ កន្លង​ទៅ។ ម្ចាស់​បណ្ដឹង​ក្នុង​រឿង​ក្តី​នេះ គឺ​ក្រុម​អាជ្ញាធរ​ចាប់​ពី​ថ្នាក់​មូលដ្ឋាន រហូត​ដល់​មន្ត្រី​ជំនាញ​ថ្នាក់​ខេត្ត ដែល​ត្រូវ​បាន​​លោក ប៉ែន បុណ្ណារ៍ និង​ប្រជា​ពលរដ្ឋ ប្ដឹង​បរិហារ​ករណី​បណ្ដែត​បណ្ដោយ​ឱ្យ​មាន​បទ​ល្មើស​កាប់​រាន​ដី​ព្រៃ​ជាង ៨០០ហិកតារ ក្នុង​ដែន​ជម្រក​សត្វ​ព្រៃ​លំផាត់ ខេត្ត​រតនគិរី។

លោក ប៉ែន ប៊ុណ្ណារ៍ បញ្ជាក់​ថា លោក​ និង​ប្រជា​សហគមន៍​បាន​ទៅ​បង្ហាញ​ខ្លួន​ជា​ទៀងទាត់​នៅ​សាលាដំបូង​ខេត្ត​រតនគិរី តាម​ការ​បង្គាប់​របស់​ចៅក្រម​ស៊ើបសួរ។ លោក​ថា ការ​បង្ហាញ​ខ្លួន​កន្លង​មក មន្ត្រី​តុលាការ​គ្រាន់​តែ​ឱ្យ​លោក​បំពេញ​លិខិត​ស្នាម និង​ចុះ​វត្តមាន មិន​មាន​ការ​សួរ​នាំ​ពាក់ព័ន្ធ​នឹង​សំណុំ​​រឿង​នេះ​ទេ។ លោក​អះអាង​ថា បើ​ទោះ​ជា​រង​បណ្ដឹង និង​ត្រូវ​តុលាការ​ដាក់​ឱ្យ​ស្ថិត​ក្រោម​ការ​ត្រួត​ពិនិត្យ​បែប​នេះ​ក្តី ក៏​លោក​មិន​រាថយ​ក្នុង​ការ​ចុះ​បង្រៀន​សហគមន៍​មូលដ្ឋាន និង​ដាក់​បណ្ដឹង​បរិហារ​ប្រឆាំង​នឹង​បទ​ល្មើស​ព្រៃ​ឈើ និង​ធនធាន​ធម្មជាតិ​នោះ​ដែរ។

នាយក​រង​ទទួល​​បន្ទុក​ផ្នែក​ឃ្លាំមើល​​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត ចាត់​ទុក​បណ្ដឹង​​ប្រឆាំង​មន្ត្រី​អាដហុក និង​ប្រជា​សហគមន៍​នេះ​ថា ជា​វប្បធម៌​ក្ដិចត្រួយ ដែល​បំផ្លាញ​​ទឹក​ចិត្ត​អ្នក​ហ៊ាន​ចេញមុខ​​ការពារ​ព្រៃ​ឈើ និង​ធនធាន​ធម្មជាតិ។ លោក​ថា តុលាការ​គួរ​តែ​ចាត់​ការ​លើ​បណ្ដឹង​បរិហារ​រឿង​កាប់​រាន​​ដី​ព្រៃ​ដែល​ប្ដឹង​ដោយ​មន្ត្រី​អាដហុក និង​ប្រជា​សហគមន៍​វិញ ជាជាង​​ចាត់​ការ​លើ​​បណ្ដឹង​របស់​អ្នក​ពាក់ព័ន្ធ​បទ​ល្មើស​ព្រៃ​ឈើ​ដែល​ប្ដឹង​បក​ពួក​គេ​រឿង​ញុះញង់​បែប​នេះ។ អ្នក​ការពារ​សិទ្ធិ​មនុស្ស​រូប​នេះ​អំពាវនាវ​ដល់​តុលាការ​ខេត្ត​រតនគិរី​ទម្លាក់​ចោល​​បទ​ចោទ​ប្រកាន់​ប្រឆាំង​នឹង​មន្ត្រី​អាដហុក និង​ប្រជា​សហគមន៍​ ហើយ​ផ្តល់​សិទ្ធិ​សេរីភាព​​ពេញលេញ​ដល់​ពួក​គេ​វិញ៖ «បណ្តឹង និង​ការ​ចោទ​ប្រកាន់លោក ប៉ែន ប៊ុណ្ណារ៍ និង​សហគមន៍ព្រៃឈើមួយ​ចំ​នួនទៀត គឺមិន​មាន​មូលដ្ឋាន ឬក៏​មិន​សម​ហេតុ​ផល​ទាល់​តែ​សោះ។ ផ្ទុយ​ទៅវិញ គឺ​ថា​បណ្តឹង​ហ្នឹង វា​​ជា​ការ​គំរាម​កំហែង បំភិតបំភ័យ បន្ទុច​បង្អាក់សកម្មភាព​របស់​មន្ត្រី​អង្គការ​សិទ្ធិមនុស្ស និង​សហគមន៍ក្នុ​ងការ​ចូល​រួម​ទប់​ស្កាត់​បទល្មើស​ព្រៃឈើ ឬការ​រុក​រាន​ព្រៃឈើជាដើម។ អ៊ីចឹង​យើង​ជា​សង្គម​ស៊ីវិល​​ដែល​ធ្វើ​ការ​​លើ​​ផ្នែក​​នេះ គឺ​តាំង​ពីដើម​មក យើង​ទាម​ទារ​ឱ្យ​ទម្លាក់​បទ​ចោទ​ប្រកាន់​លើ​​អ្នក​ទាំងអស់ហ្នឹង​ឱ្យ​មាន​សេរីភាពដើម្បី​បំពេញ​វិជ្ជាជីវៈ​របស់​ខ្លួន​ឱ្យ​បាន​ពេញលេញ​ឡើងវិញ»

មេធាវី​ការពារ​ក្តី​ឱ្យ​​មន្ត្រី​អាដហុក និង​ប្រជា​សហគមន៍ លោក សំ ទិត្យសីហា ធ្លាប់​ប្រាប់​អាស៊ី​សេរី​ថា រឿង​ក្តី​នេះ តុលាការ​យោង​ទៅ​លើ​តែ​របាយការណ៍​របស់​ក្រុម​អាជ្ញាធរ​ដែល​បាន​ចោទ​កូន​ក្តី​របស់​លោក​ថា ញុះញង់​ឱ្យ​ពលរដ្ឋ​ទៅ​កាប់​រាន​ដី​ព្រៃ ប៉ុណ្ណោះ។ លោក​អះអាង​ថា នេះ​ជា​ការ​ចោទ​ប្រកាន់​គ្មាន​មូលដ្ឋាន និង​មិន​ត្រឹម​ត្រូវ ព្រោះ​កូន​ក្តី​របស់​​លោក​ គឺជា​អ្នក​ការពារ​ព្រៃ​ឈើ ហើយ​ការ​ប្ដឹង​បរិហារ​អំពី​បទ​ល្មើស​ណា​មួយ​​នោះ គឺជា​ការ​អនុវត្ត​តាម​ក្រមព្រហ្មទណ្ឌ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។