ប្រធានពន្ធនាគារខេត្តស្វាយរៀង អះអាងថា លោក ឈូក បណ្ឌិត ដែលកំពុងជាប់ពន្ធនាគារខេត្ត គឺមានស្ថានភាពដូចអ្នកទោសដទៃទៀតដែរ។ តែយ៉ាងណាក៏ដោយ មន្ត្រីនៃអង្គការលីកាដូ (Licadho) ប្រចាំខេត្តស្វាយរៀង បញ្ជាក់ថា ទណ្ឌិតធ្លាប់មានអំណាចរូបនេះ អាចមានស្ថានភាពប្រសើរជាងទណ្ឌិតដទៃទៀត ដោយសារអាចចេញចូលបន្ទប់ឃុំឃាំង ឬចូលបណ្ណាល័យអានសៀវភៅបានច្រើនដងក្នុង ១ថ្ងៃ។ ដោយឡែកមេធាវីការពារឲ្យកម្មការិនីរងគ្រោះ កំពុងរៀបចំដាក់ពាក្យបណ្ដឹងទាមទារសំណងក្រោយ លោក ឈូក បណ្ឌិត ជាប់ពន្ធនាគារ។
លោក ឈូក បណ្ឌិត អតីតអភិបាលក្រុងបាវិត ដែលបានបាញ់កម្មការិនី ៣នាក់ឲ្យរងរបួស ហើយត្រូវបានសាលាដំបូងខេត្តស្វាយរៀង ផ្ដន្ទាទោសឲ្យជាប់ពន្ធនាគាររយៈពេលមួយឆ្នាំកន្លះនោះ គឺពុំមានការសម្របសម្រួលឲ្យរស់នៅក្នុងបន្ទប់ពិសេស ខុសពីអ្នកទោសដទៃទៀតឡើយ។
ប្រធានពន្ធនាគារខេត្តស្វាយរៀង លោក សួស សាខូ មានប្រសាសន៍ថា អ្នកទោស គឺមានភាពស្មើគ្នាចំពោះមុខច្បាប់ ដូច្នេះ លោក ឈូក បណ្ឌិត គឺត្រូវរស់នៅក្នុងបន្ទប់ទំហំ ៥ម៉ែត្រគុណនឹង ៦ម៉ែត្រ ដាក់អ្នកទោសសរុប ៣០នាក់៖ «គេជាប់ម៉េច គាត់ជាប់អ៊ីចឹង ដូចតែគេដែរ។ រឿងអានសៀវភៅនៅបណ្ណាល័យនោះ គឺអ្នកទោសណាក៏អាចមើលបានដែរ។ អង្គការស៊ីប៉ា (SIPAR) គេបង្កើតបណ្ណាល័យនៅតាមពន្ធនាគារទូទាំងប្រទេស ដើម្បីឲ្យអ្នកទោសបានអានសៀវភៅ។ ដូច្នេះអ្នកទោសគេម៉េច គាត់អ៊ីចឹង»។
លោក ឈូក បណ្ឌិត ត្រូវបានចាប់បញ្ជូនចូលពន្ធនាគារខេត្តស្វាយរៀង ភ្លាមៗកាលពីល្ងាចថ្ងៃទី៨ ខែសីហា បន្ទាប់ពីដើរចូលមកសារភាពដោយខ្លួនឯង ក្រោយគេចខ្លួនជាង ៣ឆ្នាំ។ការចូលទទួលទោសទណ្ឌនេះ គឺបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសឲ្យសមត្ថកិច្ចស្វែងរកចាប់ខ្លួន។
ទាក់ទិនបញ្ហានេះដែរ មន្ត្រីសម្របសម្រួលនៃអង្គការសិទ្ធិមនុស្សលីកាដូ ប្រចាំខេត្តស្វាយរៀង លោក នុត បូពិណ្ណរ័ត្ន ដែលធ្លាប់បានចូលទៅមើលស្ថានភាពរស់នៅរបស់ លោក ឈូក បណ្ឌិត ក្នុងពន្ធនាគារនោះឲ្យដឹងថា មិនមានការខុសប្លែកគ្នាប៉ុន្មានឡើយរវាងអ្នកទោស ឈូក បណ្ឌិត និងអ្នកទោសដទៃទៀត។ តែទោះជាយ៉ាងណា ក៏ទណ្ឌិតដែលធ្លាប់មានឥទ្ធិពលរូបនេះ អាចចេញពីក្នុងបន្ទប់ឃុំឃាំងបានច្រើនជាងគេដែរ៖ «អ្នកទោសខ្លះអាចចេញពីបន្ទប់បានមួយពេលអីអ៊ីចឹង ហើយអ្នកទោសខ្លះទៀត ចេញមកធ្វើការ គឺអាចចេញពីបន្ទប់បានដល់ល្ងាច តែចំពោះគាត់ (ឈូក បណ្ឌិត) អាចចេញអានសៀវភៅនៅបណ្ណាល័យ ចេញក្រៅបន្ទប់អ៊ីចឹងទៅ ពេលល្ងាចដល់ម៉ោងចូលបន្ទប់វិញ គឺគាត់ចូលនឹងគេដែរ»។
ក្រៅពីផ្ដន្ទាទោសដាក់ពន្ធនាគារមួយឆ្នាំកន្លះនោះ គឺសាលក្រមតុលាការខេត្តស្វាយរៀង បានតម្រូវឲ្យ លោក ឈូក បណ្ឌិត បង់ប្រាក់សំណងទៅឲ្យកម្មការិនី កែវ នា ដែលរងរបួសដៃ ចំនួន ៨លានរៀល ឬប្រហែល ២.០០០ដុល្លារ។ កម្មការិនី នុត សាខន របួសខ្នង ចំនួន ១០លានរៀល ឬប្រហែល ២.៥០០ដុល្លារ និង ប៊ុន ចិន្តា ដែលត្រូវគ្រាប់កាំភ្លើងចំទ្រូងធ្លាយទៅក្រោមក្លៀកខាងស្ដាំ ចំនួន ២០លានរៀល ឬប្រហែល ៥.០០០ដុល្លារ។
ទាក់ទងនឹងសំណងនេះដែរ អ្នកស្រី សារី បុត្រចរិយា មេធាវីការពារឲ្យកម្មការិនីទាំងបីនាក់ ដែលជាជនរងគ្រោះដោយការបាញ់ប្រហាររបស់ លោក ឈូក បណ្ឌិត កំពុងរង់ចាំលិខិតបញ្ជាក់សាលដីកាស្ថាពររបស់តុលាការកំពូល មុននឹងឈានដល់ការដាក់បណ្ដឹងសុំអនុវត្តទាមទារសំណងនៅសាលាដំបូងខេត្តស្វាយរៀង។
ជាមួយគ្នានេះដែរ កម្មការិនីរងគ្រោះ ក៏ទទូចឲ្យតុលាការពន្លឿនក្នុងការផ្តល់សំណងដល់ពួកគេឲ្យបានឆាប់ៗដែរ ដើម្បីយកទៅបន្តព្យាបាលជំងឺដែលនៅតែធ្វើទុក្ខស្ទើររាល់ថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។