ពលរដ្ឋបន្តតវ៉ាទាមទារឱ្យរដ្ឋាភិបាលដោះលែង លោក ថេង សាវឿន និងសហការីទាំង២
2023.05.25
ម្ដាយលោក ថេង សាវឿន តវ៉ាលើកបដានៅជាប់របងក្រសួងមហាផ្ទៃ នៅថ្ងៃទី២២ ឧសភា ២០២៣។
រូប៖ ពលរដ្ឋផ្ដល់ឱ្យ
ប្រជាពលរដ្ឋមកពីតាមបណ្ដាខេត្តនានា នៅតែបន្តការតវ៉ានៅតាមក្រសួងពាក់ព័ន្ធ ដើម្បីស្នើសុំអន្តរាគមន៍ដោះលែងលោក ថេង សាវឿន និងសហការីឱ្យមានសេរីភាពវិញ។ មន្ត្រីសង្គមស៊ីវិលយល់ឃើញថា ការតវ៉ារបស់ពលរដ្ឋទាំង៣រយនាក់អាចបញ្ជាក់ពីស្អាតស្អំរបស់លោក ថេង សាវឿន ដែលថា លោកគ្មានគំនិតផ្ដួលរំលំរដ្ឋាភិបាលដូចការចោទប្រកាន់នោះឡើយ។
ប្រជាពលរដ្ឋជាង ៣រយនាក់មកពីតាមបណ្ដាខេត្តជិតឆ្ងាយ នៅតែបន្តទាមទារឱ្យក្រសួងមហាផ្ទៃ និងក្រសួងយុត្តិធម៌ ដោះលែងលោក ថេង សាវឿន ព្រមទាំងសហការី២នាក់ទៀតចេញពីពន្ធនាគារខេត្តរតនគិរី បើទោះបីត្រូវចំណាយពេលវេលា ថវិកា ព្រមទាំងគ្មានកន្លែងសម្រាកសមរម្យ នៅក្នុងរាជធានីភ្នំពេញយ៉ាងណាក្ដី។
តំណាងសហគមន៍បទុមសាគរ ខេត្តកោះកុង លោកស្រី ជុ ស្រីនៅ ប្រាប់វិទ្យុអាស៊ីសេរីនៅថ្ងៃទី២៤ ឧសភា ថា ប្រជាពលរដ្ឋកំពុងរង់ចាំការប្រកាសលទ្ធផលនៃការសម្រេចរបស់ក្រសួងមហាផ្ទៃ និងក្រសួងយុត្តិធម៌ ក្រោយតំណាងពលរដ្ឋបានជួបពិភាក្សាជាមួយតំណាងស្ថាប័នទាំងពីរ។ លោកស្រីបន្តថា ក្រសួងមហាផ្ទៃបានឱ្យពលរដ្ឋត្រឡប់ទៅផ្ទះវិញ ដោយមិនបានសន្យាពីថ្ងៃកំណត់ ដែលនឹងផ្ដល់លទ្ធផលនៃការប្រជុំនោះឡើយ។ តែយ៉ាងណាលោកស្រីថា ពួកលោកស្រីនឹងមិនត្រឡប់ទៅខេត្តវិញជាដាច់ខាត លុះត្រាតុលាការដោះលែងលោក ថេង សាវឿន និងសហការីពីរនាក់ទៀតចេញពីពន្ធនាគារដោយឥតលក្ខខណ្ឌ។
លោកស្រី ជុ ស្រីនៅ៖ «ម្សិលមិញពួកខ្ញុំបានធ្វើក្បួនដង្ហែពីវត្តសាមគ្គីរង្សីមកក្រសួងមហាផ្ទៃ ដែរ តែក្រសួងមហាផ្ទៃអត់ទាន់ឱ្យដំណឹងពី(ការប្រជុំ) ថ្ងៃទី២១ហ្នឹង ដោយសារតែអត់ទាន់បញ្ជូនទៅថ្នាក់លើ ដើម្បីឱ្យតុលាការនៅរតនគិរីដោះលែងសហការីបីរូបហ្នឹង»។
ប្រជាពលរដ្ឋជាង ៣រយនាក់ រួមមានកសិករ សកម្មជនដីធ្លី បានដើរដោយថ្មើរជើងប្រមាណ៧គីឡូម៉ែត្រ ពីវត្តសាមគ្គីរង្សី ឆ្ពោះទៅក្រសួងមហាផ្ទៃ។ នៅជាប់នឹងរបងក្រសួងមហាផ្ទៃ ដែលបិទស្លាកអរគុណសន្តិភាព ប្រជាពលរដ្ឋដែលមកតវ៉ា ភាគច្រើនជាស្ត្រីដែលមានវ័យចំណាស់ នាំគ្នាអង្គុយទទូរកន្សែង ពាក់មួក នៅក្រោមកម្ដៅថ្ងៃដើម្បីរង់ចាំការឆ្លើយតបពីមន្ត្រីក្រសួងមហាផ្ទៃ។ ពួកគាត់ខ្លះលើករូបថតលោក ថេង សាវឿន និងសហការីទាំង២ រីឯអ្នកខ្លះទៀត លើកបដាដែលសរសេរលើសម្បកកេះ ដែលភ្ជាប់ជាមួយសារស្នើឱ្យដោះលែងអ្នកទាំង៣។ ក្នុងនោះ មានពលរដ្ឋមួយចំនួនដួលសន្លប់ និងបញ្ជូនទៅមន្ទីរពេទ្យ និងខ្លះទៀតខ្យល់គរ ក្នុងនោះក៏មានស្ត្រីសរសៃខ្ចី បីកូនតូចមកតវ៉ាផងដែរ។
ពលរដ្ឋម្នាក់ទៀតមកពីសហគមន៍ ១៩៧គ្រួសារ នៅខេត្តកោះកុង លោកស្រី ដេត ហួ ឱ្យដឹងថា លោកស្រីនៅតែបន្តការទាមទារឱ្យដោះលែងលោក ថេង សាវឿន និងសហការី២នាក់ទៀត បើទោះបីការធ្វើដំណើរមកតវ៉ានៅរាជធានីភ្នំពេញជួបការលំបាកយ៉ាងណាក្ដី។ លោកស្រីបញ្ជាក់ថា លោក ថេង សាវឿន និងក្រុមការងាររបស់លោកជាមនុស្សស្អាតស្អំ មានទឹកចិត្តជួយកសិករខ្មែរ និងគ្មានបំណងញុះញង់ ឬធ្វើបដិវត្តប្រឆាំងរដ្ឋាភិបាលនោះទេ។
លោកស្រី ដេត ហួ៖ «ចាស! ពួកខ្ញុំនៅតែអង្គុយរង់ចាំដដែល រង់ចាំនៅហ្នឹងរហូត។ ហើយមកដល់ទីក្រុងភ្នំពេញនេះយើងរងទុក្ខវេទនាប្រឈមនឹងអត់មានខោអាវស្លៀក ហូបអត់គ្រប់គ្រាន់ ធម្មតាយើងអ្នកអត់អ្នកក្រ។ តែយ៉ាងណាយើងនៅតែតស៊ូៗដល់បានលោកទាំងបីចេញមកវិញ»
កាលពីថ្ងៃទី២៣ ឧសភា អ្នកនាំពាក្យសាលាដំបូង និងអយ្យការអមសាលាដំបូងខេត្តរតនគិរី បានចេញសេចក្ដីថ្លែងការណ៍ដោយសន្មតថា ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន និងសហការីរបស់លោក បានលួចជួបជុំគ្នានៅខេត្តរតនគិរី កាលពីថ្ងៃ១៣ និង១៤ ឧសភា ដោយមានខ្លឹមសារក្នុងគោលដៅនយោបាយ ញុះញង់ឱ្យកសិករបះបោរ ឈានទៅដល់ការផ្ដួលរំលំរដ្ឋាភិបាល។ តំណាងអយ្យការខេត្តបានបើកការស៊ើបសួរទៅលើអង្គហេតុ លើលោក ថេង សាវឿន លោក ញ៉ិល ភាព លោក ថាន់ ហាច និងអ្នកស្រាវជ្រាវម្នាក់ទៀត គឺលោកបណ្ឌិត ចាន់ វិបុល ក្រោមបទចោទ រួមគំនិតក្បត់ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៥៣ និង៤៩៥ នៃក្រមព្រហ្មទណ្ឌ។ តុលាការបានសម្រេចឃុំខ្លួនលោក ថេង សាវឿន និងសហការីពីរនាក់ទៀតបណ្ដោះអាសន្ននៅពន្ធនាគារខេត្តរតនគិរី។
ទាក់ទិនរឿងនេះ អ្នកនាំពាក្យអយ្យការអមសាលាដំបូងខេត្តរតនគិរី លោក កែវ ភក្ដី បញ្ជាក់ថា លោកបណ្ឌិត ចាន់ វិបុល ពិតជាមានឈ្មោះពាក់ព័ន្ធជាមួយលោក ជា សាវឿន និងសហការី២នាក់ទៀត ពីបទរួមគំនិតក្បត់ និងញុះញង់បង្កឱ្យមានភាពវឹកវរដល់សន្តិសុខសង្គម ពិតប្រាកដមែន។ តែយ៉ាងណា លោកបន្តថា រហូតមកដល់ពេលនេះចៅក្រមស៊ើបសួរ មិនទាន់មានវិធានការតាមនីតិវិធី ឬចេញដីកាកោះហៅទៅលើលោក ចាន់ វិបុល នៅឡើយទេ។
លោក កែវ ភក្ដី៖ «ពាក់ព័ន្ធជាមួយនឹងការចាប់ខ្លួន អត់ទាន់មាននីតិវិធីយ៉ាងម៉េចទេ ព្រោះចៅក្រមស៊ើបសួរគាត់ទើបតែចាប់ផ្ដើមនីតិវិធី ហើយក៏បានឃុំខ្លួនមនុស្សតែ៣នាក់ទេ គឺអត់មានលោក ចាន់ វិបុល ទេ»។
ទាក់ទងទៅនឹងការចាប់ខ្លួនលោក ថេង សាវឿន និងសហការី២នាក់ទៀតរបស់លោកនេះ ក្រុមអង្គការ សង្គមស៊ីវិល សហជីព និងសមាគមចំនួន៥៨ ស្ថាប័ន នៅថ្ងៃទី២៤ ឧសភា បានចេញសេចក្ដីថ្លែងការណ៍រួមគ្នា ស្នើឱ្យដោះលែង និងទម្លាក់ចោលការចោទប្រកាន់ ទៅលើពួកលោកទាំង៣នាក់។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា យល់ឃើញថា ការប្រមូលផ្ដុំតវ៉ារបស់ប្រជាពលរដ្ឋនេះ គឺជាសក្ខីកម្មមួយ ដែលអាចបញ្ជាក់ថា លោក ថេង សាវឿន លោក ញ៉ិល ភាព និងលោក ថាន់ ហាច មិនពាក់ព័ន្ធនឹងការញុះញង់ដូចការចោទប្រកាន់របស់តុលាការនោះទេ។ លោកបន្តថា តុលាការគួរតែស្ដាប់ហេតុផលរបស់ប្រជាពលរដ្ឋ ដែលជាសាក្សីរស់ទាំងជាង ៣រយនាក់នេះដើម្បីផ្ដល់យុត្តិធម៌ក្នុងសង្គម និងដោះលែងថ្នាក់ដឹកនាំពួកគាត់ឱ្យមានសេរីភាពឡើងវិញ។
លោក នី សុខា៖ «សកម្មភាពរបស់អង្គការលោក ថេង សាវឿន ធ្វើហាក់ដូចគ្មានអ្វីដែលជាការរំលោភបំពានទៅលើផ្លូវច្បាប់ទេ។ អ៊ីចឹងយើងស្នើឱ្យអាជ្ញាធរ ជាពិសេសតុលាការ ពិចារណាឱ្យបានដិតដល់ក្នុងបញ្ហាអស់នេះ។ ដំណោះស្រាយ ខ្ញុំគិតថា មានតែទៅតាមផ្លូវច្បាប់ដែលតុលាការគួរតែធ្វើការពិចារណាឡើងវិញទេ ដើម្បីឱ្យជួយសម្រួលទៅដល់អារម្មណ៍របស់ប្រជាពលរដ្ឋក្នុងការដែលប្រជាពលរដ្ឋឡើងមកតវ៉ានេះ»។
ទាក់ទងទៅនឹងការចាប់ខ្លួនលោក ថេង សាវឿន លោក ញ៉ិល ភាព និងលោក ថាន់ ហាច នេះ ប្រជាពលរដ្ឋ និងសកម្មជនដីធ្លី អះអាងថា ពួកគាត់នឹងនៅតវ៉ារហូតដល់តុលាការដៅលែងលោក ថេង សាវឿន និងសហការីទាំង២ ឱ្យមានសេរីភាពឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
- ម្ចាស់អាជីវកម្មទាំងខ្នាតតូច និងខ្នាតធំកំពុងជួបវិបត្តិបង្វិលសាច់ប្រាក់មិនទាន់
- មិនមានភស្តុតាងបញ្ជាក់ថា លោក សម រង្សី ត្រូវបណ្ដេញចេញពីម៉ាឡេស៊ី ទេ