មន្ត្រីសង្គមស៊ីវិល និងអ្នកច្បាប់ រិះគន់អាជ្ញាធររដ្ឋាភិបាលកម្ពុជា ថា ការចាប់ខ្លួនអ្នកបង្ហោះ សារលើបណ្ដាញសង្គមហ្វេសប៊ុក(Facebook) ពាក់ព័ន្ធនឹងជំងឺកូវីដ-១៩នោះ មិនមែនជាការអនុវត្ត ច្បាប់នោះទេ។ ចំណែកស្នងការនគរបាលក្រុងភ្នំពេញបកស្រាយថា ការចាប់ខ្លួននេះ ដោយសារតែជននោះបញ្ចេញមតិប៉ាតណាប៉ាតណីធ្វើឲ្យពលរដ្ឋភ័យខ្លាច។
មន្ត្រីសង្គមស៊ីវិល និងអ្នកច្បាប់លើកឡើងថា ការចាប់ និងឃុំខ្លួនពលរដ្ឋ ដែលគ្រាន់តែបញ្ចេញមតិ ពាក់ព័ន្ធនឹងជំងឺកូវីដ-១៩ គឺជាការអនុវត្តផ្ទុយពីច្បាប់ និងធ្វើទៅតាមអារម្មរណ៍ ដែលនាំឲ្យមានការ រំលោភសិទ្ធិមនុស្សធ្ងន់ធ្ងរ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូលោកអំ សំអាត មានប្រសាសន៍ ថា អាជ្ញាធរ គ្មានមូលដ្ឋានគ្រប់គ្រាន់ដើម្បីចាប់ខ្លួនពលរដ្ឋឡើយ ព្រោះផ្អែកតាមខ្លឹមសារ ដែលពួកគេ បានបង្ហោះនៅលើហ្វេសប៊ុក គឺគ្រាន់តែជាការបញ្ចេញមតិដែលធានាដោយច្បាប់ និងពុំមានបង្កឲ្យ មានភាពចលាចលឬភាពវឹកវរអ្វីនោះទេ។ លោក ស្នើសុំឲ្យអាជ្ញាធរ បញ្ឈប់ជាបន្ទាន់នូវវិធានការចាប់ខ្លួនពលរដ្ឋ ហើយគួរតែពង្រឹងវិធានការផ្សព្វផ្សាយអប់រំឲ្យពលរដ្ឋបានយល់ដឹងអំពីគ្រោះថ្នាក់និងរបៀបការពារកុំឲ្យឆ្លងជំងឺកូវីដ-១៩ ឲ្យមានប្រសិទ្ធិភាព៖« យើងដឹងហើយថា ជំងឺកូវីដនេះ មានការព្រួយបារម្ភសម្រាប់ពិភព លោក ដូច្នេះពលរដ្ឋយើងនៅពេលដែលគាត់មិនបានយល់ដឹងច្បាស់លាស់ គឺការ ព្រួយបារម្ភ និង ការបញ្ចេញមតិរបស់គាត់ អាចនឹងខុស ។អ៊ីចឹងការចាប់ខ្លួននិងការចោទប្រកាន់នេះ ជូនកាលវាខុស និងអាចមិនមានមូលដ្ឋានគ្រប់គ្រាន់ដោយសារតែយើងមិនបានអប់រំនិង ផ្សព្វផ្សាយឲ្យពលរដ្ឋបាន ដឹងជាមុនទាក់ទងនឹងបញ្ហានេះ កុំឲ្យគាត់មានការបារម្ភហួស និងការបញ្ចេញមតិរបស់គាត់ទៅ អាច នឹងធ្វើឲ្យអាជ្ញាធរមានការយល់ច្រឡំថា ជាការញុះញង់ ឬការបង្កចលាចលអី » ។
ការលើកឡើងនេះបន្ទាប់ពីកម្លាំងនគរបាលរាជធានីភ្នំពេញបានចាប់ខ្លួនបុរសម្នាក់ឈ្មោះ កូយ សំ អាត កាលពីថ្ងៃទី៩ខែមីនាដោយចោទពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមតាមមាត្រា ៤៩៤ និង មាត្រា ៤៩៥ នៃក្រមព្រហ្មទណ្ឌដែលអាចប្រឈមជាប់ពន្ធនាគារពី ៦ខែ ដល់ ២ឆ្នាំ។ ការចាប់ខ្លួននេះ ក្រោយពីនគរបាលក្រុងភ្នំពេញ ពិនិត្យឃើញថា លោក កូយ សំអាត បានបង្ហោះហ្វេសប៊ុករបស់ខ្លួនដែលដាក់ឈ្មោះថា Tep Visal។ ក្នុងវីឌីអូឃ្លីបនេះ លោក កូយ សំអាត បាននិយាយថា ពលរដ្ឋកម្ពុជាគួរតែអរគុណវៀតណាម ដែលប្រកាសថា កម្ពុជា មានជំងឺកូវីដ-១៩កុំអីពលរដ្ឋខ្មែរទូទាំងប្រទេសអត់ដឹងថា ប្រទេសកម្ពុជា មានកូវីដ-១៩ ទេ។
ស្នងការនគរបាលរាជធានីភ្នំពេញ លោក ស ថេត ប្រាប់អាស៊ីសេរីថា បុរសម្នាក់ឈ្មោះ កូយ សំអាត ឬហៅថា ទេព វិសាល ត្រូវបានបញ្ជូនទៅសាលាដំបូងរាជធានីភ្នំពេញរួចហើយ នៅរសៀលថ្ងៃទី១០ ខែមីនា ដើម្បីអនុវត្តតាមនីតិវិធីច្បាប់ ប៉ុន្តែលោកមិនទាន់ដឹងថា តុលាការសម្រេចបែបណានៅឡើយទេ។ ទោះជាយ៉ាងណា លោកអះអាងថា ការចាប់ខ្លួននេះ គឺមិនមែនជាការរំលោភសិទ្ធិ ឬធ្វើបាបពលរដ្ឋនោះទេ ប៉ុន្តែលដោយសារតែបុរសរូបនោះ ចេះតែបង្ហោះសារ លើហ្វេសប៊ុកផ្ដេសផ្ដាសបង្កឲ្យពលរដ្ឋដទៃទៀតភ័យខ្លាច៖« នៅឲ្យស្ងៀមទៅវាថី ចង់ល្បីស្អី វាមានទាន់ស្អី ក៏ផ្អើលឆោឡោមេះ ធ្វើឲ្យប្រជាពលរដ្ឋគេភ័យខ្លាច ។ ដូច្នេះ មានតែអនុវត្តតាមច្បាប់ហើយ ។ វាមិនមែនជាការបញ្ចេញមតិ អីទេ បញ្ចេញយ៉ាងម៉េច ឥឡូវយើងគិតមើលៗ ថា ឥឡូវនេះ វាចូលជាបទល្មើសញុះញង់ហើយ ។ នៅឲ្យស្ងៀមទៅវាថី មិនមែនបញ្ចេញមតិទេ » ។
អាស៊ីសេរី មិនអាចសុំការបញ្ជាក់អំពីប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ លោក អ៊ី រិន្ទ និងព្រះរាជអាជ្ញានៃអយ្យការសាលាដំបូងរាជធានីភ្នំពេញ លោក កែវ សុធា បានទេ ដោយទូរស័ព្ទចូលពុំមានអ្នកទទួល។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ឱ្យអាស៊ីសេរីដឹងថា គិតត្រឹមថ្ងៃទី១០ខែមីនាអាជ្ញាធរបានឃាត់ខ្លួនមនុស្សចំនួនពីរនាក់ ដែលលោកថាផ្សព្វផ្សាយព័ត៌មានមិនពិតរឿងជំងឺកូវីដ-១៩ ក្នុងនោះមានបុរសម្នាក់រស់នៅភ្នំពេញឈ្មោះ កូយ សំអាត ឬទេព វិសាល នេះ ហើយត្រូវបានបញ្ជូនទៅតុលាការនិងស្ត្រីម្នាក់ទៀតនៅខេត្តសៀមរាបប៉ុន្តែអាជ្ញាធរបានអប់រំ និងដោះលែងវិញ។
រីឯអ្នកច្បាប់មួយរូប គឺលោក មេធាវី សំ សុគង់ មានប្រសាសន៍ថា សារដែលពលរដ្ឋបាននិយាយ និងបង្ហោះលើបណ្តាញសង្គមកន្លងទៅពាក់ព័ន្ធនឹងជំងឺកូវីដ-១៩ គឺមិនអាចចាត់ចូលក្នុងបទ ល្មើសញុះញង់នោះទេ គឺគ្រាន់តែជាបញ្ចេញមតិស្របតាមច្បាប់ចំពោះអ្វីដែលពួកគេបានឃើញ និងព្រួយបារម្ភ។ លោកយល់ថា អាជ្ញាធរគួរតែទទួលយកព័ត៌មាន ឬអ្វីដែលពលរដ្ឋលើកឡើង ហើយធ្វើការស្រាវជ្រាវ ប្រសិនបើការលើកឡើងទាំងនោះមិនពិតទេ គឺអាជ្ញាធរ អាចបកស្រាយពន្យល់ឲ្យច្បាស់ ប៉ុន្តែក្នុងករណីការលើកឡើងនោះ គឺជាការពិត គឺអាជ្ញាធរអាចមានវិធានការ ការពារ និងទប់ស្កាត់បានទាន់ពេលវេលា។ អ្នកច្បាប់រូបនេះ បន្តថា ប្រសិនបើអាជ្ញាធរ ប្រើប្រាស់ ក្រមព្រហ្មទណ្ឌសម្រាប់ចោទ និងផ្ដន្ទាទោសពលរដ្ឋបែបនេះគឺនឹងធ្វើឲ្យប៉ះពាល់ដល់សិទ្ធិរបស់ពួកគេដែលធានាដោយច្បាប់៖ « សេរីភាពបញ្ចេញមតិនេះ គឺជាសិទ្ធិមួយសំខាន់នៅក្នុងសង្គម ប្រជាធិបតេយ្យ ឬប្រទេសដែលប្រកាន់នូវនីតិរដ្ឋ ។ ជាពិសេស សេរីភាពបញ្ចេញមតិនេះ ធានាដោយ រដ្ឋធម្មនុញ្ញ និងកតិកាសញ្ញាស្ដីពីសិទ្ធិពលរដ្ឋ និងសិទ្ធិនយោបាយ » ។
ពាក់ព័ន្ធនឹងករណីនេះ មន្ត្រីសង្គមស៊ីវិល និងអ្នកច្បាប់យល់ថា អាជ្ញាធររដ្ឋាភិបាល គួរតែទម្លាក់ចោលការចោទប្រកាន់ និងដោះលែងពលរដ្ឋ ដែលត្រូវបានចាប់ខ្លួននោះឲ្យមានសេរីភាពវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។