ក្រុមបេក្ខជនតវ៉ាលទ្ធផលសិស្សចៅក្រម ជំនាន់ទី១០ ចំនួន ៤នាក់ នាំគ្នាដាក់ញត្តិស្វែងរកកិច្ចអន្តរាគមន៍ ពីស្ថាប័នព្រះមហាក្សត្រ ព្រឹទ្ធសភា រដ្ឋសភា និងគណៈរដ្ឋមន្ត្រី នៅព្រឹកថ្ងៃទី១១ កុម្ភៈ។
ក្នុងញត្តិនោះ ក្រុមបេក្ខជនតវ៉ា បានរកឃើញចំណុចមិនប្រក្រតី ក្នុងការប្រឡងសិស្សចៅក្រម ចំនួន ១១ចំណុច ចាប់តាំងពីវិញ្ញាសាសរសេរ រហូតដល់វិញ្ញាសាផ្ទាល់មាត់ និងការប្រកាសលទ្ធផល។ ញត្តិនោះ ក៏មានការរៀបរាប់ពីវិធីសាស្ត្រ នៃការសូកលុយ ក្នុងការប្រឡងសិស្សចៅក្រមជំនាន់ទី១០ ក្នុងញត្តិទាំងនោះដែរ ដោយអំពើពុករលួយកើតឡើងជាប្រព័ន្ធ ក្រោមបញ្ជាផ្ទាល់របស់រដ្ឋមន្ត្រីក្រសួងយុត្តិធម៌ និងមានមន្ត្រីក្រសួងយុត្តិធម៌ ចំនួន ៥នាក់ ជាអ្នកធ្វើសកម្មភាពទទួលលុយសំណូក។ លុយដែលសូកសម្រាប់តំណែងសិស្សចៅក្រម មានតម្លៃពីប្រាំមួយម៉ឺន (៦០.០០០) ដុល្លារអាមេរិក ដល់ដប់ប្រាំម៉ឺន (១៥០.០០០) ដុល្លារ។
បេក្ខជនម្នាក់ ក្នុងចំណោម ៤នាក់ លោក គង់ ប៊ុនរិទ្ធិ បញ្ជាក់ថា ការដាក់ញត្តិទៅស្ថាប័នកំពូលរបស់ជាតិនេះ ដើម្បីស្វែងរកតម្លាភាព ក្នុងលទ្ធផលប្រឡង។ លោកឲ្យដឹងថា ស្ថាប័នកំពូលទាំង ៤ បាន ទទួលយកញត្តិរបស់ពួកលោកហើយ និងសន្យាបញ្ជូនញត្តិនោះ ទៅដល់ប្រធានស្ថាប័ន ដើម្បីពិនិត្យមើល។
លោក គង់ ប៊ុនរិទ្ធិ ឲ្យដឹងថា ក្រុមលោក នឹងផ្អាកគម្រោងដាក់ញត្តិ ទៅស្ថានទូតបរទេសប្រចាំកម្ពុជាវិញ ដោយសារស្ថានទូត មិនហ៊ានលូកដៃជ្រៀតជ្រែកកិច្ចការផ្ទៃក្នុងកម្ពុជា។ តែពួកគេ នឹងបន្តដាក់ញត្តិ ទៅទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ឬអង្គការចៃកា (JICA = Japan International Cooperation Agency) វិញ ខណៈញត្តិទាមទារនេះ បានដាក់ទៅសង្គមស៊ីវិល ក្នុងប្រទេសកម្ពុជា និងឧត្ដមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជា រួចហើយ កាលពីដើមខែកុម្ភៈ។
ទោះយ៉ាងណា គណៈកម្មការរៀបចំការប្រឡង នាយកសាលាភូមិន្ទចៅក្រម តំណាងក្រសួងយុត្តិធម៌ ក្រុមប្រឹក្សាជាតិប្រឆាំងអំពើពុករលួយ និងបេក្ខជនជាប់ស្ថាពរ សិស្សចៅក្រមចំនួន ៥៥នាក់ បានចេញមុខការពារការប្រឡងសិស្សចៅក្រមជំនាន់ទី១០ ថា ត្រឹមត្រូវ និងគ្មានភាពប្រក្រតីឡើយ។
ទន្ទឹមនឹងការអះអាងនេះ លោក គង់ ប៊ុនរិទ្ធិ កំពុងជាប់បណ្ដឹងចំនួន២ លើបទចោទចំនួន៣ គឺបទបរិហារកេរ្តិ៍ ជាសាធារណៈ បរិហារបង្កាច់កេរ្តិ៍ និងបទញុះញង់ឲ្យមានការរើសអើង នៅតុលាការក្រុងភ្នំពេញ។ លោកនឹងត្រូវឡើងតុលាការ នៅថ្ងៃទី១៤ កុម្ភៈ ដើម្បីបំភ្លឺអំពីបណ្ដឹងទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។