សវនាការជម្រះក្តីលោក កឹម សុខា ថ្ងៃទី២ នៃសប្ដាហ៍ទី៤ ត្រូវជាថ្ងៃទី៦ ខែកុម្ភៈនេះ តុលាការបានចាក់វីដេអូចំនួន៨ នៃភស្តុតាងថ្មីចំនួន ១៦ចំណុច ដែលមេធាវីការពារក្តីលោក កឹម សុខា ដាក់បន្ថែម។ វីដេអូដែលចាក់បង្ហាញនេះជាសេចក្ដីថ្លែងសាធារណៈរបស់លោក កឹម សុខា ពេលចុះទៅមូលដ្ឋាន ដែលខ្លឹមសារនៃវីដេអូរនោះគឺការជំរុញឱ្យពលរដ្ឋទៅបោះឆ្នោត ការធ្វើនយោបាយមិនយកខ្មែរណាជាសត្រូវ។
សហមេធាវីការពារក្តីលោក កឹម សុខា គឺលោក ចាន់ ចេន ថ្លែងប្រាប់អ្នកសារព័ត៌មានក្រោយចប់សវនាការថា ការដេញដោលសំខាន់ៗ ក្នុងសវនាការថ្ងៃនេះ គឺផ្តោតលើខ្លឹមសារវីដេអូ និងជជែកលើភស្តុតាងអនាមិករបស់តំណាងអយ្យការដែលជារូបថតឯកជនរបស់កូនស្រីលោក កឹម សុខា យកចេញពីហ្វេសប៊ុកផេកមួយឈ្មោះថា កូនខ្មែរ។ លោកមេធាវីយល់ថា ភស្តុតាងអនាមិកបែបនេះគ្មានតម្លៃគតិយុត្តិសម្រាប់ធ្វើការចោទប្រកាន់លើលោក កឹម សុខា នោះទេ៖ «គាត់បានបញ្ជាក់ច្បាស់នៅក្នុងវីដេអូដែលខ្ញុំបានកត់សម្គាល់គឺថា គាត់មិនត្រូវការឱ្យឈាមខ្មែរហូរទៀតទេ អត់យកខ្មែរណាធ្វើសត្រូវ អត់គុំកួន អត់សងសឹក អាហ្នឹងដែលខ្ញុំចាប់អារម្មណ៍បណ្ដាវីដេអូដែលបានដាក់ជូនតុលាការ»។
ប្រធានគណបក្សសង្គ្រោះជាតិ លោក កឹម សុខា បានផ្តល់បទសម្ភាសដល់អ្នកសារព័ត៌មានមុនពេលទៅតុលាការថា តំណាងអយ្យការអះអាងថា សមត្ថកិច្ចចាប់ខ្លួនលោកដោយសំអាងលើពាក្យសម្តីរបស់លោក ដែលបានថ្លែងកាលពីឆ្នាំ២០១៣ ប៉ុន្តែសមត្ថកិច្ចទើបចាប់ខ្លួនលោកនៅឆ្នាំ២០១៧ ដោយចោទប្រកាន់ថា ជាបទល្មើសជាក់ស្ដែង។ លោកថា ទង្វើបែបនេះជាការរំលោភនីតិវិធី ដូច្នេះលោកជឿជាក់ថា តុលាការនឹងផ្តល់យុត្តិធម៌ដល់លោក៖ «បើជាក់ស្ដែងកាលពីឆ្នាំ២០១៣ ម៉ិចក៏មិនចាប់អញ្ចឹងហើយគ្រាន់តែគាត់និយាយប៉ុណ្ណឹងមកឃើញថា រំលោភនីតិវិធីតាំងពីចាប់មកហើយ អញ្ចឹងអង្គហេតុត្រូវមានភស្តុតាងថាខ្ញុំបានប្រព្រឹត្តិឃើញសកម្មភាព ប៉ុន្តែពេលចាប់ខ្ញុំចាប់កណ្ដាលយប់ខ្ញុំកំពុងដេក មានកំពុងប្រព្រឹត្តិឯណា ?»។
ក្នុងសវនាការនៃសប្ដាហ៍ទី៤ នេះ តុលាការទុកកៅអីមួយចំនួនសម្រាប់ឱ្យអ្នកសារព័ត៌មាន និងតំណាងអង្គការសង្គមស៊ីវិល ហើយក៏មានតំណាងអង្គទូតនៃប្រទេសប្រជាធិបតេយ្យមួយចំនួនចូលតាមដានស្ដាប់សវនាការដោយផ្ទាល់ក្នុងបន្ទប់សវនាការផងដែរ។
អ្នកនាំពាក្យសមាគមអាដហុកដែលឃ្លាំមើលដំណើរការក្តីនេះដោយផ្ទាល់ក្នុងសវនាការ សង្កេតឃើញថា ទិដ្ឋភាពនៅក្នុងតុលាការគឺចៅក្រមជំនុំជម្រះអនុញ្ញាត ឱ្យភាគីមេធាវីការពារក្តីលោក កឹម សុខា មេធាវីតំណាងរដ្ឋាភិបាល និងតំណាងអយ្យការជជែកគ្នាយ៉ាងតឹងសរសៃកជាខ្លាំងដែលជាការជជែកគ្នាលើរឿងដដែលៗ។ លោកបន្តថា តំណាងអយ្យការបានយកភស្តុតាងមិនរឹងមាំ និងគ្មានភាពច្បាស់លាស់ធ្វើការដេញដោល ដែលករណីនេះធ្វើឱ្យប៉ះពាល់ដល់សិទ្ធិសេរីភាពលោក កឹម សុខា៖ «គួរតែភស្តុតាងមួយមានស្ថានភាពត្រឹមត្រូវជាភស្តុតាងដែលមានភាពច្បាស់លាស់ជាដើម ពីព្រោះមិនធម្មតាទេ បើយើងចង់ចោទប្រកាន់បុគ្គលណាម្នាក់ថា បានប្រព្រឹត្តិល្មើសមាត្រាច្បាប់គួរតែយើងមានភស្តុតាងឱ្យដឹងរឹងមាំឱ្យត្រឹមត្រូវហើយមិនគួរយើងចាប់យកភស្តុតាងគ្រាន់តែជាតម្រុយៗ»។
មន្ត្រីសង្គមស៊ីវិលដដែលសង្កេតឃើញទៀតថា នៅក្រៅបន្ទប់សវនាការឯណោះវិញ គឺសមត្ថកិច្ចមានការរឹតបន្តឹងនិងហាមប្រាមអ្នកសារព័ត៌មានមិនឱ្យថតរូបក្នុងបរិវេណតុលាការ។
តំណាងអយ្យការយកឯកសារអនាមិកពីបណ្ដាញសង្គមហ្វេសប៊ុកឈ្មោះ កូន ខ្មែរ ធ្វើជាប្រភពភស្តុតាងក្នុងការសួរដេញដោលដាក់បន្ទុកលើលោក កឹម សុខា។
តំណាងអយ្យការក៏បានយករូបថតមួយចំនួន ក្នុងនោះមានរូបថតមួយសន្លឹកដែលមានកូនស្រីច្បងរបស់លោក កឹម សុខា គឺកញ្ញា កឹម មនោវិទ្យា និងសមាជិកគ្រួសារលោកអង្គុយទទួលទានអាហារជាមួយជនបរទេសមួយរូប ដើម្បីចោទសួរលោក កឹម សុខា។
មេធាវីខាងរដ្ឋាភិបាលគឺលោក គី តិច នៅក្នុងសប្ដាហ៍នេះមិនបានផ្តល់បទសម្ភាសដល់អ្នកសារព័ត៌មានដូចលើកមុនៗទេ។
ក្រោយដេញដោលដែលប្រើរយៈពេលពេញមួយព្រឹកថ្ងៃទី៦ ខែកុម្ភៈ តុលាការបានបិទបញ្ចប់ការសាកសួរទាក់ទងនឹងការបង្កើតមជ្ឍមណ្ឌលសិទ្ធិមនុស្ស និងគណបក្សសិទ្ធិមនុស្សដែលលោក កឹម សុខា ធ្លាប់ដឹកនាំកាលពីឆ្នាំ២០០៧ដល់ឆ្នាំ២០១២។ ចៅក្រមជំនុំជម្រះលោក កុយ សៅ ប្រកាសថា នៅសប្ដាហ៍ក្រោយតុលាការនឹងជជែកទាក់ទងអង្គហេតុសំខាន់ៗ បីដំណាក់កាលគឺការបង្កើត និងរចនាសម្ពន្ធគណបក្សសង្គោះជាតិ អង្គហេតុមុនការបោះឆ្នោតឆ្នាំ២០១៣ និងអង្គហេតុក្រោយឆ្នាំ២០១៣ រហូតឈានដល់ការចាប់ខ្លួនលោក កឹម សុខា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។