តុលាការ​ក្រុង​ភ្នំពេញ​គ្រោង​ប្រកាស​សាលក្រម​លើ​សំណើ​សុំ​នៅ​ក្រៅ​ឃុំ​របស់ យុវជន គង់ រ៉ៃយ៉ា នៅ​ថ្ងៃ​សុក្រ​នេះ

ដោយ វ៉ែន សុមេធ
2019-11-26
អ៊ីម៉ែល
មតិ
Share
បោះពុម្ព
សកម្មជន​គណបក្សសង្គ្រោះជាតិ លោក គង់ រ៉ៃយ៉ា។
សកម្មជន​គណបក្សសង្គ្រោះជាតិ លោក គង់ រ៉ៃយ៉ា។
បណ្ដាញ​សង្គម​ហ្វេសប៊ុក

សាលាដំបូង​រាជធានី​​ភ្នំពេញ គ្រោង​ប្រកាស​សាល​ក្រម​ករណី​សុំ​នៅ​ក្រៅ​ឃុំ​របស់​យុវជន កែម ឡីនិយម លោក គង់ រៃយ៉ា នៅ​ចុង​សប្ដាហ៍​នេះ បន្ទាប់​ពី​បញ្ចប់​សវនាការ​នៅ​រសៀល ថ្ងៃទី២៦ ខែ​វិច្ឆិកា។ ភរិយា និង​មន្ត្រី​សង្គម​ស៊ីវិល សង្ឃឹម​ថា តុលាការ​នឹង​អនុញ្ញាត​ឲ្យ​លោក គង់ រ៉ៃយ៉ា នៅ​ក្រៅ​ឃុំ​បណ្ដោះអាសន្ន​តាម​ការ​ស្នើសុំ។

ក្រោយ​ចំណាយ​ពេល​សវនាការ​អស់​ជិត​ពីរ​ម៉ោង​លើ​សំណើសុំ​នៅ​ក្រៅ​ជុំ​ទី​ពីរ​របស់​យុវជន គង់ រ៉ៃយ៉ា ចៅក្រម​សាលា​ដំបូង​រាជធានី​ភ្នំពេញ អ្នក​ស្រី អ៊ុក រ៉េតគន្ធា សម្រេច​លើកពេល ប្រកាស​សាលក្រម​រឿង​នេះ ទៅ​ថ្ងៃ​ទី២៩ ខែ​វិច្ឆិកា​ខាង​មុខ។

ក្នុង​បន្ទប់​សវនាការ លោក គង់ រ៉ៃយ៉ា បាន​រៀប​រាប់​ប្រាប់​តុលាការ​ថា មូលហេតុ​ដែល​លោក​ត្រូវ​ការ រស់​នៅ​ក្រៅ​ឃុំ​បណ្ដោះអាសន្ន ព្រោះ​លោក​ឈឺ​ឆ្អឹង​ខ្នង និង​មាន​ជំងឺ​ក្រពះ ហើយ​ជា​និស្សិត​ត្រូវ​ការ បន្ត​ការ​សិក្សា​ផង និង​ត្រូវ​រក​ស៊ី​ចិញ្ចឹម និង​ថែ​រក្សា​ម្ដាយ​មេ​ម៉ាយ​ចាស់​ជរា ព្រម​ទាំង​ភរិយា និង​កូនស្រី​ដែល​នៅ​តូច​នៅ​ឡើយ។

ភរិយា​របស់​លោក គង់ រ៉ៃយ៉ា គឺ​លោក​ស្រី សុខ ស្រីនិច សង្ឃឹម​ថា តុលាការ នឹង​អនុញ្ញាត​ឲ្យ​ប្តី​របស់ លោកស្រី នៅ​ក្រៅ​ឃុំ​បណ្ដោះអាសន្ន​តាម​ការ​ស្នើសុំ​ជា​លើក​ទី២ នេះ ព្រោះ​ប្តី​លោក​ស្រី​ជា​មនុស្ស ស្អាតស្អំ មិន​បាន​ប្រព្រឹត្ត​កំហុស​ដូច​ការ​ចោទ​ប្រកាន់​ឡើយ។ ម្យ៉ាងវិញទៀត លោកស្រី ថា អ្នក​ជាប់​ពាក់ព័ន្ធ​នឹង​រឿង​នយោបាយ ត្រូវ​បាន​តុលាការ​ដោះ​លែង​ឲ្យ​នៅ​ក្រៅ​ឃុំ​បណ្ដោះអាសន្ន រួច​អស់​ហើយ នៅ​សល់​តែ​ប្តី​របស់​លោកស្រី និង​មនុស្ស​តិច​តូច​ប៉ុណ្ណោះ៖ «ខ្ញុំ​សង្ឃឹម​ថា តុលាការ នឹង​មេត្តា និង​ដោះ​លែង​ទៅ ព្រោះ​អី​លោក​មេធាវី បាន​ជួយ​ឆ្លើយ​បំភ្លឺ​នៅ​ក្នុង​នេះ និង​លើក​អំពី​ហេតុផល​របស់​ស្វាមី​ខ្ញុំ​ច្រើន​ដង​មែន​ទែន ហើយ គាត់​បាន​សំណូមពរ​លោកស្រី​ដែល​ជា​ចៅក្រម​នេះ ពិនិត្យ​ដោះ​លែង​ឡើង​វិញ។ ការ​សវនាការ​នេះ គឺ​ក្រោយ​ការ​ស្នើ​របស់​សម្ដេច ហ៊ុន សែន ដែល​បាន​ប្រកាស​កាល​ពី​ថ្ងៃ​ទី១៤ វិច្ឆិកា​ថា ឲ្យ​តុលាការ​បន្ធូរ​បន្ថយ»

តុលាការ​គ្រប់​ជាន់​ថ្នាក់​នៃ​របប​ក្រុង​ភ្នំពេញ ធ្លាប់​បដិសេធ​សំណើ​សុំ​នៅ​ក្រៅ​ឃុំ​របស់​យុវជន កែម ឡីនិយម រូប​នេះ​ មួយ​ជុំ​រួច​មក​ហើយ​ នា​ពេល​កន្លង​មក ក្រោម​ហេតុផល​ថា គ្មាន​លក្ខខណ្ឌ​សមរម្យ ប៉ុន្តែ​តុលាការ​កំពូល ទើប​តែ​សម្រេច​ដោះ​លែង​ឲ្យ​យុវជន កែម ឡីនិយ ម្នាក់​ទៀត គឺ​លោក សួង នាគព័ន្ធ នៅ​ក្រៅ ឃុំ​បណ្ដោះអាសន្ន​កាល​ពី​ថ្ងៃ​ទី១៥ ខែ​វិច្ឆិកា ពោល​គឺ​មួយ​ថ្ងៃ​ក្រោយ​ពី​មេ​ដឹក​នាំ​របប​ក្រុង​ភ្នំពេញ លោក ហ៊ុន សែន បញ្ជា​ឲ្យ​តុលាការ​ដោះ​លែង​អ្នក​ទោស​នយោបាយ​ទាំង​អស់ និង​បញ្ឈប់​ការ​ធ្វើ​ទុក្ខ បុក​ម្នេញ។

អ្នកនាំពាក្យ​សមាគម អាដហុក លោក ស៊ឹង សែនករុណា មាន​ប្រសាសន៍​ថា តុលាការ​គួរ​តែ​ដោះ លែង​យុវជន គង់ រ៉ៃយ៉ា ឲ្យ​មាន​សេរីភាព​វិញ ដើម្បី​បញ្ចៀស​ការ​រិះគន់។ លោក​ថា ប្រសិន​បើ តុលាការ​បន្ត​ឃុំ​ខ្លួន និង​អូស​បន្លាយ​សំណុំ​រឿង​នេះ គឺ​បង្ហាញ​កាន់​តែ​ច្បាស់​ថា តុលាការ មិនបាន អនុវត្ត​ឲ្យ​បាន​ត្រឹម​ត្រូវ​តាម​ផ្លូវ​ច្បាប់ និង​គ្មាន​ឆន្ទៈ​ធ្វើ​កំណែ​ទម្រង់​ទៅ​លើ​ប្រព័ន្ធ​យុត្តិធម៌​នោះ​ទេ៖ «ក្នុង​ករណី​នេះ​តាំង​ពី​ការ​ចាប់​ខ្លួន​គាត់​មក​ម្លេះ ខាង​អង្គការ​សង្គម​ស៊ីវិល បាន​ចេញ​សេចក្ដី​ថ្លែង​ការណ៍​អំពាវនាវ​ឲ្យ​ទម្លាក់​ចោល​ការ​ចោទ​ប្រកាន់ និង​ដោះ​លែង គាត់​វិញ ហើយ​យើង​នៅ​តែ​មាន​ជំហរ​បែប​នេះ គឺ​ចង់​ឲ្យ​ដោះ​លែង​ពួក​គាត់​ឲ្យ​មាន​សេរីភាព​ឡើង​វិញ។ ការ​ដែល​ចោទ​គាត់ និង​ចាប់​ឃុំ​ក្នុង​បទ​ល្មើស​នេះ វា​អត់​មាន​សក្ដិសម​ទាល់​តែ​សោះ គ្រានតែ គាត់​បោះ​ពុម្ព​អាវ​យឺត និង​ទស្សនៈ​បណ្ឌិត កែម ឡី ថា វា​ខុស​ច្បាប់​អ្វី​ព្រោះ​យើង​ពិនិត្យ​មើល​ថា វា​អត់​មាន​អី​ប៉ះ​ពាល់​ដល់​ផ្លូវ​ច្បាប់​សោះ ព្រោះ​ទស្សនៈ​បណ្ឌិត កែម ឡី បាន​ចែកចាយ​រួច​មក​ហើយ»

សមត្ថកិច្ច​របប​ក្រុង​ភ្នំពេញ បាន​ចាប់​ខ្លួន​លោក គង់ រ៉ៃយ៉ា អាយុ ២៨ឆ្នាំ កាលពី​ថ្ងៃ​ទី៩ ខែ​កក្កដា ក្នុង​ផ្ទះ​ជួល​របស់​គាត់ បន្ទាប់​ពី​យុវជន​រូប​នេះ​បាន​ផ្សព្វផ្សាយ​លក់​អាវយឺត​មាន​រូប និង​ទស្សនៈ​បណ្ឌិត កែម ឡី នៅ​លើ​បណ្ដាញ​សង្គម​ហ្វេសប៊ុក (Facebook) សម្រាប់​ខួប​បី​ឆ្នាំ​នៃ​អំពើ​ឃាតកម្ម​លើ​បណ្ឌិត កែម ឡី។ តុលាការ ​ចោទ​ប្រកាន់​លោក​​ គង់ រ៉ៃយ៉ា ពី​បទ​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍។ មួយ​ថ្ងៃ​បន្ទាប់​មក សមត្ថកិច្ច​បាន​ចាប់​ខ្លួន​លោក សួង នាគព័ន្ធ ដោយ ចោទ​ប្រកាន់​ដូច​លោក គង់ រ៉ៃយ៉ា ដែរ បន្ទាប់​ពី​លោក​ចូលរួម​ដាក់​កម្រង​ផ្កា​គោរព​វិញ្ញាណក្ខន្ធ​បណ្ឌិត កែម ឡី នៅ​បរិវេណ​ស្ថានីយ​ប្រេង​ឥន្ធនៈ កាល់តិច ស្តុប​បូកគោ ដែល​ជា​ទីតាំង​ឃាតកម្ម​បណ្ឌិត កែម ឡី និង​បាន​ចែក​ខិត​ប័ណ្ណ​អំពាវនាវ​កុំ​ឲ្យ​មាន​ការ​សម្លាប់​មនុស្ស​ក្រៅ​ប្រព័ន្ធ​ច្បាប់។

អង្គការ​ជាតិ និង​អន្តរជាតិ បាន​ចេញ​សេចក្ដី​ថ្លែង​ការណ៍​ជា​បន្ត​បន្ទាប់ ដោយ​ចាត់​ទុក លោក គង់ រ៉ៃយ៉ា និង សួង នាគព័ន្ធ ជា​អ្នក​ទោស​មនសិការ និង​អំពាវនាវ​ដល់​អាជ្ញាធរ​កម្ពុជា​ឲ្យ​ដោះ​លែង និង ទម្លាក់​ការ​ចោទ​ប្រកាន់​លើ​អ្នក​ទាំង​ពីរ​នាក់​ជា​បន្ទាន់ និង​ដោយ​ឥត​លក្ខខណ្ឌ។ អង្គការ​ទាំង​នេះ ពិនិត្យ​ឃើញ​ថា ការ​ចាប់​ឃុំ​ខ្លួន​យុវជន កែម ឡីនិយម​ទាំង​ពីរ​នេះ ដោយ​សារ​តែ​ពួក​គេ​អនុវត្ត​សិទ្ធិ បញ្ចេញ​មតិ និង​សិទ្ធិ​ជួប​ជុំ​ដោយ​សន្តិវិធី ស្រប​តាម​ច្បាប់រដ្ឋធម្មនុញ្ញ និង​ច្បាប់​អន្តរជាតិ​ស្តីពី​សិទ្ធិ​មនុស្ស​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល