អាជ្ញាធរ​រង​ការ​រិះគន់​ថា ចាប់​ពលរដ្ឋ​ទាំង​ឈឺ ខណៈ​អ្នក​ទោស​មាន​លុយ​ដេក​ព្យាបាល​នៅ​ក្រៅ​គុក

ដោយ ហេង រស្មី
2020-10-31
Share
គិត ធាង សាត ផា សកម្មជន​ដីធ្លី និង​ជា​អ្នកគាំទ្រ​បក្ស​ប្រឆាំង លោកស្រី សាត ផា (ស្ដាំ) និង​​ឧកញ៉ា គិត ធាង (ឆ្វេង) ម្ចាស់​ក្លឹប​កម្សាន្ត រ៉ក់ (ROCK)។
Photo courtesy

មន្ត្រី​អង្គការ​ផ្នែក​សិទ្ធិមនុស្ស រិះគន់​អាជ្ញាធរ​របប​ក្រុងភ្នំពេញ ដែល​ចាប់​សកម្មជន​ដីធ្លី និង​ជា​អ្នកគាំទ្រ​បក្ស​ប្រឆាំង លោកស្រី សាត ផា ចេញពី​មន្ទីរពេទ្យ​ទាំង​កំពុង​ព្យាបាល​ជំងឺ ខណៈ​អាជ្ញាធរ ផ្ដល់​សិទ្ធិ​ពិសេស​ឲ្យ​អ្នកទោស​មាន​លុយ​មានអំណាច ដូចជា​ឧកញ៉ា គិត ធាង ម្ចាស់​ក្លឹប​កម្សាន្ត រ៉ក់ (ROCK) ជាដើម អាច​រស់នៅ​ក្រៅ​ពន្ធនាគារ​យ៉ាង​រំភើយ​ដោយ​គ្មាន​កំណត់​ពេលវេលា ក្រោម​ហេតុផល​ព្យាបាល​ជំងឺ​។ មន្ត្រី​សិទ្ធិមនុស្ស យល់ថា ករណី​នេះ ធ្វើ​ឲ្យ​សាធារណជន​មើល​ឃើញ​អំពី​ការអនុវត្ត​ច្បាប់​មាន​ស្តង់ដារ​ពីរ។

អង្គការ​សង្គម​ស៊ីវិល មើល​ឃើញ​ថា ការអនុវត្ត​ច្បាប់​របស់​អាជ្ញាធរ កាន់តែ​លែង​គោរព​គោលការណ៍​សិទ្ធិមនុស្ស និង​កាន់តែ​ឆ្លុះបញ្ចាំង​ឲ្យ​ឃើញ​ពី​ភាព​ញែក​ដាច់​ពី​គ្នា​រវាង​អ្នកក្រ និង​អ្នកមាន​លុយ​មានអំណាច ពោល​គឺ​សេវា​សង្គម​នានា​មាន​ទាំង​ផ្លូវច្បាប់ និង​សុខភាព គឺ​ជួយ​សម្រួល​ច្រើន​ដល់​ក្រុម​អ្នក​មាន​លុយ​មាន​អំណាច។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត មាន​ប្រសាសន៍​ថា ការ​ចាប់​ពង្រត់​សកម្មជន​ដីធ្លី​ក្រីក្រ និង​ជា​អ្នកគាំទ្រ​បក្ស​ប្រឆាំង លោកស្រី​សាត ផា ដែល​មាន​ការ​អះអាង​ថា លោកស្រី​កំពុង​សម្រាក​ព្យាបាល​ក្នុង​មន្ទីរពេទ្យ​លោកសង្ឃ​នោះ គឺជា​ការរំលោភ​សិទ្ធិមនុស្ស និង​អនុវត្ត​ច្បាប់​ស្តង់ដារ​ពីរ​។ លោកពិនិត្យ​ឃើញ​ថា កន្លងមក ឧកញ៉ា ឬ​អ្នកមាន​លុយ​មួយ​ចំនួន ដែល​ត្រូវ​បាន​ចាប់​ឃុំខ្លួន​ក្នុង​ពន្ធនាគារ​នោះ តែងតែ​បញ្ជូន​ចេញ​មក​ព្យាបាល​ជំងឺ​នៅ​តាម​មន្ទីរពេទ្យ​ធំៗ​របស់​រដ្ឋ​រហូតដល់​រាប់​ឆ្នាំ​ដោយ​សំអាង​ថា មាន​ជំងឺ​។ លោក ស្នើសុំ​ឲ្យ​អាជ្ញាធរ​អនុវត្ត​ច្បាប់​ដោយ​ស្មើភាព​គ្នា ដើម្បី​ចៀសវាង​ការរិះគន់​ពី​សាធារណជន៖ «​ត្រូវ​គោរព​គោលការណ៍​សិទ្ធិមនុស្ស ទោះបីជា​គាត់ ត្រូវ​មាន​ការចោទប្រកាន់​អី​ក៏ដោយ ក៏​គាត់​មាន​សិទ្ធិ​ទទួល​បាន​សេវា​ព្យាបាល​សុខភាព​ដូច​មនុស្ស​ដទៃ​ទៀត​ដែរ ដូច្នេះ​បើសិនជា​គាត់​តម្រូវ​ឲ្យ​នៅ​ក្នុង​ការ​ព្យាបាល ប៉ុន្តែ​មានការ​ចាប់ខ្លួន​ហើយ​បញ្ជូន​ទៅ​ពន្ធនាគារ​ដោយ​មិន​បាន​ឆ្លងកាត់​ការវាយតម្លៃ​របស់​វេជ្ជបណ្ឌិត​ត្រឹមត្រូវ គេ​មើល​ឃើញ​ហើយ​ថា វា​ជា​ការ​រំលោភ​សិទ្ធិ​ទទួល​បាន​សេវា​សុខភាព​របស់​គាត់ ហើយ​អាច​គេ​ថា វា​ជា​ការ​អនុវត្ត​ដែល​មាន​ស្តង់ដារ​ពីរ​រវាង​អ្នក​មិន​មាន​លុយ ហើយ​ឧកញ៉ា និង​អ្នក​មាន​លុយ ព្រោះ​អ្នកមាន​លុយ​អី គេ​នៅ​មន្ទីរពេទ្យ​បាន តែ​ដល់ពេល​អ្នក​ក្រីក្រ​មិន​អនុញ្ញាត​ឲ្យ​នៅ​មន្ទីរពេទ្យ​បាន»

សាក្សី​អះអាង​ថា អាជ្ញាធរ​របប​ក្រុងភ្នំពេញ បាន​ចូល​ទៅ​ចាប់ខ្លួន​លោកស្រី សាត ផា ដល់​ក្នុង​មន្ទីរពេទ្យ​លោកសង្ឃ​កាលពី​ល្ងាច​ថ្ងៃ​ទី​២៧ ខែ​តុលា ក្នុង​ពេល​លោកស្រី​កំពុង​សម្រាក​ព្យាបាល​របួស​ជើង​ធ្ងន់ធ្ងរ ដែល​កើតឡើង​ដោយសារ​អាជ្ញាធរ​បង្ក្រាប​ដោយ​ហិង្សា​លើ​លោកស្រី​ជា​បន្តបន្ទាប់​ក្នុង​ពេល​តវ៉ា​ទាមទារ​យុត្តិធម៌​សង្គម​។ ក្រុម​គ្រូពេទ្យ​ពិនិត្យ​ឃើញ​ថា ជើង​លោកស្រី​ប្រេះ​ឆ្អឹង​ក្បាល​ជង្គង់​។

ការ​ចាប់​ខ្លួន​នេះ គឺ​៥​ថ្ងៃ​ក្រោយពេល​លោកស្រី ចូលរួម​តវ៉ា​សម្ដែង​មតិ​ដោយ​អហិង្សា​ជាមួយ​ពលរដ្ឋ និង​សកម្មជន​បក្ស​ប្រឆាំង​ប្រមាណ​២០​នាក់ នៅមុខ​ស្ថានទូត​ចិន ដើម្បី​ទាមទារ​ឲ្យ​គោរព​កិច្ចព្រមព្រៀង​សន្តិភាព​ទីក្រុង​ប៉ារីស ថ្ងៃ​ទី​២៣ តុលា​។ តុលាការ បាន​ចោទប្រកាន់​លោកស្រី ពី​បទ​ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​បញ្ជូន​ទៅ​ឃុំខ្លួន​ក្នុង​ពន្ធនាគារ​ព្រៃ​ស​(​ម​២) កាលពី​ថ្ងៃ​ទី​២៨ ខែ​តុលា។

អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា ប្រាប់​អាស៊ីសេរី​យ៉ាង​ខ្លី​ថា សមត្ថកិច្ច មិន​បាន​ចាប់ខ្លួន​លោកស្រី សាត ផា ក្នុង​ពេល​កំពុង​ដេក​ព្យាបាល​នៅ​លើ​គ្រែ​ពេទ្យ ឬ​ក្នុង​មន្ទីរពេទ្យ​នោះ​ទេ​។ លោក អះអាង​ថា សមត្ថកិច្ច បាន​ចាប់ខ្លួន​លោកស្រី សាត ផា នៅ​ក្រោយ​មន្ទីរពេទ្យ និង​ធ្វើ​ឡើង​តាម​ដីកា​របស់​តុលាការ ហើយ​លោក​សុំ​មិន​បកស្រាយ​អ្វី​ទៀត​នោះ​ទេ៖ «វា​ជា​រឿង​របស់​បុគ្គល​ដែល​ត្រូវតែ​ទៅ​បំភ្លឺ​នៅ​ខាង​តុលាការ​ទេ ធម្មតា​ភារកិច្ច​របស់​សមត្ថកិច្ច​គេ​អនុវត្ត​តាម​នីតិវិធី​ឲ្យ​តែ​មាន​ដីកា​ពី​ខាង​តុលាការ គឺ​យើង​ត្រូវ តែ​អនុវត្ត ដូច្នេះ​សូម​សួរ​បន្ត​ទៅ​ខាង​តុលាការ​ព្រោះ​យើង​រុញ​ទៅ​តុលាការ​យូរ​ហើយ»

ទាក់ទង​នឹង​ករណីនេះ អាស៊ីសេរី មិន​អាច​សុំ​ការ​ឆ្លើយតប​ពី​អ្នកនាំពាក្យ​សាលាដំបូង​រាជធានី​ភ្នំពេញ លោក គុជ គីមឡុង និង​ប្រធាន​មន្ទីរពេទ្យ​កុសមៈ ឬ​ហៅថា មន្ទីរពេទ្យ​លោកសង្ឃ លោក តាន់ សុគន្ធ បានទេ ដោយ​ទូរស័ព្ទ ចូល​ពុំ​មាន​អ្នកទទួល។

មន្ត្រី​សង្គម​ស៊ីវិល​យល់​ថា អាជ្ញាធរ គួរ​តែ​អនុញ្ញាត​ឲ្យ​លោកស្រី សាត ផា ដែល​កំពុង​មាន​របួស​ធ្ងន់ធ្ងរ​នោះ បាន​សម្រាក​ព្យាបាល​នៅ​មន្ទីរពេទ្យ​ធំៗ​របស់​រដ្ឋ​ឱ្យ​បាន​ដិតដល់​ដូច​ករណី​ឧកញ៉ា គិត ធាង ដែល​ពាក់ព័ន្ធ​នឹង​អំពើ​ជួញដូរ​គ្រឿងញៀន​ជិត ៥០ គីឡូក្រាម នៅ​ក្លឹប​កម្សាន្ត​រ៉ក់​( Rock) ដែល​កំពុង​ដេក​សម្រាក​ព្យាបាល​នៅ​ក្នុង​មន្ទីរពេទ្យ​រុស្ស៊ី​ជាង​១​ឆ្នាំ​មក​ហើយ។

អ្នកនាំពាក្យ​អគ្គនាយកដ្ឋាន​ពន្ធនាគារ លោក នុត សាវនា ប្រាប់​អាស៊ីសេរី​ថា មក​ទល់​ពេល​នេះ ឧកញ៉ា គិត ធាង ម្ចាស់​ក្លឹប​កម្សាន្ត​រ៉ក់​(ROCK ) នៅតែ​បន្ត​សម្រាក​ព្យាបាល​ក្នុង​មន្ទីរពេទ្យ​រុស្សី ហើយ​មិន​ទាន់​ដឹង​ថា នឹង​នាំ​ខ្លួន​ឧកញ៉ា​រូប​នេះ ទៅ​ឃុំ​ក្នុង​ពន្ធនាគារ​ពេលណា​នោះ​ទេ ព្រោះ​មិន​ទាន់​មាន​បញ្ជា​ពី​តុលាការ និង​លិខិតបញ្ជាក់​សុខភាព​ពី​មន្ទីរពេទ្យ។ ចំពោះ​ករណី​សមត្ថកិច្ច​ចាប់​ឃុំខ្លួន​លោកស្រី សាត ផា ក្នុង​ពន្ធនាគារ​នោះ លោក នុត សាវនា សុំ​មិន​មាន​យោបល់​អ្វី​ឡើយ ព្រោះ​ជា​តួនាទី​របស់​សមត្ថកិច្ច​ផ្សេងៗ​ទៀត៖ «ខ្ញុំ​យល់​ម៉េច ព្រោះ​ខ្ញុំ​ជា​មន្ត្រី​បច្ចេកទេស ខ្ញុំ​អត់​មាន​យោបល់​អី​ពាក់ព័ន្ធ​នឹង​រឿង​នយោបាយ ឬក៏​រឿង​ការងារ​សង្គម​ទេ ប៉ុន្តែ​យើង​យល់ថា​អ្វីៗ​វា​មាន​ចែង​នៅ ក្នុង​បទ​បញ្ញត្តិ នៅ​ក្នុង​ច្បាប់ មាននៅ​ក្នុង​នីតិវិធី ស្រប​ទៅ​តាម​គោលការណ៍​ចែង​ទាំង​ក្នុង​គោលការណ៍​សិទ្ធិមនុស្ស និង​គោលការណ៍​មនុស្សធម៌​ហើយ​នឹង​គោលការណ៍​ច្បាប់ ដូច្នេះ​យក​ធាតុ​ផ្សុំ ទាំងអស់​នេះ មក​ពិចារណា ហើយ​វិភាគ​ទៅ»

បងប្រុស​បង្កើត​របស់​ឧកញ៉ា គិត ម៉េង គឺ​ឧកញ៉ា គិត ធាង ត្រូវ​បាន​បញ្ជូន​ចេញពី​ពន្ធនាគារ​ទៅ​សម្រាក​ព្យាបាល​នៅ​មន្ទីរ​ពេទ្យ​រុស្ស៊ី​តាំងពី​ថ្ងៃ​ទី​១ ខែ​មេសា ឆ្នាំ​២០១៩ ក្រោម​ហេតុផល​ថា មាន​ជំងឺ​សួត និង​ស្ទះ​ដង្ហើម បន្ទាប់ពី​ជាប់ឃុំ​ក្នុង​ពន្ធនាគារ​រាជធានី​ភ្នំពេញ​ប៉េ​ហ្ស៊ី (PJ) រយៈពេល​ប្រមាណ​កន្លះ​ខែ ។ គិត​មក​ទល់​ពេល​នេះ​លោក គិត ធាង រួច​ផុត​ពី​ការ​ឃុំ​ឃាំង​ក្នុង​ពន្ធនាគារ ក្រោម ហេតុផល​ព្យាបាល​ជំងឺ​អស់​រយៈពេល​១​ឆ្នាំ​៥​ខែ​ហើយ​។ កន្លង​មក សារព័ត៌មាន​ក្នុងស្រុក ក៏បាន​ចុះផ្សាយ​ដោយ​ស្រង់​សម្ភី​បុគ្គលិក​ពេទ្យរ​ស្ស៊ី​ថា លោក គិត ធាង គ្មាន​ជំងឺ​អ្វី​ធ្ងន់ធ្ងរ​ដល់​ថ្នាក់​ចាក់​ថ្នាំ​ឬ​ឱ្យ​ថ្នាំលេប​នោះទេ ប៉ុន្តែ​លោក គិត ធាង មិន​ព្រម​ត្រឡប់​ទៅវិញ ព្រោះ​លោក​មាន​សមត្ថភាព​ជួល​បន្ទប់​ពិសេស​របស់​មន្ទីរពេទ្យ​ដើម្បី​ស្នាក់នៅ​ដែល​អាច​ងាយស្រួល​ជាង​ការរស់នៅ​ក្នុង​ពន្ធនាគារ​។​

អ្នក​សិក្សា​ផ្នែក​ច្បាប់ យុវជន វ៉ន ចាន់​ឡូត កត់​សម្គាល់​ថា អ្នកមាន​លុយ​មានអំណាច ទោះបី​ជា​មាន ទោស​ទណ្ឌ​ធ្ងន់ធ្ងរ​បែប​ណា​ក្តី ប៉ុន្តែ​អាជ្ញាធរ​ពាក់ព័ន្ធ ហាក់​ដូចជា​ជួយ​សម្រួល ឬ​យកចិត្ត​ទុក​ខ្លាំង​ដល់ ពួកគេ ផ្ទុយ​ពី​ប្រជាពលរដ្ឋ​ក្រីក្រ និង​អ្នកតស៊ូ​មតិ​ដោយ​អហិង្សា ទោះបីជា​គ្មាន​ទោសកំហុស​ធ្ងន់ធ្ងរ​ក្តី ប៉ុន្តែ​ពួកគេ​តែង​ទទួលរង​ការឈឺចាប់​ទាំង​ផ្លូវការ​និង​ផ្លូវចិត្ត​។ លោក​បន្ត​ថា តាម​គោលការណ៍​ច្បាប់ និង​គោលការណ៍​សិទ្ធិមនុស្ស គឺ​លោកស្រី សាត ផា គួរតែ​ទទួល​បាន​សិទ្ធិ​ក្នុង​ការ​ព្យាបាល​និង​ថែទាំ​សុខភាព​ឲ្យ​បាន​ដិត​ដល់​ឡើងវិញ៖ «ការអនុវត្ត​សេរីភាព​របស់​គាត់ វា​អត់​មាន​ខុស​ទេ ហើយ​អាជ្ញាធរ​មិន​គួរ​ចេះតែ​ចោទ​គាត់​ដោយ​គ្មាន​មូលដ្ឋាន​ច្បាប់​ច្បាស់លាស់ ដោយ​ឃើញ​គាត់​សកម្ម​ហើយ​ចេះតែ​ទៅ ចោទ​គាត់ ថា គាត់​ស៊ីឈ្នួល​បាតុកម្ម ឬ​ចង់​ផ្តួល​រំលំ​រដ្ឋាភិបាល​អី ខ្ញុំ​គិត​ថា វា​ដូចជា​អត់​សម​ហេតុផល​ទេ ព្រោះ​គាត់​ជា​ស្ត្រី ហើយ​មាន​ជំងឺ​ទៀត»

ក្រុម​អង្គការ​ជាតិ និង​អន្តរជាតិ រួម​ទាំង​ស្ថានទូត​​ប្រទេស​ប្រជាធិបតេយ្យ​ធំៗ សេចក្តី​ថ្លែងការណ៍​ជា​បន្តបន្ទាប់ ទាមទារ​ឲ្យ​រដ្ឋាភិបាល​បញ្ឈប់​ទង្វើ​រារាំង​ចំពោះ​ការ​តវ៉ា​ដោយ​សន្តិវិធី​ហើយ​ត្រូវ​ដោះលែង​សកម្មជន​សង្គម សកម្មជន​នយោបាយ និង​យុវជន​ទាំងឡាយ​ដែល​ត្រូវ​បាន​ចាប់ខ្លួន​ទាំង​បំពាន​ច្បាប់​នោះ​ឲ្យ​មាន​សេរីភាព​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។