តុលាការក្រុងហូជីមីញ (HCMC) កាត់ទោសជនជាតិវៀតណាមមួយក្រុមមានគ្នា ៨នាក់ឲ្យជាប់ពន្ធនាគារ ចន្លោះពី ១០ ទៅ១៦ឆ្នាំ ពីបទជួញដូរក្រលៀន ដោយបានបញ្ជូនជនជាតិវៀតណាម៣៧នាក់ ទៅប្រទេសកម្ពុជាដើម្បីវះកាត់ប្តូរក្រលៀនថ្មី (Kidney)។
សារព័ត៌មានវៀតណាមអេចប្រេស (vnexpress)ចុះផ្សាយកាលពីថ្ងៃទី២៣ ខែមីនាថា មេក្រុមជួញដូរសរីរាង្គឈ្មោះលោកស្រី តុន នូធី ហ៊ូយេន (Ton Nu Thi Huyen) អាយុ ៤៦ឆ្នាំ ដែលបានស្លាប់ដោយសារបញ្ហាក្រលៀន ខណៈដែលអាជ្ញាធរវៀតណាម កំពុងស៊ើបអង្កេតករណីជួញដូរសរីរាង្គមនុស្សនេះ។ ជនល្មើសទាំង៨នាក់នោះបានបង្កើតបណ្ដាញរបស់ខ្លួន ដើម្បីស្វែងរកអ្នកលក់និងអ្នកទិញក្រលៀន នៅប្រទេសវៀតណាម។
សាលក្រមផ្ដន្ទាទោសឲ្យដឹងថា លោកស្រី តុន នូធី ហ៊ូយេន បានមកប្រទេសកម្ពុជា កាលពីឆ្នាំ២០១៦ និងបានជួបវេជ្ជបណ្ឌិតជនជាតិសិង្ហបុរីម្នាក់ឈ្មោះ ត្រាន់ (Tran) ដែលធ្វើការនៅមន្ទីរពេទ្យយោធាក្រុងភ្នំពេញ។ វេជ្ជបណ្ឌិតសិង្ហបុរីរូបនោះ ក៏បានប្រាប់លោកស្រី ហ៊ូយេន ឲ្យជួយស្វែងរកអតិថិជនទិញក្រលៀន ដើម្បីវះកាត់ប្តូរក្រលៀនថ្មី ក្នុងតម្លៃចន្លោះពី១ម៉ឺន ៥ពាន់ដុល្លារ ដល់ ១ម៉ឺន ៧ពាន់ដុល្លារ។ ចំណែកលោកស្រី ហ៊ូយេន វិញ ទទួលបានប្រាក់កម្រៃចំនួន ជិត ៣ពាន់ដុល្លារ (US$2,973) រាល់ករណីប្តូរក្រលៀនថ្មី។
ប្រភពដដែលបន្តថា ក្រោយពីវះកាត់យកក្រលៀនចេញហើយ ពួកគេត្រូវស្នាក់នៅក្នុងមន្ទីរពេទ្យក្នុងក្រុងភ្នំពេញចំនួន ១២ថ្ងៃ ដោយទទួលបានប្រាក់កម្រៃ ក្នុងម្នាក់ៗជិត៩ពាន់ដុល្លារ (VND200-210 million)។ ចាប់ពីខែមេសា ឆ្នាំ២០១៧ ដល់ខែមករា ឆ្នាំ២០១៩ ក្រុមឈ្មួញទុច្ចរិត បានទិញក្រលៀនពីអតិថិជនចំនួន១០០នាក់ និងបានបញ្ជូនជនជាតិវៀតណាម៣៧នាក់ មកទទួលការវះកាត់ប្តូរ ក្រលៀនថ្មី នៅប្រទេសកម្ពុជា។
អាជ្ញាធរវៀតណាមបានទាក់ទងទៅក្រសួងយុត្តិធម៌កម្ពុជា ដើម្បីផ្ទៀងផ្ទាត់ និងបញ្ជាក់ពីចំនួនករណីជួញដូរក្រលៀននេះដែរ ប៉ុន្តែពុំមានការឆ្លើយតបនិងសហការនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។