អ្នកឃ្លាំមើលសុវត្ថិភាពចរាចរណ៍ ថា នគរបាលជំនាញ មិនទាន់បានបន្ធូរបន្ថយការផាកពិន័យបទល្មើសចរាចរណ៍ចាំបាច់មួយចំនួន ដែលពលរដ្ឋក្រីក្រគ្មានលទ្ធភាពបង់ផាកពិន័យទេ។
ពលរដ្ឋ ចង់ឲ្យរដ្ឋាភិបាល លើកលែងការផាកពិន័យធ្ងន់ធ្ងរ ដល់ជនក្រីក្រ អ្នកប្រកបរបរក្រៅប្រព័ន្ធ និងទម្លាក់តម្លៃផាកពិន័យឲ្យទាប។
នាយកវិទ្យាស្ថានសុវត្ថិភាពចរាចរណ៍ លោក គង់ រតនៈ សង្កេតឃើញថា មានករណីខ្លះ មេប៉ូលិសចរាចរណ៍ ឬស្នងការ បានជួយសម្របសម្រួលឲ្យពលរដ្ឋក្រីក្រខ្លះ បានរួចពិន័យធ្ងន់ធ្ងរខ្លះដែរ។ តែយ៉ាងណា មិនទាន់មានការប្រកាសបន្ធូរបន្ថយការផាកពិន័យជាផ្លូវការទេ។
អ្នកជំនាញសុវត្ថិភាពចរាចរណ៍រូបនេះ ជឿថា រដ្ឋាភិបាល ពិតជាបានដឹងពីប្រតិកម្មរបស់ពលរដ្ឋប៉ុន្មានថ្ងៃមកនេះ ដូច្នេះលោក ចង់ឲ្យរដ្ឋាភិបាលពិចារណា បន្ធូរបន្ថយបទល្មើសចរាចរណ៍ដែលត្រូវផាកពិន័យសម្រាប់ម៉ូតូ ឬម៉ូតូសណ្ដោងរ៉ឺម៉ក របស់អ្នកក្រីក្រ និងទម្លាក់តម្លៃផាកពិន័យមកត្រឹម២០ភាគរយវិញ។ លោក គង់ រតនៈ លើកទឹកចិត្ត ឲ្យនគរបាលចរាចរណ៍ ពង្រឹងការផាកពិន័យយានយន្តធំៗ ដែលមានលទ្ធភាពខ្ពស់ ក្នុងការបង្កគ្រោះថ្នាក់ចរាចរណ៍ឲ្យបានធ្ងន់ធ្ងរ៖ « គួរតែផ្ដល់សិទ្ធិអាទិភាព ដូចខាងប៉ូលិសគាត់បានធ្វើអ៊ីចឹង បើថា ម៉ូតូមាន៧ចំណុច ឡានមាន៩ចំណុចគួរតែពង្រឹងទៅលើអាហ្នុងឲ្យបានច្រើនជាង ហើយគួរផ្ដោតទៅលើអាណាជាហានិភ័យធំ ជាងគេ។ អាហ្នឹង បានយើងធ្វើដើម្បីគោលដៅនៃអនុក្រឹត្យហ្នឹងល្អ។ ប៉ុន្តែបើយើងចាប់ផ្ដើមឡើង ដូចខ្ញុំជម្រាបអ៊ីចឹងថា ពីកន្លងមកយើងឃើញថា ដោយសារពេលវេលាមិនសាកសមវាមានប្រតិកម្មច្រើន ពីពលរដ្ឋដូចគ្នាដែរ»។
អគ្គស្នងការរងនគរបាលជាតិ ទទួលបន្ទុកសណ្ដាប់ធ្នាប់ និងចរាចរណ៍ លោក ហ៊ឹម យ៉ាន បានថ្លែង កាលពីថ្ងៃទី៣០ មេសា ក្នុងសន្និសីទសារព័ត៌មានថា នគរបាលចរាចរណ៍ តម្រូវឲ្យអនុវត្តផាកពិន័យតែបទល្មើសចំនួន១៦ ប៉ុណ្ណោះ ក្នុងចំណោមនៃបទល្មើសជាង ៧០បទល្មើសចរាចរណ៍។
លោក បញ្ជាក់ថា សម្រាប់ម៉ូតូ ផាកពិន័យ ៧បទល្មើសទេ គឺ មិនពាក់មួកសុវត្ថិភាព ពិន័យ ៦ម៉ឺនរៀល ប្រើទូរស័ព្ទដោយគ្មានឧបករណ៍ភ្ជាប់សំឡេង ពេលបើកបរ ពិន័យ ៨ម៉ឺនរៀល មិនគោរពភ្លើងស្ដុប មិនគោរពស្លាកសញ្ញាចរាចរណ៍ ល្មើសការបត់ វ៉ាជែង និងដឹកលើសចំណុះ ពិន័យ ១០ម៉ឺនរៀល។ ម៉ូតូគ្មានស្លាកលេខ ពិន័យ ១២ម៉ឺនរៀល។ បើកម៉ូតូក្នុងភាពស្រវឹង ត្រូវពិន័យតាមកម្រិតជាតិអាកុល ចាប់ពី ២៥ម៉ឺនរៀល ឬស្មើ ៦២ដុល្លារអាមេរិក ដល់ ១លានរៀល ឬស្មើប្រមាណ ២៥០ដុល្លារ។
ចំណែករថយន្ត ឬឡាន ចាប់ផាកពិន័យ ៩បទល្មើស គឺល្មើសល្បឿន ស្រវឹង គ្មានប័ណ្ណបើកបរ មិនគោរពភ្លើងសញ្ញា និងស្លាកសញ្ញាចរាចរណ៍ ល្មើសការបត់ វ៉ាជែង មិនពាក់ខ្សែក្រវាត់ការពារសុវត្ថិភាព ដឹកលើសចំណុះគ្មានស្លាកលេខ និងនិយាយទូរស័ព្ទដោយគ្មានឧបករណ៍ភ្ជាប់សំឡេង។ ចំពោះរថយន្តពិន័យចាប់ពី ១២ម៉ឺនរៀល ឬ ៣០ដុល្លារ ដល់បួនលានរៀល ស្មើប្រមាណ ១.០០០ដុល្លារ។
ទោះយ៉ាងណា ពលរដ្ឋ មិនសូវជំទាស់នឹងការផាកពិន័យធ្ងន់ធ្ងរលើរថយន្តទេ។ តែប្រតិកម្មនឹងការផាកពិន័យម៉ូតូចាស់ៗ សម្រាប់រកស៊ីចិញ្ចឹមជីវិត។ ក្រុមអ្នករត់រ៉ឺម៉កកង់បី និងអ្នកលក់ដូរតាមម៉ូតូសណ្ដោងរ៉ឺម៉កខ្លះ ថា ពួកគេគ្មានលទ្ធភាពទិញម៉ូតូថ្មី ដែលមានកាតគ្រីត្រឹមត្រូវយកមកសណ្ដោងរ៉ឺម៉កទេ។ពួកគេថា ច្បាប់ថ្មី បង្ខំដាក់ពិន័យខ្លាំងពេក ទាមទារប័ណ្ណបើកបរម៉ូតូសណ្ដោង និងកាតគ្រីម៉ូតូ ជាដើម ជាហេតុធ្វើឲ្យពួកគាត់លែងសូវហ៊ានចេញរកស៊ី។
លោក ញ៉េប ឌឿន ជាអ្នករត់រ៉ឺម៉កកង់បី នៅខណ្ឌដង្កោ ប្រាប់ថា លោកលែង ចេញដឹកភ្ញៀវច្រើនថ្ងៃហើយ ដោយសារខ្លាចប៉ូលិសចរាចរណ៍ចាប់ផាក ព្រោះគ្មានប័ណ្ណបើកបរម៉ូតូសណ្ដោងរ៉ឺម៉កកង់បី។ អ្នករត់កង់បីរូបនេះ ស្នើសុំឲ្យអាជ្ញាធរ បន្ធូរបន្ថយ ឬលុបចោលការពិន័យប័ណ្ណបើកបរ និងកាតគ្រី សម្រាប់ក្រុមអ្នកប្រកបមុខរបរសណ្ដោងរ៉ឺម៉កគ្រប់ប្រភេទ៖ «( ខ្ញុំ ) អត់បានចេញ រត់ទេបងអើយ។ ចាប់ពីច្បាប់ចរាចរណ៍ ( ថ្មី ) ចេញផាកមក គឺពួកខ្ញុំមានការលំបាក។ អ្នកខ្លះអត់ហ៊ានចេញរត់ទេ ព្រោះអ្វីកាលណាបើចេញរត់ទៅ គេផាកអស់លុយច្រើន អត់មានលុយឲ្យគេ ហើយឥឡូវនេះ តាំងពីកូវីដមកហើយ មានច្បាប់ចាប់ចរាចរណ៍ហ្នឹងទៀត ពួកខ្ញុំរឹតតែវេទនាបណ្ដោយ។ អត់មានភ្ញៀវដឹកហើយ គេចេញច្បាប់ អ៊ីចឹងទៀត ពួកខ្ញុំនៅផ្ទះបណ្ដោយ សេរ៉ូ ( ០ ) ឥឡូវ»។
រយៈពេល ៥ថ្ងៃ នៃការអនុវត្តរឹតបន្តឹងផាកពិន័យធ្ងន់ធ្ងរមកនេះ ពលរដ្ឋបានបង្កើនការរិះគន់ និងប្រតិកម្មយ៉ាងខ្លាំង ជុំវិញការអនុវត្តវិធានការ ផាកពិន័យយ៉ាងតក់ក្រហល់របស់រដ្ឋាភិបាល។នគរបាល ក៏បានចាប់ខ្លួនមនុស្សយ៉ាងតិច ២នាក់ដែរ ព្រោះបានរិះគន់ការផាកពិន័យចរាចរណ៍ គឺយុវជនឈ្មោះ រស់ ដារ៉ា ម្ចាស់គណនី Facebook ឈ្មោះ Alex Piano និងយុវតី ឈ្មោះ គួក ស្រីណា ម្ចាស់គណនី TIKTOK ឈ្មោះ អែ ណា។ ប៉ូលិស បានចោទពួកគេថា យករូបភាពវីដេអូចាស់មកផុស បង្កឲ្យមានការភ័ន្តច្រឡំ និងបង្គាប់ឲ្យធ្វើវីដេអូសុំទោសជាសាធារណៈ រួចដោះលែងឲ្យត្រឡប់ទៅផ្ទះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។