លោក ហ៊ុន សែន ប្រកាសថា លោក កឹម សុខា មានទោសក្បត់ជាតិ ស្របពេលតុលាការនឹងបន្តសវនាការសប្ដាហ៍ទី៦ នៅថ្ងៃនេះ
2020.02.26
លោកនាយករដ្ឋមន្រ្តីនៃរបបឯកបក្សលោក ហ៊ុន សែន ប្រកាសជំនួសតុលាការ ថាលោក កឹម សុខា ប្រធានគណបក្សសង្គ្រោះជាតិ លោក កឹម សុខា មានទោសក្បត់ជាតិ ស្របពេលតុលាការបន្តសវនាការចូលដល់សប្តាហ៍ទី៦ នៅថ្ងៃទី២៦ កុម្ភៈ។ ការប្រកាសនេះ ធ្វើឡើងស្របពេលដែលសំណុំរឿងលោក កឹម សុខា រងការរិះគន់ថា មានចរិតនយោបាយ និងតុលាការជា ឧបករណ៍នយោបាយ សម្រាប់គណបក្សកាន់អំណាច ប្រើប្រាស់ដើម្បីធ្វើទុក្ខបុកម្នេញគណបក្សប្រឆាំង។
លោក ហ៊ុន សែន កាលពីថ្ងៃទី ២៤ ខែ កុម្ភៈ ទំនងជាក្រេវក្រោធនឹងការដាក់ទណ្ឌកម្ម របស់សហភាពអឺរ៉ុប ដែលបានសម្រេចផ្តាច់ប្រព័ន្ធអនុគ្រោះពន្ធ EBA ២០% ពីកម្ពុជា ដោយសារការរំលោភ សិទ្ធិមនុស្ស និងបំផ្លាញប្រជាធិបតេយ្យ រួមទាំងការធ្វើទុក្ខបុកម្នេញលោក កឹម សុខានេះផង៖ «ថ្ងៃនេះជូនសារជាក់លាក់ច្បាស់លាស់ ថាកម្ពុជាមិនថយក្រោយលើការកាត់ក្តី ចំពោះជនក្បត់ជាតិ ឬអ្នកដែលទទួលនូវទណ្ឌកម្មទេ។ អ្នកឯងត្រូវតែច្បាស់ អ្វីដែលអ្នកឯងបានធ្វើ អ្នកឯងត្រូវចាំ អ្នកឯងយកថ្ងៃទី ២៩ ខែ ធ្នូ ឆ្នាំ ២០១៣ គឺជាថ្ងៃផ្ដាច់ព្រ័ត្រក្នុងការផ្ដួលរំលំ។ អ្នកឯងត្រូវតែទទួលនូវទណ្ឌកម្មបែបនេះ។ គឺមិនអាចលើកលែងឲ្យបានទេ»។
សាររបស់លោក ហ៊ុន សែន នៅពេលនេះ គឺហាក់ដូចជាបង្ហាញការខកចិត្តមួយដែរ ដែលការគំរាមរបស់លោក ឲ្យសហភាពអឺរ៉ុប កុំដកប្រព័ន្ធអនុគ្រោះពន្ធនេះ មិនបានជោគជ័យ។ កាលពីខែមករា ឆ្នាំ ២០១៩ ក្នុងពិធីសម្ពោធការធ្វើផ្លូវក្រវាត់ក្រុង លោក ហ៊ុន សែន ធ្លាប់គំរាមថា ការដាក់ទណ្ឌកម្មណាមួយ គឺដូចសម្លាប់កម្ពុជាដូច្នេះដែរ។ លោកថា បើកម្ពុជាស្លាប់ គណបក្សប្រឆាំងក៏ត្រូវតែស្លាប់ដែរ៖ «ការដាក់ទណ្ឌកម្មចំពោះកម្ពុជា មានតម្លៃស្មើនឹងសម្លាប់បក្សប្រឆាំង ខ្ញុំមិនលើកលែងឲ្យទេ។ បានជាជ្រុលលេងគ្នាហើយ គឺត្រូវតែលេងអ៊ីចឹង! ល្បែងវាមានទៅមានមក! បើចង់ឲ្យពួកប្រឆាំងងាប់ អាហ្នឹងកាត់ទៅ។ បើចង់ឲ្យពួកប្រឆាំងរស់ អាហ្នឹងកុំធ្វើ»។
គណបក្សប្រឆាំង ត្រូវបានរបបលោករម្លាយចោលជាងពីរឆ្នាំមកហើយ។ ចំណែកឯប្រធានគណបក្សនេះ គឺលោក កឹម សុខា ក៏ត្រូវលោកចេញបញ្ជាឲ្យចាប់ទាំងកម្រោលទាំងកណ្ដាលអធ្រាត្រ។ ដំបូងរបបនេះ យកលោក កឹម សុខា ទៅឃុំខ្លួននៅគុកត្រពាំងផ្លុង នៅខេត្តត្បូងឃ្មុំ ក្បែរព្រំដែនវៀតណាម។ ក្រោយមកដោយសារសម្ពាធអន្តរជាតិ របបក្រុងភ្នំពេញ បានយកលោក កឹម សុខា មកឃុំខ្លួនក្នុងផ្ទះ។ បន្ទាប់មកទៀត នៅកៀកថ្ងៃគណៈកម្មការអឺរ៉ុប សម្រេចដកការអនុគ្រោះពន្ធ របបនេះបានលែងឃុំខ្លួនលោក កឹម សុខា ក្នុងផ្ទះ រួចប្រញាប់ប្រញាល់ បញ្ជូនរឿងនេះទៅជំនុំជម្រះ ទាំងតក់ក្រហល់។
ឥឡូវសវនាការជំនុំជម្រះក្តីលោក កឹម សុខា បានប្រព្រឹត្តទៅ ៥សប្ដាហ៍មកហើយ ដោយមួយសប្ដាហ៍ធ្វើសវនាការមួយថ្ងៃកន្លះ។ សវនាការទាំង ៥ សប្ដាហ៍កន្លងទៅនោះ ប្រព្រឹត្តទៅដោយភាពចម្រូងចម្រាស ដោយក្រុមមេធាវីការពារក្តីលោក កឹម សុខា ចាត់ទុកថាកិច្ចដំណើរការនីតិវិធីតុលាការ មានភាពមិនត្រឹមត្រូវ និងរញ៉េរញ៉ៃជាដើម។
ភាពចម្រូងចម្រាសទាំងនោះ មានតាំងពីភាពមិនប្រក្រតី នៃការព្រមទទួលភ័ស្តុតាង ដែលគ្មានប្រភពច្បាស់លាស់ ដូចជាយកភ័ស្តុតាងពីគណនីហ្វេសប៊ុកអនាមិក ឬគ្មានអត្តសញ្ញាណត្រឹមត្រូវ ការសួរសំណួរច្រំដែល ការយកតម្រុយភ័ស្តុតាង មកសួរដេញដោល គឺបើតាមនីតិវិធីត្រឹមត្រូវ គឺត្រូវយកអង្គហេតុមកសួរដេញដោលទើបត្រូវ ការអនុវត្តធាក់ថយក្រោយនៃក្រមព្រហ្មទណ្ឌ ការយកភ័ស្តុតាងដែលគ្មាននៅក្នុងសំណុំរឿង យកមកសួរដេញដោលលោក កឹម សុខា និងចុងក្រោយ គឺការបិទសិទ្ធិសេរីភាពក្រុមមេធាវីការពារក្តីលោក កឹម សុខា មិនឲ្យឡើងតវ៉ាក្តីជាដើម។
ការរឹតត្បិតសិទ្ធិសេរីភាពរបស់ក្រុមមេធាវីការពារក្តីលោក កឹម សុខា បែបនេះ ត្រូវបានក្រុមមេធាវីទាំងអស់ នាំគ្នាដើរចេញពីបន្ទប់សវនាការ ដើម្បីបង្ហាញការធ្វើពហិការ កាលពីថ្ងៃចុងក្រោយ នៃសវនាការសប្ដាហ៍ទី ៥។
តុលាការបានសម្រេច លើកពេលសវនាការមួយសប្ដាហ៍ ដើម្បីដោះស្រាយបញ្ហានេះ។ នៅក្នុងសប្ដាហ៍ទី ៦ ដែលនឹងចាប់ផ្ដើមនៅព្រឹកថ្ងៃទី២៦ ខែកុម្ភៈនេះ តុលាការនឹងបើកសវនាការបន្តជុំវិញអង្គហេតុ ចាប់ពីឆ្នាំ ២០១២ រហូតដល់ថ្ងៃចាប់ខ្លួនលោក កឹម សុខា ក្នុងឆ្នាំ២០១៧។
ទោះបីសហមេធាវីការពារក្ដីលោក កឹម សុខា អះអាងថា នឹងបន្តចូលរួមក្នុងសវនាការនេះក៏ដោយ ក៏ពួកគាត់ បញ្ជាក់ថាគ្មានសង្ឃឹមថា ដំណើរការក្តីលោក កឹម សុខា នឹងប្រព្រឹត្តទៅដោយរលូន និងយុត្តិធម៌នោះទេ ដោយសារតែកំហុសឆ្គងមិនចេះចប់ មិនចេះហើយ ជុំវិញភាពមិនក្រក្រតីនៃការដាក់ភ័ស្តុតាង និងការរឹតត្បិតសិទ្ធិសេរីភាពមេធាវីខាងលោក កឹម សុខា ក្នុងសវនាការ។
ទោះជាយ៉ាងនេះក្តី ខាងព្រះរាជអាជ្ញា និងមេធាវីការពាររដ្ឋាភិបាល ថាក្រុមមេធាវីការពារក្តីលោក កឹម សុខា មានចេតនាពន្យារកិច្ចដំណើរការនីតិវិធីតុលាការ ទើបជំទាស់ជាហូរហែកន្លងមក។ ការចោទប្រកាន់នេះ ត្រូវបានក្រុមមេធាវីលោក កឹម សុខា បដិសេធ និងថាភាគីម្ខាងទៀតនោះទេ ដែលមានចេតនាពន្យារពេលនេះ ដូចជាករណីយកភ័ស្តុតាងភ្ញាក់ផ្អើល មកបង្ហាញជាដើម។
ឥឡូវបន្ថែមទៅភាពចម្រូងចម្រាសដែលមានស្រាប់ សាររបស់លោក ហ៊ុន សែន ក្នុងការសន្មតទុកជាមុន ថាជនជាប់ចោទលោក កឹម សុខា មានទោសជាជនក្បត់ជាតិ ទោះបីតុលាការមិនទាន់សម្រេចក្ដីយ៉ាងណានោះ កំពុងតែបន្ថែមក្ដីមន្ទិល ទៅលើសុចរិតភាពនៃកិច្ចដំណើរការនីតិវិធី ក្នុងរឿងក្ដីដ៏រសើបនេះ។
អាស៊ីសេរី មិនទាន់អាចសុំការបំភ្លឺពីមន្ត្រីនាំពាក្យរបបក្រុងភ្នំពេញ អំពីសាររបស់លោក ហ៊ុន សែន ដែលសន្មតថា លោក កឹម សុខា ជាជនក្បត់ជាតិនេះ បានឡើយទេ កាលពីថ្ងៃទី២៥ ខែកុម្ភៈ ដោយសារលោកមិនលើកទូរស័ព្ទ។
ប៉ុន្តែ មន្រ្តីនាំពាក្យក្រសួងយុត្តិធម៌ និងជាអ្នកនាំពាក្យគណៈកម្មាធិការសិទ្ធិមនុស្សរបស់របបក្រុងភ្នំពេញ លោក ជិន ម៉ាលីន ធ្លាប់អះអាងថា នាយករដ្ឋមន្ត្រី ចង់និយាយអ្វីប៉ះពាល់ដល់ដំណើរការកាត់ក្ដីក៏បានដែរ ព្រោះជាសិទ្ធិរបស់គាត់។
សហមេធាវីមួយរូប ក្នុងក្រុមមេធាវីការពារក្តីលោក កឹម សុខា ធ្លាប់លើកឡើងអំពីបញ្ហាប្រឈម ជាច្រើនក្នុងការការពារក្តី ក្នុងសំណុំរឿង ដែលមានចរិតនយោបាយនេះ។ ប៉ុន្តែពួកគាត់អះអាងថា ក្រុមមេធាវីការពារក្តីលោក កឹម សុខា គ្មានជម្រើសអ្វីផ្សេង ក្រៅពីខំប្រឹងតស៊ូស្វិតស្វាញលើសមរភូមិច្បាប់នេះ នោះទេ។ ពួកគាត់នៅតែទទូចឲ្យតុលាការ ទម្លាក់ចោលបទចោទប្រឆាំងលើកូនក្តីភ្លាមៗ និងដោយឥតលក្ខខណ្ឌ ដើម្បីឲ្យលោក កឹម សុខា មានសេរីភាពពេញលេញឡើងវិញ ដើម្បីលោកបំពេញកិច្ចការងារសង្គមតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។