មេធាវី​លោក កឹម សុខា កាន់តែ​មន្ទិល​អំពី​សវនាការ​បន្ត ក្រោយ​មាន​បញ្ហា​រឿង​ឯកសារ​ភស្តុតាង

ដោយ មួង ណារ៉េត
2020-02-14
អ៊ីម៉ែល
មតិ
Share
បោះពុម្ព
លោក កឹម សុខា (រូប​កណ្ដាល) ប្រធាន​គណបក្ស​សង្រ្គោះជាតិ និង​មេធាវី​ការពារ​ក្ដី​របស់​លោក នា​បរិវេណ​ផ្ទះ​លោក កឹម សុខា នៅ​ខណ្ឌ​ទួលគោក។
លោក កឹម សុខា (រូប​កណ្ដាល) ប្រធាន​គណបក្ស​សង្រ្គោះជាតិ និង​មេធាវី​ការពារ​ក្ដី​របស់​លោក នា​បរិវេណ​ផ្ទះ​លោក កឹម សុខា នៅ​ខណ្ឌ​ទួលគោក។
រូប​ពី​ហ្វេសប៊ុក លោក ផែង ហេង

សហ​មេធាវី​ការពារ​ក្តី​លោក កឹម សុខា កាន់​តែ​មាន​មន្ទិល ទៅលើ​កិច្ច​ដំណើរការ​នីតិវិធី​ទៅ​ខាង​មុខ ជុំវិញ​សវនាការ​ជំនុំ​ជម្រះ​ក្តី​លោក កឹម សុខា ព្រោះ​តុលាការ​យក​ឯកសារ​ភស្តុតាង ដែល​មេធាវី​ថា គ្មាន​នៅ​ក្នុង​សំណុំរឿង មក​សួរដេញដោល​កូន​ក្តី។

សហ​មេធាវី​ការពារ​ក្ដី​លោក កឹម សុខា គ្មាន​សង្ឃឹមថា ដំណើរការ​ក្តី​លោក កឹម សុខា នឹង​ប្រព្រឹត្ត​ទៅ​ដោយ​រលូន និង​យុត្តិធម៌​នោះ​ទេ ដោយសារតែ​កំហុស​ឆ្គង​មិន​ចេះ​ចប់ មិន​ចេះ​ហើយ ជុំវិញ​ភាព​មិន​ប្រក្រតី​នៃ​ការ​ដាក់​ភស្តុតាង និង​ការ​រឹតត្បិត​សិទ្ធិ​សេរីភាព​មេធាវី​ខាង​លោក កឹម សុខា ក្នុង​សវនាការ។

សហ​មេធាវី​មួយ​រូប ក្នុងចំណោម​បួន​រូប ដែល​ការពារ​ក្តី​លោក កឹម សុខា គឺ​លោក អាង ឧត្តម ដែល​មាន​បទពិសោធន៍​ការពារ​ក្តី​ជនជាប់ចោទ នៅ​សាលា​ក្តី​អន្តរជាតិ ថា​ភាព​រញ៉េរញ៉ៃ អយុត្តិធម៌ និង​រឹតត្បិត​សិទ្ធិ​មេធាវី​នេះ គឺ​កើត​ចេញ​ពី​ការណ៍​ដែល​តុលាការ​ជាតិ អនុវត្ត​ស្តង់ដារ ខុស​ឆ្ងាយ​គ្នា​ខ្លាំង ពី​ស្តង់ដារ​ដែល​អនុវត្ត​នៅ​សាលា​ក្តី​ខ្មែរក្រហម ដែល​ជា​តុលាការ​កូនកាត់ ប៉ុន្តែ​អនុវត្ត​ច្បាប់​ជាតិ​ជា​គោល​ដែរ។

បញ្ហា​មួយ ក្នុងចំណោម​បញ្ហា​ជាច្រើន ដែល​លោក អាង ឧត្ត​ម និង​សហ​មេធាវី​ការពារ​ក្តី​លោក កឹម សុខា លើកឡើង គឺ​បញ្ហា​ទទួលយក​ភស្តុតាង ដែល​តុលាការ​មិន​ព្រម​សម្រេច​ឱ្យ​ដាច់ស្រេច​មួយ​សារ​ឱ្យ​ហើយ មុន​នឹង​ជជែក​ចូល​ដល់​អង្គ​សេចក្តី និង​វែកញែក​ទម្ងន់ និង​តម្លៃ​នៃ​ភស្តុតាង​នោះ​។ ការ​មិន​បើកសវនាការ​មួយ​សារ ដើម្បី​ជជែក​ភាព​ទទួល​យក​បាន​នៃ​ភស្តុតាង​ទាំងនេះ ធ្វើ​ឱ្យ​ភាគី​បន្ត​ដាក់​ភស្តុតាង​ជា​ហូរហែ ដែល​ភស្តុតាង​ខ្លះ ត្រូវ​ភាគី​យក​មក​បង្ហាញ ទាំង​ភ្ញាក់ផ្អើល ព្រោះ​មិនដែល​មាន​ក្នុង​សំណុំរឿង​ពីមុន៖ «ពេលណា​យើង​ព្រលយ​ចង់​លើក​អ្វី​ដែល​មាន​អនុវត្ត​នៅ​សាលា​ក្ដី​ខ្មែរក្រហម សាលាក្ដី​លោក កឹម សុខា នេះ​មិន​ទំនងជា​ទទួលយក​ទេ​។ ខ្ញុំ​មើល​ទៅ​! ដូច្នេះ​ពិបាក​ណាស់​! ខ្ញុំ​ឃើញ​ខុសឆ្គង​ច្រើន​។ បើសិនជា​រឿង​ហ្នឹង នៅតែ​ចេញ​អ៊ីចឹង​ទៀត គឺ​ដំណើរការ​នៅ​ដដែលៗ​! បើ​យើង​យក​ភស្តុតាង​ណា ដែល​យើង​អត់​មាន នៅ​ក្នុង​សំណុំរឿង មក​សួរដេញដោល នឹង​មាន​បញ្ហា​អ៊ីចឹង​ទៀត»

បញ្ហា​រឿង​យក​ភស្តុតាង ដែល​គ្មាន​នៅ​ក្នុង​សំណុំរឿង យក​មក​សួរដេញដោល​លោក កឹម សុខា នេះ ធ្វើ​ឱ្យ​ក្រុម​មេធាវី​លោក កឹម សុខា ជំទាស់ និង​ទាមទារ​ឱ្យ​តុលាការ​ដោះស្រាយ​បញ្ហា​នៃ​ប្រភព​ភស្តុតាង​នេះ ឱ្យ​បាន​ដាច់ស្រេច​ជាមុន​សិន ទើប​អាច​បន្ត​កិច្ច​ដំណើរការ​នីតិវិធី​សួរដេញដោល​លោក កឹម សុខា។ ក្រុម​មេធាវី​ការពារ​ក្តី​លោក កឹម សុខា រក​ឃើញ​ថា ឯកសារ​ចំនួន​ជាង ១​ពាន់​ទំព័រ (១១៩២) ត្រូវ​បាន​ខាង​ភាគី​ចោទ​ប្រកាន់ យក​មក​បង្ហាញ​ក្នុង​តុលាការ ដោយ​ភាគី​លោក កឹម សុខា គ្មាន​ឯកសារ​នោះ​ទាល់តែសោះ។

ក្រុម​មេធាវី​លោក កឹម សុខា ដែល​តតាំង​អំពី​សុក្រិត្យភាព សុចរិត​ភាព និង​តម្លាភាព​នៃ​ការ​ប្រមូល​ភស្តុតាង​បែប​ភ្ញាក់ផ្អើល ដែល​ដាក់​ចូល​ក្នុង​សំណុំរឿង​ដោយ​ភាគី​ចុងចោទ​មិនបាន​ដឹង​នេះ ត្រូវ​បាន​ប្រធាន​ក្រុមប្រឹក្សា​ជំនុំជម្រះ បំបិទមាត់​។ ជា​ការ​តវ៉ា ក្រុម​មេធាវី​ការពារ​ក្ដី​លោក កឹម សុខា ទាំងអស់​នាំគ្នា​ដើរ​ចេញពី​បន្ទប់​សវនាការ ទាំង​កណ្ដាល​ទី។ លោក អាង ឧត្តត ថា ពួក​លោក នៅ​បន្ទប់​សវនាការ​បាន​ប្រយោជន៍​អ្វី បើ​គ្មាន​សិទ្ធិ​និយាយ៖ «យើង​មានរឿង មាន​បញ្ហា​យើង​ចង់​និយាយ ចង់​ពន្យល់ គាត់​បិទមាត់​យើង​អត់​ឱ្យ​និយាយ​។ យើង​នៅ​ធ្វើ​អ្វី​ទៀត បើ​គេ​មិន​ឱ្យ​និយាយ​? មិនអាច​នៅ​អង្គុយ​ទេ។ មេធាវី​មក​និយាយ មក​ថា មក​តតាំង​ហ្នឹងហើយ​។ បើ​គេ​មិន​ឱ្យ​និយាយ​បិទ​យើង​រហូត មិន​ឱ្យ​និយាយ យើង​ត្រូវ​សម្រេច​ចុះចេញ​។ យើង​ធ្វើ​ពហិការ»

ប៉ុន្តែ ការ​ធ្វើ​ពហិការ​នេះ រង​ការ​តិះដៀល ពី​ប្រធាន​ក្រុមប្រឹក្សា​ជំនុំជម្រះ​លោក កូយ សៅ ថា​មេធាវី​ទាំងនេះ មាន​ចរិត​ទំនើង​។ ការ​ដៀលត្មះ​អ្នកច្បាប់​ដូចគ្នា ថា ជា​មេធាវី​ទំនើង​បែបនេះ លោក អាង ឧត្តម ថា​មិន​បង្ហាញ​ពី​សីលធម៌ និង​ភាព​មាន​វិជ្ជាជីវៈ​ជា​អ្នកច្បាប់​នោះ​ទេ៖ «តិះដៀល​យើង​ជា​ភាសា​មិន​សមជា​អ្នកចេះដឹង អ្នកច្បាប់ ថា​យើង​ជា​មេធាវី​ទំនើង​អ៊ីចឹង វា​អត់​សមជា​អ្នកច្បាប់​! រឿង​ហ្នឹង​និយាយ​ក្រៅ​ទៅ កុំ​ឱ្យ​និយាយ​ជា​ផ្លូវការ​អ៊ីចឹង វា​អត់​ត្រឹមត្រូវ​។ សាច​ទឹក​ដាក់​យើង​អ៊ីចឹង បើ​យើង​បាច​ដាក់​វិញ​យ៉ាងម៉េច​? មិន​បាច​ចុះ​បាច​ឡើង​ទេ​? តែ​ខ្ញុំ​អត់​ចង់​បាច​វិញ​ទេ»

ទោះជា​មានការ​រឹតត្បិត​សិទ្ធិ​សេរីភាព​មេធាវី​ការពារ​ក្តី​លោក កឹម សុខា មិន​ឱ្យ​ឡើង​ថ្លែង​ជំទាស់​នឹង​ភាព​មិន​ប្រក្រតី​នៃ​ឯកសារ​ភស្តុតាង​ក៏ដោយ ក៏​តុលាការ​បើ​ទូលាយ​ឱ្យ​ព្រះរាជអាជ្ញា និង​មេធាវី​ការពារ​ក្តី​ឱ្យ​ខាង​រដ្ឋាភិបាល ឡើង​កត់សម្គាល់ ដោយ​គ្មាន​ការ​រឹតត្បិត​នោះ​ទេ។

អ្នកនាំពាក្យ​សមាគម​អាដហុក (Adhoc) លោក ស៊ឹង សែន​ករុណា ដែល​ចូល​តាម​សវនាការ​កាលពី​ថ្ងៃទី ១៣ ខែ កុម្ភៈ​នោះ​ដែរ​ទទួលស្គាល់​ថា រឿង​ខ្លះ គឺជា​កំហុស​របស់​ប្រធាន​ក្រុមប្រឹក្សា​ជំនុំជម្រះ ដោយសារតែ​មិនបាន​ផ្តល់​ឱកាស​ស្មើភាព​គ្នា​ដល់​ភាគី​ទាំងសងខាង​។ លោក​សង្កេត​ឃើញ​ថា ប្រធាន​ក្រុមប្រឹក្សា តែងតែ​យល់ស្រប និង​ផ្តល់​ឱកាស​ច្រើន​ដល់​តំណាង​អយ្យការ និង​មេធាវី​រដ្ឋាភិបាល ដូច្នេះ​ហាក់ដូចជា ដាក់​សម្ពាធ​ទៅលើ​ក្រុម​មេធាវី​លោក កឹម សុខា​។ ម្យ៉ាងវិញទៀត មន្ត្រី​សិទ្ធិមនុស្ស​រូប​នេះ យល់​ថា ប្រធាន​ក្រុមប្រឹក្សា​ជំនុំជម្រះ គួរតែ​ព្យាយាម​សម្របសម្រួល​កុំ​ឱ្យ​មានការ​ប្រើប្រាស់​ពាក្យ​សម្តី​ដែល នាំ​ឱ្យ​មាន​ភាព​តានតឹង​ក្នុង​បន្ទប់​សវនាការ៖ «មិន​គួរ​ណា​ចៅក្រម​ចេះតែ​កាត់ ហើយ​យល់ថា អ្វី​ដែល​ជា​បំណង​មេធាវី​លោក កឹម សុខា ចង់​លើកឡើង គឺជា​រឿង​ដដែល ទាំង​ដែល ពួកគាត់ មិនទាន់​បាន​លើក​ឡើង​ក្នុង​រយៈពេល​មុននឹង ការដែល ពួកគាត់​ដើរចេញ​នោះ​ទេ គួរតែ​ផ្តល់​ឱកាស​ឱ្យ​គាត់​លើកឡើង​មើល​ថា តើ​គាត់​មាន​ចំណុច​អី​លើកឡើង ដើម្បី​បញ្ជាក់​មុន​ធ្វើការ​ផ្ទៀងផ្ទាត់ ឯកសារ​ដើម​ដែល​យក​ពី​ចៅក្រម​ស៊ើបសួរ​នឹង​មក​។ មិន​គួរ​ណា លោក​ធ្វើការ បុរេ​វិនិច្ឆ័យ​ដែល​ជា​អ្វី​មុន​ការ​លើក​ឡើង​របស់​មេធា​វី​លោក កឹម សុខា​នោះ​ទេ»

ទោះជា​យ៉ាងនេះ​ក្តី ខាង​ព្រះរាជអាជ្ញា និង​មេធាវី​ការពារ​រដ្ឋាភិបាល ថា​ក្រុម​មេធាវី​ការពារ​ក្តី​លោក កឹម សុខា មាន​ចេតនា​ពន្យារ​កិច្ច​ដំណើរការ​នីតិវិធី​តុលាការ ទើប​ជំទាស់​រឿង​នេះ​។ ការចោទប្រកាន់​នេះ ត្រូវ​បាន​ក្រុម​មេធាវី​លោក កឹម សុខា បដិសេធ និង​ថា​ភាគី​ម្ខាង​ទៀត​នោះ​ទេ ដែល​មាន​ចេតនា​ពន្យារ​ពេលនេះ ដោយសារតែ​បញ្ហា​មិន​ប្រក្រតី​ផ្សេងៗ រួម​ទាំង​ភស្តុតាង​ភ្ញាក់ផ្អើល​បែបនេះ​ផង។

ក្រោយ​ភាព​តានតឹង និង​ពហិការ​របស់​ក្រុម​មេធាវី​ការពារ​ក្តី​លោក កឹម សុខា​នេះ តុលាការ​បានសម្រេច មិន​បើកសវនាការ​នៅ​សប្ដាហ៍​ទី ៦ នៅ​សប្ដាហ៍​ក្រោយ​នោះ​ទេ ដោយ​ត្រូវ​លើក​ទៅ​ធ្វើ​នៅ​សប្ដាហ៍​បន្ទាប់​មួយទៀត គឺ​ថ្ងៃ​ទី២៦ និង ២៧ ខែ​កុម្ភៈ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល