ខ្មែរនៅអូស្ត្រាលីស្វាគមន៍ និងគាំទ្ររដ្ឋាភិបាល អូស្ត្រាលី ដែលបានអនុម័តច្បាប់ដាក់ទណ្ឌកម្មក្រុមមេដឹកនាំរំលោភសិទ្ធិមនុស្ស ប្រព្រឹត្តអំពើពុករលួយធ្ងន់ធ្ងរ និងបង្កគ្រោះថ្នាក់ដល់ពិភពលោក។ ទោះយ៉ាងណាអ្នកនាំពាក្យបក្សកាន់អំណាចរំពឹងថា ច្បាប់នេះមិនប៉ះពាល់ដល់ មេដឹកនាំឬមន្ត្រីកម្ពុជានោះទេ។
ខ្មែរនៅអូស្ត្រាលីរំពឹងថា មេដឹកនាំកម្ពុជាមួយចំនួន ដែលបានរំលោភសិទ្ធិមនុស្ស ប្រព្រឹត្តអំពើពុករលួយធ្ងន់ធ្ងរនឹងត្រូវរដ្ឋាភិបាលប្រទេសនេះបង្កកទ្រព្យសម្បត្តិ និងហាមឃាត់មិនឲ្យចូលប្រទេសអូស្ត្រាលីជាដើម។
អតីតចៅហ្វាយក្រុងដែនឌឺណុង (Dandenong) និងជាប្រធានសមាគមមួយនៅប្រទេសអូស្ត្រាលី លោក ជា យូហ៊ន ឲ្យវិទ្យុអាស៊ីសេរីដឹងថ្ងៃទី៣ ធ្នូថា សហគមន៍ខ្មែរនៅអូស្ត្រាលីគាំទ្ររដ្ឋាភិបាលអូស្ត្រាលីដែលបានធ្វើច្បាប់ដាក់ទណ្ឌកម្មមេដឹកនាំដែលរំលោភសិទ្ធិមនុស្ស។ រដ្ឋាភិបាលអូស្ត្រាលីមិនទាន់បញ្ចេញឈ្មោះមេដឹកនាំរូបណាខ្លះ ដែលត្រូវទទួលរងទណ្ឌកម្មនេះទេ ក្រោយការប្រកាសដាក់ឲ្យប្រើប្រាស់ច្បាប់ថ្មីនេះ។ លោកថា មេដឹកនាំកំពូលប្រទេសកម្ពុជា ដូចជា លោក ហ៊ុន សែន លោក ស ខេង និង ទៀ បាញ់ អាចនឹងមានឈ្មោះក្នុងបញ្ជីនោះ៖ « ខ្ញុំយល់ឃើញថា ច្បាប់នេះជាច្បាប់មួយល្អសម្រាប់ឲ្យអ្នកធ្វើការងារនៅប្រទេសកម្ពុជា យើងធ្វើការគោរពមិនហ៊ានផ្គើនមិនហ៊ានរំលោភខ្លាំងពេកលើពលរដ្ឋ » ។
ស្រដៀងគ្នានេះដែរ ប្រធានគណបក្សសង្គ្រោះជាតិនៅក្រៅប្រទេស (CNRP-O) លោក ម៉ែន វណ្ណា ឲ្យដឹងដែរថា មេដឹកនាំ និងមន្ត្រីកម្ពុជាមួយចំនួនបានយកលុយខ្មៅ និងទ្រព្យសម្បត្តិដែលបានពីការរំលោភសិទ្ធិមនុស្សមករកស៊ីទិញដី ទិញផ្ទះនៅប្រទេសអូស្ត្រាលី ដូច្នេះលោករំពឹងថា រដ្ឋាភិបាលអូស្ត្រាលីនឹងដាក់ទណ្ឌកម្មលើអ្នកទាំងនោះ៖ « ប្រជាពលរដ្ឋយើងមានសង្ឃឹមច្រើន ដោយសារអី ? ដោយសារទប់ស្កាត់កុំឲ្យមនុស្សខូចមនុស្ស ដែលមានគំនិតបំផ្លាញជាតិរបស់ឯងធ្វើបាបប្រជាពលរដ្ឋកុំឲ្យគាត់ដើរហួសបន្ទាត់ភ្លើងក្រហម » ។
រដ្ឋាភិបាលអូស្ត្រាលីកាលពីថ្ងៃទី២ ខែធ្នូ បានធ្វើវិសោធនកម្មលើច្បាប់ចាស់ដែលអាចហៅជាខ្មែរបានថា ច្បាប់ដាក់ទណ្ឌកម្មស្វយ័តឆ្នាំ២០១១ (Autonomous Sanctions Act 2011) ដើម្បីពង្រីកបែបបទ និងប្រភេទនៃអំពើដែលឈានដល់ការដាក់ទណ្ឌកម្ម ដូចជា ការរីកសាយភាយអាវុធមហាប្រល័យ ការរំលោភសិទ្ធិមនុស្សទាំងកម្រោល ឧក្រិដ្ឋកម្មតាមប្រព័ន្ធអ៊ីនធឺណិត និងអំពើពុករលួយធ្ងន់ធ្ងរជាដើម។ ច្បាប់ថ្មីនេះធ្វើឲ្យអូស្ត្រាលីមានសមត្ថភាពដាក់ទណ្ឌកម្មហិរញ្ញវត្ថុ និងហាមឃាត់បុគ្គល និងអង្គភាពទាំងឡាយណា ដែលជាប់ពាក់ព័ន្ធនឹងអំពើឧក្រិដ្ឋ និងទុច្ចរិតទាំងនោះមិនឲ្យជាន់ទឹកដីអូស្ត្រាលីទោះជននោះប្រព្រឹត្តបទល្មើសទៅទីណាក៏ដោយ។ ច្បាប់ដាក់ទណ្ឌកម្មនេះជាការចូលរួមនៅក្នុងចលនា សាកល គ្លូបល មែគនីតស្គី (Global Magitsky) ដើម្បីប្រឆាំងនឹងក្រុមមេដឹកនាំ និងឧក្រិដ្ឋជន ដែលរំលោភសិទ្ធិមនុស្សធ្ងន់ធ្ងរតាមរយៈការបង្កើតច្បាប់ដាក់ទណ្ឌកម្មពួកគេ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា ការធ្វើច្បាប់ណាមួយរបស់អូស្ត្រាលីជាសិទ្ធិរបស់ប្រទេសនេះ។ លោកនៅតែថ្លែងអះអាងថា មេដឹកនាំរដ្ឋាភិបាលកម្ពុជានឹងមិនត្រូវអូស្ត្រាលីដាក់ទណ្ឌកម្មឡើយ។ លោកយល់ថា មន្រ្តី ឬឈ្មួញកម្ពុជាទៅវិនិយោគនៅប្រទេសអូស្ត្រាលីជាបុគ្គលស្អាតស្អំទើបរដ្ឋាភិបាលប្រទេសនេះអនុញ្ញាតឲ្យអ្នកទាំងនោះរកស៊ីនៅអូស្ត្រាលី៖ « ចំពោះការមានមតិរបស់ខ្មែរមួយចំនួនដែលរស់នៅប្រទេសអូស្ត្រាលីគឺការនិយាយតាមចិត្តគាត់បើការនិយាយគាត់មានប្រសិទ្ធភាពអូស្ត្រាលីមិនបាច់ធ្វើច្បាប់អីទេ។ គ្មានប្រសិទ្ធភាពអីទេ ព្រោះអ្នកទៅរកស៊ីនៅអូស្ត្រាលីទាល់តែរដ្ឋាភិបាលមានអនុញ្ញាតទើបគេទៅរកស៊ីបានបើគ្មានការអនុញ្ញាតទេម៉េចគេរកស៊ីបាន » ។
ទោះមានការអះអាងបែបនេះរបស់អ្នកនាំពាក្យកាន់អំណាចក្ដី ប៉ុន្តែកន្លងទៅ មន្ត្រីជាន់ខ្ពស់កម្ពុជារួមមានកូនប្រសារលោក ហ៊ុន សែន គឺលោក ឌី វិជ្ជា អគ្គនាយកនៃអគ្គនាយកដ្ឋានពន្ធដារគឺលោក គង់ វិបុល ក្មួយលោក ហ៊ុន សែន គឺលោក ហ៊ុន តូ និងមន្រ្តីយោធាផ្សេងទៀតបានប្រព្រឹត្តអំពើពុករលួយយកលុយរាប់លានដុល្លារទៅទិញដី ទិញផ្ទះនិងបើកក្រុមហ៊ុននៅប្រទេស អូស្ត្រាលី។ ប្រធានសមាគមខ្មែរនៅអូស្ត្រាលី លោក ជា យូហ៊ន ឲ្យដឹងថា ពេលនេះក្រុមការងារលោក រួមមាន មេធាវី សមាជិកសភា និងតំណាងសមាគមនៅតាមរដ្ឋនានា នៃប្រទេសអូស្ត្រាលីកំពុងស្រង់បញ្ជីឈ្មោះមេដឹកនាំ និងមន្ត្រីបញ្ជូនទៅរដ្ឋាភិបាលអូស្ត្រាលី ដើម្បីស្នើឲ្យដាក់ទណ្ឌកម្មអ្នកទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។