បេក្ខជនប្រឡងជាប់សិស្សចៅក្រមជំនាន់ទី១០ នៃសាលាភូមិន្ទចៅក្រម នាំគ្នាផ្ដិតមេដៃប្ដឹងបកបេក្ខជនម្នាក់ ដែលមិនសុខចិត្តនឹងលទ្ធផលប្រឡង និងទាមទារឲ្យរដ្ឋមន្ត្រីក្រសួងយុត្តិធម៌ ចាត់វិធានការ។
លោក គង់ ប៊ុនរិទ្ធិ ដែលកំពុងជាប់បណ្ដឹងនៅតុលាការផងនោះ ស្វាគមន៍ពាក្យប្ដឹងនេះ ដើម្បីឲ្យរដ្ឋមន្ត្រីមានឱកាសសើរើលទ្ធផលប្រឡងឡើងវិញ។
បេក្ខជនជ័យលាភី ជាប់សិស្សចៅក្រមជំនាន់ទី១០ ចំនួន ៥៥នាក់ ធ្វើញត្តិ អះអាងថា ដំណើរការប្រឡងប្រជែងគ្រប់ដំណាក់កាលទាំងអស់ មានភាពប្រក្រតី និងមានការចូលរួមសង្កេតការណ៍គ្រប់ដំណាក់កាលនៃអង្គភាពប្រឆាំងអំពើពុករលួយទៀតផង។
ក្នុងញត្តិ ចុះថ្ងៃទី៣ កុម្ភៈ ក្រុមបេក្ខជនជាប់សិស្សចៅក្រម ស្នើសុំឲ្យរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍនា ចាត់វិធានការ ចំពោះបុគ្គលតវ៉ានឹងលទ្ធផលប្រឡង គឺ លោក គង់ ប៊ុនរិទ្ធិ ដោយចោទថា លោក គង់ ប៊ុនរិទ្ធិ បង្ហោះវីដេអូឃ្លិប បរិហារកេរ្តិ៍ បង្កាច់បង្ខូចកិត្តិយស និងសេចក្ដីថ្លៃថ្នូររបស់សិស្សចៅក្រមជាប់ជ័យលាភីទាំង៥៥នាក់ និងការធ្វើឲ្យសាធារណៈជនបាត់ជំនឿទុកចិត្តលើការរៀបចំការប្រឡងប្រជែងសិស្សចៅក្រម ក្រោមវិស័យរបស់ក្រសួងយុត្តិធម៌។
អាស៊ីសេរី បានព្យាយាមសុំការបញ្ជាក់ពីក្រុមបេក្ខជនជ័យលាភីសិស្សចៅក្រមជំនាន់ទី១០ ដែលបានផ្ដិតមេដៃ ប្រឆាំង លោក គង់ ប៊ុនរិទ្ធិ ប៉ុន្តែបេក្ខជនខ្លះ បានចុចផ្ដាច់ទូរស័ព្ទ ក្រោយពេលអ្នកយកព័ត៌មាន បានណែនាំខ្លួនរួច។ ទោះជាយ៉ាងណា បេក្ខជនជ័យលាភីម្នាក់ សុំស្នើមិនឲ្យបញ្ចេញឈ្មោះ ឲ្យដឹងថា ពួកគេមិនបានដឹងពីរឿងញត្តិនោះទេ គ្រាន់តែទទួលបានតគ្នា និងតម្រូវឲ្យមានការផ្ដិតមេដៃ។ បេក្ខជនរូបនេះ សុំមិនអត្ថាធិប្បាយបន្ថែមទៀតឡើយ។
បេក្ខជនតវ៉ានឹងលទ្ធផលប្រឡងប្រជែងសិស្សចៅក្រមជំនាន់ទី១០ លោក គង់ ប៊ុនរិទ្ធិ យល់ថា ញត្តិរបស់ក្រុមសិស្សចៅក្រមទាំង ៥៥នាក់នោះ ជាការរកយុត្តិធម៌សម្រាប់លោក។ លោក ស្វាគមន៍ការដាក់ញត្តិនេះ ទៅរដ្ឋមន្ត្រីក្រសួងយុត្តិធម៌ ដើម្បីទទួលបានភាពយុត្តិធម៌ ក្នុងការប្រឡងប្រជែង៖ « ខ្ញុំបែរជាអរគុណញត្តិគាំទ្រមួយហ្នឹង ទៅវិញ ដែលកន្លងមកពួកខ្ញុំមិនដែលទទួលបានការគាំទ្របែបហ្នឹងទេ។ ពេលនេះ សិស្សចៅក្រមជំនាន់ទី១០ ដែលគាត់បានជាប់ស្ថាពរហើយនោះ គាត់បែរជាធ្វើសកម្មភាពមួយហ្នឹង ជាមួយពួកយើងខ្ញុំ។ ខ្ញុំពិតជាសប្បាយចិត្តខ្លាំងណាស់។ តាមរយៈអាស៊ីសេរី នេះផងដែរ ខ្ញុំក៏សុំអរគុណ ដល់សិស្សចៅក្រមជំនាន់ទី១០ ទាំង៥៥រូប ដែលបានធ្វើញត្តិហ្នឹងផងដែរ»។
កាលពីថ្ងៃទី២៦ មករា លោក គង់ ប៊ុនរិទ្ធិ អះអាងថា លោកបានរកឃើញថា ការប្រឡងប្រជែងសិស្សចៅក្រមជំនាន់ទី១០ មានភាពមិនប្រក្រតី ដោយអំពើពុករលួយ ជាប្រព័ន្ធ។ ភាពមិនប្រក្រតី នោះ លោក គង់ ប៊ុនរិទ្ធិ ទទួលបានព័ត៌មានថា រដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍនា បានដាក់បញ្ជាឲ្យមន្ត្រីសរុប ៥នាក់ ត្រូវប្រមូលប្រាក់ពីការប្រឡងនេះ ឲ្យបាន ៣លាន (៣.០០០.០០០) ដុល្លារអាមេរិក។ ក្នុងនោះ មានខ្លះ សូកលុយចន្លោះពី ៨ម៉ឺន (៨០.០០០) ដល់ ១៥ម៉ឺន (១៥០.០០០) ដុល្លារ ហើយមានខ្លះទៀត សូកលុយតាំងពីមុនការប្រឡងកន្លះឆ្នាំមកម្ល៉េះ។ លោក ស្នើសុំឲ្យអាជ្ញាធរមានសមត្ថកិច្ចស៊ើបអង្កេតករណីនេះ ដោយបង្ហាញសន្លឹកកិច្ចការ បង្ហាញពិន្ទុផ្ទាល់មាត់ ដើម្បីបញ្ជាក់ភាពស្អាតស្អំនៃការប្រឡងនេះ។
អាស៊ីសេរី បានព្យាយាមទូរស័ព្ទសុំការបញ្ជាក់ពីនាយកសាលាភូមិន្ទចៅក្រម លោក កេង សុម៉ារិទ្ធិ និង អ្នកនាំពាក្យក្រសួងយុត្តិធម៌ លោក ជិន ម៉ាលីន ច្រើនថ្ងៃហើយ តែពួកលោក មិនទទួលទូរស័ព្ទ។ ចំណែកជំនួយការរដ្ឋមន្ត្រីក្រសួងយុត្តិធម៌ និងជាអគ្គនាយករង នៃអគ្គនាយកដ្ឋានកិច្ចការរដ្ឋបាល និងហិរញ្ញវត្ថុ លោក ប៉ុនយ៉ៃ ណារិន្ទ ដែលមានឈ្មោះ ជាបុគ្គលម្នាក់ ក្នុងចំណោម៥នាក់ មានសិទ្ធិទទួលលុយ និងសម្រេចឲ្យបេក្ខជនជាប់ ជាសិស្សចៅក្រមជំនាន់ទី១០ មិនទទួលទូរស័ព្ទ នៅថ្ងៃទី៤ កុម្ភៈ។
បើទោះយ៉ាងណា នាយកសាលាភូមិន្ទចៅក្រម លោក កេង សុម៉ារិទ្ធិ ធ្លាប់ប្រាប់សារព័ត៌មានក្នុងស្រុក (WMC) ថា ការប្រឡងប្រជែងសិស្សចៅក្រមជំនាន់ទី១០ មានភាពយុត្តិធម៌ត្រឹមត្រូវ ប៉ុន្តែ លោក គង់ ប៊ុនរិទ្ធិ ទេ ដែលគ្មានសមត្ថភាពប្រឡងជាប់៖ « គឺគាត់ឆ្លៀតឱកាសនៅពេលដែលមានការវាយប្រហារទៅលើស្ថាប័នរាជបណ្ឌិតសភា ( វិជ្ជាជីវៈតុលាការ ) ថា ចៅក្រមអាយុ ២០ឆ្នាំជាប់។ ទី២ មកទៀត គឺគាត់ឆ្លៀតឱកាស នៅពេលដែល គាត់អស់សិទ្ធិប្រឡង៣ដងហើយ គាត់ឆ្លៀតឱកាសធ្វើរឿងឲ្យល្បឺអ៊ីចឹង ដើម្បីវាយប្រហារ ដើម្បីតវ៉ា។ ដែលរឿងមួយទៀត ខ្ញុំមើលឃើញថា ការសរសេររបស់គាត់ គឺសរសេរមិនត្រូវទេ មានអ្នក Screen Sort ថតមកក្នុងការផុសរបស់គាត់ហ្នឹង ហើយមួយទៀត ការបង្ហាញអាកប្បកិរិយារបស់គាត់ហ្នឹង មិនទទួលយកការណែនាំរបស់គេ ហើយដើរចេញទាំងឈ្លើយហ្នឹង ខ្ញុំគិតថា អាហ្នឹង ជាចំណុចមួយ ដែលមិនសក្ដិសមជាអ្នកច្បាប់»។
នាយកប្រតិបត្តិអង្គការសម្ព័ន្ធគណនេយ្យសង្គមកម្ពុជា លោក សន ជ័យ ឲ្យដឹងថា ក្រុមបេក្ខជនតវ៉ាលទ្ធផលសិស្សចៅក្រមជំនាន់ទី១០ ចំនួន៤ នាក់ ក៏បានរកកិច្ចអន្តរាគមន៍ពីខាងអង្គការលោកដែរ។ លោកយល់ថា ជាការមិនសមហេតុផល នៅពេលក្រុមបេក្ខជនជាប់ជ័យលាភីសិស្សចៅក្រម នាំគ្នាតវ៉ាប្រឆាំង នឹងអ្នកដែលកំពុងទាមទារ រកយុត្តិធម៌។ លោក សន ជ័យ ថា សិស្សចៅក្រមទាំង៥៥នាក់ គួរនាំគ្នាជំរុញឲ្យគណៈកម្មការរៀបចំការប្រឡង ឲ្យបង្ហាញតម្លាភាព តាមការទាមទាររបស់ លោក គង់ ប៊ុនរិទ្ធិ ទើបជាការប្រសើរ និងជាដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។