លោក គង់ រ៉ៃយ៉ា អះអាង​ថា​គ្មាន​កំហុស​ ក្រោយ​ពេល​តុលាការ​ដោះលែង​ឲ្យ​នៅ​ក្រៅ​ឃុំ​បណ្ដោះ​អាសន្ន

ដោយ ថន ថារ៉ូ
2019-11-28
អ៊ីម៉ែល
មតិ
Share
បោះពុម្ព
យុវជន កែម ឡីនិយម លោក គង់ រ៉ៃយ៉ា ពេល​ចេញ​ពី​ពន្ធនាគារ​ព្រៃ​ស នៅ​ល្ងាច​ថ្ងៃ​ទី២៩ ខែ​វិច្ឆិកា ឆ្នាំ២០១៩។
យុវជន កែម ឡីនិយម លោក គង់ រ៉ៃយ៉ា ពេល​ចេញ​ពី​ពន្ធនាគារ​ព្រៃ​ស នៅ​ល្ងាច​ថ្ងៃ​ទី២៩ ខែ​វិច្ឆិកា ឆ្នាំ២០១៩។
រូប៖ RFA

តុលាការ​ក្រុង​ភ្នំពេញ បាន​សម្រេច​ដោះលែង​យុវជន កែម​ ឡី និយម លោក គង់ រ៉ៃយ៉ា ឲ្យ​នៅ​ក្រៅ​ឃុំ​បណ្ដោះ​អាសន្ន នៅ​ថ្ងៃ​ទី​២៩ វិច្ឆិកា ប៉ុន្តែ​បាន​ភ្ជាប់​លក្ខខណ្ឌ​តឹងរ៉ឹង​មួយ​ចំនួន ឲ្យ​លោក​អនុវត្ត​កំឡុង​ពេល​នៅ​ក្រៅ​ឃុំ​បណ្ដោះ​អាសន្ន​នេះ។

លោក គង់ រ៉ៃយ៉ា ប្រាប់​អាស៊ី​សេរី ក្រោយ​ការ​ដោះលែង​នៅ​ល្ងាច​ថ្ងៃ​ទី២៩ វិច្ឆិកា​ថា លោក​គួរ​តែ​បាន​នៅ​ក្រៅ​ឃុំ​យូរ​ហើយ មិនមែន​ទើបតែ​ពេល​នេះ​ទេ ព្រោះ​លោក​មាន​កាតព្វកិច្ច​ច្រើន​ត្រូវ​បំពេញ ខណៈ​លោក​គ្មាន​បាន​ប្រព្រឹត្តិ​កំហុស​អ្វី​សោះ។​ ទោះ​យ៉ាង​ណា លោក គង់ រ៉ៃយ៉ា ប្រាប់​ថា លោក​គ្មាន​ជម្រើស​អ្វី ក្រៅ​ពី​​​ធ្វើ​តាម​​លក្ខខណ្ឌ​របស់​តុលាការ​ទេ។

លោក គង់ រ៉ៃយ៉ា អះអាង​ទៀត​ថា ការ​ចាប់​ខ្លួន​លោក ជា​រឿង​មិន​ត្រឹមត្រូវ ព្រោះ​ការលក់​អាវ​យឺត មាន​ទស្សនៈ​បណ្ឌិត កែម ឡី ដែល​គេ​ទទួល​ស្គាល់​រួច​ទៅ​ហើយ លោក​មិន​បាន​ញុះញង់​អ្វី​ឡើយ។ លោក​ថា ទស្សនៈ​របស់​បណ្ឌិត កែម ឡី មិន​មែន​ជា​សារ​ញុះញង់​ទេ ព្រោះ​ពលរដ្ឋ​ជា​ច្រើន​បាន​ចង​ក្រង បោះពុម្ព​ជា​សៀវភៅ ផលិត​ជា​បដា និង​បោះ​ពុម្ព​អាវ​យឺត​ពាក់​ច្រើន​គ្នា​ជា​ហូរហែ​រួច​ហើយ តែ​មិន​រង​ការ​ចោទ​ឡើយ៖ «បាទ! ខ្ញុំ​គិត​ថា ខ្ញុំ​អត់​ប្រព្រឹត្តិ​កំហុស ដូច​ការ​ចោទ​ប្រកាន់​ទេ ហើយ​បើ​ខាង​តុលាការ​ ក៏​ដូចជា​អាជ្ញាធរ ជា​ពិសេស​អាជ្ញាធរ បើ​គិត​ថា​ ខ្ញុំ​មាន​កំហុស​ គួរ​តែ​ប្រាប់​ខ្ញុំ​ផង មុន​នឹង​ចាត់​វិធានការ​ផ្នែក​ច្បាប់ ចំពោះ​ខ្ញុំ ពីព្រោះ​ ដូច​ខ្ញុំ​បាន​បញ្ជាក់​អ៊ីចឹង ថា ខ្ញុំ​ធ្វើ​តែ​តាម​ក្រោយ​គេ​ទេ ដោយសារ​ខ្ញុំ​ឃើញ អ្នក​មុនៗ​ធ្វើ​អត់​មាន​បញ្ហា​អ្វី បាន​ខ្ញុំ​ធ្វើ​តាម​ក្រោយ​គេ។ មិនមែន​ធ្វើ​តាម​តែ​ចិត្ត​នឹក​ឃើញ​នោះ​ឡើយ»

យុវជន កែម ឡីនិយម គង់ រ៉ៃយ៉ា ត្រូវ​បាន​ចៅក្រម​​សាលាដំបូង​រាជធានី​ភ្នំពេញ​ សម្រេច​​ដោះលែង​​ឲ្យ​នៅ​ក្រៅ​ឃុំ​​​បណ្ដោះអាសន្ន នៅ​ព្រឹក​ថ្ងៃ​ទី២៩ ខែ​វិច្ឆិកា។ ទោះ​លោក គង់ រ៉ៃយ៉ា ត្រូវ​បាន​​​ដោះលែង​ឱ្យ​នៅ​ក្រៅ​ឃុំ​ជា​បណ្ដោះអាសន្ន  តែ​តុលាការ​​បាន​​ដាក់​​លក្ខខណ្ឌ​មួយ​ចំនួន​​​ដូច​ជា មិន​ឲ្យ​ចាកចេញ​ពី​ប្រទេស​កម្ពុជា ត្រូវ​បង្ហាញ​ខ្លួន​នៅ​មុខ​តុលាការ​ជា​រៀងរាល់​ខែ មិន​ឱ្យ​ចូលរួម​ធ្វើ​សកម្មភាព និង​បណ្ដាញ​សកម្មភាព​ក្នុង​សង្គម និង​ត្រូវ​សហការ​ជាមួយ​តុលាការ​ជានិច្ច។

ចៅក្រម អ្នក​ស្រី អ៊ុក រ៉េតគន្ធា ​ប្រកាស​ការ​ដោះលែង​ឲ្យ​នៅ​ក្រៅ​ឃុំ​បណ្ដោះ​អាសន្ន​នៅ​ព្រឹក​ថ្ងៃ​ទី​២៩ វិច្ឆិកា​ ជា​​លទ្ធផល​ពី​សវនាការ​លើ​សំណើ​សុំ​នៅ​ក្រៅ​ឃុំ​ ជុំ​ទី​ពីរ​ របស់​លោក គង់ រ៉ៃយ៉ា កាល​ពី​ថ្ងៃ​ទី២៦ ខែ​វិច្ឆិកា។ នៅ​ក្នុង​ពេល​ធ្វើ​សវនាការ កាល​ពី​ថ្ងៃ​ទី​២៦ វិច្ឆិកា លោក គង់ រ៉ៃយ៉ា ប្រាប់​​ចៅក្រម​ ​ថា មូលហេតុ​ ដែល​លោក​ត្រូវ​ការ​រស់​នៅ​ក្រៅ​ឃុំ​បណ្ដោះអាសន្ន ព្រោះ​លោក​ឈឺ​ឆ្អឹង​ខ្នង និង​មាន​ជំងឺ​ក្រពះ ហើយ​ជា​និស្សិត​ត្រូវ​ការ​បន្ត​ការ​សិក្សា​ផង និង​ត្រូវ​រក​ស៊ី​ចិញ្ចឹម និង​ថែ​រក្សា​ម្ដាយ​មេ​ម៉ាយ​ចាស់​ជរា ព្រម​ទាំង​ភរិយា និង​កូនស្រី​ នៅ​តូច​​ម្នាក់។

លោក គង់ រ៉ៃយ៉ា គឺ​ជា​អ្នក​ទោស​នយោបាយ​ទី​៧៦ ដែល​ត្រូវ​បាន​តុលាការ​ ​ដោះលែង​ឲ្យ​នៅ​ក្រៅ​ឃុំ​បណ្ដោះ​អាសន្ន​ ក្រោយ​ពេល​មេ​ដឹកនាំ​របប​ក្រុង​ភ្នំពេញ លោក ហ៊ុន សែន បញ្ជា​ឲ្យ​​ដោះលែង​អ្នក​ទោស​នយោបាយ និង​បញ្ឈប់​ការ​ធ្វើ​ទុក្ខ​បុក​ម្នេញ សកម្មជន និង​មន្ត្រី​មូលដ្ឋាន​របស់​គណបក្ស​ប្រឆាំង។ លោក​ត្រូវ​បាន​សមត្ថកិច្ច​រាជធានី​ភ្នំពេញ ​ចាប់​ខ្លួន​ នៅ​ក្នុង​ផ្ទះ​ជួល​មួយ​កន្លែង កាល​ពី​​ដើម​ខែ​កក្កដា ដោយសារ​លក់​អាវ​យឺត មាន​រូបភាព និង​ទ្រឹស្ដី​បណ្ឌិត​ កែម ឡី។ របប​ក្រុង​ភ្នំពេញ បាន​ចោទ​ថា យុវជន​រូប​នេះ មាន​ចេតនា​ញុះញង់​ពលរដ្ឋ​ តាម​រយៈ​ការ​លក់​អាវ​យឺត​នេះ។

អ្នក​នាំ​ពាក្យ​សមាគម​អាដហុក លោក ស៊ឹង សែន​ករុណា មើល​ឃើញ​ថា ការ​ចាប់​ខ្លួន និង​ដោះលែង​យុវជន​កែម​ឡី និយម គង់ រ៉ៃយ៉ា ឲ្យ​នៅ​ក្រៅ​ឃុំ​​បណ្ដោះ​អាសន្ន ជា​រឿង​នយោបាយ។ អ្នក​ឃ្លាំ​មើល​សិទ្ធិ​មនុស្ស​រូប​នេះ ក៏​យល់​ឃើញ​ដូច​លោក គង់ រ៉ៃយ៉ា​ ដែរ គឺ​ការ​ដោះលែង ដោយ​មិន​ទម្លាក់​បទ​ចោទ ជា​រឿង​មិន​ត្រឹមត្រូវ ព្រោះ​យុវជន​រូប​នេះ ​រង​ការ​ចាប់​ខ្លួន ដោយ​គ្មាន​ប្រព្រឹត្តិ​កំហុស គឺ​ដោយ​សារ​​ការ​បញ្ចេញ​មតិ៖ «ការ​ដែល​មាន​សេរីភាព​នេះ​ តាម​ពិត​វា​ជា​ជំហាន​មួយ​ដែល​ល្អ​ហើយ។ តែ​យើង​ចង់​ឲ្យ​ឃើញ​នោះ គឺ​ចង់​ឲ្យ​តុលាការ​អនុវត្ត​ច្បាប់​ឲ្យ​បាន​ត្រឹម​ត្រូវ ព្រោះ​យើង​ចង់​ថា បើ​រឿង​នេះ មិន​មាន​កំហុស​ផ្នែក​ផ្លូវ​ច្បាប់​ទេ ត្រូវ​តែ​ទម្លាក់​ការ​ចោទ​ប្រកាន់​ដើម្បី​ផ្ដល់​នូវ​សេរីភាព​ពេញ​លេញ ទៅ​ដល់​រូប​គាត់ ដើម្បី​ធ្វើ​ការ​ប្រកប​របរ​ចិញ្ចឹម​គ្រួសារ​ណា ហើយ​នឹង​ធ្វើ​កិច្ច​ការងារ​សង្គម​ផ្សេងៗ​ទៀត។ អ៊ីចឹង បើ​សិន​ជា​ការ​ដោះលែង​នៅ​ក្រៅ​ឃុំ​ ហើយ​ដាក់​លក្ខខណ្ឌ បែប​នេះ ខ្ញុំ​គិត​ថា​ មិនមែន​ជា​រឿង​មួយ​អនុវត្ត​បាន​ត្រឹមត្រូវ និង​យុត្តិធម៌​សម្រាប់​គាត់​នៅ​ឡើយ​ទេ​បាទ»

លោក គង់ រ៉ៃយ៉ា ធ្លាប់​ជាប់​ពន្ធនាគារ​រយៈ​ពេល ១៨ខែ​ម្ដង​រួច​ហើយ កាល​ពី​ឆ្នាំ២០១៦ ដោយសារ​របប​ក្រុង​ភ្នំពេញ​ ចោទ​ថា​ លោក​បាន​អំពាវនាវ​ឲ្យ​មាន​ការ​ធ្វើ​បដិវត្ត​ពណ៌ ​តាម​បណ្ដាញ​សង្គម​ហ្វេសប៊ុក (facebook)។ ប៉ុន្តែ​ អ្នក​ច្បាប់ និង​អ្នក​ឃ្លាំមើល​សិទ្ធិ​មនុស្ស ហៅ​ការ​​ចាប់​ខ្លួន យុវជន​គង់ រ៉ៃយ៉ា ពេល​នោះ​ថា ជា​ការ​រំលោភ​សិទ្ធិ​មនុស្ស​ដូច​ករណី​លក់​អាវ​យឺត មាន​រូប​បណ្ឌិត កែម ឡី​ ដែរ ព្រោះ​ការ​អំពាវនាវ​របស់​យុវជន​ គង់ រ៉ៃយ៉ា ពេល​នោះ ​​មិន​ទាន់​មាន​អំពើ ឬ​សកម្មភាព​ ប្រឆាំង​រដ្ឋាភិបាល​កើត​ឡើង​ឡើយ៕

(រថយន្ត​ដឹក​យុវជន គង់ រ៉ៃយ៉ា និង​អ្នកជាប់​ឃុំ​​ផ្សេង​ទៀត​ មក​សាលាដំបូង​រាជធានី​ភ្នំពេញ នៅ​ព្រឹក​ថ្ងៃ​ទី២៩ ខែ​វិច្ឆិកា ឆ្នាំ២០១៩។ រូប៖ RFA)