ច្បាប់​សំខាន់ៗ​ដែល​កើត​ឡើង​ក្នុង​ឆ្នាំ​២០១៥​និង​ច្បាប់​ដែល​គ្រោង​បង្កើត​ឆ្នាំ​២០១៦

ដោយ​ សុ ជីវី
2015-12-31
អ៊ីម៉ែល
មតិ
Share
បោះពុម្ព
តំណាងរាស្ត្រ​គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា លើក​ដៃ​អនុម័ត​ច្បាប់​បោះ​ឆ្នោត​ថ្មី កាល​ពី​ថ្ងៃ​ទី​១៩ មីនា ២០១៥ នា​វិមាន​រដ្ឋ​សភា។
តំណាងរាស្ត្រ​គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា លើក​ដៃ​អនុម័ត​ច្បាប់​បោះ​ឆ្នោត​ថ្មី កាល​ពី​ថ្ងៃ​ទី​១៩ មីនា ២០១៥ នា​វិមាន​រដ្ឋ​សភា។
RFA/Tin Zakariya

ឆ្នាំ​២០១៥ ជា​ឆ្នាំ​កំណើត​នៃ​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) និង​ច្បាប់​ពាក់ព័ន្ធ​ការ​បោះឆ្នោត។ ចំណែក​អង្គការ​មិនមែន​រដ្ឋាភិបាល​វិញ ក៏​រិះគន់​ការ​អនុម័ត​​ច្បាប់​ក្នុង​ឆ្នាំ​នេះ​ថា រឹតត្បិត​សកម្មភាព​ការងារ​ពួក​គេ។

តើ​បទដ្ឋាន​ច្បាប់​សំខាន់ៗ​ដែល​បង្កើត​ក្នុង​ឆ្នាំ​២០១៥ នេះ​មាន​អ្វី​ខ្លះ និង​ផ្ដល់​ប្រយោជន៍​យ៉ាង​ណា​ខ្លះ? តើ​ច្បាប់​ណា​ខ្លះ​ដែល​កំពុង​ចោទ​ក្ដី​បារម្ភ​ទៅ​ឆ្នាំ​២០១៦ ខាង​មុខ?

នៅ​ដើម​ឆ្នាំ​២០១៥ ច្បាប់​សំខាន់ៗ​មួយ​ចំនួន​ពាក់ព័ន្ធ​នឹង​ការ​បោះឆ្នោត​ត្រូវ​បាន​រដ្ឋសភា​អនុម័ត បើ​ទោះ​ជា​ក្រុម​អង្គការ​មិន​មែន​រដ្ឋាភិបាល​រិះគន់​ថា មាន​ស្ថានភាព​អាក្រក់​ក្ដី។

ច្បាប់​ទាំង​នោះ​ប្រសូត​ចេញ​ពី​ការ​ចរចា​ទ្វេភាគី​រវាង​គណបក្ស ដែល​មាន​អាសនៈ​នៅ​ក្នុង​សភា​គឺ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ។

ខុស​ប្លែក​ពី​ច្បាប់​មួយ​ចំនួន​ទៀត ច្បាប់​បង្កើត គ.ជ.ប និង​ច្បាប់​ទាក់ទង​នឹង​ការ​បោះឆ្នោត​ក្នុង​ពេល​ដែល​សភា​អនុម័ត​នោះ គឺ​មាន​សមាជិក​សភា​មក​ពី​បក្ស​ទាំង​២ បាន​បោះ​ឆ្នោត​គាំទ្រ។ នោះ​ក៏​ដោយសារ​តែ​បក្ស​ទាំង​២ បាន​ចរចា​បង្កើត​ឡើង ចង​ភ្ជាប់​ដោយ​វប្បធម៌​សន្ទនា ដែល​ជា​ពាក្យ​ដ៏​ពេញ​និយម​ប្រើប្រាស់​សម្រាប់​គណបក្ស​ទាំង​២​ក្នុង​ឆ្នាំ​២០១៥។

តំណាងរាស្ត្រ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ កាល​ពី​ថ្ងៃ​ទី​១៩ ខែ​មីនា បាន​អនុម័ត​ច្បាប់​ស្ដីពី​ការ​ជ្រើសតាំង​តំណាងរាស្ត្រ និង​ច្បាប់​ស្ដីពី​ការ​ប្រព្រឹត្ត​ទៅ​នៃ​គណៈកម្មាធិការ​ជាតិ​រៀបចំ​ការ​បោះ​ឆ្នោត ដែល​មាន​សំឡេង​គាំទ្រ ១០១ លើ ១០១​សំឡេង។

ប្រធាន​គណបក្ស​សង្គ្រោះ​ជាតិ លោក សម រង្ស៊ី បាន​ថ្លែង​ថា សភា​ពុំ​មាន​ការ​ដេញ​ដោល​ច្បាប់​នេះ​ដ្បិត​បាន​ជជែក​គ្រប់​គ្រាន់​ហើយ៖ «ពីព្រោះ​នេះ​ជា​ការ​ព្រមព្រៀង​គ្នា ដែល​មាន​ការ​សម្បទាន​ទៅ​វិញ​ទៅ​មក។ ពី​ដើម​ទី​យក​តែ​គោលជំហរ​គណបក្ស​សង្គ្រោះ​ជាតិ គឺ​យើង​ចង់​បាន​ល្អ​មួយ​រយ​ភាគ​រយ​ដូច​សង្គម​ស៊ីវិល​ចង់​បាន​អ៊ីចឹង ប៉ុន្តែ​យើង​មិន​អាច​សម្រេច​អ្វី​ទាំង​ស្រុង​ម្នាក់​ឯង​ទេ វា​មាន​ការ​ដូរ​គ្នា​ទៅ​វិញ​ទៅ​មក»

បើ​ទោះ​ជា​យ៉ាង​ណា នៅ​មុន​ពេល​បង្កើត​ច្បាប់​ទាំង​នេះ តុលាការ​បាន​កោះ​ហៅ​លោក កឹម សុខា អនុ​ប្រធាន​គណបក្ស​ប្រឆាំង និង​មន្ត្រី​បក្ស​រួម​នឹង​អ្នក​គាំទ្រ​ផង ទាក់​ទិន​នឹង​សំណុំ​រឿង​អំពើ​ហិង្សា​នៅ​ក្បែរ​ទីលាន​ប្រជាធិបតេយ្យ​កាល​ពី​ឆ្នាំ​២០១៤។

ក្រុម​អង្គការ​មិន​មែន​រដ្ឋាភិបាល​ដែល​ធ្វើ​ការងារ​ទាក់ទង​នឹង​ការ​បោះឆ្នោត​រិះគន់​ថា ច្បាប់​នេះ​កាន់តែ​អាក្រក់ ក្នុង​នោះ​ក៏​បាន​រឹតត្បិត​សេរីភាព​របស់​ក្រុម​អង្គការ​មិន​មែន​រដ្ឋាភិបាល។ ពួកគេ​បាន​ទាមទារ​អោយ​កែប្រែ ឬ​ដក​ចេញ​មាត្រា​មួយ​ចំនួន ប៉ុន្តែ​ត្រូវ​បដិសេធ។

មិន​យូរ​ប៉ុន្មាន​គណៈកម្មាធិការ​ជាតិ​រៀបចំ​ការ​បោះឆ្នោត ក៏​ត្រូវ​បង្កើត​ឡើង​តាម​ច្បាប់។ ក្បាល​ម៉ាស៊ីន​ដឹកនាំ​មាន​សមាសភាព ៩​រូប ដែល​ត្រូវ​បាន​ជ្រើស​ចេញ​ពី​គណបក្ស​ម្ខាងៗ​ចំនួន ៤​នាក់ និង​មក​ពី​អង្គការ​មិនមែន​រដ្ឋាភិបាល​មួយ​រូប។

មុន​នឹង​មាន​ការ​ព្រមព្រៀង​គ្នា លោក ហ៊ុន សែន ធ្លាប់​ព្រមាន​ថា នឹង​រក្សា គ.ជ.ប ចាស់​ប្រសិន​បើ​គណបក្ស​ប្រឆាំង​បន្ត​ជំទាស់​សមាជិក​ទី​៩ នៃ គ.ជ.ប នេះ៖ «បើ​សិន​ជា​មិន​អាច​ឯកភាព​គ្នា ទុក​ឯកឧត្ដម អ៊ឹម សួស្ដី បន្ត​ធ្វើ​ប្រធាន គ.ជ.ប ទៅ កុំ​ពិបាក​ពេក! អា​ថ្មី​មិន​ទាន់​ចេញ អា​ចាស់​បន្ត រឿង​ហ្នឹង​តែ​ប៉ុណ្ណឹង​ឯង ហើយ​កុំ​ថា​ចាញ់​ប្រៀប ឬ​មិន​ចាញ់​ប្រៀប ទុន​របស់​យើង​ប៉ុណ្ណឹង​កុំ​ទារ​ភាគហ៊ុន​ច្រើន​ពេក!»

ច្បាប់​ស្ដីពី​ការ​បោះ​ឆ្នោត​ជ្រើសរើស​ក្រុមប្រឹក្សា​ឃុំ សង្កាត់ ក៏​ត្រូវ​បាន​អនុម័ត ​នៅ​ថ្ងៃ​ទី​៣០ ខែ​តុលា ពោល​គឺ​នៅ​មួយ​សប្ដាហ៍​ក្រោយ​ពេល​អ្នក​តំណាងរាស្ត្រ​បក្ស​ប្រឆាំង​ពីរ​រូប​ត្រូវ​ក្រុម​អ្នក​តវ៉ា​វាយ​ដំ​នៅ​រដ្ឋសភា​ក្នុង​ពេល​តវ៉ា​ទម្លាក់ លោក កឹម សុខា ពី​តំណែង​អនុ​ប្រធាន​ទី​១​រដ្ឋ​សភា។

ការ​អនុម័ត​ច្បាប់​នេះ ធ្វើ​ឡើង​ដោយ​ពុំ​មាន​ការ​ចូល​រួម​ពី​តំណាងរាស្ត្រ​បក្ស​ប្រឆាំង​ឡើយ។ ចំណែក​អង្គការ​មិន​មែន​រដ្ឋាភិបាល​បាន​រិះគន់​ជា​ថ្មី​ទៀត។ ក្នុង​ថ្ងៃ​តែ​មួយ​នោះ​រដ្ឋ​សភា​ក៏​បាន​បោះឆ្នោត​ទម្លាក់​លោក កឹម សុខា ពី​តំណែង។

នាយក​ប្រតិបត្តិ​នៃ​អង្គការ​ឃ្លាំមើល​ការ​បោះ​ឆ្នោត​ដោយ​សេរី ត្រឹមត្រូវ និង​យុត្តិធម៌​នៅ​កម្ពុជា ហៅ​កាត់​ថា ខុមហ្វ្រែល (COMFREL) លោក គល់ បញ្ញា ថ្លែង​ថា ការ​អនុម័ត​ច្បាប់​នេះ ជា​សញ្ញា​អវិជ្ជមាន។ លោក​ថា ការ​ប្រកួត​ប្រជែង​ក្នុង​ការ​បោះឆ្នោត​ឃុំ​សង្កាត់ គឺ​គ្មាន​តម្លាភាព និង​យុត្តិធម៌​ចំពោះ​គណបក្ស​នយោបាយ​ដែល​គ្មាន​សំឡេង​ក្នុង​រដ្ឋសភា។

លោក គល់ បញ្ញា៖ «មាន​គណបក្ស​ច្រើន​ណាស់​ដែល​គេ​ចង់​ចូល​រួម​ប្រកួត​ប្រជែង​ការ​បោះ​ឆ្នោត​ឃុំ​សង្កាត់ ហើយ​យើង​ត្រូវ​យក​ទៅ​ជជែក​ជាមួយ​គេ។ តែ​គេ​ធ្វើ (Rule for gains) ហ្នឹង ធ្វើ​ច្បាប់​សម្រាប់​ឈ្នះ​តែ​ម្នាក់​ឯង​ហ្នឹង។ ច្បាប់​ហ្នឹង​បង្កើត​អាក្រក់ អវិជ្ជមាន។ នីតិវិធី​ច្បាប់​ចាស់ វា​គ្រាន់​ជាង​ច្បាប់​ចាស់​ទៀត។ យើង​ទៅ​ធ្វើ​អាក្រក់​សម្រាប់​លេង​ខ្លួន​ឯង»

ចំណែក​ក្រុម​អង្គការ​មិន​មែន​រដ្ឋាភិបាល​ធ្វើ​ការងារ​លើក​ស្ទួយ​សិទ្ធិ​ស្ត្រី​បាន​ទាមទារ​អោយ​មាន​វិសោធនកម្ម​ច្បាប់​ទាក់ទង​នឹង​ការ​បោះឆ្នោត ដើម្បី​ធានា​សមភាព​យេនឌ័រ​ក្នុង​ចំណោម​អ្នក​ដឹកនាំ​ដែល​ជ្រើស​ចេញ​ពី​ការ​បោះឆ្នោត។ ចំណុច​សំខាន់​គឺ​ចង់​អោយ​មាន​បញ្ជី​ឈ្មោះ​បេក្ខជន​ឆ្លាស់​រវាង​បុរស និង​ស្ត្រី។

ច្បាប់​មួយ​ចំនួន​ទៀត​ក៏​ត្រូវ​បាន​រដ្ឋសភា​អនុម័ត​ជា​ហូរហែ រួម​មាន​ច្បាប់​ស្ដីពី​ការ​ត្រួត​ពិនិត្យ​ផលិតផល​ថ្នាំជក់​កាល​ពី​ថ្ងៃ​ទី​៨ ខែ​ឧសភា ច្បាប់​គ្រប់គ្រង​គ្រោះ​មហន្តរាយ​កាល​ពី​ថ្ងៃ​ទី​៤ ខែ​មិថុនា ច្បាប់​ស្ដីពី​ភតិសន្យា​ពិសេស ឬ​ច្បាប់​ជួល​ផ្ទះ កាល​ពី​ថ្ងៃ​ទី​៦ ខែ​កក្កដា។

ច្បាប់​ដែល​មាន​ភាព​ចម្រូងចម្រាស​មួយ​ទៀត​ក្នុង​ឆ្នាំ​២០១៥​នេះ គឺ​ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល ដែល​ត្រូវ​បាន​អនុម័ត​កាល​ពី​ថ្ងៃ​ទី​១៣ ខែ​កក្កដា ដោយ​តំណាងរាស្ត្រ​គណបក្ស​កាន់​អំណាច។

ក្រុម​អង្គការ​មិន​មែន​រដ្ឋាភិបាល​ទាំង​ជាតិ និង​អន្តរជាតិ​បាន​ប្រតិកម្ម​ថា ជា​ចេតនា​នយោបាយ​របស់​គណបក្ស​ប្រជាជន​កម្ពុជា ដែល​ចង់​គ្រប់គ្រង ឬ​រឹតត្បិត​សិទ្ធិ​សេរីភាព​ពលរដ្ឋ។

នាយក​ប្រតិបត្តិ​គណៈកម្មការ​ដើម្បី​ការ​បោះឆ្នោត​ដោយ​សេរី ត្រឹមត្រូវ និង​យុត្តិធម៌​នៅ​កម្ពុជា លោក គល់ បញ្ញា ថា ច្បាប់​ថ្មី​នេះ​មិន​បាន​ដើរ​តាម​លំអាន​រដ្ឋធម្មនុញ្ញ ដែល​ជា​ច្បាប់​កំពូល​របស់​កម្ពុជា ឡើយ៖ «ច្បាប់​ថា ចង់​ការពារ​សិទ្ធិ​សេរីភាព តែ​បែរ​ជា​ធ្វើ​ច្បាប់​មួយ​ដែល​បញ្ជាក់​ថា សេរីភាព​ធ្វើ​សមាគម​គឺ​ជា​បទ​ល្មើស។ សេរីភាព​របស់​ពលរដ្ឋ​ក្នុង​ការ​ចូល​រួម​ក្នុង​វប្បធម៌ ក្នុង​សេដ្ឋកិច្ច​សង្គម និង​ចូល​រួម​នយោបាយ​ទៅ​ជា​បទល្មើស។ យើង​មើល​ទៅ​គឺ​មាន​បញ្ហា​ដូច​មាត្រា ៣៧ មាត្រា​៩ សេរីភាព​សមាគម ទាំង​អ្នក​ចុះ​ឈ្មោះ​ មិន​ចុះ​ឈ្មោះ​ក្ដី ជា​ពិសេស​មិន​ចុះ​ឈ្មោះ​តែ​ធ្វើ​សកម្មភាព​ទៅ​ជា​បទល្មើស​ហើយ។ តើ​យើង​បាន​ការពារ​សេរីភាព​អោយ​គេ​ទេ? យើង​ធ្វើ​អោយ​គេ​ក្លាយ​ជា​ជន​ល្មើស គឺ​យើង​រំលោភ​រដ្ឋធម្មនុញ្ញ​មាត្រា​​៤២ ដែល​និយាយ​ពី​សេរីភាព​សមាគម»

យ៉ាង​នេះ​ក្ដី​តំណាងរាស្ត្រ​បក្ស​ប្រឆាំង​សន្យា​ថា បាន​ត្រៀម​ជា​ស្រេច​នឹង​ស្នើ​អោយ​មាន​វិសោធនកម្ម​ច្បាប់​នេះ។

កាល​ពី​ថ្ងៃ​ទី​៣០ ខែ​វិច្ឆិកា សមាជិក​សភា​គណបក្ស​ប្រជាជន​ចំនួន ៦៦​រូប បាន​សម្រេច​អនុម័ត​សេចក្ដី​ព្រាង​ច្បាប់​ថវិកា​ជាតិ​ឆ្នាំ​២០១៦។ ក្នុង​នោះ​រដ្ឋាភិបាល​កម្ពុជា គ្រោង​នឹង​ចំណាយ​ថវិកា​ជាតិ​ប្រហែល​ជាង ៤​ពាន់​លាន​ដុល្លារ ដែល​កើន​លើស​ឆ្នាំ​២០១៥ ចំនួន ១៦​ភាគរយ។ មន្ត្រី​បក្ស​ប្រឆាំង និង​អង្គការ​សង្គម​ស៊ីវិល បន្ត​រិះគន់​ពី​ការប្រើប្រាស់​ថវិកា​ជាតិ​ដោយ​ពុំ​មាន​តម្លាភាព និង​មិន​សូវ​មាន​ប្រសិទ្ធភាព។

កាល​ពី​ពាក់​កណ្ដាល​ខែ​ធ្នូ តំណាង​រាស្ត្រ​គណបក្ស​សង្គ្រោះ​ជាតិ សម្រេច​ចូល​រួម​ប្រជុំ​សភា​ជា​លើក​ដំបូង បន្ទាប់​ពី​មាន​អំពើ​ហិង្សា​លើ​តំណាងរាស្ត្រ ២​រូប កាល​ពី​ខែ​តុលា។ សេចក្ដី​ព្រាង​ច្បាប់​​៣ ដែល​ត្រូវ​បាន​សមាជិក​សភា​នៃ​គណបក្ស​ទាំង​ពីរ​អនុម័ត​រួម​គ្នា គឺ​វិសោធនកម្ម​លើ​កិច្ច​ព្រមព្រៀង​ម៉ារ៉ាកេស​ស្ដីពី​ការ​បង្កើត​ពាណិជ្ជកម្ម និង​កិច្ច​ព្រមព្រៀង​ស្ដីពី​ការ​បង្កើត​មជ្ឈមណ្ឌល​ជីវចម្រុះ​អាស៊ាន និង​ច្បាប់​ស្ដីពី​សុខភាព​សត្វ និង​ផលិតកម្ម​សត្វ។

ទាក់ទិន​នឹង​បទដ្ឋាន​ច្បាប់​នេះ សេចក្ដី​ព្រាង​ច្បាប់​មួយ​ចំនួន កំពុង​ធ្វើ​អោយ​ក្រុម​អង្គការ​មិនមែន​រដ្ឋាភិបាល​ព្រួយ​បារម្ភ​ថា ជា​ច្បាប់​ដែល​នឹង​រឹត​បន្តឹង​សិទ្ធិ​សេរីភាព​ពលរដ្ឋ រួម​មាន សេចក្ដី​ព្រាង​ច្បាប់​ស្ដីពី​ឧក្រិដ្ឋកម្ម​អ៊ីនធឺណិត (Cyber Crime Law or Internet Law) សេចក្ដី​ព្រាង​ច្បាប់​ស្ដីពី​ទូរគមនាគមន៍ និង​សេចក្ដី​ព្រាង​ច្បាប់​ស្ដីពី​សហជីព​ជា​ដើម។ ស្រប​គ្នា​នេះ​ពួកគេ​ក៏​ចង់​ឃើញ​សេចក្ដី​ព្រាង​ច្បាប់​ស្ដីពី​សិទ្ធិ​ទទួល​បាន​ព័ត៌មាន និង​ច្បាប់​គ្រប់គ្រង​ផលិត​ផល​គ្រឿង​ស្រវឹង​លេច​ចេញ​ជា​រូបរាង​ក្នុង​ឆ្នាំ​២០១៦ ខាង​មុខ។

មក​ដល់​ពេល​នេះ គណបក្ស​ទាំង​២ ដែល​មាន​អាសនៈ​ក្នុង​សភា បាន​បង្កើត​គណៈកម្មការ​ចំពោះ​កិច្ច​ពិភាក្សា​ចំណុច​ចម្រូងចម្រាស​នៃ​សេចក្ដី​ព្រាង​ច្បាប់​ស្ដីពី​សហជីព ដែល​សហជីព​រិះគន់​ថា រឹតត្បិត​សេរីភាព​សហជីព ឬ​នឹង​ធ្វើ​អោយ​ប៉ះពាល់​ដល់​អត្ថប្រយោជន៍​កម្មករ​និយោជិត។ គណៈកម្មការ​នេះ​នឹង​ជួប​គ្នា​ជា​លើក​ដំបូង​នៅ​ថ្ងៃ​ទី៤ ខែមករា ឆ្នាំ​២០១៦។

ស្រប​ពេល​ដែល​រដ្ឋាភិបាល​កំពុង​ត្រៀម​រឹត​បន្តឹង និង​ណែនាំ​អោយ​ពលរដ្ឋ​ចូល​រួម​គោរព​ច្បាប់​ចរាចរណ៍​ថ្មី​នៅ​ដើម​ឆ្នាំ​២០១៦ ប្រមុខ​រដ្ឋាភិបាល លោក ហ៊ុន សែន បាន​ប្រកាស​ពី​ការ​បង្កើត​ច្បាប់​កំណត់​ប្រធាន​គណបក្ស​នយោបាយ និង​ស្ថាប័ន​មួយ​ចំនួន​ឲ្យ​មាន​សញ្ជាតិ​តែ​មួយ៖ «ខាង​គណបក្ស​ប្រជាជន កំពុង​តែ​គិតគូរ ដោយសារ​យើង​មាន​ច្បាប់​មួយ​រួច​ទៅ​ហើយ ប្រធាន និង​សមាជិក​គណៈកម្មាធិការ​ជាតិ​រៀបចំ​ការ​បោះ​ឆ្នោត ត្រូវ​តែ​ជា​សញ្ជាតិ​ខ្មែរ។ ដូច្នេះ ពេល​ខាង​មុខ ច្បាប់​ស្ដីពី​បក្ស​នយោបាយ ចាំបាច់​ត្រូវ​កំណត់​ប្រធាន​បក្ស​នយោបាយ ត្រូវ​តែ​សញ្ជាតិ​ខ្មែរ​តែ​មួយ ដើម្បី​កុំ​ឲ្យ​មាន​រឿង​អី កាន់​ប៉ាសស្ព័រ​បរទេស​រត់ ហើយ​បរទេស​មក​អន្តរាគមន៍។ យើង​ពិនិត្យ​មើល បើ​គណៈកម្មាធិការ​ជាតិ​រៀបចំ​ការ​បោះ​ឆ្នោត និង​សមាជិក​គណៈកម្មការ​រៀបចំ​ការ​បោះ​ឆ្នោត ត្រូវ​មាន​សញ្ជាតិ​ខ្មែរ​តែ​មួយ​ហើយ តើ​ប្រធាន​បក្ស​នយោបាយ​ត្រូវ​ទេ? វា​ត្រូវ។ អ៊ីចឹង​ត្រូវ​រៀបចំ​ប្រធាន​ក្រុមប្រឹក្សា​ធម្មនុញ្ញ ប្រធាន​រដ្ឋសភា ប្រធាន​ព្រឹទ្ធសភា ប្រធាន​តុលាការ​កំពូល អគ្គ​ព្រះរាជអាជ្ញា​អម​តុលាការ​កំពូល ត្រូវ​សញ្ជាតិ​ខ្មែរ​ទាំងអស់ រាប់​អគ្គសវនករ ប្រធាន​ក្រុម​ប្រឹក្សា​ប្រឆាំង​អំពើ​ពុក​រលួយ ត្រូវ​សញ្ជាតិ​ខ្មែរ​ទាំងអស់»

មិន​ខុស​គ្នា​ដែរ​មន្ត្រី​គណបក្ស​សង្គ្រោះ​ជាតិ ជំទាស់​នឹង​គំនិត​នេះ ព្រមទាំង​បាន​ហៅ​ការ​ប៉ុនប៉ង​ធ្វើ​ច្បាប់​បែប​នេះ ថា​ជា​ការ​រើសអើង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល