ម្តាយ​យុវជន​រងគ្រោះ​បន្ត​ទាមទារ​ឱ្យ​សមត្ថកិច្ច​បង្ហាញ​លទ្ធផល​ស៊ើបអង្កេត​ករណី​ហិង្សា​លើ​កូនប្រុស

ដោយ យន់ សាមៀន
2021-05-02
Share
ម្តាយ​យុវជន​រងគ្រោះ​បន្ត​ទាមទារ​ឱ្យ​សមត្ថកិច្ច​បង្ហាញ​លទ្ធផល​ស៊ើបអង្កេត​ករណី​ហិង្សា​លើ​កូនប្រុស លោកស្រី ព្រុំ ចាន់ថា និងកូនប្រុស កាក់ សុវណ្ណឆៃ ដែលរងការលួចគប់ដុំថ្មបណ្តាលឱ្យរងរបួសក្បាលធ្ងន់ធ្ងរ កាលពីថ្ងៃទី២៧ ខែមេសា ឆ្នាំ២០២១។
រូប៖ ហ្វេសប៊ុក ស្រឡាញ់គ្រួសារ។

ម្តាយ​យុវជន​រងគ្រោះ ដែល​ត្រូវ​ជន​មិន​ស្គាល់​មុខ​គប់​ដុំ​ថ្ម​បណ្តាល​ឱ្យ​រងរបួស​ធ្ងន់ បន្ត​ទាមទារ​ឱ្យ​សមត្ថកិច្ច​បង្ហាញ​ពី​ដំណើរការ​ស៊ើបអង្កេត​ករណី​ហិង្សា​លើ​កូន​គាត់​ឱ្យ​បាន​ច្បាស់លាស់ ។ ប៉ុន្តែ​មន្ត្រី​នគរបាល​ថ្លែង​ថា ការស៊ើបអង្កេត​មិនមែន​ធ្វើ​តាម​ការ​ចង់​បាន​របស់​ក្រុម​គ្រួសារ​ជនរងគ្រោះ​ឡើយ​។ រីឯ​មន្ត្រី​សង្គម​ស៊ីវិល ទទូច​ឱ្យ​សមត្ថកិច្ច ពន្លឿន​ការស្វែងរក​ជន​បង្ក​ហេតុ​យក​មក​ផ្ដន្ទាទោស​តាម​ច្បាប់ ដើម្បី​ផ្តល់​យុត្តិធម៌​ឱ្យ​ជនរងគ្រោះ។

គ្រួសារ​សកម្មជន​គណ​បក្ស​សង្គ្រោះ​ជាតិ ដែល​ត្រូវ​ជន​មិន​ស្គាល់​មុខ​លប​គប់​នឹង​ដុំឥដ្ឋ ទន្ទឹង​រង់ចាំ​យុត្តិធម៌​ពី​ស្ថាប័ន​ពាក់ព័ន្ធ ជាច្រើន​ថ្ងៃ​មក​ហើយ ខណៈ​ជនរងគ្រោះ​មិន​ទាន់​ជាសះស្បើយ​មុខរបួស​នៅ​ឡើយ។

ម្ដាយ​យុវជន​រងគ្រោះ កាក់ សុវណ្ណឆៃ គឺ​លោកស្រី ព្រុំ ចាន់ថា ប្រាប់​អាស៊ីសេរី​ថា រយៈពេល​ជាច្រើន​ថ្ងៃ​មក​ហើយ សមត្ថកិច្ច​មិន​បាន​មក​សាកសួរ​គ្រួសារ​លោកស្រី​ឡើយ​ជុំវិញ​ករណី​ហិង្សា​លើ​កូន​លោកស្រី ។ លោកស្រី​មើល​ឃើញ​ថា សមត្ថកិច្ច​ហាក់​មិន​យកចិត្តទុកដាក់​រឿង​នេះ​ទេ ដោយសារ រើសអើង​និន្នាការ​នយោបាយ​។ លោកស្រី​បន្ត​ថា ប្រសិនបើ​អាជ្ញា​ធរមាន​ចេតនា​ស្វែង​រក​នោះ គឺ​អាច​រក​ឃើញ​ជនល្មើស​យក​មក​ផ្ដន្ទាទោស​បាន ព្រោះ​ស្ថានភាព​កន្លែង​កើត​ហេតុ​ត្រូវ​បាន​បិទ​ខ្ទប់ ដោយ​មាន​អាជ្ញាធរ​យាមកាម​ត្រឹមត្រូវ​តាម​ច្រក​នានា។

ម្តាយ​ជនរងគ្រោះ​រូប​នេះ ទាមទារ​ឱ្យ​សមត្ថកិច្ច​បង្ហាញ​លទ្ធផល​នៃ​ការស៊ើបអង្កេត​ករណីនេះ​ឱ្យ​បាន​ឆាប់ ដើម្បី​ពន្លឿន​ការ​រក​យុត្តិធម៌​ដល់​កូន​លោកស្រី៖ «ខ្ញុំ​ជឿជាក់​ថា ប្រសិនបើ​ប្រទេស​មិន​មាន​កូ​វីដ ប្រទេស​មិន​ឡូ​ក​ដោ​ន (Lockdown) មិន​បិទ​ខ្ទប់ ក៏​អាជ្ញាធរ​ចង់​រក រក​ស្រួល​ខ្លាំង​ណាស់ អាជ្ញាធរ​ស្រុក​ខ្មែរ​ពូកែ​ណាស់​ឱ្យ​តែ​ត្រូវ​នឹង​មុខសញ្ញា​គាត់​រក ប៉ុន្តែ​ម្យ៉ាង​គឺ​មន្ត្រី​នយោបាយ​សកម្មជន​នយោបាយ​គឺ​មិន​ខ្វល់​តែម្តង​គឺ​គាត់​ចង់​បំបិទ​សេរីភាព​ផ្នែក​នយោបាយ​ផ្នែក​ដឹងឮ គឺ​គណបក្សប្រឆាំង​តែម្តង​ខ្ញុំ​សង្កត់​ធ្ងន់​គឺ​រឿង​ហ្នឹង​តែម្តង»

យុវជន កាក់ សុវណ្ណាឆៃ អាយុ​១៦​ឆ្នាំ គឺជា​កូន​របស់​សមាជិក​ក្រុមប្រឹក្សា​រាជធានី​ភ្នំពេញ​ជាប់ឆ្នោត​គណបក្ស​សង្គ្រោះ​ជាតិ លោក កាក់ កម្ភារ ដែល​កំពុង​ជាប់ឃុំ​នៅ​ពន្ធនាគារ​ព្រៃស ដែល​តុលាការ​ចោទ​ប្រកាន់​លោក​ពី​បទ​ញុះញង់ និង​រួមគំនិត​ក្បត់​។ យុវជន​រូប​នេះ​ត្រូវ​បាន​ជន​មិន​ស្គាល់​មុខ​មាន​គ្នា​២​នាក់​ជិះ​ម៉ូតូ​លប​គប់​នឹង​ដុំ​ថ្ម​ពីក្រោយ​ខ្នង បណ្ដាល​ឱ្យ​បែកក្បាល​ខាងឆ្វេង​ដេរ ២០​ថ្នេរ ពេល​ដែល​រូបគេ​កំពុង​ធ្វើ​ដំណើរ​ជាមួយ​ម្ដាយ​នៅ​ភូមិ​ត្នោត​ជ្រុំ សង្កាត់​បឹងទំពុន​ទី​២ ខណ្ឌមានជ័យ រាជធានី​ភ្នំពេញ​នៅ​ព្រឹក​ថ្ងៃទី​២៧ មេសា។ កន្លង​មក​យុវជន​រូប​នេះ ត្រូវ​បាន​ប៉ូលិស​ចាក់​អង្រែលើ ខណ្ឌ​មានជ័យ ចាប់​ឃុំខ្លួន​ប្រើ​ហិង្សា និង​ដាក់​ខ្នោះដៃ រយៈពេល​១​យប់ ពាក់ព័ន្ធ​លប​ចូល​យក​ទង់​គណបក្ស​សង្គ្រោះ​ជាតិ​នៅ​ទីស្នាក់ការ​កណ្ដាល។

ទាក់ទង​នឹង​ការ​​លើកឡើង​របស់​ម្តាយ​ជនរងគ្រោះ​នេះ​អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា បកស្រាយ​ថា សមត្ថកិច្ច​ចាប់ផ្តើម​ដំណើរការ​ស្រាវជ្រាវ​ភ្លាមៗ នៅពេល​ទទួល​បាន​បណ្តឹង​ពី​ជនរងគ្រោះ​។ លោក​ថា ជនរងគ្រោះ​ក៏​ត្រូវ​ចូលរួម​បំភ្លឺ​រឿង​នេះ​ដោយ​ស្មោះ​ត្រង់​ដែរ​។ លោក​បន្ត​ថា សមត្ថកិច្ច​នឹង​ស្រាវជ្រាវ​ផ្តល់​យុត្តិធម៌​ឱ្យ​ជនរងគ្រោះ ដោយ​មិន​ទុក​ករណីនេះ​ចោល​ឡើយ តែ​ការស្រាវជ្រាវ លឿន​ឬ​យឺត គឺ​ទៅតាម​ស្ថានភាព​ជាក់ស្តែង៖ «គ្មាន​ករណី​ណាមួយ​ដែល​ត្រូវ​ទុកចោល​ទេ អ្វី​ដែល​គាត់​លើកឡើង​គឺជា​ការ​គិត​របស់​គាត់ ពេលខ្លះ​ខ្ញុំ​បញ្ជាក់​ថា​ទៅវិញ​ការ​លើកឡើង​របស់​គាត់​ជា​និន្នាការ​របស់​គាត់​គិត គាត់​អត់​ដែល​ជឿ​ទុកចិត្ត​ទៅលើ​សមត្ថកិច្ច ផង ដល់ពេល​អ៊ីចឹង​មាន​ហេតុផល​អ្វី​ដែល​ត្រូវ​អនុវត្ត សំខាន់​គឺ​ការ​មក​ពឹងពាក់​ការ​មក​ក្នុងនាម​ជា​ប្រជាពលរដ្ឋ​កុំ​ប្រើ​ពាក្យ​ថា​ក្នុងនាម​អ្នកនេះ​អ្នកនោះ​មក​ប្តឹង យើង​ប្រើ​ពាក្យ​ថា ក្នុងនាម​យើង​ប្រជា​ពលរដ្ឋ»

ជុំវិញ​រឿង​នេះ អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែនករុណា សង្កេត​ឃើញ​ថា ករណី​ហិង្សា​លើ​គ្រួសារ និង​សកម្មជន​គណបក្សប្រឆាំង​ជាច្រើន​ករណី​កន្លង​ទៅ​នេះ សមត្ថកិច្ច​មិន​ទាន់​ចាប់​បាន​ជន ប្រព្រឹត្ត​យក​មក​ផ្ដន្ទាទោស​តាមច្បាប់​នៅឡើយ​ទេ។

លោក​ជំរុញ​ឱ្យ​អាជ្ញាធរ​ពន្លឿន​ការស្រាវជ្រាវ​រឿង​ករណីនេះ ដើម្បី​ផ្តល់​យុត្តិធម៌​ដល់​ជនរងគ្រោះ និង​ដើម្បី​បញ្ចៀស​ការចោទប្រកាន់​ថា ករណី​ទាំងនេះ​មាន​ពាក់ព័ន្ធ​នឹង​រឿង​នយោបាយ៖ «ជា​ការ​ពិត បើសិន​បើ​ជន​ដៃ​ដល់​នៅតែ​មិន​មាន​ការ​ចាត់​វិធានការ ជា​ធម្មតា​ទេ​ច្បាប់​អត់​មាន​ប្រសិទ្ធភាព​បែប​ហ្នឹង វា​អាច​បង្ក​ឱ្យ​ជន​ប្រព្រឹត្ត​ផ្សេងៗ​ទៀត​គាត់​អាច​ធ្វើ​នូវ​អំពើ​ហិង្សា​ដដែល នេះ​អាច​កើតឡើង​នៅក្នុង​សង្គម​ខ្មែរ​យើង ហើយ​ជន​ដៃ​ដល់ ឬ​អ្នក​ប្រព្រឹត្ត​ទាំងអស់​ហ្នឹង នៅតែ​ក្រៅ​សំណាញ់​ច្បាប់ ហើយ​ជា​អំពើ​និទ្ទណ្ឌភាព ដែល​ប្រទេស​នានា​គេ​មិន​ចង់ឱ្យ​កើត​មាន​នូវ​អំពើ​ហ្នឹង​ទេ ជាពិសេស​នៅ​ក្នុង​សង្គម​លទ្ធិប្រជាធិបតេយ្យ​គេ​រឹតតែ​ពង្រឹង​នូវ​ការ​អនុវត្ត​ច្បាប់»

ចាប់​តាំង​ពី​ឆ្នាំ​២០២០ រហូត​មក​ដល់​ពេល​នេះ មាន​សកម្មជន និង​សាច់ញាតិ​សកម្មជន​គណបក្ស​សង្គ្រោះ​ជាតិប្រមាណ ៣០​នាក់​ហើយ ត្រូវ​បាន​ជន​មិន​ស្គាល់​មុខ​លប​វាយ​ឲ្យ​របួស ហើយ​ភាគច្រើន​អាជ្ញាធរ​មិន​ទាន់​បាន​វែកមុខ​ជន​ប្រព្រឹត្ត និង​ជន​នៅ​ពី​ក្រោយខ្នង​យក​មក​ផ្ដន្ទាទោស​តាមច្បាប់​នៅ​ឡើយ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល