ពលរដ្ឋមួយគ្រួសារនៅស្រុកបារាយណ៍ ខេត្តកំពង់ធំ សម្រេចដាក់ពាក្យប្ដឹងទៅតុលាការ និងអង្គការក្រៅរដ្ឋាភិបាល ចំពោះករណីប៉ូលិសនគរបាលប៉ុស្តិ៍ម្នាក់ដែលរងការចោទថា បានប្រើហិង្សាធ្ងន់ធ្ងរមកលើកូនរបស់ខ្លួនកាលពីថ្ងៃទី១៨ មេសា។ យ៉ាងណា ប៉ូលិសរូបនោះបដិសេធចំពោះការចោទប្រកាន់នេះ។
ក្រុមគ្រួសារជនរងគ្រោះ សម្រេចប្ដឹងមន្ត្រីនគរបាលប៉ុស្តិ៍ឃុំត្នោតជុំ ស្រុកបារាយណ៍ ម្នាក់ពីបទបង្ករបួសស្នាម។ ជនរងគ្រោះឈ្មោះ លោក ម៉ូ ស្ម័គ្រ បានដាក់ពាក្យបណ្ដឹងទៅអង្គការលីកាដូ (Licadho) ខេត្តកំពង់ធំ កាលពីថ្ងៃទី២៣ មេសា និងដាក់ទៅសាលាដំបូងខេត្តកំពង់ធំ កាលពីថ្ងៃទី២៤ មេសា ដោយប្ដឹងឈ្មោះ នាង យ៉េង ជាមន្ត្រីនគរបាលប៉ុស្តិ៍ ពីបទប្រើហិង្សាមកលើខ្លួនកាលពីថ្ងៃទី១៨ មេសា ក្នុងពិធីរាំរែកមួយនៅវត្តក្នុងឱកាសបុណ្យចូលឆ្នាំ។
ឪពុកជនរងគ្រោះ លោក រ៉ាយ ម៉ន មានប្រសាសន៍ថា ក្រោយពេលកើតហេតុភ្លាមៗ កូនរបស់លោកមានអាការៈក្អួតចង្អោរដោយចេញឈាម និងឈឺចាប់ក្នុងខ្លួនផង ក្រុមគ្រួសារក៏បានបញ្ជូនកូនទៅមន្ទីរពេទ្យបង្អែកស្រុកបារាយណ៍ ហើយស្ថានភាពនៅតែធ្ងន់ធ្ងរ ក៏បញ្ជូនកូនទៅមន្ទីរពេទ្យបង្អែកខេត្តបន្តទៀត។ លោកថា ការប្ដឹងនេះ គឺស្នើឲ្យតុលាការចាត់វិធានការទៅតាមច្បាប់ និងទាមទារសំណងខ្លះយកមកមើលជំងឺកូនរបស់ខ្លួន៖ «បាទ! របួសធ្ងន់ ក្មួយ! មុនទៅពេទ្យមានក្អួតឈាម ហើយអូសអេកូមើលគេថាប៉ះពាល់នឹងប្លោកនោម»។
ក្នុងពាក្យបណ្ដឹងបញ្ជាក់ថា កាលពីយប់កើតហេតុថ្ងៃទី១៨ មេសា ឈ្មោះ ម៉ូ ស្ម័គ្រ បានទៅគប់ប៉េងប៉ោង ហើយត្រូវរង្វាន់បានស្រាមួយដប។ ក្រោយមកជនរងគ្រោះបម្រុងចេញទៅទិញសាច់ក្លែម ប៉ុន្តែបែរជាត្រូវប៉ូលិសឈ្មោះ នាង យ៉េង មកចាប់កអាវ ហើយអុកជង្គង់ ព្រមទាំងវាយនឹងកាំភ្លើងបណ្ដាលឲ្យបែកក្បាលទៀតផង។
ផ្ទុយពីការចោទប្រកាន់នេះ មន្ត្រីនគរបាលប៉ុស្តិ៍ឃុំត្នោតជុំ លោក នាង យ៉េង បញ្ជាក់ថា កាលពីយប់កើតហេតុ គឺលោក និងសមត្ថកិច្ចឯទៀតមិនបានវាយឈ្មោះ ម៉ូ ស្ម័គ្រ ទេ ប៉ុន្តែខណៈនាំខ្លួនជននោះចេញពីកន្លែងរាំរែក ដោយសារគាត់ស្រវឹង ហើយរាំជះស្រាទៅលើគេ និងលោកផង គឺមានការប្រទាញប្រទង់គ្នា ទើបបណ្ដាលឲ្យបុគ្គលនោះបែកក្បាលដោយមិនដឹងមូលហេតុ៖ «បាទ! ប្រទ្រូសប្រទ្រាស់គ្នាមិនដឹងប៉ះនឹងអី ព្រោះកម្លាំងខ្ញុំសុទ្ធតែស្ពាយកាំភ្លើង។ ហើយគេប្រឹងរើប្រឹងអីផងតាំងចាប់តាំងអី មិនដឹងប៉ះអីទេបង»។
មន្ត្រីនគរបាលប៉ុស្តិ៍ដដែលបន្ថែមថា លោកគ្រាន់តែនាំ ឈ្មោះ ម៉ូ ស្ម័គ្រ ចេញពីវង់រាំរែក ប៉ុន្តែមិនទាន់បានបញ្ជូនទៅនគរបាលប៉ុស្តិ៍ទេ ព្រោះគាត់ក៏បានរើម្តងទៀត ហើយរត់ចេញពីសមត្ថកិច្ចនៅយប់នោះទៅ។ យ៉ាងណា ការប្ដឹងនេះលោកថា ជាសិទ្ធិរបស់ពលរដ្ឋ ហើយលោកក៏ត្រៀមខ្លួនចូលបំភ្លឺ ប្រសិនបើមានការកោះហៅ។
ដោយឡែកនាយរងនគរបាលប៉ុស្តិ៍ត្នោតជុំ លោក ម៉ន យីន មានប្រសាសន៍ថា សំណុំរឿងនេះលោកបានបញ្ជូនទៅអធិការស្រុករួចរាល់ហើយ ហើយខាងលោកនឹងបន្តស៊ើបអង្កេតលើបញ្ហានេះបន្ថែមទៀត។
ទោះបីជាយ៉ាងណាក៏ដោយ មន្ត្រីអង្កេតនៃអង្គការការពារសិទ្ធិមនុស្សលីកាដូ (Licadho) ខេត្តកំពង់ធំ លោក ឈួម រុណ បញ្ជាក់ថា ជនរងគ្រោះពិតជាមានរបួសក្បាល និងប៉ះពាល់ដល់តម្រង់នោមមែន។ ប្រសិនករណីនេះពិតជាដូចការអះអាងរបស់ជនរងគ្រោះ លោកថា មន្ត្រីសមត្ថកិច្ច គឺប្រព្រឹត្តខុសទៅនឹងផ្លូវច្បាប់៖ «ប៉ូលិសធ្វើអ៊ីចឹង គឺមិនត្រឹមត្រូវតាមច្បាប់ទេ ព្រោះការប្រើហិង្សាលើប្រជាពលរដ្ឋអ៊ីចឹង អាហ្នឹងជាទម្លាប់អាក្រក់មួយសម្រាប់សមត្ថកិច្ច»។
លោក ឈួម រុណ ថា ខាងលោកនឹងបន្តតាមដានករណីនេះបន្ថែមទៀត។ តែយ៉ាងណា លោកស្នើឲ្យមន្ត្រីពាក់ព័ន្ធ គប្បីស៊ើបអង្កេតជុំវិញបញ្ហានេះឲ្យបានច្បាស់លាស់ ដើម្បីស្វែងរកភាពយុត្តិធម៌ជូនជនរងគ្រោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។