តុលាការគ្រោងជម្រះក្តីសកម្មជនមាតាធម្មជាតិ ៣នាក់នៅសប្តាហ៍ក្រោយ
2021.03.25
សាលាដំបូងរាជធានីភ្នំពេញគ្រោងលើកយកសំណុំរឿងសកម្មជនមាតាធម្មជាតិទៅជំនុំជម្រះ នៅថ្ងៃទី៣១ ខែមីនា បន្ទាប់ពីបានលើកពេលកាលពីចុងខែកុម្ភៈ ដោយសារការរាតត្បាតជំងឺកូវីដ-១៩ ក្នុងសហគមន៍។ ប៉ុន្តែសវនាការនេះគ្រោងធ្វើឡើងចំពោះតែសកម្មជនដែលកំពុងជាប់ឃុំទាំង ៣នាក់ រួមមាន យុវជន ថុន រដ្ឋា ឡុង គន្ធា និងភួន កែវរស្មី ប៉ុណ្ណោះ។ ចំណែកអ្នកនៅក្រៅឃុំ ២នាក់ទៀត ពួកគេមិនមានឈ្មោះក្នុងលិខិតរបស់តុលាការនោះទេ។
ប្រពន្ធលោក ថុន រដ្ឋា លោកស្រី ប៉ាត់ រស្មី ទទូចដល់តុលាការឱ្យបើកសវនាការរឿងនេះតាមកាលកំណត់ ពីព្រោះប្តីលោកស្រីបានជាប់ឃុំដោយអយុត្តិធម៌អស់រយៈពេលជាច្រើនខែមកហើយ។ លោកស្រីទាមទារឱ្យតុលាការដោះលែងប្តី និងសហការីពីរនាក់ទៀត ពីព្រោះពួកគេមិនបានប្រព្រឹត្តបទល្មើសអ្វីឡើយ។ លោកស្រីបន្ថែមថា ការឃុំខ្លួនប្តីលោកស្រីយូរ ប៉ះពាល់ជាខ្លាំងដល់ផ្លូវចិត្ត និងជីវភាពគ្រួសារ ជាពិសេសកូនតូចរបស់លោកស្រី ត្រូវរស់នៅដោយកំព្រាឪពុក៖ «ប្តីរបស់នាងខ្ញុំ ហើយនិងគ្នាគាត់ពីរនាក់ទៀតហ្នឹង ត្រូវទទួលបានយុត្តិធម៌តាំងពីយូរ ព្រោះគាត់អត់បានប្រព្រឹត្តកំហុសអ្វីទេ ហើយតុលាការចេះតែពន្យារៗ រហូតមកដល់ឥលូវ។ គាត់គ្រាន់តែការពារបរិស្ថានធនធានធម្មជាតិដែលគាត់ស្រឡាញ់ អ៊ីចឹងតុលាការនៅថ្ងៃទី៣១ ហ្នឹង ជំនុំជម្រះដោះលែងឱ្យគាត់មានសេរីភាពវិញទៅ ព្រោះគាត់អត់បានប្រព្រឹត្តកំហុសអ្វីទេ»។
អាជ្ញាធរបានចាប់ខ្លួនសកម្មជនមាតាធម្មជាតិទាំង ៣នាក់ កាលពីដើមខែកញ្ញា ឆ្នាំ២០២០។ ការចាប់ខ្លួននេះ កើតមានឡើងបន្ទាប់ពីកញ្ញា ឡុង គន្ធា បានបង្ហោះសារលើហ្វេសប៊ុកអំពីគម្រោងដើរពីវត្តភ្នំទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ដើម្បីស្នើសុំជួបផ្ទាល់ជាមួយលោកនិយាយអំពីបញ្ហាលុបបឹងតាមោក ដែលស្ថិតនៅជាយរាជធានីភ្នំពេញ។ តុលាការបានចោទប្រកាន់ពួកគេ រួមទាំងលោក អាឡិច និងសកម្មជនខ្មែរថាវរៈ កញ្ញា ជា គន្ធីន សរុបទាំងអស់ ៥នាក់ ពីបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ដែលប្រឈមនឹងការជាប់ពន្ធនាគាររហូតដល់ ២ឆ្នាំ។
មេធាវីការពារក្តីឱ្យសកម្មជនទាំង ៥រូប គឺលោក សំ ចំរើន ប្រាប់អាស៊ីសេរីថា លោកមិនដឹងពីមូលហេតុដែលតុលាការគ្រោងជម្រះរឿងនេះ ទៅលើកូនក្តីលោកតែបីនាក់បែបនេះទេ។ លោកបញ្ជាក់ថា លោកនឹងពិភាក្សាជាមួយកូនក្តីពីរនាក់ទៀត ដើម្បីស្នើសុំបំបែកសំណុំរឿង។ មេធាវី សំ ចំរើន ថ្លែងទៀតថា ពួកលោកចង់ឱ្យសវនាការនេះធ្វើឡើងដោយឆាប់រហ័សតាមកាលកំណត់ ប៉ុន្តែដំណើរការជាក់ស្តែងយ៉ាងណានោះ លោកក៏មិនប្រាកដដែរ ព្រោះតុលាការជាអ្នកសម្រេច។
អាស៊ីសេរីមិនអាចទាក់ទងអ្នកនាំពាក្យតុលាការក្រុងភ្នំពេញលោក អ៊ី រិន្ទ ដើម្បីសាកសួររឿងនេះបានទេ នៅថ្ងៃទី២៥ ខែមីនា ដោយទូរស័ព្ទចូល តែពុំមានអ្នកទទួល។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណា ទទួលស្គាល់ថា ជំងឺកូវីដ-១៩ កំពុងរាតត្បាតខ្លាំង ប៉ុន្តែតុលាការគួរតែលៃលកយ៉ាងណាឱ្យសវនាការនេះអាចប្រព្រឹត្តទៅបាន ព្រោះសកម្មជនមាតាធម្មជាតិទាំង ៣នាក់ បានជាប់ឃុំជាច្រើនខែមកហើយ។ លោកសង្កត់ធ្ងន់ថា ការអូសបន្លាយពេលកាន់តែយូរក្នុងដំណើរការក្តី ប៉ះពាល់ដល់សិទ្ធិសេរីភាពរបស់សកម្មជនទាំងនោះ៖ «ពួកគាត់ទាំងអស់នេះ តាមដែលយើងពិនិត្យមើលកន្លងមក គឺមិនមានអ្វីដែលជារឿងរងការចោទប្រកាន់អ្វីដល់កម្រិតធ្ងន់ធ្ងរទេ ពីព្រោះពួកគាត់សុទ្ធតែជាសកម្មជនដែលធ្វើកិច្ចការងារសម្រាប់ផលប្រយោជន៍ដល់សង្គមជាតិ»។
គិតត្រឹមចុងខែមីនា ឆ្នាំ២០២១ នេះ សកម្មជនមាតាធម្មជាតិទាំង ៣នាក់ បានជាប់ឃុំក្នុងពន្ធនាគារអស់រយៈពេលជិត ៧ខែហើយ។ ពួកគេនឹងត្រូវជាប់ឃុំបន្តទៀត បើតុលាការពន្យាពេលសវនាការ ឬក៏សម្រេចផ្តន្ទាទោសទៅតាមបទចោទប្រកាន់។
ក្រុមប្រទេសប្រជាធិបតេយ្យ សង្គមស៊ីវិលជាតិ-អន្តរជាតិ និងក្រុមអ្នកជំនាញសិទ្ធិមនុស្សអង្គការសហប្រជាជាតិ បានថ្កោលទោសរបបលោក ហ៊ុន សែន ជាបន្តបន្ទាប់ ជុំវិញការចាប់ខ្លួនសកម្មជនបរិស្ថាន និងសកម្មជននយោបាយតាមទំនើងចិត្តនេះ។ ពួកគេស្នើយ៉ាងទទូចឱ្យរបបនេះ ទម្លាក់ចោលបទចោទប្រកាន់ និងដោះលែងអ្នកជាប់ឃុំទាំងនោះឱ្យមានសេរីភាព ជាពិសេសត្រូវងាកមកគោរពសិទ្ធិពលរដ្ឋរបស់ខ្លួនវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។