តុលាការខេត្តកំពង់ស្ពឺ ដោះលែងអ្នកភូមិពីរនាក់ដែលជាប់ពន្ធនាគារក្នុងរឿងទំនាស់ដីធ្លី នៅយប់ថ្ងៃទី១៤ មីនា។ ការដោះលែងនេះ ធ្វើឡើងភ្លាមៗបន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាទៅអាជ្ញាធរខេត្ត ឲ្យធ្វើការជាមួយតុលាការទាំងយប់ ដើម្បីសុំធានាអ្នកភូមិទាំងពីរឲ្យនៅក្រៅឃុំបណ្ដោះអាសន្ន។
ស្ត្រីដែលតុលាការដោះលែងឲ្យនៅក្រៅឃុំបណ្ដោះអាសន្ន ពាក់ព័ន្ធក្នុងរឿងទំនាស់ដីធ្លីនៅខេត្តកំពង់ស្ពឺ ចាត់ទុកថា ការចាប់ខ្លួនគាត់ដាក់ពន្ធនាគារ គឺជារឿងអយុត្តិធម៌មួយ បើទោះបីជាមានការដោះលែងក៏ដោយ។
ស្ត្រីទាំងពីរនាក់នោះមានឈ្មោះ យូ រ៉ន និង អ៊ីត រុំ រស់នៅភូមិថ្មី ឃុំតាំងសំរោង ស្រុកភ្នំស្រួច ខេត្តកំពង់ស្ពឺ។
លោកស្រី យូ រ៉ន ថ្លែងថា តុលាការខេត្តកំពង់ស្ពឺ បានចោទប្រកាន់គាត់ និងអ្នកភូមិដោយមិនមានភស្តុតាងគ្រប់គ្រាន់ឡើយ។ លោកស្រីស្នើឲ្យដោះលែងពួកគាត់ឲ្យមានសេរីភាពជារហូត ពីព្រោះគាត់មិនបានប្រព្រឹត្តដូចការចោទប្រកាន់នោះទេ៖«ខ្ញុំបានចេញពីពន្ធនាគារយប់ ហើយឯកឧត្ដម ហ៊ុន ម៉ានី និង ហ៊ុន មានិត កូនរបស់សម្ដេចផ្ទាល់ ម៉ង ដែលគាត់ចូលទៅជាមួយអភិបាលខេត្ត ចូលទៅកន្លែងពន្ធនាគារដោះខ្ញុំមក ។ ខ្ញុំអត់បានប្រព្រឹត្តទេ គេចោទខ្ញុំថាខ្ញុំប្រើអំពើហិង្សាទៅលើ ម្ចាស់អចលនវត្ថុ ហ្នឹង គឺខ្ញុំអត់បានប្រើអំពើហិង្សាទេ។ ចាប់ខ្ញុំដាក់ពន្ធនាគារ គឺអយុត្តិធម៌ណាស់ តុលាការខេត្ត កំពង់ស្ពឺ ពុករលួយ ណាស់ ព្រះរាជអាជ្ញាយប់មិញក៏មកតាម ព្រឹកឡើងមកតាមទៀត មកដល់ដីជម្លោះកើតហេតុទៀត ។ ម៉ោង១១-១២យប់ គាត់រត់ទាំងយប់ម៉ង»។
លោកស្រី យូ រ៉ន ថ្លែងបន្តថា ក្បួនរថយន្តជាង ១០គ្រឿងរបស់ លោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺ និងជាកូនប្រុសរបស់លោកនាយករដ្ឋមន្ត្រី ហ៊ុន សែន បានដឹកនាំពួកគាត់ចូលភូមិ និងចុះទៅស្វែងយល់ដល់ដីទំនាស់ និងបានជូនលុយឲ្យពួកគាត់ទាំងពីរនាក់ក្នុងម្នាក់ ៣០០ដុល្លារ ប៉ុន្តែពុំទាន់មានការសន្យាដោះស្រាយយ៉ាងណានៅឡើយទេ។
ការដោះលែងស្ត្រីអ្នកភូមិទាំងពីរនាក់នេះ ធ្វើឡើងភ្លាមៗបន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាទៅអភិបាលខេត្ត ឲ្យធ្វើការជាមួយតុលាការទាំងយប់ ដើម្បីសុំធានាអ្នកភូមិទាំងពីរនាក់ ឲ្យនៅក្រៅឃុំ។ លោក ហ៊ុន សែន បានសរសេរលើហ្វេសប៊ុកថា លោកខកចិត្តខ្លាំងណាស់ដែលតុលាការខេត្តកំពង់ស្ពឺ ចាប់តំណាងប្រជាជន ២នាក់ឃុំខ្លួន ដែលលោកទើបតែបានដឹង។ លោកសរសេរបន្តថា កូនប្រុស ២នាក់របស់លោក គឺលោក ហ៊ុន ម៉ានិត និងលោក ហ៊ុន ម៉ានី កំពុងធ្វើដំណើរទៅកាន់ខេត្តកំពង់ស្ពឺ ដើម្បីជួយប្រជាជនក្នុងរឿងនេះ។ លោកសង្ឃឹមថា ព្រះរាជអាជ្ញានឹងអនុញ្ញាតឲ្យប្រជាជនទាំង ២នាក់បាននៅក្រៅឃុំ ប្រសិនបើមិនទុកចិត្ត លោក ហ៊ុន សែន សុំឲ្យអាជ្ញាធរខេត្តកំពង់ស្ពឺ ឃុំកូនលោកទាំងពីរជំនួសវិញចុះ។
ក្រោយការដោះលែងស្ត្រីរងគ្រោះដីធ្លីទាំង ២នាក់រួច នៅថ្ងៃទី១៥ មីនា លោក ហ៊ុន សែន បានសរសេរឆ្លើយតបនឹងមតិនៅលើទំព័រហ្វេសប៊ុករបស់លោកថា តុលាការឯករាជ្យ មិនស្ថិតក្រោមអំណាចរាជរដ្ឋាភិបាលទេ។ បើស្ថិតក្រោមអំណាចរាជរដ្ឋាភិបាល មិនបាច់ខ្ញុំសុំធានាឲ្យនៅក្រៅឃុំទេ គឺបញ្ជាឲ្យដោះលែងតែម្ដង។
មន្ត្រីអង្គការសិទ្ធិមនុស្សលីកាដូ (LICADHO) លោក អំ សំអាត ថ្លែងថា តុលាការ គឺជាឧបករណ៍មួយដែលភាគីក្រុមហ៊ុន និងអ្នកមានអំណាចប្រើប្រាស់ ដោយមិនបានផ្អែកទៅលើគោលការណ៍ច្បាប់ អង្គហេតុ និងភស្តុតាងពិតប្រាកដ។ លោកថា ពលរដ្ឋរងគ្រោះពីរត្រួត គឺបាត់បង់ដីធ្លី និងជាប់ពន្ធនាគារដោយសារតែតុលាការមិនឯករាជ្យ។ លោក អំ សំអាត មានមតិថា ការអន្តរាគមន៍នេះ ដោយសារតែនាយករដ្ឋមន្ត្រីមើលឃើញពីភាពអយុត្តិធម៌ក្នុងប្រព័ន្ធយុត្តិធម៌៖ «បើរឿងនេះវាសមហេតុសមផលហើយ មានភាពយុត្តិធម៌ មិនមែនសម្ដេចនាយករដ្ឋមន្ត្រី ក្នុងនាមនីតិប្រតិបត្តិ ឃើញភាពអយុត្តិធម៌ ហើយលោកលូកដៃអន្តរាគមន៍ ហើយហ៊ានថាបើសិនជាមិនលែងទេ ឲ្យឃុំកូន លោកទាំង ពីរជំនួសវិញ។ នេះយើងឃើញហើយ វាជារឿងមួយមិនត្រឹមត្រូវតាមផ្លូវច្បាប់ហើយ វាមាន ភាពអយុត្តិធម៌។ តុលាការខ្លួនឯង ត្រូវធ្វើយ៉ាងម៉េចឲ្យខ្លួនក្លាយជាតុលាការឯករាជ្យ មុននឹងសម្រេច ឃុំខ្លួន ទៅលើជនណាម្នាក់។ មានភាពអយុត្តិធម៌ ប្រមុខរដ្ឋាភិបាលធ្វើបទអន្តរាគមន៍ទៅនាំឲ្យគេ ចោទប្រកាន់ ថា នីតិប្រតិបត្តិលូកលាន់ ឬក៏រំលោភអំណាចប្រព័ន្ធតុលាការនោះទេ»។
វិទ្យុអាស៊ីសេរី មិនអាចទាក់ទងព្រះរាជអាជ្ញាសាលាដំបូងខេត្តកំពង់ស្ពឺ លោក អ៊ូ ផាត ដើម្បីបំភ្លឺបន្ថែមបានទេនៅថ្ងៃទី១៥ មីនា។
កាលពីថ្ងៃសុក្រ ទី១១ មីនា ចៅក្រមនៃតុលាការខេត្តកំពង់ស្ពឺ លោក តូង ពុទ្ធារ៉ា បានសម្រេចឃុំខ្លួនស្ត្រី ២នាក់ដែលជាតំណាងសហគមន៍ភ្នំស្រួច ចោទប្រកាន់ថាបានរំលោភលើសេចក្ដីសម្រេចរបស់តុលាការ ដែលតម្រូវឲ្យពួកគាត់បញ្ឈប់សកម្មភាព និងឋិតនៅឲ្យឆ្ងាយពីដីទំនាស់ ដែលភាគីម្ខាងទៀតមានតំណាងពលរដ្ឋជាង ៨០គ្រួសារ បានប្ដឹងពួកគេទៅតុលាការកាលពីឆ្នាំ២០១៥។
ក្រោយការចាប់ខ្លួនមួយថ្ងៃ តំណាងអ្នកភូមិជាង ១៦០គ្រួសារ បានមកដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន និងអង្គភាពប្រឆាំងអំពើពុករលួយ ឲ្យអន្តរាគមន៍ដោះលែង។
អ្នកភូមិឲ្យដឹងថា ពលរដ្ឋ ១៦៥គ្រួសារ បានកាន់កាប់ដីទំនាស់ជាង ៣០០ហិកតារ តាំងពីឆ្នាំ១៩៧៩។ នៅឆ្នាំ២០០៦ មានមន្ត្រីទាហានកងរថពាសដែក អាសេអូ (ACO) ឈ្មោះ ទូច សុភក្ត្រ បានអះអាងថា ជាដីកម្មសិទ្ធិរបស់ខ្លួន និងបានប្ដឹងផ្ដល់អ្នកភូមិកាលពីឆ្នាំ២០១១។ ទោះបីជាយ៉ាងណា វិវាទនេះមិនបានបញ្ចប់នោះទេ។ ក្រុមនិស្សិតបានចុះទៅវាស់វែងដីចែកជូនដល់ពលរដ្ឋ ប៉ុន្តែពួកគាត់ពុំទទួលបានឡើយ បែរជាបែងចែកឲ្យពលរដ្ឋជាង ៨០គ្រួសារផ្សេងទៀត ហើយពលរដ្ឋទាំងនោះបានលក់ដីនោះទៅឲ្យក្រុមហ៊ុន ភួង សារឿន។ វិវាទនេះ បាននាំឲ្យមានការប្រទាំងប្រទើសគ្នាម្ដងទៀត ដែលមានឈ្មោះ ជីវ កុំ និងកូនប្រធានភូមិថ្មី ឈ្មោះ អ៊ីម ដា ជាតំណាងពលរដ្ឋជាង ៨០គ្រួសារ ប្ដឹងអ្នកភូមិទៅតុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។