តុលាការ​កំពូល​សម្រេច​ដោះលែង​យុវជន កែម ឡីនិយម​គឺ​លោក សួង នាគព័ន្ធ បណ្ដោះអាសន្ន

ដោយ សន ចាន់រដ្ឋា
2019-11-15
អ៊ីម៉ែល
មតិ
Share
បោះពុម្ព
យុវជន​គង់ រ៉ៃយ៉ា (ស្ដាំ) ពេល​សមត្ថកិច្ច​បញ្ជូនមក​សាលាដំបូង​រាជធានី​ភ្នំពេញ​ កាល​ពី​ថ្ងៃ​ទី១១ កក្កដា ២០១៩ និង​លោក សួង នាគព័ន្ធ (ឆ្វេង) ពេល​អាជ្ញាធរ​របប​ក្រុង​ភ្នំពេញ​ចាប់​ខ្លួន នៅ​ការាស់សាំងកាល់តិច​ កាល​ពី​ថ្ងៃ​ទី១០ កក្កដា ២០១៩។
យុវជន​គង់ រ៉ៃយ៉ា (ស្ដាំ) ពេល​សមត្ថកិច្ច​បញ្ជូនមក​សាលាដំបូង​រាជធានី​ភ្នំពេញ​ កាល​ពី​ថ្ងៃ​ទី១១ កក្កដា ២០១៩ និង​លោក សួង នាគព័ន្ធ (ឆ្វេង) ពេល​អាជ្ញាធរ​របប​ក្រុង​ភ្នំពេញ​ចាប់​ខ្លួន នៅ​ការាស់សាំងកាល់តិច​ កាល​ពី​ថ្ងៃ​ទី១០ កក្កដា ២០១៩។
Photo courtesy

តុលាការកំពូល​សម្រេចដោះលែងលោក សួង នាគព័ន្ធ បណ្តោះអាសន្ន​តាម​ការ​ស្នើសុំ​នៅ​ថ្ងៃ​ទី១៥ ខែវិច្ឆិកា ក្រោយ​ពី​បាន​ជាប់ពន្ធនាគារជាង ៤ខែ ពាក់ព័ន្ធ​នឹង​សកម្មភាព​ចូលរួម​បុណ្យ​ខួប​បី​ឆ្នាំ​នៃ​អំពើ​ឃាតកម្ម​លើ​អ្នក​វិភាគ​នយោបាយ និង​សង្គម​ដ៏​ល្បី​ម្នាក់ គឺ​បណ្ឌិត កែម ឡី។ មន្ត្រីសិទ្ធិមនុស្ស យល់​ថា ការ​ដោះ​លែង​នេះ គឺជាជំហ៊ានវិជ្ជមានមួយ ប៉ុន្តែ​ទាមទារ​ឲ្យ​ដោះ​លែង និង​ទម្លាក់​ចោល​​ទាំង​​ស្រុង ចំពោះ​ការ​ចោទ​ប្រកាន់​លើ​លោក សួង នាគព័ន្ធ និងលោក គង់ រ៉ៃយ៉ា។

តុលាការកំពូល សម្រេចដោះលែង​លោក សួង នាគព័ន្ធ ឲ្យនៅក្រៅឃុំបណ្តោះអាសន្ននៅព្រឹក ថ្ងៃ​ទី១៥ ខែវិច្ឆិកា បន្ទាប់ពីតុលាការបានបើកសវនាការជុំនុំជម្រះរយៈពេលមួយម៉ោងលើបណ្តឹង​សុំ​នៅ​ក្រៅ​ឃុំ។ ទោះយ៉ាងណា សំណុំរឿងនេះ មិនទាន់បញ្ចប់នោះឡើយ។ យុវជន កែម ឡីនិយម រូប​នេះ នឹង​បន្តដាក់ឲ្យស្ថិតក្រោមការត្រួតពិនិត្យរបស់តុលាការ។

មេធាវីការពារក្តីឲ្យយុវជន សួង នាគព័ន្ធ គឺ​លោក សំ សុគង់ មានប្រសាសន៍ថា កូនក្តីរបស់លោក នឹង​ត្រូវដោះលែងពីពន្ធនាគារព្រៃស​យ៉ាងយូរត្រឹមព្រលប់ថ្ងៃទី១៥ ខែវិច្ឆិកា ក្រោយបំពេញឯក សារ​ក្នុង​ពន្ធនាគារ​រួចរាល់។ លោក សុំ សុគង់ បន្តថា ការសម្រេចឲ្យកូនក្តីរបស់លោកនៅក្រៅឃុំ បណ្តោះអាសន្ន​នេះ គឺអាចដោយសារតែស្ថានភាពនយោបាយធូរស្រាល ក្រោយលោក ហ៊ុន សែន បញ្ជាឲ្យតុលាការដោះលែងអ្នកទោសនយោបាយ​ទាំង​អស់ និង​ម្យ៉ាងទៀត​ដោយសារ លោក សួង នាគព័ន្ធ មានលក្ខខណ្ឌគ្រប់គ្រាន់តាមផ្លូវច្បាប់ ដើម្បីបាននៅក្រៅឃុំ៖ «ហ៊ាន​ទី១ ការ​ផ្តល់​​សេរី​ជូន​គាត់​គឺ ជា​កត្តា​មួយ​សំខាន់ ហើយ​កត្តា​ទី២ មេធាវី​ការពារ​នឹង​ស្វែងរក​ភស្តុតាង​ដោះ​បន្ទុក ដើម្បី​ស្នើសុំ​ទៅ​តុលាការ​ក្រុង​ភ្នំពេញ​ឲ្យ​ពន្លឿន​សវនាការ​ឲ្យ​ទម្លាក់​បទ​ចោទ​ប្រកាន់​ទាំង​ស្រុង​តែ​​ម្តង​កុំ​ឲ្យ​មាន​ឈ្មោះ​ថា អ្នក​ជាប់​ពាក់ព័ន្ធ​នឹង​មាន​ទោស»

លោក សួង នាគព័ន្ធ ត្រូវបានសមត្ថកិច្ចរបបក្រុងភ្នំពេញចាប់ខ្លួន​កាលពីថ្ងៃទី១០ ខែកក្កដា ខណៈ លោក​កំពុងចូលរួមដាក់កម្រងផ្កាគោរពវិញ្ញាណក្ខន្ធបណ្ឌិត កែម ឡី នៅ​បរិវេណ​ស្ថានីយ៍​ប្រេង​ឥន្ធនៈ កាល់តិច នៅ​ស្តុប បូកគោ ដែលជាទីតាំងឃាតកម្មបណ្ឌិត កែម ឡី កើតឡើង និងបាន​ចែកខិត​ប័ណ្ណ​សារ​អំពាវនាវ​កុំឲ្យ​មាន​ការ​សម្លាប់មនុស្ស​ក្រៅ​ប្រព័ន្ធច្បាប់។ តុលាការ​បាន​ចោទ​ប្រកាន់​​លោក សួង នាគព័ន្ធ ពី​បទ​ញុះញង់​ឱ្យ​ប្រព្រឹត្ត​បទឧក្រិដ្ឋ​ជា​អាទិ៍។ នៅមុនការចាប់ខ្លួន​លោក សួង នាគព័ន្ធ មួយ​ថ្ងៃ ពោល​គឺ នៅថ្ងៃទី៩ ខែ​កក្កដា សមត្ថកិច្ចរបប​ក្រុង​ភ្នំពេញ ក៏​បាន​ចូល​ទៅ​ចាប់​ខ្លួនយុវជន កែម ឡី និយម​ម្នាក់​ទៀត គឺ​លោក គង់ រ៉ៃយ៉ា ក្នុងផ្ទះជួលរបស់​លោកជាមួយកូនតូចអាយុ ៦ខែ និងភរិយា ព្រម​ទាំង​បងប្អូនបង្កើត ២នាក់​ទៀត បន្ទាប់​ពី​បាន​ផ្សព្វផ្សាយ​លក់​អាវយឺត​មានរូប និង​ទស្សនៈ​បណ្ឌិត កែម ឡី នៅ​លើ​បណ្ដាញ​សង្គម​ហ្វេសប៊ុក (Facebook) សម្រាប់​ខួប​បី​ឆ្នាំ​នៃ​អំពើ​ឃាតកម្ម​លើ​បណ្ឌិត កែម ឡី។ សមាជិក​គ្រួសារ​របស់​លោក គង់ រ៉ៃយ៉ា ត្រូវ​បាន​ដោះលែងវិញនៅថ្ងៃ​បន្ទាប់ ប៉ុន្តែលោក គង់ រ៉ៃយ៉ា ត្រូវបានតុលាការចោទប្រកាន់ និងបញ្ជូនទៅឃុំខ្លួនក្នុងពន្ធនាគារព្រៃសដូច លោក សួង នាគព័ន្ធ ដែរ។ តុលាការ​កំពូល ទើប​តែ​សម្រេច​បដិសេធ​សំណើសុំនៅក្រៅឃុំរបស់លោក គង់ រ៉ៃយ៉ា កាល​ពី​ថ្ងៃ​ទី៤ ខែវិច្ឆិកា​កន្លង​ទៅ។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លី​កាដូ​ (LICADHO​) លោក​ អំ​ សំអាត ថ្លែង​ថា ការសម្រេចឲ្យលោក សួង នាគព័ន្ធ នៅក្រៅឃុំបណ្តោះអាសន្ននេះ គឺជាជំហាន​វិជ្ជមាន​មួយ ប៉ុន្តែលោកនៅតែជំរុញឲ្យតុលាការដោះលែង និងទម្លាក់ចោលការចោទប្រកាន់ទាំងស្រុងលើលោក សួង នាគព័ន្ធ និងលោក គង់ រ៉ៃយ៉ា៖ «លោក សួង នាគព័ន្ធ អាច​មាន​សេរីភាព​ឡើង​វិញ តែ​សេរីភាព​មិន​ពេញលេញ​ទេ។ អ្វី​ដែល​សំខាន់​ករណី​លោក សួង នាគព័ន្ធក្តី និង​លោក គង់ រ៉ៃយ៉ា ក្តី ដែល​យើង​ចាត់​ទុក​ថា ជា​រឿង​មួយ​អយុត្តិធម៌​សម្រាប់​គាត់ ហើយ​រឿង​ចាប់​ខ្លួន​នេះ​ដោយសារ​គាត់​បញ្ចេញ​មតិ​ផ្ទាល់​ខ្លួន ហើយ​ករណី​ទាំង​ពីរ​ត្រូវ​បាន​ទទួល​ការ​រិះគន់​ផង​ដែរ​ពី​សហគមន៍​ជាតិ និង​អន្តរជាតិ។ ខ្ញុំ​គ្រាន់​តែ​សង្ឃឹម​ថា សាលា​ដំបូង​អាច​លើក​លែង​ការ​ចោទ​ប្រកាន់​លើ​អ្នក​ទាំង​ពីរ​ឲ្យ​មាន​សេរីភាព​ពេញលេញ»

កាលពី​ថ្ងៃទី២៧​ ខែតុលា​កន្លង​ទៅ អង្គការលើ​កលែងទោស​អន្តរជាតិ​ (Amnesty​ International​) បាន​ចេញ​សេចក្តី​ថ្លែងការណ៍​មួយ​ ដោយ​ចាត់ទុកថា​ សួង​ នាគព័ន្ធ​ និង​លោក​ គង់​ រ៉ៃ​យ៉ា​ ជា​អ្នកទោស​មនសិការ និង​អំពាវនាវ​ដល់​អាជ្ញាធរ​កម្ពុជា​ឲ្យ​ដោះលែង​ និង​ទម្លាក់​ការចោទប្រកាន់​ លើ​អ្នក​ទាំងពីរ​នាក់​ជា​បន្ទាន់​ និង​ដោយ​ឥត​លក្ខខណ្ឌ​។ អង្គការ​អន្តរជាតិ​មួយ​នេះ​ ពិនិត្យ​ឃើញថា​ ការ​ចាប់​ ឃុំខ្លួន​ យុវជន​ គង់​ រ៉ៃ​យ៉ា​ និង​ សួង​ នាគព័ន្ធ​ នេះ​ ដោយសារ​តែ​ពួកគេ​អនុវត្ត​សិទ្ធិ​បញ្ចេញ​មតិ​ និង​សិទ្ធិ​ជួបជុំ​ដោយ​សន្តិ​វី​ធី​ស្របតាម​ច្បាប់​រដ្ឋធម្មនុញ្ញ ​និង​ច្បាប់អន្តរជាតិ​ស្តី​ពី​សិទ្ធិមនុស្ស​ជាដើម​។

អង្គការលើ​កលែងទោស​អន្តរជាតិ​ រក​ឃើញថា​ ការ​ឃុំខ្លួន​យុវជន​ទាំងពីរ​នាក់​ក្នុង​ពន្ធនាគារ​ព្រៃស​ ជាង ៣ខែ​មក​នេះ​ គឺ​ធ្វើ​ឡើង​ក្នុង​លក្ខខណ្ឌ​រំលោភសិទ្ធិ​របស់​ពួក​គេ​ ដោយសារ​អ្នក​ទាំង​ពីរ​ ត្រូវ​បាន​ ដាក់​ឃុំឃាំង​ក្នុង​បន្ទប់​ទំហំ ៤គុណ ៥ម៉ែត្រ​ ដែល​ផ្ទុក​អ្នក​ទោស​ចាប់​ពី ២៥ ទៅ ២៧នាក់។ ដូច្នេះ​មាន​ ន័យ​ថា​ ពួក​គេ​ត្រូវ​ចែក​កន្លែង​គ្នា​រស់នៅ​ក្នុង​ម្នាក់​តិច​ជាង ០,៧៥ម៉ែត្រការ៉េ​។ អង្គការលើ​កលែងទោស​អន្តរជាតិ​បញ្ជាក់​ថា​ ករណីនេះ​ ធ្វើឲ្យ​ប៉ះពាល់​ធ្ងន់ធ្ងរ​ដល់​ផ្លូវចិត្ត​និង​សុខភាព​របស់​ពួកគេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល