សាច់ញាតិបុរសដែលស្លាប់ពេលប៉ូលិសឃុំខ្លួនសួរចម្លើយនៅអធិការដ្ឋាននគរបាលស្រុកសង្កែ ខេត្តបាត់ដំបង អះអាងថា គណៈកម្មាធិការជាតិប្រឆាំងទារុណកម្ម និងក្រសួងមហាផ្ទៃយឺតយ៉ាវចេញលទ្ធផលស៊ើបអង្កេត និងចេញសេចក្តីសន្និដ្ឋានចុងក្រោយ ដើម្បីផ្តល់យុត្តិធម៌ដល់ជនរងគ្រោះដែលស្លាប់ដោយសារអំពើទារុណកម្មក្នុងដៃសមត្ថកិច្ច។ មន្ត្រីសង្គមស៊ីវិលយល់ថា សមត្ថកិច្ចជំនាញគួរតែពន្លឿនចេញលទ្ធផលឱ្យបានឆាប់ ដើម្បីផ្តល់យុត្តិធម៌ជូនពួកគាត់ និងផ្តល់ទំនុកចិត្តលើស្ថាប័នអនុវត្តច្បាប់។
សាច់ញាតិបុរសដែលស្លាប់ពេលប៉ូលិសឃុំខ្លួនសួរចម្លើយនៅនគរបាលស្រុកសង្កែ ខេត្តបាត់ដំបងលើកឡើងថា ប្រសិនសិនបើអាជ្ញាធរមានសមត្ថកិច្ចពាក់ព័ន្ធមានឆន្ទៈស្វែងរកយុត្តិធម៌ដល់ពួកគាត់ គឺមិនពិបាករកភស្តុតាង និងអូសបន្លាយពេលក្នុងការចេញរបាយការណ៍ស៊ើបអង្កេត និងសេចក្តីសន្និដ្ឋានសម្រេចចុងក្រោយនោះទេ ព្រោះករណីទារុណកម្មនេះទាក់ទងមន្ត្រីនគរបាលស្រុកសង្កែ។ សាច់ញាតិជនរងគ្រោះចោទជាសំណួរថា តើស្ថាប័នទាំងនោះត្រូវចំណាយពេលប៉ុន្មានទៀត ទើបអាចចាប់ជនប្រព្រឹត្តយកមកផ្ដន្ទាទោសតាមច្បាប់។
បងស្រីបង្កើតរបស់ជនរងគ្រោះគឺលោកស្រី ពេជ្រ លីណា ប្រាប់អាស៊ីសេរីថា ប្អូនប្រុសលោកស្រី បានស្លាប់ទាំងអយុត្តិធម៌ ក្រោមអំពើទារុណកម្មយ៉ាងឃោរឃៅនៅអធិការដ្ឋាននគរបាលស្រុកសង្កែ ខេត្តបាត់ដំបង ហើយរហូតមកដល់ពេលនេះសមត្ថកិច្ចមិនទាន់បង្ហាញការស៊ើបអង្កេតចុងក្រោយ ដើម្បីផ្តល់យុត្តិធម៌ដល់ពួកគាត់នៅឡើយទេ។ ស្ត្រីវ័យជាង ៣០ឆ្នាំរូបនេះឱ្យដឹងថា កន្លងទៅលោកស្រី និងសាច់ញាតិបានធ្វើដំណើរជាច្រើនលើកទៅភ្នំពេញក្នុងគោលបំណងទៅបំភ្លឺផង និងចង់ដឹងពីលទ្ធផលស៊ើបអង្កេតរបស់មន្ត្រីក្រសួងមហាផ្ទៃផង តែសមត្ថកិច្ចទាំងនោះតែងតែរុញដាក់គ្នាដោយឱ្យពួកលោកស្រីទៅសាកសួរពីកន្លែងមួយទៅកន្លែងមួយ។ ចំណែកថ្មីៗ នេះ ប្រធានផ្នែកនីតិកម្ម និងជំនួយផ្នែកច្បាប់នៃគណៈកម្មាធិការជាតិប្រឆាំងទារុណកម្ម លោក តុប សំភី បានសន្យានឹងលោកស្រីឱ្យរង់ចាំទទួលលទ្ធផលរយៈពេល ១៥ថ្ងៃចំនួន ២ដងមកហើយ ក៏ប៉ុន្តែរហូតមកដល់ពេលនេះ គណៈកម្មការជំនាញមួយនេះ មិនគោរពតាមការសន្យាដោយមិនទាន់ជូនដំណឹងមកសាច់ញាតិជនរងគ្រោះដែលកំពុងទន្ទឹងរង់ចាំយុត្តិធម៌នោះទេ៖ «ស្នើសុំទៅអគ្គស្នងការដែលស៊ើបអង្កេតចុងក្រោយករណីប្អូនខ្ញុំ សូមឱ្យលោកអាណិតជួយពន្លឿនបង្ហាញលទ្ធផលចុងក្រោយមក ដើម្បីផ្តល់យុត្តិធម៌ដល់ប្អូនខ្ញុំដែលគាត់ស្លាប់ទាំងអយុត្តិធម៌ ព្រោះគ្រួសារខ្ញុំរង់ចាំយូរណាស់ហើយ ហើយកុំឱ្យពួកខ្ញុំរង់ចាំយូរពេកព្រោះករណីប្អូនរបស់ខ្ញុំ គឺជាករណីប៉ូលិសយកប្អូនខ្ញុំទៅសួរចម្លើយជាជនសង្ស័យតែស្លាប់ក្នុងដៃសមត្ថកិច្ច អត់មានទាក់ទងនឹងប្រវត្តិគាត់ដោយពិបាកស៊ើបនោះទេ»។
មកទល់ពេលនេះ សំណុំរឿងនៃការស្លាប់របស់បុរសឈ្មោះ ពេជ្រ ធារ៉េត ដែលសង្ស័យថា ប៉ូលិសស្រុកសង្កែជាអ្នកធ្វើទារុណកម្មនោះ បានអូសបន្លាយពេលជាង ១ឆ្នាំមកហើយ ប៉ុន្តែមិនទាន់មានយុត្តិធម៌សម្រាប់គ្រួសារជនរងគ្រោះនោះទេ បើទោះបីជាគណៈកម្មាធិការជាតិប្រឆាំងទារុណកម្ម បានរកឃើញជាជំហានដំបូងថា ប៉ូលិសស្រុកសង្កែ ពិតជាពាក់ព័ន្ធនឹងការធ្វើទារុណកម្មពិតមែនក្តី។
វិទ្យុអាស៊ីសេរី មិនអាចទាក់ទងប្រធានគណៈកម្មាធិការជាតិប្រឆាំងទារុណកម្មលោក នុត សាអាន និងប្រធានការិយាល័យព្រហ្មទណ្ឌកម្រិតធ្ងន់នៃក្រសួងមហាផ្ទៃ លោក ហែម ប៊ុនណា ដើម្បីបញ្ជាក់ជុំវិញរឿងនេះបានទេ នៅថ្ងៃទី១៦ ខែកក្កដា។
កាលពីថ្ងៃទី១៦ ខែមិថុនា ឆ្នាំ២០២១ កន្លងទៅគណៈកម្មាធិការជាតិប្រឆាំងទារុណកម្ម ចេញរបាយការណ៍ស្រាវជ្រាវរបស់ខ្លួន ដោយសន្និដ្ឋានថា ជនរងគ្រោះឈ្មោះ ពេជ្រ ធារ៉េត អាចស្លាប់បណ្ដាលមកពីការវាយធ្វើទារុណកម្មស្រាលឬធ្ងន់ ក្នុងពេលប៉ូលិសឃុំខ្លួននៅអធិការនគរបាលស្រុកសង្កែ ប៉ុន្តែសមត្ថកិច្ច មិនបានចាប់ជនល្មើសផ្ដន្ទាទោសតាមច្បាប់ឡើយ។ គណៈកម្មាធិការជាតិប្រឆាំងទារុណកម្ម បានរុញសំណុំរឿងនេះទៅអគ្គស្នងការនគរបាលជាតិ ដើម្បីស៊ើបអង្កេតបន្ថែមទៀត ក្រោមហេតុផលថា មន្ត្រីប៉ូលិសពាក់ព័ន្ធនៅក្នុងខេត្តបាត់ដំបងផ្តល់ចម្លើយផ្សេងៗគ្នា។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តបាត់ដំបង លោក យិន ម៉េងលី មានប្រសាសន៍ថា ករណីនេះបើស្ថាប័នមានសមត្ថកិច្ចមានឆន្ទៈពិតប្រាកដមិនស្មុគ្រស្មាញក្នុងការស៊ើបអង្កេតនោះទេ។ លោកយល់ថា សមត្ថកិច្ចគួរបង្ហាញលទ្ធផលឱ្យបានឆាប់ ទោះបីលទ្ធផលរកឃើញយ៉ាងណាក៏ដោយ ដើម្បីឱ្យគ្រួសារជនរងគ្រោះអស់ចិត្ត ឬបន្តនីតិវិធីតាមប្រព័ន្ធតុលាការតទៅទៀត។ លោក យិន ម៉េងលីថា ភាពយឺតយ៉ាវនេះនឹងធ្វើឱ្យពលរដ្ឋអស់ជំនឿលើស្ថាប័នអនុវត្តច្បាប់៖ «នៅក្នុងសំណុំរឿងហ្នឹង តើវាមានអ្វីដែលជាអាថ៌កំបាំង ឬមានអ្នកណានៅកាងពីក្រោយបានគណៈកម្មាធិការជាតិប្រឆាំងទារុណកម្មចេញរបាយការណ៍មករុញដាក់អគ្គស្នងការដោយសន្យាពីមួយទៅមួយដែលធ្វើឱ្យគាត់ខាតបង់ពេលវេលា ថវិកាចុះឡើងតាមដានរឿងហ្នឹង ហើយយុត្តិធម៌ពិបាករកម្ល៉េះ»។
កាលពីថ្ងៃទី៣ ខែមេសា ឆ្នាំ២០២១ បុរសម្នាក់ឈ្មោះ ពេជ្រ ធារ៉េត អាយុ ៣១ឆ្នាំ មានមុខរបរជាជាងផ្សារដែក រស់នៅក្នុងភូមិបោះពោធិ៍ ឃុំអូរដំបង១ ស្រុកសង្កែ បានស្លាប់បាត់បង់ជីវិត ក្នុងពេលប៉ូលិសចាប់ឃុំខ្លួនសួរចម្លើយនៅក្នុងអធិការដ្ឋាននគរបាលស្រុកសង្កែ អស់រយៈពេលជាង ៣ម៉ោង ពាក់ព័ន្ធនឹងការសង្ស័យថា គាត់រាយខ្សែភ្លើងអគ្គិសនី ដើម្បីឆក់សម្លាប់ប្រពន្ធនៅក្នុងផ្ទះដោយសារភ្លើងប្រច័ណ្ឌ។ ប៉ុន្តែសាក្សីអះអាងថា ក្នុងពេលកើតហេតុ គឺបុរសជាប្តីរូបនេះ មិនបាននៅផ្ទះឡើយ។ ប៉ូលិសខេត្តបាត់ដំបងបកស្រាយថា លោក ពេជ្រ ធារ៉េត ស្លាប់ដោយសារគាំងបេះដូង ព្រោះប្រើថ្នាំញៀនហួសកម្រិត។ ប៉ុន្តែនៅពេលសាច់ញាតិពិនិត្យសាកសពឃើញមានស្នាមរបួស និងជាំពេញខ្លួនចាប់តាំងពីជើងរហូតដល់ក្បាល និងមានហូរឈាមតាមច្រមុះ និងត្រចៀក ព្រមទាំងស្នាមខូងនៅកន្លែងដាក់ខ្នោះ និងស្នាមជាំខ្លាំងនៅកជើងទាំងពីរ។ លើសពីនេះ សម្លៀកបំពាក់របស់ជនរងគ្រោះ ត្រូវបានផ្លាស់ប្ដូរ ហើយសាច់ញាតិអះអាងថា សមត្ថកិច្ចបានព្យាយាមរារាំងមិនឲ្យសាច់ញាតិ និងអ្នកកាសែត ពិនិត្យសាកសពទៀតផង។ អ្នកជំនាញ និងគ្រួសារជនរងគ្រោះសន្និដ្ឋានថា ស្នាមជាំ និងរបួសនៅលើដងខ្លួនសាកសពលោក ពេជ្រ ធារ៉េត ជាស្នាមរងទារុណកម្មដោយការវាយដំ និងឆក់ខ្សែភ្លើង ។ ខាងគណៈកម្មាធិការជាតិប្រឆាំងទារុណកម្ម ក៏បានចុះស៊ើបអង្កេតរកឃើញថា ការស្លាប់របស់ជនរងគ្រោះ ជាប់ពាក់ព័ន្ធនឹងការធ្វើទារុណកម្មរបស់នគរបាលស្រុកសង្កែដែរ ។ ទោះជាយ៉ាងណាក្ដី មកទល់ពេលនេះ ក្រុមនគរបាលស្រុកសង្កែ ដែលជាប់សង្ស័យក្នុងករណីនេះ នៅតែមានសេរីភាពដដែល។
បងស្រីរបស់ជនគ្រោះ ដែលសកម្មក្នុងការស្វែងរកយុត្តិធម៌ជូនប្អូនប្រុសនេះ បន្តអះអាងថា លោកស្រីនឹងនៅតែតស៊ូដល់ទីបញ្ចប់ដោយមិនរាថយទេ រហូតទាល់តែប្អូនប្រុសរបស់លោកស្រី និងក្រុមគ្រួសារទទួលបានយុត្តិធម៌ពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។